Kgatišo e Mpsha e Ithutwago ya Morokami

MAKASINE wo woo o o balago ke tokollo ya mathomo ya kgatišo e ithutwago ya Morokami. Re rata go hlalosa tše dingwe tša dikarolo tša sebopego se sefsa sa makasine wo.

Kgatišo e ithutwago e gatišetšwa Dihlatse tša Jehofa gotee le barutwana ba Beibele bao ba tšwelago pele gabotse. E tla gatišwa gatee ka kgwedi gomme e tla ba le dihlogo tše ka bago tše nne goba tše hlano tše ithutwago. Lenaneo la dihlogo tše tše ithutwago le hwetšwa go letlakala la ka ntle la makasine. Go fapana le kgatišo ya batho bohle ya Morokami, kgatišo e ithutwago e ka se be le diswantšho tše fapa-fapanego letlakaleng la ka ntle la tokollo e nngwe le e nngwe, ka ge e ka se sepedišwe bodireding bja tšhemo.

Go letlakala 2 la makasine wo, go na le kakaretšo e kopana e holago kudu ya morero wa sehlogo se sengwe le se sengwe se ithutwago goba lelokelelo la tšona gotee le lelokelelo la dihlogo tše dingwe tše sa ithutwego. Baswari ba Thuto ya Morokami ba tla holwa kudu ke karolo ye ge ba lokišetša dihlogo tšeo ba tlago go di ahla-ahla ka tsela e nago le morero sebokeng sa phuthego.

O tla lemoga gore dihlogo tše ithutwago ke tše dikopana go se nene go feta kamoo di bego di le ka gona. Ka baka leo, go tla ba le nako e oketšegilego ya go hlahloba mangwalo a motheo nakong ya Thuto ya Morokami. Re go kgothatša ka borutho gore o lebelele mangwalo ka moka a bontšhitšwego bekeng e nngwe le e nngwe. Mangwalo a mangwe a bontšhitšwego a swailwe ka gore “bala,” gomme a swanetše go balwa le go ahla-ahlwa nakong ya Thuto ya Morokami. Mangwalo a mangwe le ona a ka balwa ge nako e dumela. Dihlogong tše dingwe, o ka hwetša mangwalo a swailwe gore “bapiša.” Ka ge mangwalo a bjalo a sa hlatsele ka go lebanya dintlha tše kgolo tše di lego serapeng, gantši a ka se ke a balwa sebokeng sa phuthego. Lega go le bjalo, mangwalo ao a swailwego gore “bapiša,” a na le tsebišo e kgahlišago ya tlaleletšo, goba a ka thekga ka tsela e sa lebanyego dintlha tšeo di ahla-ahlwago. Re go kgothaletša gore o a bale ge o dutše o lokišetša Thuto ya Morokami. Mohlomongwe o ka kgona go a akaretša ge o nea ditlhaloso.

Pego ya ngwaga le ngwaga e ka se sa ba gona ka gare ga Morokami. Go thoma ka 2008, e tla tšwelela e le letlakala la ka gare ka go Tirelo ya Rena ya Mmušo le go tšwelela ka go Yearbook. Lega go le bjalo, ka ge go bontšhitšwe ka mo godimo, kgatišo e ithutwago e na le dihlogo tše dingwe tše sa ithutwego. Gaešita le ge tše dintši tša tšona di ka se ahla-ahlwe sebokeng sa phuthego, o kgothaletšwa go di bala ka kelohloko. Le tšona di hupere dijo tša moya tše tšwago go “mohlanka yo a botegago le wa temogo.”—Mat. 24:45-47.

Ge re ruma, kgatišo e ithutwago le kgatišo ya batho bohle tša Morokami ga se dimakasine tše pedi tše sa swanego. Bobedi bja tšona ke Morokami o Tsebatša Mmušo wa Jehofa. Go letlakala 2, di na le dirapa tše di swanago tšeo di hlalosago morero wa Morokami. Bobedi bja tšona di tla akaretšwa ka bolumong e tlemilwego ya ngwaga le ngwaga. Karolo ya “Na o a Gopola?” yeo e tlago go tšwelela ka kgatišong e ithutwago, e tla ba le ditaba tše tšwago ka dikgatišong tše ka bobedi.

Ga e sa le go tloga ka 1879, Morokami o be o dutše o tsebatša therešo mabapi le Mmušo wa Modimo ka potego, gaešita le dinakong tša dintwa, mathata a tša boiphedišo gotee le tlaišo. Re rapelela gore ka tšhegofatšo ya Jehofa, Morokami o tšwele pele o dira bjalo le ka sebopego sa wona se sefsa. Re rapelela le gore Jehofa a go šegofatše, wena mmadi, ge o dutše o diriša ka botlalo kgatišo e mpsha e ithutwago ya Morokami.