Rata Bana Beno le Dikgaetšedi ba Difoa!

BATHO ba Modimo lehono ke lapa le legolo la bana babo rena le dikgaetšedi ba moya bao bohwa bja bona bo thomilego go banna le basadi ba bogologolo. Ba ba akaretša Samuele, Dafida, Simisone, Rahaba, Moše, Aborahama, Sara, Noa le Abele. Gare ga bahlanka ba Jehofa ba botegago go na le ba bantši ba difoa. Ka mohlala, banyalani ba mathomo ba go ba Dihlatse tša Jehofa kua Mongolia e be e le difoa. Le gona, ka lebaka la potego ya badumedi-gotee le rena ba difoa ba kua Russia, re ile ra fenya ka semolao tshekong Kgorong ya Yuropa ya Ditshwanelo tša Batho.

Mehleng ya lehono, “mohlanka yo a botegago le wa temogo” o tšweleditše dikgatišo tša polelo ya diatla le go rulaganya gore go be le diphuthego gaešita le dikopano tše dikgolo le tše dinyenyane ka polelo ya diatla. (Mat. 24:45) Se se hotše difoa kudu. * Eupša na o kile wa ipotšiša gore go be go le bjang go difoa go ithuta ka Modimo wa therešo le go dira tšwelopele therešong ntle le dithulaganyo tše? Na o kile wa nagana ka seo wena o ka se dirago go thuša difoa tšeo di dulago tikologong ya geno?

Pele ga Ditokišetšo tša Mehleng Yeno

Go thwe’ng ge e ba o ka botšiša batho ba godilego ba difoa mabapi le diphihlelo tša bona ge ba be ba thoma go ithuta ka Modimo? Ba ka go botša kamoo ba ilego ba ikwa ka gona ge ba be ba ithuta gore Modimo o na le leina—kamoo go ithuta therešo yeo go fetotšego maphelo a bona le go ba thekga nywaga e mentši pele dibidio tša polelo ya diatla goba di-DVD di thoma go hwetšagala, e le go ba thuša go ithuta ditherešo tše di tseneletšego tša Mangwalo. Ba ka hlalosa kamoo go bego go le ka gona ge diboka tša Bokriste di be di sa swarwe goba di sa fetolelwe ka polelo ya diatla. Go e na le moo, motho yo mongwe o be a dula kgaufsi le bona gomme a ba ngwalela dintlha letlakaleng e le go ba thuša go kwešiša seo se bolelwago. Ngwanabo rena yo mongwe wa sefoa o ile a ithuta ditherešo tša Beibele ka tsela yeo ka nywaga e šupago pele go e-ba le yoo a ka fetolelago dipolelo tše ka polelo ya diatla.

Bana babo rena ba bangwe ba godilego ba difoa ba gopola kamoo go bego go le thata ka gona go šoma tšhemo ya batho bao ba kwago. Ka letsogong le lengwe ba be ba swara pampišana yeo e go yona go ngwadilwego thero e bonolo ya modiro wa ntlo le ntlo. Ka go le lengwe ba be ba swara dimakasine tša morago-rago tša Morokami le Phafoga! Go be go le thata go swara thuto ya Beibele le motho yo mongwe wa sefoa ba diriša feela dipuku tšeo di gatišitšwego tšeo go bego go se na le o tee wa bona yo a bego a di kwešiša gabotse. Bagoeledi ba bangwe ba godilego ba difoa ba gopola kamoo ba ilego ba tlalelana ka gona ge ba be ba sa kwešišwe ke batho bao ba bolelago le bona gomme ba sa kgone go tšwela pele ba boledišana le bona ka ditherešo tša Beibele. Le gona, ba tseba gore go bjang go rata Jehofa e le ka kgonthe eupša o palelwe ke go bontšha lerato leo ka kgodišego. Ka baka la’ng? Ka gobane ba be ba sa kgodišege gore kwešišo ya bona e nepagetše ditabeng tše itšego.

Go sa šetšwe mapheko ao bana babo rena le dikgaetšedi ba difoa ba ile ba lebeletšana le ona ba ile ba dula ba botega. (Jobo 2:3) Ba ile ba dula ba letetše Jehofa ka tlhologelo. (Ps. 37:7) Ga bjale o ba šegofatša go feta ka tsela yeo bontši bja bona ba bego ba letetše.

Ela hloko maiteko a ngwanabo rena yo mongwe wa sefoa yo e lego monna wa lapa e bile e le tate. Pele dibidio tša polelo ya diatla di hwetšagala,  o be a swara thuto ya lapa ka potego. Morwa wa gagwe o gopola ka gore: “Go be go dula go le thata kudu go tate go swara thuto ya lapa, ka gobane sohle seo a bego a swanetše go re ruta sona se be se e-tšwa dipukung tše gatišitšwego. Gantši o be a sa kwešiše gabotse taba e ngwadilwego. Le rena bana re be re dira gore thuto e mo thatafalele le go feta. Re be re kitimela go mmotša ge a se a hlalosa dilo gabotse. Go sa šetšwe tše ka moka, ka mehla o be a swara thuto ya lapa. O be a bona go ithuta ga rena selo se itšego ka Jehofa go le bohlokwa kudu go feta go ipakela dihlong ka lebaka la go se kwešiše ga gagwe Seisemane gabotse.”

Mohlala o mongwe ke wa Richard, ngwanabo rena yo a lego nywageng ya bo-70 yoo e lego sefoa e bile e le sefofu yo a dulago Brooklyn, New York, kua U.S.A. Richard o tsebja ka go ba gona dibokeng tša Bokriste ka mehla. E le gore a be gona, o be a sepela ka setimela gomme a bala makga ao ka ona setimela se emago e le gore a kgone go tseba moo a swanetšego go fologa gona. Maregeng a mangwe, go ile gwa ba le ledimo le legolo la lehlwa moo diboka di ilego tša se swarwe. Ditho ka moka tša phuthego di ile tša tsebišwa, eupša ka tsela e itšego Richard a se botšwe ka seo. Ge bana babo rena ba lemoga seo se diregilego ba ile ba mo nyaka gomme ba mo hwetša a eme ka ntle ga Holo ya Mmušo, a letile ka go se fele pelo gore mejako e bulwe. Ge a be a botšišwa gore ke ka lebaka la’ng a ile a šwahla ledimo le o ile a araba ka gore: “Ke rata Jehofa.”

O tla Dira’ng?

Na go na le batho ba difoa bao ba dulago tikologong ya geno? Na o ka ithuta polelo ya diatla e le gore o kgone go boledišana le bona? Batho ba difoa gantši ba na le kgaugelo e bile ga ba fele pelo ge ba ruta batho polelo ya bona. O ka kopana le motho wa sefoa go sa letelwa goba wa kopana le yena bodireding. O tla dira’ng? Leka go boledišana le yena. Diriša boitšhišinyo bja mmele, mo ngwalele seo o nyakago go mmotša sona, mo thalele diswantšho goba o diriše mekgwa ye ka moka. Le ge e ba motho yoo a ka bontšha gore ga a na kgahlego ya go ithuta therešo, botša Hlatse e nngwe ya sefoa goba ngwanabo rena yoo a tsebago polelo ya diatla mabapi le ketelo yeo. Molaetša wo e ka ba o ipiletšago go motho wa sefoa ge o fetišetšwa go yena ka polelo ya diatla.

Mohlomongwe o ithuta polelo ya diatla gomme o kopanela le phuthego ya polelo ya diatla. O ka kaonefatša bjang bokgoni bja gago bja go bolela le go kwešiša polelo ya diatla? Le ge go ka ba go e-na le bagoeledi bao ba kwago ka phuthegong ya gabo lena, ke ka baka la’ng o sa diriše polelo ya diatla ge o bolela le bona. Se se tla go thuša go nagana bjalo ka difoa, ke gore, ka polelo ya diatla. Ka dinako tše dingwe o ka lekega gore o bolele go e na le gore o diriše polelo ya diatla. Le ga go le bjalo, ge o ithuta leleme le lengwe o swanetše go kgotlelela e le gore o tle o kgone go le bolela ka thelelo.

Go katanela go diriša polelo ya diatla go bontšha gore re rata le go hlompha bana babo rena le dikgaetšedi ba difoa. Nagana kamoo difoa di ikwago di le tlalelong ka gona letšatši le letšatši ge di sa kgone go kwešiša batho bao di kopanago le bona mošomong goba sekolong. Ngwanabo rena yo mongwe wa sefoa o itše: “Letšatši le lengwe le lengwe batho ka moka bao ke kopanago le bona ga ba kgone go bolela polelo ya diatla.  Gantši ke ikwa ke lewa ke bodutu e bile ke sa amogelege gomme ke ikwa ke ferekane e bile ke galefile. Ga ke kgone go hlalosa tsela yeo ke ikwago ka yona ka dinako tše dingwe.” Diboka tša rena e swanetše go ba mothopo wa lethabo moo bana babo rena le dikgaetšedi ba difoa ba ka hwetšago dijo tša moya le go thabela dipoledišano tše borutho le segwera.—Joh. 13:34, 35.

Ga se ra swanela go hlokomologa dihlopha tše dinyenyane tša difoa tšeo di kopanelago le diphuthego tša batho bao ba kgonago go bolela. Diboka di a fetolelwa bakeng sa bona. E le gore ba kgone go kwešiša gabotse seo go bolelwago ka sona, ditho tša phuthego tšeo e lego difoa di dula ditulong tša ka pele Holong ya Mmušo. Se se ba thuša go bona bobedi mofetoledi le seboledi gabotse ntle le go širwa ke motho. Diphihlelo di bontšha gore ditho ka moka tša phuthego di tlwaelana le boemo bjo ka pela gomme ga bo di šitiše. Ditokišetšo tše di šoma gape le dikopanong tše dikgolo le tše dinyenyane tšeo go tšona dipolelo di fetolelwago polelong ya diatla. Ditho tša phuthego di swanetše go retwa ka ge di šoma ka thata go fetolela ka tsela yeo motho yo a bolelago polelo ya diatla a ka fetišetšago tsebišo ka yona—ka tsela ye e kwagalago le ya tlhago.

Mohlomongwe o phuthegong yeo go yona go nago le sehlopha sa polelo ya diatla goba go nago le ba sego kae ba difoa bao diboka di fetolelwago bakeng sa bona. O ka dira’ng go bontšha gore o kgahlegela bana babo rena ba le dikgaetšedi ba difoa? Ba laletše go tla lapeng la gago. Ge e ba go kgonega, ithute ditsela tše sego kae tša bolela ka diatla. O se ke wa boifišwa ke gore o ka se kgone go boledišana le bona. O tla hwetša tsela ya go boledišana le bona, gomme go bontšha lerato mo go bjalo go tla feleletša ka dinako tše di thabišago. (1 Joh. 4:8) Dihlatse-gotee le rena tša difoa di na le mo gontši moo di ka go abelanago le rena. Ba na le bokgoni bja go bolela, ba na le temogo gomme ba na le metlae. Ngwanabo rena yo mongwe yoo batswadi ba gagwe e lego difoa o re: “Bophelo bja-ka ka moka ke be ke phela le batho ba difoa, gomme ba nthutile dilo tšeo nka se kgonego go ba leboga ka mo go lekanego bakeng sa tšona. Re ka ithuta mo gontši go bana babo rena le dikgaetšedi ba difoa.”

Jehofa o rata barapedi ba gagwe ba botegago go akaretša le ba difoa. Mohlala wa bona wa potego le kgotlelelo o tlaleletša bobotseng bja mokgatlo wa Jehofa. E-ka re ka rata bana babo rena le dikgaetšedi ba difoa!

[Mongwalo wa tlase]

[Seswantšho go letlakala 31]

Molaetša wa Mmušo e ka ba o ipiletšago kudu go sefoa ge se o botšwa ka polelo ya diatla

[Seswantšho go letlakala 32]

Diboka tša rena e swanetše go ba mothopo wa lethabo moo bana babo rena le dikgaetšedi ba difoa ba kgothatšwago moyeng