Ikhole ka go se be Lenyalong

“Yo a ka amogelago seo a a se amogele.”—MAT. 19:12.

1, 2. (a) Jesu, Paulo le ba bangwe ba be ba lebelela bjang go se be lenyalong? (b) Ke ka baka la’ng ba bangwe ba ka nagana gore go se be lenyalong ga se mpho?

GA GO pelaelo gore go ba lenyalong ke e nngwe ya dimpho tše dibotse tšeo Modimo a di neilego batho. (Die. 19:14) Lega go le bjalo, Bakriste ba bantši bao ba sego lenyalong ba thabela bophelo. Harold, ngwanabo rena yo a nago le nywaga e 95 yo a sa kago a nyala, o re: “Le ge ke kgahlišwa ke go ba le batho ba bangwe le go amogela baeng, ga ke lewe ke bodutu ge ke le noši. Ke nagana gore ke filwe mpho ya go se be lenyalong.”

² Jesu Kriste le moapostola Paulo ba boletše ka go se be lenyalong e le mpho e tšwago go Modimo, go swana le go ba lenyalong. (Bala Mateo 19:11, 12; 1 Bakorinthe 7:7.) Ke therešo gore ga se batho ka moka bao ba sego lenyalong bao ba ikgethetšego go ba bjalo. Ka dinako tše dingwe maemo a dira gore go be thata go hwetša molekane yo o mo nyakago. Goba ka morago ga nywaga e mentši ya lenyalo, ba bangwe ba  ikhwetša ba le noši ka baka la tlhalo goba go hlokofalelwa ke molekane. Ka gona, ke bjang go se be lenyalong e ka bago mpho? Le gona, Bakriste bao ba sego lenyalong ba ka ikhola bjang ka seo?

Mpho ya Moswananoši

3. Gantši Bakriste bao ba sego lenyalong ba holega bjang?

³ Gantši motho yo a sego lenyalong o na le nako e ntši e bile o itaola go feta motho yo a lego lenyalong. (1 Bakor. 7:32-35) Ye ke mehola ya moswananoši yeo e ka dirago gore a kgone go katološa bodiredi bja gagwe, a rate ba bangwe kudu gomme a batamele kgauswi le Jehofa. Ka gona, Bakriste ba bantši ba lemogile mehola ya go se be lenyalong gomme ba phetha ka go ‘amogela’ se, le ge e ka ba ka nakwana. Go ka direga gore ba bangwe ba be ba sa ikemišetša go se be lenyalong, eupša ge maemo a fetoga ba ile ba naganišiša ka se le go rapela ka taba ye gomme ba lemoga gore Jehofa o ba thuša gore ba kgotsofale. Ka gona, ba ile ba dumela gore maemo a fetogile gomme ba amogela go dula ba se lenyalong.—1 Bakor. 7:37, 38.

4. Ke ka baka la’ng Bakriste bao ba sego lenyalong ba sa swanela go ikwa ba nyatšega tirelong ya Modimo?

⁴ Bakriste bao ba sego lenyalong ba a tseba gore go ba lenyalong ga se gona go dirago gore ba be bohlokwa go Jehofa le mokgatlo wa gagwe. Modimo o re rata ka moka. (Mat. 10:29-31) Ga go motho goba selo seo se ka re aroganyago le lerato la Modimo. (Baroma 8:38, 39) Go sa šetšwe gore re lenyalong goba go se bjalo, ga se ra swanela go ikwa re nyatšega tirelong ya Modimo.

5. Go nyakega’ng gore re ikhole ka go se be lenyalong?

⁵ Lega go le bjalo, mpho ya go se be lenyalong e swanetše go hlagolelwa gore mehola ya gona e bonale, go swana le talente ya go tseba mmino goba ya go ba ramabelo. Ka gona, ke bjang Bakriste bao ba sego lenyalong lehono—e ka ba bana babo rena goba dikgaetšedi, ba bagolo goba ba banyenyane, bao ba ratago go se be lenyalong goba ba ba gapeletšwago ke maemo—ba ka ikholago ka boemo bja bona? Anke re hlahlobeng mehlala e mengwe e kgothatšago ya phuthego ya pele ya Bokriste gomme re boneng seo re ka ithutago sona.

Go se be Lenyalong Bofseng

6, 7. (a) Barwedi ba Filipi ba bile le tokelo efe tirelong ya Modimo? (b) Timotheo o ile a ikhola bjang ka go se be lenyalong, gona o ile a hwetša ditšhegofatšo dife ka baka la go ikgafa e sa le yo mofsa?

⁶ Moebangedi Filipi o be a na le barwedi ba bane bao ba bego ba fišega bjalo ka baebangedi go swana le tatago bona. (Dit. 21:8, 9) Go porofeta e be e le e nngwe ya dimpho tše di tlišwago ke moya o mokgethwa gomme dikgarebe tše di ile tša diriša mpho ye e le go phethagatša Joele 2:28, 29.

⁷ Lesogana le lengwe leo le ilego la ikhola ka go se be lenyalong ke Timotheo. Mmagwe Yunise  le makgolwagwe Loisa ba ile ba mo ruta “mangwalo a makgethwa” go tloga bjaneng. (2 Tim. 1:5; 3:14, 15) Mohlomongwe ba fetogile Bakriste mo e ka bao ka 47 C.E. ge Paulo a be a thoma go tla motseng wa gabo bona wa Lisitara. Nywaga e mebedi ka morago, ge Paulo a be a ba etetše ka lekga la bobedi, mohlomongwe Timotheo o be a obelela nywaga e 20 goba a sa tšwa go e feta. Go sa šetšwe gore e be e sa le yo monyenyane ka nywaga e bile e sa le yo mofsa therešong, o be a “bolelwa gabotse” ke bagolo ba Bakriste ba Lisitara le motse wa kgauswi wa Ikonia. (Dit. 16:1, 2) Ka gona Paulo o ile a kgopela Timotheo gore a sepele le yena leetong la boromiwa. (1 Tim. 1:18; 4:14) Ga re tsebe ge e ba Timotheo a ile a nyala. Seo re se tsebago ke gore ge e be e sa le lesogana, o ile a amogela taletšo ya Paulo ka diatla tše pedi gomme o feditše nywaga e mentši a hlankela e le moromiwa le molebeledi yo a sego lenyalong.—Bafil. 2:20-22.

8. Johane Mareka o thušitšwe ke’ng gore a ipeele dipakane tša moya gomme se se ile sa dira gore a hwetše ditšhegofatšo dife?

⁸ Ge Johane Mareka e sa le yo mofsa, le yena o ile a ikhola ka go se be lenyalong. Yena le mmagwe, Maria, gotee le yo mongwe wa leloko la gabo e lego Baranaba, e be e le ditho tša phuthego ya Jerusalema. Mohlomongwe gabo Mareka ba be ba na le sa bona, ka ge ba be ba na le ntlo ka toropong e bile ba na le ngwanenyana yo e bego e le mohlanka. (Dit. 12:12, 13) Le ge bophelo bo be bo le bose ka tsela yeo, Mareka e be e se motho wa go kuka magetla goba wa go ipona; e bile o be a sa kgotsofatšwe ke go fo dula tlhenkge le go ja bo fodile. Go bonagala go gwerana le baapostola go ile gwa dira gore a kganyoge go ba moromiwa. Ka gona o ile a sepela le Paulo le Baranaba leetong la bona la pele la boromiwa gomme a hlankela e le modiredi wa bona. (Dit. 13:5) Ka morago, o ile a sepela le Baranaba gomme ka morago ga moo re kwa gore o ile a hlankela le Petro kua Babilona. (Dit. 15:39; 1 Pet. 5:13) Ga re tsebe gore Mareka o ile a dula a se lenyalong ka nako e kaakang. Eupša o ile a tsebja kudu e le motho yo a ikemišeditšego go hlankela ba bangwe le go dira go gontši tirelong ya Modimo.

9, 10. Bafsa ba bantši lehono bao ba sego lenyalong ba na le dibaka dife tša go katološa bodiredi bja bona? Nea mohlala.

⁹ Bafsa ba bantši lehono ka phuthegong le bona ba katološa tirelo ya bona go Modimo ge ba sa dutše ba se lenyalong. Ka go swana le Mareka le Timotheo, ba a lemoga gore go se be lenyalong go dira gore ba kgone “go ineela go Morena ka mehla ka ntle le tšhitišo.” (1 Bakor. 7:35) Ruri se se a kgahliša. Dibaka tša go hlankela ke ga mantšha-o-tlogele—go bula madibogo, go ithuta leleme le šele, go thuša ka go agwa ga Diholo tša Mmušo goba makala, go ya Sekolong sa Tlwaetšo ya Bodiredi le go hlankela Bethele. Ge e ba o sa dutše o le yo mofsa gomme o se lenyalong, na o ikhola ka dibaka tše o nago le tšona?

¹⁰ Ngwanabo rena yo a bitšwago Mark o thomile go bula madibogo ge e be e sa le yo mofsa, a ya Sekolong sa Tlwaetšo ya Bodiredi gomme a hlankela dikabelong tše di fapafapanego lefaseng ka bophara. Ge a gopola nywaga e 25 e fetilego a le tirelong ya nako e tletšego, o re: “Ke ile ka leka go dirišana gabotse le batho ka moka ka phuthegong, go tšea karolo le bona tšhemong, go ba direla maeto a bodiši, go ba laletša ka gae gore ba tle ba je le nna gaešita le go rulaganya dipokano tšeo di sekametšego dilong tša moya. Dilo tše ka moka di nthabišitše kudu.” Bjalo ka ge mantšu a Mark a bontšha, lethabo le legolo bophelong le tlišwa ke go nea gomme bophelo bjo bo kgotsofatšago tirelong e kgethwa bo re nea dibaka tše dintši tša go nea ba bangwe. (Dit. 20:35) Go sa šetšwe gore ke dilo dife tšeo di ba kgahlago, tšeo ba di kgonago goba gore ba na le phihlelo efe bophelong, bafsa ba bantši lehono ba na le mo gontši mo ba ka go dirago modirong wa Morena.—1 Bakor. 15:58.

11. Go se kitimele go tsena lenyalong go hola ka’ng?

¹¹ Le ge bafsa ba bantši ba ka rata go feleletša ba tsene lenyalong, go na le mabaka a kwagalago a go se kitimele go tsena lenyalong. Paulo o kgothaletša bafsa gore ba lete go fihlela ba fetile “lebaka la bofsa,” e lego nako yeo dikganyogo  tša dikopano tša botona le botshadi di lego matla kudu. (1 Bakor. 7:36) Go tšea nako gore o thome go ikwešiša le go hwetša phihlelo yeo e nyakegago gore o kgone go kgetha molekane yo a swanetšego bophelong. Go dira keno ya lenyalo ke phetho e kgolo, yeo e swanetšego go tšea bophelo ka moka.—Mmo. 5:2-5.

Go Ikhwetša o se Lenyalong

12. (a) Mohlologadi Anna o ile a lebeletšana bjang le maemo a gagwe ge a be a fetoga? (b) Mohlologadi yo o bile le tokelo efe?

¹² Go bonagala Anna, yo go boletšwego ka yena Ebangeding ya Luka, a be a nyamile kudu ge monna wa gagwe a be a ehwa go sa letelwa ka morago ga nywaga e šupago feela ba nyalane. Ga re tsebe ge e ba ba bile le bana goba ge e ba a ile a nagana ka go nyalwa gape. Eupša Beibele e bega gore Anna e be e sa dutše e le mohlologadi ge a be a na le nywaga e 84. Go ya ka seo Beibele e se bolelago, re ka phetha ka gore Anna o dirišitše maemo a gagwe ao a bego a fetogile gore a batamele kgauswi le Jehofa. “O be a sa ke a hlokwa tempeleng, a dira tirelo e kgethwa bošego le mosegare, a ikona dijo le go lopa.” (Luka 2:36, 37) Ka gona, o be a etiša dilo tša moya pele bophelong. Go dira bjalo go be go nyaka boikemišetšo bjo bogolo le boiteko, eupša o ile a putswa kudu. O bile le tokelo ya go bona Jesu yo monyenyane le go hlatsela tokologo yeo e bego e tla tlišwa ke Mesia yo.—Luka 2:38.

13. (a) Ke’ng seo se bontšhago gore Dorokase o be a le mafolofolo ka phuthegong? (b) Botho bja Dorokase bo ile bja putswa bjang?

¹³ Mosadi yo a bitšwago Dorokase, goba Thabitha, o be a dula Jopa, e lego boemakepe bja bogologolo ka leboabodikela bja Jerusalema. Ka ge Beibele e sa bolele gore o be a na le monna, mohlomongwe o be a sa nyalwa ka nako yeo. Dorokase “o be a tletše ditiro tše dibotse le dimpho tša kgaugelo.” Go molaleng gore o be a roketše bahlologadi ba bantši le ba bangwe diaparo gomme se se be se dirile gore ba mo rate kudu. Ka gona gateetee ge a be a thoma go babja gomme ka morago a hwa, phuthego ka moka e ile ya kgopela Petro go rapelela gore kgaetšedi yo yo a rategago a tsošwe. Ge ditaba tša gore o tsošitšwe di be di phatlalala Jopa, ba bantši ba ile ba fetoga badumedi. (Dit. 9:36-42) Go ka direga gore Dorokase o bile le karolo go thušeng ba bangwe ba batho bao ka baka la botho bja gagwe bjo bogolo.

14. Ke’ng seo se tutuetšago Bakriste bao ba sego lenyalong go batamela kgauswi le Jehofa?

¹⁴ Ba bantši ka phuthegong ba ikhwetša ba se lenyalong go swana le Anna le Dorokase. Ba bangwe ba ka ba ba se ba hwetša molekane yo ba mo nyakago. Ba bangwe ba hlalane goba ba hlokofaletšwe ke balekane. Ka ge ba se na molekane yo ba ka mo ntšhetšago sa mafahleng, gantši Bakriste bao ba sego lenyalong ba ithuta go ithekga kudu ka Jehofa. (Die. 16:3) Silvia, kgaetšedi yo a sego lenyalong yo a hlanketšego Bethele ka nywaga e fetago e 38, o lebelela se e le tšhegofatšo. O re: “Ka dinako tše dingwe ke lapišwa ke go bonala eka ke tiile. Ke ipotšiša gore: ‘Nna ke tlo kgothatšwa ke mang?’” Eupša o oketša ka gore: “Go dumela gore Jehofa o tseba seo ke se hlokago go feta kamoo nna ke tsebago ka gona go mpatametša kgauswi le yena. Ka mehla ke dula ke kgothatšwa e bile ka dinako tše dingwe ke hwetša kgothatšo le moo ke bego ke sa nagane gore nka e hwetša gona.” Ge re dutše re batamela kgauswi le Jehofa, ka mehla o tla re thuša ka botho le ka tsela e kgothatšago.

15. Bakriste bao ba sego lenyalong ba ka ‘katologa’ bjang leratong?

¹⁵ Go se be lenyalong go tšweletša sebaka se sebotse sa go ‘katologa’ leratong. (Bala 2 Bakorinthe 6:11-13.) Jolene, kgaetšedi yo a sego lenyalong yoo a feditšego nywaga e 34 a le tirelong ya nako e tletšego, o re: “Ke ile ka leka ka matla go bopa segwera se sebotse, e sego feela le dithaka tša ka, eupša le batho ka moka. Go se be lenyalong ke sebaka se sebotse sa go hlankela Jehofa, lapa leno gotee le bana beno le dikgaetšedi, go akaretša le baagišani. Ge ke dutše ke gola, go se be lenyalong go nthabiša le go feta.” Batšofadi, bao ba fokolago, batswadi bao ba se nago balekane, bafsa le ba bangwe ka phuthegong ba tloga ba leboga thekgo e se nago boithati  yeo bao ba sego lenyalong ba ba neago yona. Ee, ge re rata ba bangwe, re ikwa re thabile. Na le wena o ka ‘katologa’ leratong?

Go se be Lenyalong Bophelo ka Moka

16. (a) Ke ka baka la’ng Jesu a ile a dula a sa nyala? (b) Paulo o ile a diriša bjang go se be lenyalong ka bohlale?

¹⁶ Jesu ga se a ka a nyala; o be a swanetše go rulaganya le go phetha bodiredi bjo a bo neilwego. O sepetše maeto a matelele, a šoma go tloga ka masa go fihla bošego gomme mafelelong a gafa bophelo bja gagwe e le sehlabelo. Go se be lenyalong go mo thušitše go dira dilo tše ka moka. Moapostola Paulo o sepetše dikhilomithara tše dikete gomme o ile a kopana le mathata a magolo bodireding. (2 Bakor. 11:23-27) Le ge mohlomongwe Paulo a ka ba a be a nyetše pejana, o ile a kgetha go dula a se lenyalong ka morago ga gore a be moapostola. (1 Bakor. 7:7; 9:5) Jesu le Paulo ba kgothaleditše ba bangwe gore ba ekiše mohlala wa bona ge e ba ba ka kgona ka baka la bodiredi. Lega go le bjalo, ga go le o tee wa bona yo a ilego a phetha ka gore go se tsene lenyalong ke selo se se nyakegago gore motho e be modiredi.—1 Tim. 4:1-3.

17. Ba bangwe lehono ba ekišitše bjang mohlala wa Jesu le Paulo, gona ke ka baka la’ng re ka kgodišega gore Jehofa o kgahlwa ke bao ba ikgafago ka tsela yeo?

¹⁷ Le lehono, ba bangwe ba kgethile go se be lenyalong gore ba be le nako e oketšegilego bodireding. Harold, yoo go boletšwego ka yena pejana, o hlanketše Bethele ka nywaga ya ka godimo ga e 56. O re: “Ka morago ga go hlankela Bethele ka nywaga e lesome, ke lemogile gore banyalani ba bantši ba tloga Bethele ka baka la bolwetši goba ba swanelwa ke go hlokomela batswadi ba bona bao ba tšofalago. Batswadi ba ka ka moka ba hlokofetše. Eupša ke be ke rata Bethele kudu moo ke bego ke sa nyake go e tlogela ka baka la go tsena lenyalong.” Ka tsela e swanago, nywaga e fetilego, mmulamadibogo yo a bitšwago Margaret o lemogile gore: “Ke hweditše dibaka tše dintši tša go tsena lenyalong, eupša ke ile ka di hlokomologa. Go e na le moo, ke ile ka kgona go diriša tokologo ya go se be lenyalong gore ke swarege kudu bodireding gomme se se nthabišitše kudu.” Ruri Jehofa a ka se lebale bohle bao ba dirago boikgafo bjo bjalo bjo bo se nago boithati bakeng sa borapedi bja therešo.—Bala Jesaya 56:4, 5.

Ikhole ka Boemo bjo o Lego go Bjona

18. Ba bangwe ba ka kgothatša bjang le go thekga Bakriste bao ba sego lenyalong?

¹⁸ Anke re reteng le go kgothatša Bakriste ka moka bao ba sego lenyalong bao ba dirago sohle seo ba ka se kgonago gore ba hlankele Jehofa. Re ba rata ka moka e bile re rata le tema e bohlokwa yeo ba e kgathago ka phuthegong. Le ka mohla ba ka se lewe ke bodutu ge e ba ruri re eba ‘bana babo bona, dikgaetšedi, bomma le bana ba bona.’—Bala Mareka 10:28-30.

19. O ka dira’ng gore o ikhole ka go se be lenyalong?

¹⁹ Go sa šetšwe gore o kgethile go se be lenyalong goba o gapeletšwa ke maemo, eka mehlala ye ya ka Mangwalong le ya mehleng yeno e ka go kgodiša gore le wena o ka thaba le go ba le mohola bophelong. Re fagahlela go hwetša dimpho tše dingwe, mola tše dingwe re sa lore le ka tšona. Tše dingwe re di thabela le semeetseng, mola tše dingwe re di thabela ge nako e dutše e eya. Ka gona, go ya ka gore re di lebelela bjang. O ka dira’ng gore o ikhole ka go se be lenyalong? Batamela kgauswi le Jehofa, eba le mo gontši mo o go dirago tirelong ya Modimo gomme o katologe leratong. Ka go swana le go ba lenyalong, go se be lenyalong go ka ba le meputso ge re go lebelela ka tsela e swanago le ya Modimo gomme re diriša mpho ye ka bohlale.

Na o a Gopola?

• Ke bjang go se be lenyalong e ka bago mpho?

• Go se be lenyalong e ka ba bjang tšhegofatšo bofseng?

• Bakriste bao ba sego lenyalong ba bulegetšwe ke dibaka dife tša go batamela kgauswi le Jehofa le go katologa leratong?

[Dipotšišo tša Thuto]

[Diswantšho go letlakala 18]

Na o diriša ka botlalo dibaka tšeo o nago le tšona tirelong ya Modimo?