Basadi, ke ka Baka La’ng le Swanetše go Ikokobeletša Bohlogo?
Basadi, ke ka Baka La’ng le Swanetše go Ikokobeletša Bohlogo?
“Hlogo ya mosadi . . . ke monna.”—1 BAKOR. 11:3.
1, 2. (a) Moapostola Paulo o ngwadile’ng mabapi le thulaganyo ya Jehofa ya bohlogo le go ikokobetša? (b) Go tla ahla-ahlwa dipotšišo dife sehlogong se?
JEHOFA o dirile thulaganyo yeo moapostola Paulo a boletšego ka yona ge a be a ngwala gore “hlogo ya monna yo mongwe le yo mongwe ke Kriste” gomme “hlogo ya Kriste yona ke Modimo.” (1 Bakor. 11:3) Sehlogo se se fetilego se bontšhitše gore Jesu o be a lebelela go ikokobeletša hlogo ya gagwe, Jehofa Modimo, e le tokelo e bile a thabela go dira bjalo, le gore Kriste ke hlogo ya banna ba Bakriste. Kriste o be a le botho, a le bonolo, a e-na le kwelobohloko e bile a se na boithati ge a be a dirišana le batho. Banna bao ba lego ka phuthegong ba swanetše go ba ka tsela yeo go ba bangwe, kudu-kudu go basadi ba bona.
2 Lega go le bjalo, go thwe’ng ka basadi? Hlogo ya bona ke mang? Paulo o ngwadile gore: “Hlogo ya mosadi . . . ke monna.” Basadi ba swanetše go lebelela bjang mantšu a ao a buduletšwego? Na molao wo wa motheo o a šoma le ge monna e se modumedi? Na go ikokobeletša bohlogo bja monna go bolela gore mosadi e swanetše go ba modirišani yo a ikhomoletšego lenyalong, a sa bolele selo ge go dirwa diphetho? Mosadi a ka ikhweletša bjang tumišo?
“Ke tlo mo Dirêla Modiriši”
3, 4. Ke ka baka la’ng thulaganyo ya bohlogo lenyalong e le e holago?
3 Thulaganyo ya bohlogo e tšwa go Modimo. Ka morago ga go bopša ga Adama, Jehofa Modimo o itše: “Xa xo botse xe motho a le nnoši; ke tlo mo dirêla modiriši e a mo lebanexo.” Ka morago ga go bopša ga Efa, Adama o be a thabile kudu ge a hweditše mogwera le mothuši mo a ilego a re: “Byalo xomme šó, e lexo lešapô la mašapô a-ka, le nama ya nama ya-ka.” (Gen. 2:18-24) Adama le Efa ba be ba e-na le tebelelo e botse kudu ya go ba batswadi ba moloko ka moka o phethagetšego wa batho woo o bego o tla phela ka mo go sa felego le ka lethabo lefaseng la paradeise.
4 Ka baka la go rabela ga batswadi ba rena ba pele, boemo bjo bo phethagetšego bjoo bo bego bo le gona tšhemong ya Edene bo ile bja lahlega. (Bala Baroma 5:12.) Eupša thulaganyo ya bohlogo e ile ya dula e šoma. Ge e latelwa gabotse, e tliša mehola e megolo le lethabo lenyalong. Mafelelo e ba a mabotse go swana le kamoo Jesu a bego a ikwa ka gona ge a ikokobeletša Hlogo ya gagwe, Jehofa. Pele ga bophelo bja gagwe bja lefaseng, Jesu o be a “thabile pele ga [Jehofa] ka mehla.” (Die. 8:30, NW) Ka baka la go se phethagale, banna ga ba sa kgona go ba dihlogo tše di phethagetšego gomme basadi ga ba sa kgona go ikokobetša ka mo go phethagetšego. Lega go le bjalo, ge banna le basadi ba tšwela pele ba katana kamoo ba ka kgonago ka gona, thulaganyo ye e ba le mafelelo a kgotsofatšago kudu lenyalong gona bjale.
5. Ke ka baka la’ng banyalani ba swanetše go tšeela godimo keletšo yeo e lego go Baroma 12:10?
5 Lenyalo le atlega kudu ge banyalani ba diriša keletšo ye ya Mangwalo yeo e ngwaletšwego Bakriste ka moka, e rego: “Leratong la borwarre e-bang le maikwelo a borutho a bonolo go yo mongwe le yo mongwe. Go bontšhaneng kgodišo, etelelang pele.” (Baroma 12:10) Le gona, monna le mosadi ba swanetše go šoma ka thata go ba “botho yo mongwe go yo mongwe, [ba] šokelane ka bonolo, [ba] lebalelane ka bolokologi.”—Baef. 4:32.
Ge Molekane e se Modumedi
6, 7. Mafelelo e ka ba afe ge mosadi a ikokobeletša monna wa gagwe yo e sego modumedi?
6 Go thwe’ng ge e ba molekane wa gago wa lenyalo e se mohlanka wa Jehofa? Gantši ke banna bao e sego badumedi. Boemong bjo, mosadi o swanetše go mo swara bjang? Beibele e araba ka gore: “Lena basadi ikokobeletšeng banna ba lena, e le gore, ge e ba go e-na le bao ba sa kwego lentšu, ba tle ba ruiwe ka ntle le lentšu ka boitshwaro bja basadi ba bona, ka baka la ge ba bile dihlatse tše di bonego ka mahlo tša boitshwaro bja lena bjo bo sekilego gotee le tlhompho e tseneletšego.”—1 Pet. 3:1, 2.
7 Lentšu la Modimo le botša mosadi gore a dule a ikokobeletša monna wa gagwe yo e sego modumedi. Boitshwaro bja gagwe bjo bobotse bo ka kgoma monna wa gagwe gomme bja mo tutueletša gore a nyake go tseba seo se dirago gore mosadi a itshware ka tsela yeo. Ka baka leo, monna a ka hlahlobišiša ditumelo tša mosadi wa gagwe wa Mokriste gomme mafelelong a amogela ditherešo.
8, 9. Ke’ng seo mosadi wa Mokriste a ka se dirago ge monna wa gagwe yo e sego modumedi a sa arabele ka tsela e kgahlišago le ge mosadi yo a itshwere gabotse?
8 Lega go le bjalo, go thwe’ng ge e ba monna yo e sego modumedi a sa arabele ka tsela e kgahlišago? Mangwalo a kgothaletša mosadi yo e lego modumedi gore a bontšhe dika tša Bokriste ka dinako tšohle, go sa šetšwe gore go ka ba thata gakaakang. Ka mohlala, go 1 Bakorinthe 13:4 re bala gore: “Lerato le na le bopelotelele.” Ka gona, mosadi wa Mokriste o dira gabotse ge a tšwela pele a itshwara “ka boikokobetšo bjo bo feletšego bja monagano le boleta, ka bopelotelele,” a lebeletšana le boemo bjo ka lerato. (Baef. 4:2) Ka thušo ya matla a Modimo a šomago—moya wa gagwe o mokgethwa—go a kgonega go boloka dika tša Bokriste gaešita le ka tlase ga maemo a thata.
9 Paulo o ngwadile gore: “Dilong tšohle ke na le matla ka baka la yo a mphago matla.” (Bafil. 4:13) Moya wa Modimo o thuša molekane wa Mokriste go dira dilo tše dintši tšeo a bego a ka se kgone go di dira ge nkabe e se ka wona. Ka mohlala, go swarwa gampe ke molekane go ka leka motho gore a itefeletše. Lega go le bjalo, Beibele e botša Bakriste ka moka gore: “Le se ke la bušetša bobe ka bobe go motho. . . . Gobane go ngwadilwe gwa thwe: ‘Tefetšo ke ya-ka, ke tla lefetša, go re’alo Jehofa.’” (Baroma 12:17-19) Ka tsela e swanago, 1 Bathesalonika 5:15 e re eletša ka gore: “Le boneng gore go se be le yo a lefetšago bobe ka bobe go yo mongwe, eupša ka mehla phegelelang go dirana botse le go bo dira go ba bangwe ka moka.” Ka thušo ya moya o mokgethwa wa Jehofa, re kgona go dira seo re bego re ka se kgone go se dira ka matla a rena. Ke mo go swanetšego gakaakang gore re rapelele moya o mokgethwa wa Modimo gore o re nee seo re se hlokago!
10. Jesu o ile a arabela bjang ge batho ba be ba mmolela gampe le ge ba mo dira dilo tše di sa kgahlišego?
10 Jesu o beile mohlala o mobotse ge a be a dirišana le batho bao ba mmoletšego gampe goba ba mo dirilego dilo tšeo di sa kgahlišego. Petro wa Pele 2:23 e re: “Ge a be a rogwa, ga se a ka a ithogela. Ge a be a tlaišega, ga se a ka a tšhošetša, eupša o ile a dula a ikgafetše yo a ahlolago ka go loka.” Re kgothaletšwa go latela mohlala wa gagwe o mobotse. O se ke wa galefišwa ke boitshwaro bjo bobe bja ba bangwe. Go etša ge Bakriste ka moka ba kgothaletšwa, e-ba ‘le maikwelo a borutho a borwarre, o šokele ka botho, o ikokobeditše monaganong, o sa lefeletše bobe ka bobe goba go roga ka go roga.’—1 Pet. 3:8, 9.
Na e fo ba Modirišani yo a Ikhomoletšego?
11. Ke tokelo efe e kgolo yeo basadi ba bangwe ba Bakriste ba tlago go ba le karolo go yona?
11 Na go ikokobeletša bohlogo bja monna go bolela gore basadi ba swanetše go fo ba badirišani bao ba ikhomoletšego lenyalong, ba sa bolele selo ditabeng tša lapa goba tše dingwe? Ga go bjalo le gatee. Jehofa o neile basadi gotee le banna ditokelo tše dintši. Anke o nagane ka tokelo e kgolo yeo ba 144 000 ba nago le yona ya go ba dikgoši le baperisita kua legodimong ka tlase ga Kriste ge a buša lefase le! Palong yeo go akaretšwa le basadi. (Bagal. 3:26-29) Go molaleng gore Jehofa o neile basadi karolo ya bohlokwa thulaganyong ya gagwe ya dilo.
12, 13. Nea mehlala e bontšhago gore basadi le bona ba ile ba porofeta.
12 Ka mohlala, mehleng ya Beibele basadi e be e le baporofeta. Joele 2:28, 29 e boletše e sa le pele gore: “Nama yohle ke tlo e thšêla Môya wa-ka; ’me barwa ba lena le barwedi ba lena ba tlo porofeta. . . . Le balata ba lena ba banna le ba basadi ke tlo ba thšêla Môya wa-ka mehleng yeo.”
13 Barutiwa ba Jesu ba 120 bao ba bego ba kgobokane phapošing ya ka godimo kua Jerusalema ka letšatši la Pentekoste ya 33 C.E. ba be ba akaretša basadi gotee le banna. Moya wa Modimo o ile wa tšhollelwa sehlopheng se ka moka. Ka baka leo, Petro o be a ka kgona go tsopola seo moporofeta Joele a se boletšego e sa le pele gomme a se diriša ka tsela e swanago go banna gotee le basadi. Petro o itše: “Se ke seo se boletšwego ka moporofeta Joele a re, ‘Mehleng ya bofelo,’ go bolela Modimo, ‘ke tla tšhollela o mongwe wa moya wa-ka godimo ga nama ya mohuta o mongwe le o mongwe, gomme barwa ba lena le barwedi ba lena ba tla porofeta . . . ; gaešita le godimo ga bahlanka ba-ka ba banna le ba basadi, ke tla tšhollela o mongwe wa moya wa-ka mehleng yeo, gomme ba tla porofeta.’”—Dit. 2:16-18.
14. Ke tema efe yeo basadi ba ilego ba e kgatha go phatlalatšeng thuto ya pele ya Bokriste?
14 Lekgolong la pele la nywaga, basadi ba ile ba kgatha tema ya bohlokwa go phatlalatšeng thuto ya Bokriste. Ba ile ba bolela go ba bangwe ka Mmušo wa Modimo gomme ba dira dilo ka go dumelelana le modiro woo wa boboledi. (Luka 8:1-3) Ka mohlala, moapostola Paulo o ile a bitša Fibe gore ke “modiredi wa phuthego yeo e lego Kenkerea.” Le gona ge a be a dumediša badumedi-gotee le yena, Paulo o ile a bolela ka basadi ba mmalwa ba botegago, go akaretša “Teraefina le Teraefosa, basadi bao ba šomago ka thata Moreneng.” O ile a ba a bolela ka “Peresi moratiwa wa rena, gobane o itapišitše kudu Moreneng.”—Baroma 16:1, 12.
15. Ke tema efe yeo basadi ba e kgathago lehono go phatlalatšeng thuto ya Bokriste?
15 Mehleng ya rena, bontši bja batho ba ka godimo ga dimilione tše šupago bao ba bolelago ditaba tše dibotse tša Mmušo wa Modimo lefaseng ka bophara ke basadi ba nywaga e fapa-fapanego. (Mat. 24:14) Bontši bja bona ke badiredi ba nako e tletšego, baromiwa le ditho tša lapa la Bethele. Mopsalme Dafida o opetše ka gore: “Morena a na a kwatša lentšu la phenyo, gomme basadi ba ba hlakelago ya ba ba bantši-ntši.” (Ps. 68:12, PK.) Ruri mantšu a a ipontšhitše e le a therešo! Jehofa o tšeela godimo tema yeo basadi ba e kgathago go boleleng ditaba tše dibotse le go phethagatšeng merero ya gagwe. Ruri taelo ya gagwe ya gore basadi ba ikokobeletše bohlogo ga e bolele gore ba swanetše go fo ikhomolela.
Basadi ba Babedi Bao ba sa Kago ba Ikhomolela
16, 17. Mohlala wa Sara o bontšha bjang gore basadi ga se ya swanela go fo ba badirišani bao ba ikhomoletšego lenyalong?
16 Ge e ba Jehofa a nea basadi ditokelo tše dintši, na banna ga se ba swanela go boledišana le basadi ba bona pele ba dira diphetho tše dikgolo? E tla ba gabohlale gore ba dire bjalo. Mangwalo a bolela ka ditiragalo tše mmalwa tšeo go tšona basadi ba ilego ba bolela goba ba dira dilo gaešita le ge dipono tša bona di be di sa amogelwe ke banna ba bona. Ela hloko mehlala e mebedi.
17 Sara, mosadi wa mopatriareka Aborahama, o ile a dulela go botša monna wa gagwe gore a rake mosadi wa gagwe wa bobedi le morwa wa gagwe ka baka la go hloka ga bona tlhompho. “Lentšu leo la šulafatša Aborahama xa-xolo”—eupša e sego Modimo. Jehofa o boditše Aborahama gore: “O se šulêlwê ka ’baka la molata yó wa xaxo; ka moka tše Sara a di boletšexo le wêna, O di dumêlê.” (Gen. 21:8-12) Aborahama o ile a kwa Jehofa, a theetša Sara gomme a dira seo a bego a se kgopela.
18. Abigaile o gatile mogato ofe wa pele?
18 Nagana gape ka Abigaile, mosadi wa Nabala. Ge Dafida a be a tšhaba Kgoši Saulo yo a nago le lehufa, o ile a fetša nako a hlomile mešaša kgaufsi le mehlape ya Nabala. Go e na le gore ba tšee tše dingwe tša dilo tša monna yo wa mohumi, Dafida le banna ba gagwe ba ile ba di hlokomela. Lega go le bjalo, Nabala “e be e le e mothata” gomme o ile a ‘fotlela’ banna ba Dafida. E be e le “motho wa dintwa,” e le ‘lešilo gomme a dirile tša bošilo.’ Ge banna ba Dafida ka tlhompho ba kgopela thušo, Nabala o ile a gana. Abigaile o ile a arabela bjang ge a e-kwa seo se diragetšego? Ka ntle le go botša Nabala, o ile “a napa a akxofa a tšea dinkxwa tše makxolo a mabedi le makuka a mabedi a morara, le dinku tše di budulexo tše thlano, le diroto tše thlano tša dipabe, le mekwape e lekxolo ya morara, le dinkxwana tša maxó tše makxolo a mabedi” gomme a di nea Dafida le banna ba gagwe. Na Abigaile o dirile se se nepagetšego? Beibele e re: “Morêna a ôtla Nabala, a hwa.” Ka morago Dafida o ile a nyala Abigaile.—1 Sam. 25:3, 14-19, 23-25, 38-42.
‘Basadi Bao ba Swanelwago ke Theto’
19, 20. Ke’ng seo se dirago gore mosadi a tloge a swanelwa ke theto?
19 Mangwalo a reta mosadi yo a dirago dilo ka tsela ya Jehofa. Ge puku ya Beibele ya Diema e reta “mosadi wa sethakxa” e re: “Ké yêna lehumô le le fetaxo dipheta. Pelo ya mong wa xaxwe e dula è mmotile; monna wa xaxwe xa a hloke thuô. Tše a mo dirêlaxo tšôna, xa di na tše mpe, ké tše botse mehla yohle ya bophelô by’axwe.” Go feta moo, “se a se bolêlaxo ké bohlale; ’leme la xaxwe le ruta batho botho. Ó šetša tšohle tše di tlaxo ka lapeng la xaxwe; xa a je bušwa bya bobodu. Bana ba xaxwe ba êma ba re: Mma-mahlôxônôlô! Monna wa xaxwe ó a mo rêta.”—Die. 31:10-12, 26-28.
20 Ke’ng seo se dirago gore mosadi a tloge a swanelwa ke theto? Diema 31:30 e re: “Botsôrô bo a fora, le botse ké lefêla; mosadi xo rêtwa mo-šia-Morêna.” Go boifa Jehofa go akaretša senyakwa sa go ikokobeletša thulaganyo e kgethwa ya bohlogo ka go rata. “Hlogo ya mosadi . . . ke monna,” go etša ge “hlogo ya monna yo mongwe le yo mongwe [e le] Kriste” gomme “hlogo ya Kriste yona ke Modimo.”—1 Bakor. 11:3.
Leboga Mpho ya Modimo
21, 22. (a) Ke mabaka afe ao Bakriste bao ba lego lenyalong ba nago le ona a go leboga mpho ya Modimo ya lenyalo? (b) Ke ka baka la’ng re swanetše go hlompha thulaganyo ya Jehofa ya bolaodi le ya bohlogo? (Bona lepokisi leo le lego go letlakala 17.)
21 Bakriste bao ba lego lenyalong ba na le mabaka a mantši a go leboga Modimo! Ba ka dirišana e le banyalani ba thabilego. Ba ka leboga ka mo go kgethegilego mpho ya Modimo e šegofaditšwego ya lenyalo ka gobane e ba nea tokelo ya go kopanya maphelo a bona gomme ba sepele le Jehofa. (Ruthe 1:9; Mika 6:8) Yena—Mothomi wa lenyalo—o tseba gabotse seo se nyakegago gore banyalani e be ba thabilego. Ka mehla dira dilo ka tsela ya gagwe gomme ‘go thabela Jehofa e tla ba matla a gago,’ gaešita le lefaseng la lehono leo le tletšego mathata.—Neh. 8:10.
22 Monna wa Mokriste yo a ratago mosadi wa gagwe go etša ge a ithata o tla bontšha botho le go naganela bjalo ka hlogo. Mosadi wa gagwe yo a boifago Modimo e tla ba yo a rategago e le ruri, ka gobane o tla mo thekga le go mmotšha tlhompho e tseneletšego. Sa bohlokwa kudu, lenyalo la bona leo le beago mohlala o mobotse le tla tumiša Modimo wa rena yo a swanelwago ke theto, Jehofa.
Na o a Gopola?
• Thulaganyo ya Jehofa ya bohlogo le ya go ikokobetša ke efe?
• Ke ka baka la’ng banyalani ba swanetše go hlomphana?
• Mosadi yo e lego modumedi o swanetše go swara bjang molekane wa gagwe yo e sego modumedi?
• Ke ka baka la’ng banna ba swanetše go boledišana le basadi ba bona pele ba dira diphetho tše dikgolo?
[Dipotšišo tša Thuto]
[Lepokisi go letlakala 17]
Ke ka Baka La’ng re Swanetše go Hlompha Bolaodi?
Jehofa o hlomile dithulaganyo tša bolaodi le bohlogo gare ga dibopiwa tše bohlale. Se se diretšwe go hola dibopiwa tša moya le batho. Se di nea dibaka tša go diriša tokologo ya boikgethelo le go hlompha Modimo ka go mo hlankela gotee ka kwano.—Ps. 133:1.
Phuthego ya Bakriste ba tloditšwego e lemoga bolaodi le bohlogo bja Jesu Kriste. (Baef. 1:22, 23) E le ge a lemoga bolaodi bja Jehofa, mafelelong “Morwa le yena o tla ipea ka tlase ga Yo a beilego dilo tšohle ka tlase ga gagwe, gore Modimo e be tšohle go yo mongwe le yo mongwe.” (1 Bakor. 15:27, 28) Ka gona, ke mo go swanetšego gakaakaang gore batho bao ba ineetšego go Modimo ba sepedišane le thulaganyo ya bohlogo ka phuthegong le ka lapeng! (1 Bakor. 11:3; Baheb. 13:17) Ka go dira bjalo, re a ikhola ka ge re tla amogelwa ke Jehofa le go šegofatšwa ke yena.—Jes. 48:17.
[Seswantšho go letlakala 13]
Thapelo e ka thuša mosadi wa Mokriste go bontšha dika tša Modimo
[Seswantšho go letlakala 15]
Jehofa o tšeela godimo tema yeo basadi ba e kgathago go tšwetšeng pele dikgahlego tša Mmušo