Thuša Bana go Tlwaelana le Mokgatlo wa Jehofa

BANA ba nyaka go ithuta. Nagana ka dipotšišo tšeo bana ba Baisiraele ba ka bago ba ile ba ipotšiša tšona bošegong bja Paseka ya mathomo kua Egipita tše bjalo ka tše di rego: ‘Ke ka baka la’ng kwana e be e swanetše go hwa?’ ‘Ke ka baka la’ng tate a tlotša madi dijakwaneng?’ ‘Re ya kae?’ Taba ya gore Jehofa o amogetše dipotšišo tše bjalo e bonala go seo a bego a se laetše bo-tate ba Baisiraele. Jehofa o ba boditše ka ditiragalo tša nakong e tlago mabapi le go gopola Paseka gore: “E tlo re xe bana ba lena ba Le botšiša ba re: Mokxwa wó wa lena ké wa xo re’ng? ké mo Le tl’o xo re: Ké sôna sehlabêlô sa Paseka ya Morêna, e a kilexo a feta nywakô ya Ba-Isiraele kwa Egipita!” (Ek. 12:24-27) Ka morago Jehofa o ile a gopotša batswadi ba Baisiraele ka bohlokwa bja go araba dipotšišo tša bana ba bona mabapi le ‘melao le mekgwa’ yeo a bego A ba laetše yona.—Doit. 6:20-25.

Go molaleng gore Jehofa o be a nyaka gore  bana ba kgone go hwetša dikarabo tše di kgotsofatšago tša dipotšišo tša bona mabapi le borapedi bja therešo—dikarabo tšeo di bego di tla ba tutueletša go rata Jehofa e le Modimo wa bona le Mophološi. Jehofa o kganyogela bana se se swanago lehono. Tsela e nngwe yeo batswadi ba ka tiišetšago go rata Modimo dipelong tša bana ba bona ke ka go ba thuša go tlwaelana le mokgatlo wa Jehofa le go kwešiša kamoo ba holegago ka gona ditokišetšong tša wona. Ka gona, anke re hlahlobeng ditsela tše dingwe tšeo ka tšona bana ba ka thušwago go ithuta ka mo go oketšegilego ka mokgatlo wa Modimo.

Phuthego

Bana ba swanetše go tseba phuthego yeo lapa la gabo bona le kopanelago go yona. Go fihlelela seo, lena batswadi le swanetše go ya le bana ba lena dibokeng ka moka tša Bokriste. Ka tsela yeo, le latela mokgwa woo Jehofa a o laetšego Baisiraele ge a be a re: “O phuthêlê sethšaba mmôxô, banna le basadi le bana, . . . O ba balêlê ba kwê, ba ithutê, xomme ba boifê Morêna Modimo wa lena, ba hlôkômêlê se se bolêlwaxo ke molaô wó, ba dirê ka wôna. Le bana ba bôná ba ba sešoxo ba o tseba, ba o kwê, ba ithutê xo boifa Morêna Modimo wa lena.”—Doit. 31:12, 13, mongwalo o sekamego ke wa rena.

Go tloga boseeng, bana ba ka thoma go ithuta Lentšu la Jehofa. Moapostola Paulo o boletše ka Timotheo a re: “Go tloga boseeng o tsebile mangwalo a makgethwa.” (2 Tim. 3:15) Dibokeng Holong ya Mmušo, gaešita le bana ba banyenyane ba thoma go kwešiša tsebišo yeo e newago gomme ba tlwaelana le dikopelo tša Mmušo. Ge ba le moo, ba ithuta go  diriša le go hlompha Beibele le dikgatišo tšeo di theilwego Beibeleng. Go oketša moo, ge ba le dibokeng ba tla lemoga go ba gona ga seka seo se hlaolago balatedi ba kgonthe ba Kriste—lerato la kgonthe. Jesu o itše: “Ke le nea taelo e mpsha ya gore le ratane; go etša ge ke le ratile, gore le lena le ratane. Bohle ba tla tseba ka se gore le barutiwa ba-ka, ge e ba le ratana.” (Joh. 13:34, 35) Lerato le borutho le polokego ya kgonthe tšeo ba di bonago Holong ya Mmušo di tla ipiletša go bona gomme tša ba thuša go dira gore go ba gona dibokeng tša Bokriste e be karolo ya sa ruri ya maphelo a bona.

Ge o itlwaetša go fihla e sa le ka pela Holong ya Mmušo gomme o ema sebakanyana ka morago ga ge diboka di fedile, bana ba gago ba tla ba le nako ya go gwerana le ba bangwe. Go e na le go fo re ba gwerane le bana ba bangwe feela, ke ka baka la’ng o sa ba tsebiše bana babo rena le dikgaetšedi ba nywaga ka moka? Ge ba tlwaelana le batho ba bagolo, bana ba gago ba tla lemoga gore batho ba ba godilego ba bile le diphihlelo tše dintši tšeo di kgahlišago le bohlale. Bjalo ka ge Usia yo monyenyane, kgoši ya Juda, a ile a tutuetšwa gabotse ke Sakaria wa bogologolo bjalo ka yo a bego “a mo ruta xo boifa Modimo,” le lehono bao ba hlanketšego Jehofa ka potego ka nywaga e mentši ba na le tutuetšo e botse go bafsa. (2 Kor. 26:1, 4, 5) Le sa dutše le le Holong ya Mmušo, o ka hlalosetša bana ba gago ka morero wa bokgobapuku, letlapa la ditsebišo le dibopego tše dingwe.

Mokgatlo wa Lefase ka Bophara

Bana ba swanetše go tseba gore phuthego ya gabo bona ke karolo ya mokgatlo wa lefase ka bophara o nago le diphuthego tša ka godimo ga tše 100 000. Hlalosa dibopego tša mokgatlo wo, kamoo o šomago ka gona le tema yeo bana ba e kgathago go thekga modiro wa mokgatlo wo. Ba bontšhe gore ke ka baka la eng o fagahlela dikopano tša tikologo, tša selete le diketelo tša molebeledi wa tikologo.—Bona lepokisi le le rego  “Dihlogo tša Poledišano Nakong ya Borapedi bja Lapa,” go letlakala 28.

Ge o hwetša sebaka, laletša balebeledi ba basepedi, baromiwa, ditho tša lapa la Bethele le badiredi ba bangwe ba nako e tletšego dijong lapeng la gago. O se ke wa nagana gore ga ba na nako ya bana. Bahlanka ba ba nako e tletšego ba katanela go ekiša Jesu, yo ka mehla a bego a amogela bana le go bolela le bona. (Mar. 10:13-16) Ge ba e-kwa bahlanka ba ba Jehofa ba laodiša diphihlelo gomme ba lemoga lethabo la bona tirelong e kgethwa, bana ba gago le bona ba ka ipeela pakane ya go tsenela tirelo ya nako e tletšego.

Ke’ng se sengwe seo le ka se dirago le le lapa go thuša bana ba lena go tlwaelana le mokgatlo wa Jehofa? Ditšhišinyo tše dingwe ke tše: Ipheng mošomo wa lapa wa go ahla-ahla puku ya Dihlatse tša Jehofa—Bagoeledi ba Mmušo wa Modimo. Gatelela boineelo, boikokobetšo le potego tšeo bahlanka ba Jehofa ba di bonagaditšego. Bontšha kamoo Jehofa a ba dirišitšego ka gona go phatlalatša ditaba tše dibotse lefaseng ka bophara. Diriša dibidio tša mokgatlo wa Jehofa go ba ruta dilo tše bohlokwa tša nakong e fetilego le tša gona bjale. Ge go kgonega, etelang ofisi ya lekala le legae la Bethele nageng ya gabo lena goba mohlomongwe le dinageng tše dingwe. Maeto a bjalo a tla ruta bana ba gago kamoo karolo ya lefaseng ya mokgatlo wa Jehofa, ka tlase ga tlhahlo ya sehlopha sa mohlanka yo a botegago, e rulagantšwego ka gona bakeng sa go nea bana babo rena lefaseng ka bophara dijo tša moya le tlhahlo, go etša ge go dirilwe lekgolong la pele la nywaga C.E.—Mat. 24:45-47; Dit. 15:22-31.

Go Nweletša Tsebišo go Ngwana yo Mongwe le yo Mongwe

Ge o ruta bana ba gago, gopola kamoo Jesu a ilego a ruta baapostola ba gagwe. O ile a ba botša gore: “Ke sa na le dilo tše dintši tšeo nka le botšago tšona, eupša ga le kgone go di rwala  ga bjale.” (Joh. 16:12) Jesu ga se a ka a imetša barutiwa ba gagwe ka tsebišo. Go e na le moo, o ile a ba ruta ganyenyane-ganyenyane ditherešo tše bohlokwa e le gore di ka kgona go nwelela ka tshwanelo. Ka mo go swanago, o se ke wa imetša bana ba gago. Ge ka mehla o ba ruta ganyenyane-ganyenyane ka mokgatlo wa Jehofa, o tla oketša kgahlego ya bona gomme wa dira gore go ithuta ka phuthego ya Bokriste go thabiše. Ge dinyakwa tša bana ba gago di fetoga, o ka boeletša wa ba wa tlaleletša go seo ba šetšego ba ithutile sona.

Phuthego ya Bokriste ke mothopo o bohlokwa wa thušo bakeng sa go matlafatša tswalano ya rena le Modimo gomme bafsa bao ba tšeago karolo ka mafolofolo medirong ya yona ba hlangwa gakaone go ganetša tutuetšo ya lefase la Sathane. (Baroma 12:2) Re kgodišegile gore o tla thaba kudu ge o dutše o thuša bana ba gago gore ba tlwaelane le mokgatlo wa Jehofa. Eka a ka ba šegofatša gore ba dule ba o kgomaretše ka potego le go kgomarela Modimo yo lerato yo re mo hlankelago.

[Lepokisi/​Seswantšho go letlakala 28]

 Dihlogo tša Poledišano Nakong ya Borapedi bja Lapa

Tše dingwe tša dihlogo tša poledišano tšeo di tswalanago le mokgatlo wa Jehofa tšeo le ka di ahla-ahlago mantšiboeng a Borapedi bja Lapa ke tše.

▪ Bolelang ka histori ya phuthego ya lena. E thomile neng le gona bjang? Ke Diholo tše kae tša Mmušo tšeo phuthego e ilego ya di diriša? Bakeng sa poledišano ye, ke ka baka la’ng le sa laletše setho seo e lego kgale se le gona ka phuthegong go tla go araba dipotšišo tša bana ba gago?

▪ Hlalosang morero wa diboka tša phuthego ka go fapa-fapana ga tšona le dipokano tše dikgolo le kamoo bana ba ka holwago ke tšona.

▪ Ahla-ahlang morero wa dikolo tše di fapa-fapanego tša mokgatlo wa Jehofa. Laodišang diphihlelo tšeo di bontšhago dienywa tše dibotse tšeo dialoga tša dikolo tše di di tšweleditšego.

▪ Thušang bana go bona bohlokwa bja go ba bagoeledi ba ka mehla ba ditaba tše dibotse. Ba bontšheng kamoo ba ka akaretšwago pegong ya lefase ka bophara yeo e lego ka go Yearbook of Jehovah’s Witnesses.

▪ Ahla-ahlang dikarolo tše di fapa-fapanego tša tirelo ya nako e tletšego tšeo bafsa ba ka di tsenelago mokgatlong wa Jehofa. Kgaolo 10 ya puku ya Go Rulaganyetšwa go Dira Thato ya Jehofa ke mothopo o mobotse bakeng sa tsebišo ye.

▪ Thušang bana go kwešiša lebaka leo ka lona re swanetšego go latela dithulaganyo tše itšego ka phuthegong. Hlalosang lebaka leo ba sa swanelago go dira dilo ka go ithatela mokgatlong wa Jehofa, gaešita le ge e le tše dinyenyane. Bontšhang kamoo ba ka tsenyago letsogo go dira gore phuthego e be le thulaganyo e botse ka go latela tlhahlo ya bagolo.

[Seswantšho]

Bana ba gago ba tla holega ge ba gwerana le bao ba hlanketšego ka nako e telele

[Diswantšho go letlakala 26]

Go swana le Isiraeleng ya bogologolo, batswadi lehono ba katanela go araba ka tsela e kgotsofatšago ge ba botšišwa ka mokgatlo wa Jehofa