Go Latela Kriste Moetapele yo a Phethagetšego

GANTŠI bao ba latelago baetapele bao e lego batho ba feleletša ba nyamile. Lega go le bjalo, bao ba ikokobeletšago boetapele bja Kriste ba ba le mafelelo a fapanego. Jesu o itše: “Tlang go nna, lena bohle bao le lapišitšwego le go imelwa, ke tla le lapološa. Rwalang joko ya ka le ithute go nna, gobane ke wa moya o boleta e bile ke wa pelo e ikokobeditšego gomme le tla hweletša meoya ya lena tapologo.” (Mat. 11:28, 29) Boetapele bja Jesu bo a lapološa le go thabiša. O tloga a tshwenyega ka babotlana le bao ba gateletšwego, o ba laletša gore ba tle ka tlase ga joko ya gagwe e botho. Lega go le bjalo, go latela boetapele bja Jesu go akaretša’ng?

Moapostola Petro o ngwadile gore: “Kriste o ile a tlaišega bakeng sa lena, a le tlogelela mohlala gore le latele dikgato tša gagwe kgauswi.” (1 Pet. 2:21) Go bohlokwa gakaaka’ng gore re latele dikgato tša Jesu? Akanya o le gare ga sehlopha seo se swanetšego go phatša lefelong leo go epetšwego dithuthupi gomme e le motho o tee feela gare ga lena yoo a kgonago go phatša moo ka katlego. Na o be o ka se latele dikgato tša gagwe kgauswi, mohlomongwe e bile o gata mehlaleng ya gagwe? Ka mo go swanago, bokamoso bja rena bjo bo šireletšegilego bo ithekgile ka gore re latele mohlala wa Jesu. Go dira bjalo go akaretša go mo theetša le go dirišana le bao ba mo emelago.

Theetša Gomme o kwe

Ge a be a le kgauswi le go phetha Thuto ya gagwe ya Thabeng, Jesu o itše: “Yo mongwe le yo mongwe yo a kwago dipolelo tše tša ka gomme a di dira o tla swantšhwa le monna yo a nago le temogo, yo a agilego ntlo ya gagwe godimo ga leswika. Pula ya tšhologa le meetsefula a tla le diphefo tša tšutla tša wela ntlo yeo, eupša ya se buragane, gobane e be e theilwe godimo ga leswika.”—Mat. 7:24, 25.

Ka gona, Jesu o boletše ka monna yo a theetšago gomme a kwa mantšu a gagwe gore o na le “temogo.” Na re bontšha ka go kwa go tšwa pelong gore re hlompha mohlala wa Kriste le go o tšeela godimo, goba na gare ga ditaelo tša Jesu re sekametše go ikgethela go kwa feela tšeo di lego bonolo goba tšeo di swanelago maemo a rena? Jesu o itše: “Ka mehla ke dira dilo tše di kgahlago [Modimo].” (Joh. 8:29) Anke re kataneleng go ekiša mohlala woo.

Lekgolong la pele la nywaga, baapostola ba ile ba bea mohlala o mobotse wa go ikokobeletša boetapele bja Kriste. Lebakeng le lengwe, Petro o ile a botša Jesu gore: “Bona! Re tlogetše dilo ka moka gomme re go latetše.” (Mar. 10:28) Ka kgonthe, baapostola ba ile ba tšeela boetapele bja Jesu godimo kudu moo ka go rata ba ilego ba tlogela dilo tše dingwe e le gore ba mo latele.—Mat. 4:18-22.

Dirišana le Baemedi ba Kriste

Pejana ga lehu la gagwe, Jesu o boletše ka tsela e nngwe yeo ka yona re ka latelago boetapele bja gagwe. O itše: “Yo a amogelago motho yo ke mo romilego, o amogela le nna.” (Joh. 13:20) Ge e le gabotse, Jesu o boletše ka baemedi ba gagwe ba tloditšwego gore ke ‘bana babo.’ (Mat. 25:40) Ka morago ga ge Jesu a tsošeditšwe magodimong, ‘bana babo’ ba ile ba kgethelwa go hlankela legatong la gagwe e le batseta “bao ba emetšego Kriste,” ba kgothaletša ba bangwe go boelana le Jehofa Modimo. (2 Bakor. 5:18-20) Go hlompha boetapele bja Kriste go akaretša go ikokobeletša ‘bana babo.’

Re dira gabotse go hlahloba kamoo re arabelago  ka gona keletšong ya Mangwalo ye e lego nakong yeo e tšwelelago dikgatišong tša rena tše di theilwego Beibeleng. Ka go ithuta Mangwalo le go ba gona dibokeng tša phuthego, re gopotšwa ka mantšu a Kriste. (2 Pet. 3:1, 2) Re bontšha tebogo ya rena e tšwago pelong bakeng sa dijo tše tša moya ka go dula re iphepa ka tšona. Lega go le bjalo, re swanetše go arabela bjang ge e ba keletšo e itšego e boeletšwa ka dinako tše dingwe? Ka mohlala, Lentšu la Modimo le eletša Bakriste go nyala goba go nyalwa “feela Moreneng.” (1 Bakor. 7:39) Taba ye e be e dutše e ahlaahlwa ka go Morokami ka lebaka la ka godimo ga ngwagakgolo. Ka kgonthe bana babo Kriste ba bontšha go tshwenyega ga bona ka lerato mabapi le boemo bja rena bja moya ka go gatiša dihlogo tšeo di bolelago ka taba ye le ka keletšo e nngwe e buduletšwego. Go kwa dikgopotšo tše ke e nngwe ya ditsela tša go bontšha gore re latela Moetapele wa rena yo a phethagetšego, Jesu Kriste.

Diema 4:18 e re: “Tsela ya baloki e bjalo ka seetša se se phadimago ganyenyane-ganyenyane go fihlela e eba mosegare o mogolo.” Ee, boetapele bja Kriste bo tšwela pele, ga se bja ema felo gotee. Tsela e nngwe ya go dirišana le ‘bana babo’ Kriste ke go ba le boemo bjo bo nepagetšego bja kgopolo mabapi le go kaonefatšwa le ge e le gofe ga kwešišo ya rena ya ditherešo tša Mangwalo moo go gatišitšwego ke “mohlanka yo a botegago le wa temogo.”—Mat. 24:45.

E bile re bontšha go ikokobeletša ‘bana babo’ Kriste ka go dirišana le balebeledi bao ba kgethilwego ka phuthegong ya Bokriste. Moapostola Paulo o itše: “Kwang bao ba etelelago pele gare ga lena gomme le ikokobetše, gobane ba hlokomela meoya ya lena.” (Baheb. 13:17) Ka mohlala, mogolo a ka re nea kgothatšo mabapi le bohlokwa bja go ba le mantšiboa a Borapedi bja Lapa ka mehla goba a ka nea ditšhišinyo mabapi le dikarolo tše itšego tša bodiredi bja rena bja tšhemo. Molebeledi wa mosepedi a ka re nea keletšo e holago ya Mangwalo mabapi le karolo e itšego ya bophelo bja Bokriste. Ge re diriša ka go rata keletšo e bjalo re tla be re bontšha gore re latela Jesu bjalo ka Moetapele wa rena.

Ka manyami, lefase le hloka boetapele bjo bo atlegago. Eupša go lapološa gakaakang go latela boetapele bjo lerato bja Kriste! Anke ka mešegofela re kweng Moetapele wa rena gomme re dirišane le bao a ba dirišago lehono.

[Diswantšho go letlakala 27]

Na o amogela keletšo ya Mangwalo ya gore o se ke wa tsena jokong le motho yo a sa dumelego?