Lentšu la Jehofa le a Phela

Dintlha tše Kgolo go tšwa Mangwalong a Yago go Bagalatia, Baefeso, Bafilipi le Bakolose

KA MORAGO ga go kwa gore Bakriste ba be ba aroga borapeding bjo bo sekilego ka baka la tutuetšo ya balatedi ba Bojuda, moapostola Paulo o ngwalela “diphuthego tša Galatia” lengwalo le matla. (Bagal. 1:2) Lengwalo le le ngwadilwe mo e ka bago ka 50-52 C.E., gomme le hupere keletšo e lebanyago le kgothatšo e matla.

Nywageng e ka bago e lesome ka morago, ge a be a le Roma e le “mogolegwa wa Kriste Jesu,” Paulo o ngwalela diphuthego tša Efeso, Filipi le Kolose gomme o di nea keletšo e kwagalago le kgothatšo e lerato. (Baef. 3:1) Le rena lehono re ka holwa ke go ela hloko molaetša wa dipuku tša Beibele tša Bagalatia, Baefeso, Bafilipi le Bakolose.—Baheb. 4:12.

‘BA BOLELWA BA LOKILE’—BJANG?

(Bagal. 1:1–6:18)

Ka ge balatedi ba Bojuda ba be ba nyaka go senya Paulo leina, o šireletša boemo bja gagwe bjalo ka moapostola ka go bolela dintlha tše itšego ka bophelo bja gagwe. (Bagal. 1:11–2:14) Paulo o lwantšha dithuto tša bona tša maaka ka go bolela ntlha ye: “Motho ga a bolelwe a lokile ka baka la mediro ya molao, eupša o bolelwa a lokile ka tumelo go Kriste Jesu.”—Bagal. 2:16.

Paulo o re Kriste o ‘lokolotše ka theko bao ba lego tlase ga molao’ gomme o ba lokolletše go thabela tokologo ya Bokriste. O nea Bagalatia temošo e matla e rego: “Emang le tiile, gomme le se ke la itumelela go tlemelelwa gape jokong ya bokgoba.”—Bagal. 4:4, 5; 5:1.

Dipotšišo tša Mangwalo di a Arabja:

3:16-18, 28, 29​—Na kgwerano ya Aborahama e sa dutše e šoma? Ee, e sa dutše e šoma. Kgwerano ya Molao e be e tlaleletša, e sego go tšeela kgwerano ya Modimo le Aborahama sebaka. Ka gona, kgwerano ya Aborahama e ile ya dula e šoma le ka morago ga ge Molao o “fedišitšwe.” (Baef. 2:15) Dikholofetšo tša yona di fetišetšwa go “peu” ya kgonthe ya Aborahama—Kriste Jesu, yo e lego karolo e kgolo ya peu, le go bao e lego “ba Kriste.”

6:2​—“Molao wa Kriste” ke’ng? Molao wo o akaretša dilo ka moka tšeo Jesu a di rutilego le go di laela. Ka mo go kgethegilego o akaretša taelo ya gore “re ratane.”—Joh. 13:34.

6:8​—Ke bjang re “bjalelago moya”? Re dira se ka go phela ka tsela yeo e dumelelago moya wa Modimo go šoma go rena ntle le tšhitišo. Go bjalela moya go akaretša go tšea karolo ka pelo ka moka medirong yeo e dirago gore moya o šome.

Seo re Ithutago Sona:

1:6-9. Bagolo ba Bakriste ba swanetše go gata mogato ka ntle le go dika-dika ge mathata a tsoga ka phuthegong. Ka go bea mabaka ka tsela e kwagalago gotee le go diriša Mangwalo, ba ka kgona go ganetša maaka kapejana.

2:20. Topollo ke mpho yeo Modimo a re filego yona. Re swanetše go ithuta go e lebelela ka tsela yeo.—Joh. 3:16.

5:7-9. Ditlwaelano tše mpe di ka re ‘palediša go tšwela pele re e-kwa therešo.’ Re bontšha bohlale ge re di phema.

6:1, 2, 5. Bao ba nago le “ditshwanelego tša moya” ba ka re thuša go rwala maima, a bjalo ka selo seo se re tshwenyago goba seo se re imelago ka ge re ile ra gata kgato e fošagetšego re sa tsebe. Lega go le bjalo, ge go tliwa tabeng ya go rwala  boikarabelo bja rena bja moya, re swanetše go bo rwala ka borena.

‘GO KGOBOKANYA GOTEE DILO TŠOHLE GO KRISTE’

(Baef. 1:1–6:24)

Ge a gatelela sehlogo sa botee bja Bokriste lengwalong la gagwe le le yago go Baefeso, Paulo o bolela ka “taolo tekanyong e tletšego ya dinako tše di beilwego, e lego go kgobokanya gotee gape dilo tšohle go Kriste, dilo tše di lego magodimong le dilo tše di lego lefaseng.” Kriste o neile “dimpho tšeo e le go batho” go thuša bohle go “fihlelela botee tumelong.”—Baef. 1:10; 4:8, 13.

E le gore ba tumiše Modimo le go godiša botee, Bakriste ba swanetše go ‘apara motho yo mofsa’ gomme ba ‘ikokobetše seng sa bona ka go boifa Kriste.’ Le gona ba swanetše go ‘emela maano a bohwirihwiri a Diabolo ba tiile’ ka go apara ditlhamo tše feletšego tša moya.—Baef. 4:24; 5:21; 6:11.

Dipotšišo tša Mangwalo di a Arabja:

1:4-7​—Bakriste ba tloditšwego ba kgethilwe e sa le pele bjang nako e telele pele ba ka belegwa? Ba kgethilwe e sa le pele e le sehlopha, e sego e le motho ka o tee ka o tee. Se se diregile pele lefase la batho ba sebe le e ba gona. Boporofeta bjo bo begilwego go Genesi 3:15, bjoo bo boletšwego pele go ka ingwa motho le ge e le ofe wa sebe, bo akaretša morero wa Modimo wa gore balatedi ba itšego ba Kriste ba buše le yena legodimong.—Bagal. 3:16, 29.

2:2​—Ke bjang moya wa lefase o swanago le moya wo re o hemago, gomme mothopo wa matla a wona ke ofe? “Moya wa lefase”—moya wa go ipuša le wa go se kwe—o gohle bjalo ka moya wo re o hemago. (1 Bakor. 2:12) Matla a wona a theilwe bokgoning bja wona bja go tutuetša le go phegelela.

2:6​—Ke bjang Bakriste ba tloditšwego ba ka bago “mafelong a legodimong” mola ba sa le lefaseng? Mo polelwana e rego “mafelong a legodimong” ga e šupe go bohwa bja bona bja legodimong bjoo ba bo holofeditšwego. Go e na le moo, e šupa go boemo bja bona bjo bo phagamego bja moya, bjoo bo tlišwago ke go ‘swawa ga bona ka moya o mokgethwa wo o holofeditšwego.’—Baef. 1:13, 14.

Seo re Ithutago Sona:

4:8, 11-15. Jesu Kriste o ile a “tšea mathopša,” ke gore, a tloša batho taolong ya Sathane gore a ba diriše e le dimpho gore go agwe phuthego ya Bokriste. ‘Ka lerato re ka gola dilong tšohle go . . . Kriste’ ka go kwa le go ikokobeletša bao ba etelelago pele gare ga rena le ka go dira ka go dumelelana le dithulaganyo tša phuthego.—Baheb. 13:7, 17.

5:22-24, 33. Go tlaleletša tabeng ya gore mosadi o ikokobeletša monna wa gagwe, mosadi o bile o swanetše le go mo hlompha. O dira se ka go bonagatša “moya wo o homotšego le o boleta” le ka go katanela go hlompha monna wa gagwe ka go bolela gabotse ka yena, le go šoma ka thata go dira gore diphetho tša monna wa gagwe di atlege.—1 Pet. 3:3, 4; Tito 2:3-5.

5:25, 28, 29. Go swana le ge a ‘iphepa,’ monna o swanetše go hlokomela mosadi wa gagwe gabotse—nameng, maikwelong le moyeng. Le gona o swanetše go babalela mosadi wa gagwe ka go fetša nako e lekanego le yena le go mo swara ka tsela e borutho, ka dipolelo le ka ditiro.

6:10-13. Gore re lwantšhe madira a batemona, re swanetše go apara ditlhamo tše feletšego tša moya tše di tšwago go Modimo.

‘TŠWELANG PELE LE SEPELA KA THULAGANYO’

(Bafil. 1:1–4:23)

Paulo o boletše kudu ka lerato lengwalong la gagwe le le yago go Bafilipi. O re: “Se ke seo ke tšwelago pele ke se rapelela, gore lerato la lena le gole ka mo go oketšegago ka tsebo e nepagetšego le temogo e tletšego.” O ba thuša go phema molaba wa go ikholofela kudu ka go ba nea temošo e rego: “Dulang le šomela phološo ya lena ka go boifa le go thothomela.”—Bafil. 1:9; 2:12.

Paulo o kgothaletša bao ba gotšego ka tsebo gore ba phegelele “pakaneng ya moputso wa  pitšo ya godimo ya Modimo.” O re: “Go fihla moo re šetšego re tšwetše pele, anke re tšweleng pele re sepela ka thulaganyo ka wona mokgwa wo.”—Bafil. 3:14-16.

Dipotšišo tša Mangwalo di a Arabja:

1:23​—Paulo o be a gateletšwa ke ‘dilo dife tše pedi,’ gomme ke go “lokollwa” gofe moo a bego a go kganyoga? Ka baka la maemo ao a bego a le go ona, Paulo o be a gateletšwa ke dikgonagalo tše pedi tšeo a bego a lebane le tšona: bophelo goba lehu. (Bafil. 1:21) Gaešita le ge a sa bolele ka seo a tlago go se kgetha, o tsebatša seo a se kganyogago—“go lokollwa le go ba le Kriste.” (Bafil. 3:20, 21; 1 Bathes. 4:16) Go “lokollwa” nakong ya go ba gona ga Kriste go tla feleletša ka gore Paulo a hwetše moputso woo Jehofa a mo lokišeditšego wona.—Mat. 24:3.

2:12, 13​—Ke bjang Modimo a dirago gore re ‘rate re be re dire’? Moya wa Jehofa o mokgethwa o ka šoma dipelong le menaganong ya rena go godiša kganyogo ya rena ya go dira seo re ka se kgonago ge re mo direla. Ka gona, o re thuša go ‘šomela phološo ya rena.’

Seo re Ithutago Sona:

1:3-5. Gaešita le ge Bafilipi ba be ba se na sa bona, ba re beetše mohlala o mobotse wa go nea ka seatla se se bulegilego.—2 Bakor. 8:1-6.

2:5-11. Ka ge mohlala wa Jesu o bontšha, boikokobetšo ga se seka sa bofokodi eupša ke sa matla a boitshwaro. Go feta moo, Jehofa o godiša ba ikokobeditšego.—Die. 22:4.

3:13. “Dilo tša morago” e ka ba dilo tše bjalo ka mošomo o lefago gabotse, tšhireletšego ya go ba wa ka lapeng leo le humilego, goba gaešita le dibe tše dikgolo tša nakong e fetilego tšeo re itshotšego ka baka la tšona gomme ra ‘hlatswiwa le go hlweka.’ (1 Bakor. 6:11) Re swanetše go lebala dilo tše, ke gore, re tlogele go tshwenyega ka tšona, gomme re ‘obelele dilo tša pele.’

‘GO TSEPAMIŠWA TUMELONG’

(Bakol. 1:1–4:18)

Lengwalong la gagwe le le yago go Bakolose, Paulo o pepentšha dikgopolo tše fošagetšego tša barutiši ba maaka. O bontšha gore phološo ga se ya ithekga ka dinyakwa tša Molao, eupša e ithekgile ka gore ‘ba tšwele pele tumelong.’ Paulo o kgothaletša Bakolose gore ba ‘tšwele pele ba sepela boteeng le Kriste, ba tsemile medu gomme ba agwa go yena e bile ba tsepamišwa tumelong.’ Go tsepamišwa mo go bjalo go be go tla ba thuša bjang?—Bakol. 1:23; 2:6, 7.

Paulo o ngwala gore: “Ka ntle le dilo tše ka moka, aparang lerato, gobane ke setlemo se se phethagetšego sa botee. Gape, anke khutšo ya Kriste e buše dipelong tša lena.” Moapostola o ba botša gore: “Selo le ge e le sefe seo le se dirago, se direng ka moya ka moka bjalo ka ge eka le se direla Jehofa, e sego batho.” O bolela mabapi le bao ba lego ka ntle ga phuthego gore: “Tšwelang pele le sepela ka bohlale go” bona.—Bakol. 3:14, 15, 23; 4:5.

Dipotšišo tša Mangwalo di a Arabja:

2:8​—“Dilo tša motheo tša lefase” tšeo Paulo a lemošitšego ka tšona ke dife? Ke dilo tša lefase la Sathane—dilo tša motheo goba ditekanyetšo tšeo di le bopago, di le hlahlago goba di le tutuetšago. (1 Joh. 2:16) Tšeo di akaretšwago go dilo tše ke filosofi, go rata dilo tše di bonagalago le madumedi a maaka a lefase le.

4:16​—Ke ka baka la’ng lengwalo leo le yago go Balaoditsea e se karolo ya Beibele? Se e ka ba e le ka gobane lengwalo le be le se na tsebišo e bohlokwa bakeng sa rena lehono. Goba e ka ba e le gore le be le bušeletša dintlha tšeo di lego ka mangwalong a mangwe a makgethwa.

Seo re Ithutago Sona:

1:2, 20. Topollo, yeo Modimo a e neilego ka baka la botho bja gagwe bjo bo sa swanelago, e ka hlwekiša matswalo a rena le go re nea khutšo ya ka gare.

2:18, 23. “Boikokobetšo bja bofora”—boikokobetšo bja go leka go kgahliša batho mohlomongwe ka go gana dilo tše di bonagalago goba ka go se babalele mmele—bo bontšha gore motho o ‘ikgogomoša ka tsela ya gagwe ya go nagana ya nama.’