Hlagolela Lerato Leo le sa Felego le ka Mohla

‘Lerato le kgotlelela tšohle. Lerato le ka mohla ga le fele.’—1 BAKOR. 13:7, 8.

1. (a) Gantši lerato le tšweletšwa ka tsela efe? (b) Batho ba bantši ba rata mang le eng?

GO BOLETŠWE dilo tše dintši ka lerato. Seka se se a tumišwa e bile se tšweletšwa ka tsela yeo e sego ya kgonthe dikošeng. Lerato ke senyakwa sa motheo sa batho. Eupša dipuku le difilimi gantši di tšweletša seka se ka tsela yeo e sego ya kgonthe dikanegelong tša lerato, gomme di rekišwa mafelong a mantši. Lega go le bjalo, go rata Modimo le moagišani go hlaela ka tsela e nyamišago. Re bona go direga seo Beibele e boletšego ka sona e sa le pele mabapi le mehla ye ya bofelo. Batho ke “baithati, barati ba tšhelete, . . . ba ratago maipshino go e-na le go rata Modimo.”—2 Tim. 3:1-5.

2. Beibele e nea temošo efe mabapi le lerato le le fošagetšego?

² Batho ba na le bokgoni bja go bontšha lerato, eupša Lentšu la Modimo le re lemoša mabapi le go bontšha lerato le le fošagetšego. Le gona, Beibele e hlalosa seo se diregago ge lerato le bjalo le tsema medu ka pelong ya motho. (1 Tim. 6:9, 10) Na o sa gopola seo moapostola Paulo a se ngwadilego ka Dema? Le ge a be a šoma le Paulo,  Dema o ile a thoma go rata seo lefase le se neago. (2 Tim. 4:10) Moapostola Johane o ile a lemoša Bakriste mabapi le kotsi yona ye. (Bala 1 Johane 2:15, 16.) Go rata lefase le dilo tša nakwana tšeo le di neago gotee le tsela ya lona, ga go sepedišane le go rata Modimo le dilo tšeo di tšwago go yena.

3. Re lebeletšane le tlhohlo efe, gona go rotoga dipotšišo dife?

³ Le ge re phela lefaseng le, ga re karolo ya lona. Ka baka leo, re lebeletšane le tlhohlo ya go phema pono ya lona e fošagetšego ka lerato. Ke ga bohlokwa gore re se itumelele go tanywa ke lerato le le fošagetšego. Ka gona, re swanetše go hlagolela lerato leo le theilwego melaong ya motheo le go le bontšha go bomang? Ke ditokišetšo dife tšeo di re thušago go hlagolela le go bontšha lerato leo le kgotlelelago tšohle le leo le sa felego le ka mohla? Go dira bjalo go re thuša bjang gona bjale le gona go kgoma bokamoso bja rena bjang? Re swanetše go hwetša dikarabo go ya ka pono ya Modimo e le gore re hwetše tlhahlo e swanetšego.

Hlagolela Lerato Bakeng sa Jehofa

4. Lerato la go rata Modimo le godišwa bjang?

⁴ Go hlagolela go ka bolela go kgothaletša le go dira gore kgolo ya selo se itšego e kgonege. Nagana ka molemi yo a šomago ka thata go lema mmu le go bjala peu. O letetše gore peu e mele. (Baheb. 6:7) Ka tsela e swanago, lerato la rena go Modimo le swanetše go gola. Go nyakega’ng gore se se direge? Re swanetše go lokiša mmu o mobotse wa dipelo tša rena, moo peu ya therešo ya Mmušo e ilego ya bjalwa gona. Re ka dira se ka go ba le thuto ya ka mehla ya Lentšu la Modimo e le gore re oketše tsebo ya rena ka yena. (Bakol. 1:10) Go ba gona ka mehla dibokeng tša phuthego le go tšea karolo go tšona le gona go tla re thuša go oketša tsebo ya rena. Na yo mongwe le yo mongwe wa rena o dira boiteko bjo bo sa kgaotšego gore a hwetše tsebo e tseneletšego?—Die. 2:1-7.

5. (a) Re ka ithuta bjang ka dika tša Jehofa tše dikgolo? (b) O ka re’ng ka toka, bohlale le matla a Modimo?

⁵ Jehofa o utolla semelo sa gagwe ka Lentšu la gagwe. Ka go ithuta Mangwalo le ka go tšwela pele re hwetša tsebo ka Jehofa, re ka oketša tebogo ya rena bakeng sa dika tša gagwe—e lego toka, matla, bohlale, gomme go feta tšohle, lerato la gagwe le legolo. Jehofa o bontšha toka ditseleng tša gagwe ka moka le melaong ya gagwe e phethagetšego. (Doit. 32:4; Ps. 19:7) Re ka lebelela mediro ka moka ya tlholo gomme ra makatšwa ke bohlale bja gagwe. (Ps. 104:24) Legohle ka moka le nea bohlatse bja gore Jehofa ke mothopo wa matla a magolo le matla a sa lekanyetšwego.—Jes. 40:26.

6. Modimo o bontšhitše bjang gore o a re rata, gona seo se go kgomile bjang?

⁶ Go ka thwe’ng ka seka se segolo sa Modimo e lego lerato? Ke le legolo kudu gomme le re kgoma ka moka ga rena. O ile a bontšha lerato leo ge a be a neela ka sehlabelo bakeng sa go lopolla batho. (Bala Baroma 5:8.) Tokišetšo ye e a hwetšagala go lefase ka moka la moloko wa batho, eupša ke feela bao ba arabelago leratong la Modimo le go bontšha tumelo sehlabelong sa Morwa bao ba tlago go holwa ke yona. (Joh. 3:16, 36) Go neela ga Modimo ka Jesu e le sehlabelo sa poelanyo bakeng sa rena go swanetše go re tutueletša gore le rena re mo rate.

7, 8. (a) Ke’ng seo se nyakegago go rena e le gore re bontšhe gore re rata Modimo? (b) Batho ba Modimo ba boloka melao ya gagwe go sa šetšwe maemo afe?

⁷ Re ka bontšha bjang gore re rata Modimo e le go leboga tšohle tšeo a re diretšego tšona? Karabo e buduletšwego e bohlokwa ka ge e re: “Se ke seo lerato la Modimo le se bolelago, gore re boloke  ditaelo tša gagwe; gomme ditaelo tša gagwe ga di boima.” (1 Joh. 5:3) Ee, go rata Jehofa Modimo go re tutueletša go boloka melao ya gagwe. Leo ke lebaka leo ka lona re neago bohlatse ka leina la gagwe le Mmušo wa gagwe, e lego seo se holago batho ba bangwe. Go dira bjalo go tšwa pelong ke bohlatse bja gore re boloka melao ya Modimo ka maikemišetšo a mabotse.—Mat. 12:34.

⁸ Bana babo rena go dikologa lefase ba phegelela bo boloka melao ya Modimo go sa šetšwe gore batho ga ba na kgahlego le gore ba ganetša molaetša wa Mmušo ka go lebanya. Ga ba kgaotše maitekong a bona a go phetha bodiredi bja bona ka botlalo. (2 Tim. 4:5) Ka tsela e swanago, re tutueletšega go abelana le ba bangwe tsebo ya Modimo gaešita le go boloka ditaelo tša gagwe tše dingwe.

Lebaka Leo ka Lona re Ratago Morena wa Rena Jesu Kriste

9. Jesu o ile a kgotlelela’ng, gona o be a tutuetšwa ke’ng?

⁹ Go tlaleletša go rateng Modimo, go na le mabaka a mantši a dirago gore re hlagolele lerato bakeng sa Morwa wa gagwe. Le ge re sa ka ra bona Jesu, go ithuta ka yena go tiiša lerato leo re mo ratago ka lona. (1 Pet. 1:8) Ke dilo dife tšeo Jesu a ilego a di kgotlelela? Ge a be a dira thato ya Tatagwe, Jesu o be a hloilwe ntle le lebaka, a tlaišwa, a pharwa ka melato ya maaka le go rogwa. Le gona, o ile a kgotlelela go se swarwe ka seriti ka ditsela tše dingwe. (Bala Johane 15:25.) Go rata ga Jesu Tatagwe wa legodimong go mo tutueleditše go kgotlelela diteko tšeo. Le gona, a tutueditšwe ke lerato, lehu la gagwe la sehlabelo le ile la nea ba bantši topollo.—Mat. 20:28.

10, 11. Ka baka la seo Kriste a re diretšego sona, re ikemišeditše go dira’ng?

¹⁰ Tsela ya Jesu e re tutueletša go gata mogato. Ge re nagana ka seo Kriste a re diretšego sona, lerato la rena go yena le a gola. Bjalo ka balatedi ba gagwe, re swanetše go ikemišetša go hlagolela le go tšwela pele re bontšha lerato leo le swanago le la Kriste e le gore re kgotlelele ge re boloka taelo ya gagwe ya gore re hlatsele Mmušo le go dira barutiwa.—Mat. 28:19, 20.

¹¹ Ge re arabela leratong leo Kriste a le bontšhitšego batho ka moka, re ikwa re gapeletšega go fetša modiro wa rena pele bofelo bo fihla. (Bala 2 Bakorinthe 5:14, 15.) Lerato leo Kriste a le bontšhitšego le be le le bohlokwa e le gore a phethagatše seo Modimo a se rerilego bakeng sa moloko wa batho. Mohlala woo Kriste a re beetšego wona gore re o latele kgaufsi o thuša yo mongwe le yo mongwe wa rena go ba le karolo morerong woo wa Modimo. Se se nyaka gore re hlagolele go rata Modimo ka botlalo ka mo go kgonegago. (Mat. 22:37) Ka go kwa seo Jesu a se rutilego le go boloka melao ya gagwe, re bontšha gore re a mo rata e bile re ikemišeditše go godiša bogoši bja Modimo go sa šetšwe seo se diregago, go etša ge Jesu a dirile.—Joh. 14:23, 24; 15:10.

Go Phegelela Tsela e Phalago Tšohle ya Lerato

12. Paulo o be a e-ra go re’ng ge a be a bolela ka “tsela e phalago tšohle”?

¹² Moapostola Paulo o be a ekiša Kriste. Ka baka la go latela dikgato tša Kriste kgaufsi, Paulo o be a ka bolela ka bolokologi le bana babo gore ba mo ekiše. (1 Bakor. 11:1) Le ge a ile a kgothaletša Bakriste ba Korinthe gore ba dule ba tsoma ka phišego dimpho tše dingwe tša moya tšeo di bego di bonala kudu lekgolong la pele la nywaga,  tše bjalo ka phodišo ya mohlolo le go bolela ka maleme, Paulo o ile a ba bontšha gore go na le selo sa bohlokwa seo se ka phegelelwago. Go 1 Bakorinthe 12:31 o ile a hlalosa gore: “Ke le bontšha tsela e phalago tšohle.” Taba e dikologilego ditemana tšeo di latelago e bontšha gore ye e be e le tsela e phalago tšohle ya lerato. Ke ka tsela efe e lego e phalago tšohle? Paulo o ile a tšwela pele go hlalosa seo a bego a bolela ka sona. (Bala 1 Bakorinthe 13:1-3.) Ge e ba a be a e-na le bokgoni bjo bo itšego goba a fihleletše dilo tše dikgolo eupša a se na le lerato, se se be se tla mo hola ka’ng? Se be se ka se be le mohola! A tutueditšwe ke moya wa Modimo, o ile a hlalosa therešo ye e bohlokwa. A tutuetšo e matla gakaakang yeo a bilego le yona ka go re hlalosetša mantšu a!

13. (a) Temana ya ngwaga ya 2010 e re’ng? (b) Ke ka kgopolo efe lerato le sa felego le ka mohla?

¹³ Se se latelago Paulo o re hlalosetša seo lerato le lego sona le seo le sego sona. (Bala 1 Bakorinthe 13:4-8.) Ga bjale iphe nako ya go itlhahloba go bona ge e ba o fihlelela dinyakwa tša lerato. Lebiša tlhokomelo kudu polelwaneng ya mafelelo ya temana 7 le lefokong la mathomo la temana 8 tše di rego: ‘Lerato le kgotlelela tšohle. Lerato le ka mohla ga le fele,’ yeo e tlago go ba temana ya rena ya ngwaga ya 2010. Hlokomela gore go temana 8, Paulo o itše dimpho tša moya, tšeo di akaretšago go porofeta le go bolela ka maleme—tšeo di bego di dirišwa ge phuthego ya Bokriste e be e sa thoma—di tla fedišwa. Di tla fela. Eupša lerato le tla dula le le gona. Jehofa ke mothofatšo wa lerato, gomme ke wa ka mo go sa felego. Ka gona, lerato le ka se fele le ka mohla. Le tla dula le le gona ka mo go sa felego e le seka sa Modimo wa rena wa ka mo go sa felego.—1 Joh. 4:8.

Lerato le Kgotlelela Tšohle

14, 15. (a) Lerato le ka re thuša bjang go kgotlelela diteko? (b) Ke ka baka la’ng ngwanabo rena yo mongwe wa mofsa a ile a gana go kwanantšha?

¹⁴ Ke’ng seo se thušago Bakriste go kgotlelela go sa šetšwe diteko, maemo a thata le mathata ao ba bago le ona? Ge e le gabotse ke lerato leo le theilwego molaong wa motheo. Lerato le le feta la go fo dumela go gafa selo seo motho a se ratago kudu. Le akaretša go ikemišetša go boloka potego ya rena gaešita le go hwela Kriste. (Luka 9:24, 25) Naganišiša ka Dihlatse tše botegago tšeo di ilego tša tlaišwa dikampeng tša tshwenyo, dikampeng tša mošomo le dikgolegong nakong ya Ntwa ya II ya Lefase.

¹⁵ Phihlelo ya Hlatse ya mofsa ya Jeremane yeo e bitšwago Wilhelm e bontšha se gabotse. Go e na le go kwanantšha, o ile a dula a botega ge a be a lebeletšane le go bolawa ka go thuntšhwa ke sehlopha sa mašole a Nazi. Lengwalong la go laela ba lapa labo o itše: “Re swanetše go rata Modimo go feta tšohle, bjalo ka ge Moetapele wa rena Jesu Kriste a laetše. Ge e ba re mo emela, ruri o tla re putsa.” Ka morago, sehlogong sa Morokami setho sa lapa labo se ngwadile gore: “Dinakong tša kgakanego, re ile ra dira re le lapa gore go rata Modimo ga rena go ete pele ka mehla.” Wo ke moya wo o bontšhwago ke bontši bja bana babo rena bao ga bjale ba lego kgolegong kua Armenia, Eritrea, South Korea le dinageng tše dingwe. Bana ba babo rena ba dula ba tiiletše go rateng ga bona Jehofa.

16. Bana babo rena ba Malawi ba ile ba kgotlelela’ng?

¹⁶ Dinageng tše dintši, tumelo le kgotlelelo ya bana babo rena e lekwa ka diteko tše dintši. Ka nywaga e 26, Dihlatse tša Jehofa kua Malawi di ile tša kgotlelela dithibelo tša mmušo, kganetšo e šoro le ditlhaselo tše dintši tše šoro. Kgotlelelo ya bona e ile ya putswa. Ge tlaišo e be e thoma nageng yeo, go be go e-na le Dihlatse tše e ka bago tše 18 000. Ka morago ga nywaga e 30, palo ya tšona e ile ya oketšega ka makga a fetago a mabedi go fihla go 38 393. Dinageng tše dingwe go bile le mafelelo a swanago.

17. Ke’ng seo ba bangwe bao ba tšwago malapeng ao a aroganego ka bodumedi ba lebeletšanago le sona, gona ke ka baka la’ng ba kgona go kgotlelela tshwaro yeo?

 ¹⁷ Go hlaselwa ga batho ba Modimo ka kakaretšo ka tsela e lebanyago go ka ba thata. Ge Mokriste a hlaselwa ke ditho tša lapa labo, seo se ka kweša bohloko le go feta. Kgateletšego e ka bakwa ke ditho tša lapa goba ba leloko la kgaufsi. Na Jesu ga se a ka a bolela e sa le pele gore seo se tla direga? Ee o boletše, gomme ba bantši ba bone go nepagala ga mantšu ao. (Mat. 10:35, 36) Bafsa ba lego mahlalagading ba kgotleletše go ganetšwa ke batswadi bao e sego Dihlatse. Ba bangwe ba ile ba rakwa ka magaeng, eupša Dihlatse di ile tša ba amogela ka botho. Ba bangwe ba lahlilwe ke batswadi ba bona. Ke’ng seo se thušitšego bafsa ba bjalo go kgotlelela tshwaro e bjalo? Ga se ba thušwa feela ke go rata bana babo bona, go feta tšohle ba thušitšwe ke go rata Jehofa le Morwa wa gagwe e le ka kgonthe.—1 Pet. 1:22; 1 Joh. 4:21.

18. Lerato leo le kgotlelelago dilo tšohle le thuša Bakriste bao ba nyetšego bjang?

¹⁸ Go na le maemo a mantši bophelong ao a nyakago lerato leo le kgotlelelago tšohle. Lenyalong, lerato le dira gore balekane ba hlomphe mantšu a Jesu a rego: “Se Modimo a se tlemagantšego jokong go se be le motho yo a se aroganyago.” (Mat. 19:6) Ge Bakriste ba lego lenyalong ba ‘tlaišega nameng,’ ba swanetše go ikgopotša gore Jehofa ke motho wa bohlokwa lenyalong la bona. (1 Bakor. 7:28) Lentšu la gagwe le re ‘lerato le kgotlelela tšohle,’ le gona monna le mosadi bao ba bontšhago seka se ba tla kgomarelana gomme ba boloka lenyalo la bona le tiile.—Bakol. 3:14.

19. Ke’ng seo se ilego sa direga gare ga batho ba Modimo ka morago ga dikotsi tša tlhago?

¹⁹ Lerato le re thuša go kgotlelela dilo tšohle dinakong tša dikotsi tša tlhago. Go bile bjalo nakong ya ge karolo ya ka borwa bja Peru e hlaselwa ke tšhišinyego ya lefase gomme dikarolo tša Kgogometšaneng ya United States di senywa ke Ledimo la Katrina. Dikotsing tšeo, bana babo rena le dikgaetšedi ba bantši ba ile ba senyegelwa ke dintlo goba ba lahlegelwa ke dithoto. Lerato le ile la tutueletša phuthego ya lefase ka bophara go romela ditlabakelo tša thušo, gomme baithapi ba ile ba thuša ka go tsošološa dintlo tše di senyegilego le go lokiša Diholo tša Mmušo. Ditiro tše bjalo di hlatsela gore bana babo rena ba rata le go tshwenyega ka ba bangwe ka dinako tšohle le ka tlase ga maemo le ge e le afe.—Joh. 13:34, 35; 1 Pet. 2:17.

Lerato le ka Mohla ga le Fele

20, 21. (a) Ke ka baka la’ng lerato le le bohlokwa kudu? (b) Ke ka baka la’ng o ikemišeditše go phegelela tsela ya lerato?

²⁰ Gare ga batho ba Jehofa lehono, re bona bohlale bja go phegelela tsela e phalago tšohle ya lerato. Ka kgonthe, le atlega maemong ka moka. Ela hloko kamoo moapostola Paulo a gateletšego therešo yeo ka gona. Sa pele, o bontšhitše gore dimpho tša moya di tla fela le gore phuthego ya Bokriste e tla gola ka mo go feletšego. Ke moka o ile a phetha ka gore: “Eupša bjale se se dulago se le gona ke tumelo, kholofelo, lerato, tše tharo tše; eupša se segolo go di feta ka moka ke lerato.”—1 Bakor. 13:13.

²¹ Mafelelong, dilo tšeo re nago le tumelo go tšona di tla phethagala gomme go ka se sa nyakega gore re tšwele pele re di holofetše. Ka morago ga ge dilo ka moka di dirilwe tše mpsha, go ka se sa nyakega gore re be le kholofelo ya dilo tšeo re fagahletšego go di bona di phethagala. Eupša go thwe’ng ka lerato? Lona le ka se ke la fela. Le tla dula le le gona. Ge re phela ka mo go sa felego, re tla kgona go bona le go kwešiša e le ka kgonthe dibopego tše dingwe tša lerato la Modimo. Ge o dira thato ya Modimo ka go phegelela tsela e phalago tšohle ya lerato le le sa felego, o tla dula o le gona ka mo go sa felego.—1 Joh. 2:17.

O be o tla Araba Bjang?

• Ke ka baka la’ng re swanetše go itiša malebana le lerato le le fošagetšego?

• Lerato le ka re thuša go kgotlelela’ng?

• Ke ka kgopolo efe lerato le sa felego le ka mohla?

[Dipotšišo tša Thuto]

[Ntlhakgolo go letlakala 27]

Temana ya ngwaga ya 2010 e re: ‘Lerato le kgotlelela tšohle. Lerato le ka mohla ga le fele.’​—1 Bakor. 13:7, 8.

[Diswantšho go letlakala 25]

Go rata Modimo go re tutueletša go nea bohlatse

[Diswantšho go letlakala 26]

Lerato le le sa felego le thušitše bana babo rena le dikgaetšedi ba Malawi gore ba kgotlelele diteko