“Phakgamelang Komelo ya Bafarisei”

Jesu o ile a lemoša barutiwa ba gagwe gore: “Phakgamelang komelo ya Bafarisei, e lego boikaketši.” (Luka 12:1) Pego e nngwe e swanago le ye e bontšha gabotse gore Jesu o be a ganetša “thuto” ya Bafarisei.—Mat. 16:12.

Beibele ka dinako tše dingwe e šomiša lentšu “komelo,” e le seka sa tshenyego. Ga go pelaelo gore dithuto le mekgwa ya Bafarisei di be di senya mekgwa e mebotse ya bao ba bego ba ba theetša. Ke ka baka la’ng thuto ya Bafarisei e be e le kotsi?

1 Bafarisei ba be ba ikgogomoša ka go itira baloki, gomme ba be ba nyatša batho ba tlwaelegilego.

Go itira ga bona baloki go tšweletšwa go e nngwe ya dipapišo tša Jesu. O itše: “Mofarisei [yo mongwe o ile] a ema a rapela ka dilo tše mo pelong a re: ‘Modimo, ke a go leboga gobane ga ke bjalo ka batho ba bangwe, bao e lego bahlakodi, ba sa lokago, dihlotlolo goba gaešita le bjalo ka molekgetho yo. Ke ikona dijo gabedi ka beke; ke ntšha sa lesome sa dilo ka moka tšeo ke di hwetšago.’ Eupša molekgetho a eme kgole, a sa rate gaešita le go emišetša mahlo a gagwe legodimong, eupša a duletše go itshetla sehuba a re: ‘Modimo, ntšhokele, nna modiradibe.’”—Luka 18:11-13.

Jesu o ile a reta boikokobetšo bja molekgetho ka gore: “Ruri ke a le botša: Monna yo o ile a theogela ntlong ya gagwe a hlatsetšwe e le yo a lokilego kudu go feta [Mofarisei], gobane yo mongwe le yo mongwe yo a ikgodišago o tla kokobetšwa, eupša yo a ikokobetšago o tla godišwa.” (Luka 18:14) Le ge balekgetho ba be ba tumile ka go se botege, Jesu o be a nyaka go thuša ba ba bego ba mo theetša gare ga bona. Bonyenyane balekgetho ba babedi—Mateo le Sakeo—e ile ya ba balatedi ba gagwe.

Go thwe’ng ge e ba re ka thoma go nagana gore re ba kaone go ba bangwe ka baka la bokgoni bjoo re bo neilwego ke Modimo goba ditokelo goba ka baka la go palelwa ga bona le mafokodi a bona? Re swanetše go tloša ka pela dikgopolo tše bjalo menaganong ya rena, gobane Mangwalo a bolela gore: “Lerato ga le fele pelo e bile le botho. Lerato ga le hufege, ga le ikgantšhe, ga le ikgogomoše, ga le dire tša go leša dihlong, ga le nyake tša go ikhola, ga le rumolege. Ga le boloke pego ya bobe. Ga le thabele go se loke eupša le thaba le therešo.”—1 Bakor. 13:4-6.

Re swanetše go ikwa go swana le moapostola Paulo. Ka morago ga go bolela gore “Kriste Jesu o tlile lefaseng go tlo phološa badiradibe,” Paulo o ile a tlaleletša ka gore: “Ke nna yo mobe go bona ka moka.”—1 Tim. 1:15.

Dipotšišo tšeo re ka naganišišago ka tšona:

Na ke lemoga gore ke modiradibe gomme phološo ya ka e ithekgile ka botho bjo bogolo bja Jehofa? Goba na ke lebelela go botega ga ka tirelong ka ngwaga e mentši, ditokelo tšeo ke nago le tšona mokgatlong wa Modimo, goba bokgoni bja ka e le motheo wa gore ke ipone ke phagametše ba bangwe?

2 Bafarisei ba be ba nyaka go kgahliša ba bangwe ka go bontšha go loka ga bona phatlalatša. Ba be ba rata maemo le go tumišwa ka direto.

 Eupša Jesu o lemošitše ka gore: “Mediro ka moka ye ba e dirago ba e direla go bonwa ke batho, gobane ba oketša bophara bja mapokisana ao a nago le mangwalo ao ba a rwalago e le ditšhireletšo gomme ba lelefatša merumo ya diaparo tša bona. Ba rata dibaka tša ka pelepele menyanyeng le ditulo tša ka pele disinagogeng, le go dumedišwa ka tlhompho marekišetšong le go bitšwa Rabi ke batho.” (Mat. 23:5-7) Swantšha ditiro tša bona le tša Jesu. Le ge e be e le Morwa yo a phethagetšego wa Modimo, o be a ikokobeditše. Ge monna yo mongwe a be a mmitša “yo botse,” Jesu o ile a re: “Ke ka baka la’ng o mpitša yo botse? Ga go yo botse ge e se o tee, yena Modimo.” (Mar. 10:18) Ka nako e nngwe, Jesu o ile a hlapiša barutiwa ba gagwe maoto, e le ge a beela balatedi ba gagwe mohlala wa boikokobetšo.—Joh. 13:1-15.

Mokriste wa therešo o swanetše go hlankela badumedigotee le yena. (Bagal. 5:13) Se ke sa bohlokwa kudu go bao ba nyakago go swanelegela go ba balebeledi ka phuthegong. Ke mo go swanetšego ge motho “a katanela go fihlelela bolebeledi,” eupša pakane ye e swanetše go tšwa go kganyogo ya go nyaka go thuša ba bangwe. “Bolebeledi” ga se maemo a go hwetša botumo goba matla a taolo. Bao ba hlankelago e le balebeledi ba swanetše go ba le “pelo e ikokobeditšego,” go etša ge Jesu a be a le bjalo.—1 Tim. 3:1, 6; Mat. 11:29.

Dipotšišo tšeo re ka naganišišago ka tšona:

Na ke tlwaetše go godiša bao ba lego maemong a boikarabelo ka gare ga phuthego, mohlomongwe ke nagana gore ke tla tuma goba ka hwetša ditokelo tše oketšegilego? Na ke hlokomela kudu dikarolo tša tirelo ya Modimo tšeo go bonagalago di dira gore ke lemogwe goba ke tumišwe? Na ruri ke leka go ikgantšhetša ba bangwe?

  3 Melao le ditšo tša Bafarisei di be di dira gore Molao wa Moshe o thatafalele batho ba tlwaelegilego.

Molao wa Moše o be o nea ka kakaretšo thulaganyo ya borapedi bja Jehofa Isiraeleng. Lega go le bjalo, o be o sa bolele ditaba ka botlalo. Ka mohlala, Molao o be o ganetša go šoma ka Sabatha, eupša o be o sa bolele ka go lebanya gore ke mošomo ofe woo o sa swanelwago go dirwa le woo o ka dirwago. (Ek. 20:10) Ka gona Bafarisei ba ile ba šomiša sebaka se go tsenya melao ya bona, ditlhaloso le ditšo. Le ge Jesu a be a hlokomologa melao yeo Bafarisei ba bego ba itlhametše yona, o be a boloka Molao wa Moshe. (Mat. 5:17, 18; 23:23) O be a bona ka kua ga seo se bego se ngwadilwe Molaong woo. Jesu o be a tseba morero wa Molao woo gaešita le bohlokwa bja go bontšha kgaugelo le lešoko. E be e le yo a lekalekanego, le ge balatedi ba gagwe ba be ba dira diphošo leboelela. Ka mohlala, le ge a ile a kgothaletša baapostola ba gagwe gararo gore ba dule ba phafogile gomme ba phakgame bošegong bja go swarwa ga gagwe, ba ile ba robala kgafetšakgafetša. Lega go le bjalo, o ile a ba kwela bohloko ka go ba botša gore: “Go ba gona, moya o mafolofolo eupša nama e a fokola.”—Mar. 14:34-42.

Dipotšišo tšeo re ka naganišišago ka tšona:

Na ke itlhamela melao e thata goba ke gapeletša gore dipono tša ka e be molao o swanetšego go latelwa? Na ke yo a lekalekanego go seo ke se letetšego go ba bangwe?

Naganišiša ka phapano magareng ga dithuto tša Jesu le tša Bafarisei. Na o lemoga moo o swanetšego go kaonefatša gona? Ge e ba go le bjalo, ke ka baka la’ng o sa ikemišetše go dira bjalo?

[Seswantšho go letlakala 28]

Bafarisei ba be ba rwala mapokisana ao a nago le mangwalo.—Mat. 23:2, 5

[Diswantšho go letlakala 29]

Go fapana le Bafarisei ba baikgogomoši, bagolo ba ikokobeditšego ba Bakriste ba hlankela ba bangwe

[Seswantšho go letlakala 30]

Go swana le Jesu, na wena o yo a lekalekanego go seo o se letetšego go ba bangwe?