1, 2. (a) Ke ka baka la’ng go le bohlokwa gore re “phakgame ge e le mabapi le dithapelo”? (b) Ke dipotšišo dife tša go itlhahloba tšeo re swanetšego go ipotšiša tšona mabapi le thapelo?

MONNA yo mongwe yo a bego a šoma bošego o itše: “Nako e thata kudu ya gore motho a dule a phafogile bošego ke diirinyana tša matlagosa.” Ga go pelaelo gore ba bangwe bao ba swanetšego go dula ba phafogile bošego ka moka ba tla dumelelana le seo. Bakriste ba mehleng yeno ba lebane le tlhohlo e swanago ka gobane bošego ke bja matlagosa, ka ge tshepedišo e kgopo ya Sathane e le kgauswi le go fela. (Baroma 13:12) Ruri go tla ba kotsi gore re robale ka iri ye ya mafelelo! Go bohlokwa kudu gore re ‘hlaphogelwe monaganong’ gomme re kwe keletšo ya Mangwalo ya gore re “phakgame ge e le mabapi le dithapelo.”—1 Pet. 4:7.

² Ka baka la mehla yeo re phelago go yona, ke gabohlale go ipotšiša gore: ‘Ke phakgame gakaaka’ng tabeng ya thapelo? Na ke diriša mohuta o mongwe le o mongwe wa thapelo, le gona na ke rapela ka mehla? Na ke tlwaetše go rapelela ba bangwe, goba na ke dula ke rapela feela ka dilo tšeo ke di hlokago le tšeo ke di nyakago? Le gona thapelo e bohlokwa gakaaka’ng gore ke phologe?’

3. Ke dilo dife tše dingwe tšeo re ka di rapelelago?

³ Lengwalong leo moapostola Paulo a le ngwaletšego Baefeso o boletše ka “mohuta o mongwe le o mongwe wa thapelo.” (Baef. 6:18) Gantši dithapelong tša rena re ka kgopela Jehofa gore a re thuše gore re hwetše dinyakwa tša rena le go fenya mapheko. “Mokwi wa thapelo” o re theetša ka lerato ge re mo lopa gore a re thuše. (Ps. 65:2) Lega go le bjalo, re swanetše go katanela go rapelela le dilo tše dingwe. Tšona di akaretša go tumiša Jehofa, go mo leboga le go mo lopa.

4. Ke ka baka la’ng re swanetše go tumiša Jehofa gantši dithapelong tša rena?

⁴ Go na le mabaka a mantši a gore ge re rapela  Jehofa re mo tumiše. Ka mohlala, re tutueletšega go mo tumiša ge re nagana ka “mediro ya gagwe e matla” le “boati bja bogolo bja gagwe.” (Bala Psalme 150:1-6.) Ditemana tše tshelelago tša Psalme 150 di re kgothaletša ka makga a 13 gore re tumiše Jehofa! Mohlami wa psalme e nngwe yoo a boifago Modimo kudu o opetše ka gore: “Ke go tumišitše gašupa ka letšatši ka baka la dikahlolo tša gago tša go loka.” (Ps. 119:164) Ruri Jehofa o swanelwa ke go tumišwa. Ka baka leo, na ga se ra swanela go mo tumiša dithapelong tša rena “gašupa ka letšatši,” ke gore, kgafetšakgafetša?

5. Moya wa go leboga ge re rapela o re šireletša bjang?

⁵ Go leboga ke mohuta o mongwe wa bohlokwa wa thapelo. Paulo o kgothaleditše Bakriste ba motseng wa Filipi gore: “Le se ke la belaela ka selo, eupša dilong tšohle tsebišang Modimo dikgopelo tša lena ka thapelo le ka topo gotee le ka go leboga.” (Bafil. 4:6) Go leboga Jehofa ka go tšwa pelong dithapelong tša rena go a re šireletša. Se se bohlokwa kudu ka ge re phela mehleng ya bofelo ya batho ba “go se leboge.” (2 Tim. 3:1, 2) Lefase le le tletše moya wa go se leboge. Ge e ba re se šedi, moya woo o ka re fetela gabonolo. Go leboga Modimo dithapelong tša rena go re thuša gore re kgotsofale le go phema go ba ‘bangongoregi le babelaedi ba ba belaelago ka kabelo ya bona bophelong.’ (Juda 16) Go feta moo, ge dihlogo tša malapa di akaretša mantšu a tebogo ge di rapela le malapa a tšona, di kgothaletša basadi ba tšona le bana gore ba be le moya wa go leboga.

6, 7. Go lopa ke eng, gona re ka lopa Jehofa mabapi le eng?

⁶ Go lopa ke thapelo e tseneletšego e tšwago pelong. Ke ditaba dife tšeo re ka lopago Jehofa ka tšona? Re ka mo lopa ge re tlaišwa goba ge re swerwe ke bolwetši bjo bošoro. Dinakong tše bjalo, dithapelo tša rena go Modimo di fetoga ditopo. Eupša na ke ka dinako tšeo feela moo re ka lopago Jehofa?

⁷ Nagana ka thapelo ya Jesu ya mohlala gomme o ele hloko seo a se boletšego mabapi le leina la Modimo, Mmušo wa Gagwe le thato ya Gagwe. (Bala Mateo 6:9, 10.) Lefase le le tletše bokgopo, le gona mebušo ya batho e palelwa ke go nea batho gaešita le dinyakwa tša bona tša motheo. Ka gona, re swanetše go rapelela gore leina la Tatago rena wa magodimong le kgethagatšwe le gore Mmušo wa gagwe o fediše pušo ya Sathane lefaseng. Le gona ye ke nako ya go lopa Jehofa gore thato ya gagwe e direge mo lefaseng bjalo ka ge e direga legodimong. Ka gona a re duleng re phakgame, re rapela mehuta ka moka ya dithapelo.

8, 9. Ke ka baka la’ng re swanetše go ba šedi tabeng ya go ahlola Petro le baapostola ba bangwe ka ge ba ile ba robala kua serapeng sa Getsemane?

⁸ Gaešita le ge moapostola Petro a ile a kgothaletša Bakriste gore ba “phakgame ge e le mabapi le dithapelo,” ka nako e nngwe o kile a palelwa ke go dula a phakgame. E be e le yo mongwe wa barutiwa bao ba ilego ba robala ge Jesu a be a rapela serapeng sa Getsemane. Gaešita le ka morago ga gore Jesu a ba botše gore ba ‘phakgame gomme ba rapele ba sa kgaotše,’ ga se ba ka ba dira bjalo.—Bala Mateo 26:40-45.

⁹ Go e na le gore re ahlole Petro le baapostola ba bangwe ka bogale ka ge ba paletšwe ke go dula ba phakgame, e tla ba mo gobotse ge re ka gopola gore ditiragalo tša letšatšing leo di be di ba lapišitše kudu. Ba be ba lokišeleditše Paseka le go e bina bjona bošegong bjoo. Le gona Jesu o ile a thoma Selalelo sa Morena, a bea mohlala wa tsela yeo Segopotšo sa lehu la gagwe se swanetšego go swarwa ka yona nakong e tlago. (1 Bakor.  11:23-25) “Ka morago ga go opela ditumišo, ba [ile ba] tšwa ba ya Thabeng ya Mehlware,” ba sepela monabo o moteletšana diterateng tše disesane tša Jerusalema. (Mat. 26:30, 36) Mohlomongwe ka nako yeo e be e šetše e le ka morago ga bošegogare. Ge nkabe re be re le serapeng sa Getsemane bošegong bjoo, le rena re ka ba re ile ra robala. Go e na le gore Jesu a sole baapostola bao ba lapilego, ka lerato o ile a dumela gore “moya o mafolofolo eupša nama e a fokola.”

10, 11. (a) Petro o ithutile thuto efe phihlelong ya gagwe ya kua serapeng sa Getsemane? (b) Phihlelo ya Petro e go kgoma bjang?

¹⁰ Petro ga se a ka a lebala seo se mo diragaletšego serapeng sa Getsemane. O ile a ithuta thuto e bohloko ka baka la go se dule a phakgame. Pejana ga moo, Jesu o be a itše: “Ka moka ga lena le tla kgopša mabapi le nna bošegong bjo.” Ge a re’alo, Petro o ile a araba ka gore: “Gaešita le ge ba bangwe ka moka ba ka kgopša ka nakwana, nna nka se kgopše le ka mohla!” Jesu o ile a re Petro o be a tla mo latola gararo. A kgodišegile, Petro o ile a re: “Gaešita le ge e ba nka swanelwa ke go hwa le wena, le gatee nka se go latole.” (Mat. 26:31-35) Lega go le bjalo, go etša ge Jesu a be a boletše, Petro o ile a kgopša. A tshwenyegile ka baka la ge a latotše Jesu, Petro o ile “a lla gabohloko.”—Luka 22:60-62.

¹¹ Ga go pelaelo gore Petro o ile a ithuta thuto e itšego phihlelong ye gomme a fenya tshekamelo ya gagwe ya go ipota. Go molaleng gore thapelo e thušitše Petro tabeng ye. Ge e le gabotse, ke mo go kgahlišago gore keletšo ya gore re “phakgame ge e le mabapi le dithapelo” e tšwa go Petro. Na re ela hloko keletšo yeo e buduletšwego? Go oketša moo, na re ‘rapela re sa kgaotše’ ka go re’alo ra bontšha gore re ithekgile ka Jehofa? (Ps. 85:8) Le gona a re duleng re gopola keletšo ya moapostola Paulo yeo e rego: “Anke yo a naganago gore o eme a hlokomele gore a se we.”—1 Bakor. 10:12.

12. Ke ka baka la’ng Nehemia e le mohlala o mobotse go rena?

¹² Nagana ka Nehemia, yoo e bego e le motšheladino wa Kgoši Arithasasitha wa Moperesia lekgolong la bohlano la nywaga B.C.E. Nehemia ke mohlala o mobotse kudu wa motho yo a ilego a rapela ka go tšwa pelong. O feditše matšatši a mantši a “ikona dijo le go rapela Modimo” ka baka la masetlapelo ao a bego a wetše Bajuda kua Jerusalema. (Neh. 1:4) Ge Arithasasitha a be a mmotšiša gore o reng a nyamile, “gateetee [Nehemia a] rapela Modimo wa magodimong.” (Neh. 2:2-4) Mafelelo e bile afe? Jehofa o ile a araba dithapelo tša  gagwe gomme a rarolla ditaba ka tsela yeo e ilego ya hola batho ba Gagwe. (Neh. 2:5, 6) Ruri se se swanetše go ba se ile sa matlafatša tumelo ya Nehemia!

13, 14. Re swanetše go dira’ng gore tumelo ya rena e dule e le matla gomme re lwantšhe maiteko a Sathane a go re nola moko?

¹³ Go rapela ka mehla go etša Nehemia go re thuša go dula re na le tumelo e tiilego. Sathane ga a na lešoko gomme gantši o re hlasela ge re fokola. Ka mohlala, ge re babja goba re gateletšegile, re ka thoma go nagana gore Modimo ga a iše felo ka nako yeo re e fetšago re le bodireding kgwedi le kgwedi. Ba bangwe ba rena re ka ba le dikgopolo tšeo di gateletšago, mohlomongwe e le ka baka la diphihlelo tšeo re bilego le tšona nakong e fetilego. Sathane o nyaka gore re dumele gore ga re na mohola. Gantši mekgwa yeo a e dirišago go re hlasela ke ya go bapala ka maikwelo a rena e le gore a fokodiše tumelo ya rena. Lega go le bjalo, ka go dula re “phakgame ge e le mabapi le dithapelo,” re ka dula re tiile tumelong. Ke therešo gore ‘kotse e kgolo ya tumelo e tla dira gore re kgone go tima mesebe ka moka e tukago ya yo kgopo.’—Baef. 6:16.

¹⁴ Ge e ba re “phakgame ge e le mabapi le dithapelo,” diteko tša tumelo di ka se re hwetše re sa itebetše gomme tša dira gore re se sa botegela Jehofa. Ge re lebane le diteko, anke re gopoleng mohlala wa Nehemia gomme gateetee re rapele Modimo. Re ka atlega go ganetšeng meleko le go kgotlelela diteko tša tumelo ge feela re thušwa ke Jehofa.

15. Ke dipotšišo dife tšeo re swanetšego go ipotšiša tšona mabapi le go rapelela ba bangwe?

¹⁵ Jesu o ile a lopela Petro e le gore tumelo ya moapostola yo e se ke ya fela. (Luka 22:32) Mokriste yo a botegago wa  lekgolong la pele la nywaga e lego Epafora o ile a ekiša Jesu tabeng ye gomme a rapelela bana babo ba kua Kolose ka go tšwa pelong. Paulo o ba ngwaletše gore: “Ka mehla o le rapelela ka thata gore le dule le tiile, le dule le na le kgodišego gomme le ineetše ka mo go feletšego go direng thato ya Modimo.” (Bakol. 4:12, The New English Bible) Re swanetše go ipotšiša gore: ‘Na ke rapela ka thata ge ke rapelela bana bešo lefaseng ka bophara? Ke ga kae moo dithapelo tša ka di akaretšago badumedigotee le nna bao ba lego mathateng ka baka la dikotsi tša tlhago? Ke neng la mafelelo moo ke ilego ka tloga ke rapelela bao ba rwelego boikarabelo bjo boima ka mokgatlong wa Jehofa? Na ke sa tšwa go rapelela bao ba lebeletšanego le mathata ka phuthegong?’

16. Na ruri go bohlokwa go rapelela bana babo rena? Hlalosa.

¹⁶ Go rapelela ba bangwe go Jehofa Modimo go ka ba hola kudu. (Bala 2 Bakorinthe 1:11.) Gaešita le ge Jehofa a sa gapeletšege go gata mogato ka baka la ge barapedi ba gagwe ba bantši ba mo rapetše leboelela ka selo se itšego, o lemoga selo seo ba tshwenyegilego ka sona e bile o tšeela godimo taba yeo ge a araba dithapelo tša bona. Ka gona re swanetše go tšeela godimo tokelo yeo re nago le yona le boikarabelo bja go rapelela ba bangwe. Ka go swana le Epafora, re swanetše go bontšha gore re rata bana babo rena le dikgaetšedi ba Bakriste go tšwa pelong ka go ba rapelela. Go dira bjalo go tla oketša lethabo la rena, ka gobane “go na le lethabo le legolo go neeng go feta go amogeleng.”—Dit. 20:35.

17, 18. Go dula re “phakgame ge e le mabapi le dithapelo” go tla re thuša bjang?

¹⁷ Pele ga ge Paulo a ka bolela gore “bošego ke bja matlagosa; letšatši le batametše,” o ngwadile gore: “Le tseba gore nako ye e šetše e le iri ya gore le phafoge borokong, gobane bjale phološo ya rena e batametše go feta nakong ya ge re be re eba badumedi.” (Baroma 13:11, 12) Lefase le lefsa la Modimo leo a le holofeditšego le kgauswi, gomme phološo ya rena e batametše go feta ka tsela yeo re ka naganago ka yona. Ga se ra swanela go robala moyeng, le gona ga se ra swanela go dumelela ditšhitišo tša lefase le di re jela nako ya go boledišana le Jehofa ka thapelo. Go e na le moo, anke re “[phakgameng] ge e le mabapi le dithapelo.” Go dira bjalo go tla re thuša go tšea karolo “ditirong tše kgethwa tša boitshwaro le medirong ya boineelo go Modimo” ge re dutše re letetše letšatši la Jehofa. (2 Pet. 3:11, 12) Ka go re’alo tsela ya rena ya bophelo e tla bontšha gore re dula re phakgame moyeng le gore re tloga re dumela gore bofelo bja tshepedišo ye e kgopo ya dilo bo kgauswiuswi. Ka gona anke re “rapeleng ka mehla.” (1 Bathes. 5:17) Le gona anke re ekišeng Jesu ka go nyaka lefelo leo re ka bago noši gore re rapele. Ge e ba re ipha nako e telele ya go rapela Jehofa, re tla mmatamela. (Jak. 4:7, 8) Ruri yeo e tla ba tšhegofatšo e kgolo!

¹⁸ Mangwalo a re: “Mehleng ya ge Kriste a be a phela lefaseng o ile a lopa le go kgopela Yo a ilego a kgona go mo phološa lehung, ka megoo e matla le megokgo gomme kgopelo ya gagwe ya kwewa ka baka la ge a be a boifa Modimo.” (Baheb. 5:7) Jesu o ile a lopa le go kgopela Jehofa gomme a dula a botegela Modimo go fihlela mafelelong a bophelo bja gagwe mo lefaseng. Ka baka leo, Jehofa o ile a phološa Morwa wa gagwe yo a rategago lehung gomme a mo putsa ka bophelo bja go se hwe legodimong. Le rena re ka botegela Tatago rena wa legodimong go sa šetšwe meleko le diteko tšeo di ka re welago nakong e tlago. Ee, re ka hwetša moputso wa bophelo bjo bo sa felego ge e ba re dula re “phakgame ge e le mabapi le dithapelo.”