Go Hlankela Nakong ya Koketšego e Kgolo

Ka ge go anega Harley Harris

E be e le ka September 2, 1950, kua Kennett, Missouri, U.S.A. Re be re le kopanong ya tikologo, re dikologilwe ke lešaba leo le galefilego. Ramotse o be a re tlišeditše Bahlapetši ba Setšhaba gore ba re šireletše lešabeng le leo le sa laolegego. Mo setarateng go be go tletše mašole ao a swerego dithunya tše ditelele le dibetša. Re dutše re rogwa, re ile ra namela dikoloi tša rena gomme ra leba Cape Girardeau, Missouri, go ya go feleletša dikarolo tša lenaneo la kopano. Ke kolobeditšwe kopanong yeo ke e-na le nywaga e 14. Eupša e re ke go botše gore go tlile bjang gore ke hlankele Jehofa nakong ye ya khuduego.

NYWAGENG ya mathomong ya bo-1930, rakgolo le makgolo le bana ba bona ba seswai ba kwele dipolelo tše di gatišitšwego tša Ngwanabo rena Rutherford gomme seo sa ba kgodiša gore ba hweditše therešo. Batswadi ba-ka, Bay le Mildred Harris, ba kolobeditšwe kopanong ya selete ya kua Washington, D.C. ka 1935. Ruri ba be ba thabile kudu go ba karolo ya “lešaba le legolo,” leo le ilego la lemogwa kopanong yeo!—Kut. 7:9, 14.

Ke belegwe ngwageng o latetšego. Ka morago ga ngwaga, batswadi ba-ka ba ile ba hudugela tšhemong yeo e lego lekatana kua Mississippi. Ge re be re dula tšhemong yeo, re be re se na molebeledi wa mosepedi yoo a bego a re etela. Lapa lešo le be le ngwalelana mangwalo le Bethele e bile le e-ya dikopanong gomme nakong yeo ka moka, yeo e be e le yona feela tsela yeo re bego re ikopanya le bana babo rena.

Go Kgotlelela Tlaišo

Nakong ya Ntwa II ya Lefase, Dihlatse tša Jehofa di be di tlaišwa kudu ka baka la boema-gare bja tšona. Re be re hudugetše kua Mountain Home, Arkansas. Ka letšatši le lengwe, nna le tate re be re nea bohlatse setarateng. Monna yo mongwe o ile a amoga tate dimakasine, a di tšhuma mo pele ga rena. O ile a re re mafšega a go tšhaba go ya ntweng. Ka ge ke be ke e-na le nywaga e mehlano, ke ile ka thoma go lla. Tate o ile a fo lebelela monna yoo a ikhomoletše, go fihlela monna yoo a sepela.

E bile go be go e-na le batho bao ba bego ba re thekga. Ka letšatši le lengwe ge lešaba le le galefilego le be le dikologile koloi yeo re bego re e nametše, ramolao wa mo motseng o ile a tšwelela. O ile a botšiša gore: “Go direga’ng mo?” Monna yo mongwe o ile a fetola ka gore: “Dihlatse tše tša Jehofa ga di nyake go lwela naga ya gabo tšona!” Ge ramolao a e-kwa seo o ile a itahlela ka koloing ya rena gomme a goeletša ka gore: “Ke lwele Ntweng ya I ya Lefase gomme le gona bjale ke tla lwa!  Tlogelang batho ba. Ga ba tshwenye motho!” Lešaba leo le ile la phatlalala ka setu. Ruri re ile ra leboga batho ba bjalo bao ba bego ba re bontšha botho!—Dit. 27:3.

Dikopano tša Selete di a re Matlafatša

Kopano ya selete ya 1941 yeo e bego e swaretšwe St. Louis, Missouri, e be e tlile ka nako. Go akanyetšwa gore go be go tlile batho ba 115 000. Re ile ra makatšwa ke ge go kolobetšwa batho ba 3 903! Ke sa dutše ke gopola gabotse sehlogo sa polelo ya Ngwanabo rena Rutherford se se rego “Bana ba Kgoši.” O be a bolela le rena bana ka go lebanya gomme ka moka re ile ra hwetša kopi ya puku e kgahlišago ya Children. Kopano ye e ile ya nthuša go lebeletšana le seo se diragetšego ngwageng o latetšego, e lego ngwaga woo ke ilego ka thoma go ya sekolong sa tlasana. Nna le bo-motswala re ile ra rakwa sekolong ka ge re be re gana go dumediša folaga. Re be re e-ya sekolong letšatši le lengwe le le lengwe go bona ge e ba balaodi ba sekolo ba ka ba ba fetošitše kgopolo. Gantši ge e be e le mesong re be re phatša sethokgweng re lebile sekolong—eupša re be re tseba gore ba tla re gomiša. Lega go le bjalo, ke be ke nagana gore ka tsela yeo re be re bontšha gore re botegela Mmušo wa Modimo.

Lega go le bjalo, go se go ye kae ke ge Kgoro-kgolo ya Tsheko ya United States e laela gore go dumediša folaga ke taba ya boikgethelo. Bjale re ile ra kgona go ya sekolong. Morutiši o be a le botho go rena moo a ilego a re ruta dilo tšeo re bego re šaletše morago ka tšona. Le bana bao re bego re tsena le bona sekolo ba ile ba re swara ka tlhompho.

Ke sa dutše ke gopola le kopano ya selete ya 1942 yeo e ilego ya swarelwa Cleveland, Ohio, moo Ngwanabo rena Nathan H. Knorr a ilego a neela polelo e rego “Khutšo—Na e ka ba Gona ka mo go sa Felego?” Tlhahlobo ye ya Kutollo kgaolo 17 e ile ya bontšha gore nako ya khutšo e tla tla ka morago ga Ntwa II ya Lefase. Ka gona, go be go sa tla dikgolo. E le go itokišeletša seo, go ile gwa bulwa Sekolo sa Gilead ka 1943. Ke be ke sa tsebe kamoo seo se tla kgomago bophelo bja-ka bja nakong e tlago. Ruri go ile gwa ba le khutšo gomme tlaišo ya fokotšega. Lega go le bjalo, ge Ntwa ya kua Korea e thoma ka 1950, modiro wa rena o ile wa thibelwa gape, go etša ge ke hlalositše mathomong.

Go Tšea Karolo Kutšwanyana Kgolong

Ka 1954, ke ile ka aloga sekolong se se phagamego gomme kgwedi ka morago ke ile ka thoma go bula madibogo. Ka morago ga go hlankela kua Kennett, Missouri, moo ka 1950 re bego re dikologilwe ke lešaba le le galefilego, ka March 1955 ke ile ka laletšwa go tlo hlankela Bethele. Phuthego yeo ke bego ke abetšwe go yona e be e šoma le tšhemo ya Times Square, yeo e lego gare ga New York City. Ruri bophelo bja mo bo be bo fapane le bja moo ke tšwago gona! Ke be ke kgona go tanya kgahlego ya batho bao ba swaregilego kudu ba kua New York ka go bula makasine sehlogong seo se šišinyago kgopolo gomme ke ba botšiše gore, “Na o kile wa ipotšiša se?” Ba bantši ba be ba amogela dimakasine.

Selo seo ke bego ke se rata kudu kua Bethele ke borapedi bja mesong, bjoo bo bego bo etelelwa pele ke Ngwanabo rena Knorr. O be a tloga a kgona go dira gore re kwešiše ditemana tša Beibele le go di diriša ka tsela e atlegilego! Tsela yeo a bego a bolela le rena masogana ao a sa nyalago e be e swana le ya ge tate a bolela le morwa wa gagwe, gantši a re eletša ka tsela yeo re swanetšego go dirišana le basadi. Ka 1960, ke ile ka nyaka go nyala.

Ke ile ka tsebiša Bethele gore ke nyaka go sepela ka morago ga matšatši a 30 gomme ba se nkarabe. Ka morago ga matšatši a 30, le ge ke be ke e-na le dihlong ke ile ka rapa sebete sa go botšiša gore nka sepela neng. Ngwanabo rena Robert Wallen o ile a araba mogala gomme a tla mo ke bego ke šoma gona. O ile a mpotšiša gore ke nagana eng ka go ba mmulamadibogo yo a kgethegilego goba molebeledi wa tikologo. Ke ile ka araba ka gore: “Ngwanabo rena Robert, ke na le nywaga e 24 feela, gomme ga ke na phihlelo.”

Go ba Molebeledi wa Tikologo

Bošegong bjoo, ke ile ka hwetša enfelopo e kgolo ka phapošing ya-ka. E be e e-na le fomo ya go tsenela bobulamadibogo bjo bo kgethegilego le ya go tsenela modiro wa go ba molebeledi wa tikologo. Banna! Ke ile ka šala ke ahlame! Ke be  ke letetšwe ke tokelo e kgolo ya go hlankela bana bešo modirong wa tikologo ka borwa-bodikela bja Missouri le ka bohlabela bja Kansas. Lega go le bjalo, pele ke tloga Bethele, ke ile ka ba gona sebokeng sa balebeledi ba basepedi. Ge Ngwanabo rena Knorr a be a phetha polelo ya gagwe o itše: “Go ba molebeledi wa tikologo goba wa selete ga go bolele gore o tseba kudu go feta bana babo rena ba bangwe. Ba bangwe ba na le phihlelo go le feta. Eupša maemo ga a ba dumelele go hwetša ditokelo tša go swana le tša lena. Le ka ithuta mo gontši go bona.”

Ruri seo e be e le therešo! Ngwanabo rena Fred Molohan le mosadi wa gagwe gotee le morwarragwe Charley yo a tšwago Parsons, kua Kansas ba be ba bea mohlala o mobotse kudu. Ba be ba ithutile therešo morago kua ka bo-1900. Go be go thabiša kudu go kwa diphihlelo tšeo ba bilego le tšona le pele nka belegwa! Ngwanabo rena yo mongwe e be e le John Wristen, e lego ngwanabo rena yo botho yo a tšofetšego yo a tšwago Joplin, kua Missouri, yo e bilego mmulamadibogo ka nywaga-some e mentši. Bana babo rena ba bao ba rategago ba be ba hlompha thulaganyo ya pušo ya Modimo kudu. Ba ile ba dira gore ke ikwe ke tšeelwa godimo bjalo ka molebeledi wa tikologo—go sa šetšwe gore ke be ke sa le yo mofsa.

Ka 1962, ke ile ka nyala Cloris Knoche, mmulamadibogo yo mafolofolo yo a nago le moriri o mohwibidu. Ke ile ka tšwela pele ke le molebeledi wa tikologo gotee le Cloris. Re ile ra tsebana gakaone le bana babo rena ge re be re dula le bona. Re ile ra kgona go kgothatša bafsa gore ba tsenele tirelo ya nako e tletšego. Bafsa ba babedi ba ba lego mahlalagading tikologong yeo—Jay Kosinski le JoAnn Kresyman—ba be ba fo nyaka go kgothatšwa ka tsela e bjalo. Go šoma le bona tirelong le go thabišwa ke go phela bophelo bja boikgafo go ile gwa ba tutueletša go ipeela dipakane. JoAnn o ile a ba mmulamadibogo yo a kgethegilego gomme Jay o ile a hlankela lapeng la Bethele. Ka morago, bobedi bja bona ba ile ba nyalana gomme ga bjale ba na le nywaga e ka bago e 30 ba hlankela modirong wa tikologo.

Tirelo ya Boromiwa

Ka 1966, Ngwanabo rena Knorr o ile a re botšiša ge e ba re ka rata go hlankela lefelong le šele. Re ile ra araba ka gore: “Re thabela seo re se dirago, eupša ge e ba re nyakega felo-tsoko, ga re na bothata.” Ka morago ga beke, re ile ra laletšwa Sekolong sa Gilead. Ruri re be re thabetše go boela Bethele ge re be re le sekolong le go thabela go ba le bao ke bego ke ba rata le go ba hlompha! Re ile ra ba ra gwerana le barutwana-gotee le rena bao ba sa dutšego ba hlankela ka potego go fihla le lehono.

Nna le Cloris re ile ra romelwa Ecuador kua Amerika Borwa, gotee le Dennis le Edwina Crist, Ana Rodríguez le Delia Sánchez. Ba ga Crists ba ile ba ya motseng-mogolo wa naga yeo e lego Quito. Rena gotee le Ana le Delia, re ile ra abelwa go ya go hlankela Cuenca, motse wa boraro ka bogolo kua Ecuador. Tšhemo yeo e be e akaretša diprofense tše pedi. Phuthego ya mathomo kua Cuenca e be e kopanela ka phapošing ya rena ya bodulo. E be e le rena ba bane le ba bangwe ba babedi. Re be re ipotšiša gore re tla dira bjang modiro wa boboledi.

Kua Cuenca go be go tletše dikereke gomme ka matšatši ao a bitšwago a makgethwa motse o be o tlala ka batho ba kereke bao ba gwantago. Lega go le bjalo, batho ba kua Cuenca ba be ba e-na le  dipotšišo tše dintši. Ka mohlala, ka lekga la mathomo ge ke be ke kopana le Mario Polo, nkgwete ya monamedi wa dipaesekela wa kua Cuenca, o ile a mmakatša ge a be a mpotšiša gore, “Mogweba-ka-mmele yoo go bolelwago ka yena pukung ya Kutollo ke mang?”

Bošegong bjo bongwe, Mario o ile a tla ntlong ya rena a tshwenyegile kudu. Moruti wa bona o be a mo neile kgatišo e nngwe yeo e bego e bolela gampe ka Dihlatse tša Jehofa. Ke ile ka mmotša gore batho ba bao ba bolelwago gampe ba swanetše go newa sebaka sa go ipolelela. Ka gona letšatšing le le latelago, Mario o ile a laletša nna le moruti yoo ka lapeng la gagwe gore go tle go arabje ditatofatšo tšeo. Sebokeng seo, ke ile ka šišinya gore re boledišane ka taba ya Boraro Botee. Ka morago ga gore moruti a bale Johane 1:1, Mario o ile a hlalosa gore ka Segerika go na le phapano magareng ga “Modimo” le “modimo.” Go bile bjalo le ka ditemana tša Beibele ka moka tšeo di ilego tša balwa. Ka ntle le pelaelo, moruti yoo o ile a sepela a se na seo a ka se šupago go hlatsela thuto ya Boraro Botee. Se se dirile gore Mario le mosadi wa gagwe ba kgolwe gore re ruta therešo gomme ba ile ba kgona go emela dithuto tša Beibele ka tsela e botse. Go thabiša gakaakang go bona diphuthego tša motse wa Cuenca di oketšega go fihla go tše 33 tšhemong ka moka yeo re bego re abetšwe go yona la mathomo gomme palo-moka ya tšona e bile tše 63—yeo ke koketšego e kgolo e le ruri!

Go Bona go Katološwa ga Lekala

Ka 1970, nna gotee le Al Schullo re ile ra laletšwa go ya go hlankela lekaleng la kua Guayaquil. Re be re hlokomela mošomo wa lekala. Joe Sekerak o be a šoma ka nakwana go paka dikgatišo bakeng sa diphuthego tše 46 tša naga yeo ka moka. Cloris o feditše nako e itšego a hlankela e le moromiwa mola nna ke be ke hlankela Bethele. O thušitše batho ba 55 go fihlela ba kolobetšwa, gantši go be go kolobetšwa barutwana ba gagwe ba bararo go iša go ba bahlano kopanong e nngwe le e nngwe.

Ka mohlala, Cloris o ile a ithuta Beibele le mosadi yo a bitšwago Lucresia, yoo monna wa gagwe a bego a mo ganetša. Lega go le bjalo, mafelelong Lucresia o ile a kolobetšwa gomme a thoma go hlankela e le mmulamadibogo wa ka mehla. O ile a ruta bana ba gagwe go sepela ditseleng tša Jehofa. Ga bjale barwa ba gagwe ba babedi ba hlankela e le bagolo gomme yo mongwe ke mmulamadibogo yo a kgethegilego; morwedi’agwe o hlankela e le mmulamadibogo. Motlogolo wa gagwe o ile a nyalwa ke ngwanabo rena yo a beago mohlala o mobotse gomme bobedi bja bona ba hlankela e le babulamadibogo ba kgethegilego. Lapa le le thušitše batho ba bantši go ithuta therešo.

Ka 1980, Ecuador e be e e-na le bagoeledi ba e ka bago ba 5 000. Ofisi ya rena e be e le e nyenyane bakeng sa batho ba bantši bao ba oketšegago. Ngwanabo rena yo mongwe o ile a neela ka lefelo la diheketara tše 32 leo le lego ka ntle ga motse wa Guayaquil. Ka 1984 re ile ra thoma go aga ofisi ya lekala e mpsha lefelong leo le Holo ya Kopano, tšeo di ilego tša neelwa ka 1987.

Ba Bantši ba Ikemišetša go Thuša Katološong ye

Go theoša le nywaga, go be go kgothatša kudu go bona bagoeledi ba bantši le babulamadibogo go tšwa dinageng tše dingwe ba e-tla Ecuador go thuša mo go nago le tlhokagalo e kgolo ya bagoeledi ba Mmušo. O mongwe wa mehlala yeo nka se tsogego ke e lebetše ke wa Andy Kidd, morutiši yo a rotšego modiro wa kua Canada. O ile a hudugela Ecuador ka 1985 a e-na le nywaga e 70 gomme o ile a hlankela ka potego go fihla a e-hwa ka 2008 a e-na le nywaga e 93. Ge ke be ke thoma go mmona kabelong ya gagwe, e be e le molebeledi a nnoši ka phuthegong e nyenyane. O be a sa kgone Sepaniši gabotse, eupša o be a neela polelo ya phatlalatša le go swara Thuto ya Morokami. E bile o be a swara Sekolo sa Bodiredi sa Pušo ya Modimo gomme a swara dikarolo tše mmalwa tša Seboka sa Tirelo! Ga bjale go na le diphuthego tše pedi tše di golago tikologong yeo, tšeo di nago le bagoeledi ba e ka bago ba 200 le bagolo ba bantši ba lefelong leo.

Ngwanabo rena yo mongwe, Ernesto Diaz, yo a hudugilego a e-tšwa United States le lapa la gagwe, a šetše a e-na le dikgwedi tše seswai a le Ecuador o itše: “Bana ba rena ba bararo ba ithutile leleme leo le bolelwago mo gomme ga bjale ke  barutiši ba babotse. Bjalo ka tatago bona, ke ile ka fihlelela phetho yeo go bonagalago e be e sa kgonege boemong bjo—ya go ba mmulamadibogo wa ka mehla, ke tšea karolo bodireding bja nako e tletšego gotee le lapa la-ka. Ka moka ga rena re swara dithuto tša Beibele tše 25. Tše ka moka di dirile gore lapa la-ka le be le botee gomme, go feta tšohle, la batamela kgaufsi kudu le Jehofa go feta kamoo go ilego gwa ba ka gona.” Ruri re leboga bana babo rena ba le dikgaetšedi bao ba rategago!

Lekala le ile la katološwa gape ka 1994, le ipoeleditše gabedi. Ka 2005 palo ya bagoeledi ba rena e ile ya feta 50 000 gomme go be go nyakega gore lekala le katološwe gape. Se se ile sa akaretša go godišwa ga Holo ya Kopano, go agwa ga meago e mefsa ya bodulo gotee le diofisi tša bofetoledi. Meago ye e mefsa e ile ya kgakolwa ka October 31, 2009.

Ge ke be ke rakwa sekolong ka 1942, go be go e-na le Dihlatse tše 60 000 kua United States. Ga bjale go na le tša ka godimo ga tše milione. Ge re be re e-tla Ecuador ka 1966, go be go e-na le bagoeledi ba Mmušo ba 1 400. Ga bjale go na le ba ka godimo ga 68 000. E bile go sa tlo ba le ba bantši go tšwa dithutong tša Beibele tše 120 000 le palong ya ka godimo ga 232 000 ya bao ba bilego gona Segopotšong sa lehu la Kriste ka 2009. Ke therešo gore Jehofa o šegofaditše batho ba gagwe ka tsela yeo re sa kago ra e nagana. Ruri go a thabiša go phela nakong ya koketšego e kgolo! *

[Mongwalo wa tlase]

[Diswantšho go letlakala 5]

Kopano yeo e swaretšwego lebaleng (1981) gomme Holo ya Kopano ya Guayaquil (2009) e agilwe lebaleng leo