Na Mahlo A Modimo A A Go Bona?

NA JEHOFA, Mmopi yo Mogolo, o na le bokgoni bja go bona? Ee o nabjo! Beibele e bea mabaka ka mo go kwagalago ge e re: “A . . . Mmopi wa leihlô Le re xa a bone?” (Psalme 94:9) Jehofa o feta motho kgole ka go bona. Ga a fo bona sebopego sa rena sa ka ntle feela eupša gape ke “Mo-leka-pelo,” e bile o kgona go “hlatha dipelo.” (Diema 17:3; 21:2) Ee, o na le bokgoni bja go hlahloba menagano ya rena, maikemišetšo gotee le dikganyogo tša rena tša ka gare-gare.

Jehofa o lemoga mathata ao re ka lebeletšanago le ona bophelong gomme o araba dithapelo tša rena. Mopsalme o ngwadile gore: “Mahlô a Morêna a bôna baloki; ’tsêbê tša xaxwe di kwa xe ba lla. Morêna ó kxaufsi le ba ’pelo di rôbexilexo; ó phološa meôya e kxobetsi.” (Psalme 34:15, 18) Ke mo go homotšago gakaakang go tseba gore Jehofa o kwešiša maemo a rena e bile o kwa dithapelo tša rena tše tšwago pelong!

Jehofa Modimo o bona le ditiro tšeo di dirwago ka sephiring. Ee, “dilo ka moka di hlobotše e bile di molaleng mahlong a yo re ikarabelago go yena.” (Baheberu 4:13) Ka gona go sa šetšwe gore ditiro tša rena di lokile goba ga tša loka, Modimo o a di bona. (Diema 15:3) Ka mohlala, Genesi 6:8, 9 e re “Noaxe yêna ó hweditše Modimo à mo lebeletše ka botho” le gore e be “é le wa xo sepela à na le Modimo.” Ee, Noa o ile a amogelwa ke Jehofa le go šegofatšwa ke yena ka gobane o be a e-kwa e bile a tšeela godimo melao ya motheo ya Modimo ya go loka. (Genesi 6:22) Ka mo go fapanego, batho ba mehleng ya Noa e be e le ba bašoro e bile ba gobogile boitshwarong. Modimo o be a sa hlokomologe boemo bjo. O ile “a bôna bokxôpô bya batho bò xodile mo lefaseng, le tirô ka moka tša diakanyô tša dipelô tša bôná è le bobe fêla ka mehla.” Mafelelong, Jehofa o ile a tliša tshenyego go batho ba kgopo eupša a phološa Noa le lapa la gagwe.—Genesi 6:5; 7:23.

Na Jehofa o tla go lebelela ka kamogelo? Ee, mahlo a Jehofa “a tsepeletše lefase ka moka, xore a bônatšê matla a xaxwe ka bao ba lebeletšexo Yêna ka pelo ka moka.” (2 Koronika 16:9) Kgaufsinyana o tla tloša ba babe ka moka gape mo lefaseng gomme a phološa baloki.—Psalme 37:10, 11.