Na o na le Pono e Swanago le ya Jehofa ka Dilo tše Kgethwa?

“Le phakgame . . . gore go se ke gwa ba le seotswa le ge e le motho yo a sa lebogego dilo tše kgethwa.”—BAHEBERU 12:15, 16.

1. Ke boemo bofe bja kgopolo bja gona bjale bjoo bahlanka ba Jehofa ba sa bo thekgego?

LEFASE ka kakaretšo le tšwela pele go hlokomologa dilo tše kgethwa. Setsebi sa tša leago sa Mofora e lego Edgar Morin se boletše gore: “Metheo ka moka yeo melao ya boitshwaro e theilwego go yona—Modimo, tlhago, naga, histori le go bokgoni bja go nagana—e thomile go belaelwa. . . . Batho ba ipeela melao ya bona.” Se se bonagatša “moya wa lefase,” goba “moya woo bjale o šomago go barwa ba go se kwe.” (1 Bakorinthe 2:12; Baefeso 2:2) Bao ba ineetšego go Jehofa gomme ka go rata ba ikokobeletšago bobuši bja gagwe ga ba thekge moya woo wa go hloka tlhompho. (Baroma 12:1, 2) Go e na le moo, bahlanka ba Modimo ba lemoga karolo ya bohlokwa yeo bokgethwa bo e bapalago borapeding bja bona go Jehofa. Ke dilo dife maphelong a rena tšeo di swanetšego go ba tše kgethwa? Sehlogo se se tla ahla-ahla dilo tše hlano tšeo e lego tše kgethwa go bahlanka ba Modimo ka moka. Sehlogo se se latelago se tla lebiša tlhokomelo bokgethweng bja diboka tša rena tša Bokriste. Eupša ge e le gabotse lentšu “kgethwa” le bolela’ng?

2, 3. (a) Mangwalo a gatelela go kgethega ga Jehofa bjang? (b) Ke bjang re lebelelago leina la Jehofa e le selo se sekgethwa?

² Ka Seheberu sa Beibele, lentšu “kgethwa” le fetiša kgopolo ya go beelwa ka thoko. Borapeding, “kgethwa” e šoma selong seo se sa dirišwego ka tsela e tlwaelegilego, goba seo se lebelelwago e le se se kgethegilego. Jehofa ke yo mokgethwa ka kgopolo e feletšego. O bitšwa gore ke “Yêna Mokxêthwa.” (Diema 9:10; 30:3) Isiraeleng ya bogologolo, moperisita yo a phagamego o be a rwala lematšana la gauta leo le tlemeletšwego kefeng ya gagwe leo le ngwadilwego gore, “Bokgethwa ke bja Jehofa.” (Ekisodo 28:36, 37, NW) Mangwalo a tšweletša Bakerubi le Baserafi ba legodimong bao ba dikologilego sedulo sa bogoši sa Jehofa ba goeletša ka gore: “Mokxêthwa, Mokxêthwa, Mokxêthwa, ké Morêna.” (Jesaya 6:2, 3; Kutollo 4:6-8) Go boeletšwa ga lentšu le go bontšha gore Jehofa ke yo mokgethwa, o hlwekile e bile o sekile ka mo go fetišišago. Ge e le gabotse, ke Mothopo wa bokgethwa ka moka.

³ Leina la Jehofa ke le lekgethwa. Mopsalme o goeleditše ka gore: “A ba rêtê ’ina l’axo le lexolo le le šiišaxo, ka xobane è le le lekxêthwa.” (Psalme 99:3) Jesu o re rutile go rapela ka gore: “Tatago rena wa magodimong, leina la gago a le kgethagatšwe.” (Mateo 6:9) Mmago Jesu wa lefaseng, e lego Maria, o ile a goeletša ka gore: “Moya wa-ka o godiša Jehofa . . . Yo matla o ntiretše ditiro tše kgolo, leina la gagwe ke le lekgethwa.” (Luka 1:46, 49) Bjalo ka bahlanka ba Jehofa, re lebelela leina la gagwe e le selo se sekgethwa gomme re phema go dira selo le ge e le sefe seo se ka tlišago thogako leineng leo le lekgethwa. Ka godimo ga moo, re na le pono e swanago le ya Jehofa ka bokgethwa, ke gore dilo tšeo a di lebelelago e le tše kgethwa le rena re di lebelela bjalo.—Amosi 5:14, 15.

Lebaka Leo ka Lona re Hlomphago Jesu ka mo go Tseneletšego

4. Ke ka baka la’ng Beibele e hlalosa Jesu e le “Mokgethwa”?

⁴ Bjalo ka “morwa yo a tswetšwego a nnoši”  wa Modimo yo mokgethwa, Jehofa, Jesu o bopilwe e le yo mokgethwa. (Johane 1:14; Bakolose 1:15; Baheberu 1:1-3) Ka baka leo o bitšwa “Mokgethwa wa Modimo.” (Johane 6:69) O ile a tšwela pele e le yo mokgethwa ge bophelo bja gagwe bo fetišetšwa lefaseng go tšwa legodimong ka gobane Maria o ile a belega Jesu ka matla a moya o mokgethwa. Morongwa o be a mmoditše gore: “Moya o mokgethwa o tla theogela go wena . . . yo a tlago go belegwa o tla bitšwa yo mokgethwa, Morwa wa Modimo.” (Luka 1:35) Thapelong ya bona go Jehofa, Bakriste ba kua Jerusalema ka makga a mabedi ba ile ba bitša Morwa wa Modimo gore ke “mohlanka wa gago yo mokgethwa Jesu.”—Ditiro 4:27, 30.

5. Ke morero ofe o mokgethwa woo Jesu a o phethagaditšego ge a be a le mo lefaseng, gona ke ka baka la’ng madi a gagwe e le a bohlokwa?

⁵ Jesu o be a e-na le morero o mokgethwa woo a bego a swanetše go o phetha ge a be a le mo lefaseng. Nakong ya ge a kolobetšwa ka 29 C.E., Jesu o ile a tlotšwa bjalo ka Moperisita yo a Phagamego wa tempele ya Jehofa e kgolo ya moya. (Luka 3:21, 22; Baheberu 7:26; 8:1, 2) Go oketša moo, o be a swanetše go hwa lehu la sehlabelo. Madi a gagwe ao a tšholotšwego a be a tla nea topollo yeo batho ba badiradibe ba bego ba tla phološwa ka yona. (Mateo 20:28; Baheberu 9:14) Ka gona re lebelela madi a Jesu e le selo se sekgethwa, e le a “bohlokwa.”—1 Petro 1:19.

6. Re lebelela Kriste Jesu bjang, gona ka baka la’ng?

⁶ Ge a bontšha gore re hlompha Kgoši ya rena le Moperisita yo a Phagamego yo e lego Kriste Jesu ka tlhompho e tseneletšego, moapostola Paulo o ngwadile gore: “Modimo o . . . phagamišeditše [Morwa wa gagwe] boemong bja godimo gomme ka botho a mo nea leina le lego ka godimo ga leina le ge e le lefe le lengwe, e le gore letolo le lengwe le le lengwe la bao ba lego legodimong le bao ba lego lefaseng le bao ba lego ka tlase ga mmu le khuname leineng la Jesu, gomme leleme le lengwe le le lengwe le swanetše go dumela phatlalatša gore Jesu Kriste ke Morena gore go išwe letago go Modimo Tate.” (Bafilipi 2:9-11) Re bontšha gore re na le pono e swanago le ya Jehofa ka dilo tše kgethwa ka go ikokobeletša ka lethabo Moetapele wa rena le Kgoši e bušago, Kriste Jesu, e lego Hlogo ya phuthego ya Bokriste.—Mateo 23:10; Bakolose 1:18.

7. Re bontšha bjang gore re ikokobeletša Kriste?

⁷ Le gona go ikokobeletša Kriste go akaretša go bontšha tlhompho e swanetšego go banna bao a ba dirišago go etelela pele modirong woo a o laolago gona bjale. Modiro wa bao ba tloditšwego ka moya bao ba bopago Sehlopha se Bušago le balebeledi bao ba kgethilwego ke bona makaleng, dileteng, ditikologong le diphuthegong o swanetše go lebelelwa e le boikarabelo bjo bokgethwa. Ka gona, tokišetšo ye e nyaka gore re e hlomphe ka mo go tseneletšego gomme re ikokobeletše yona.—Baheberu 13:7, 17.

Batho ba Bakgethwa

8, 9. (a) Ke ka tsela efe Baisiraele e bego e le setšhaba se sekgethwa? (b) Jehofa o ile a gatelela bjang molao wa motheo wa bokgethwa go Baisiraele?

⁸ Jehofa o ile a dira kgwerano le Baisiraele. Tswalano ye e ile ya nea setšhaba seo se sefsa maemo a kgethegilego. Ba ile ba dirwa ba bakgethwa, goba ba arolwa. Jehofa ka boyena o ile a ba botša gore: “Le bê bakxêthwa ba-ka, ka xobane  Nna Morêna ke E Mokxêthwa; xomme ke hlaotše lena mo dithšabeng xore Le bê ba-ka.”—Lefitiko 19:2; 20:26.

⁹ Jehofa o ile a gatelela go setšhaba sa Baisiraele molao wa motheo wa bokgethwa go tloga ge se thewa. Ba be ba sa swanela go kgoma thaba yeo Melao e Lesome e neilwego go yona e le gore ba se ke ba hwa. Ka gona ka tsela e itšego Thaba ya Sinai e be e lebelelwa e le e kgethwa. (Ekisodo 19:12, 23) Boperisita, tabarenakele le thoto ya yona le tšona di be di swanetše go lebelelwa e le tše kgethwa. (Ekisodo 30:26-30) Boemo ke bofe ka phuthegong ya Bokriste?

10, 11. Ke ka baka la’ng go ka bolelwa gore phuthego ya Bokriste ya batlotšwa ke e kgethwa, gona se se na le mafelelo afe go “dinku tše dingwe”?

¹⁰ Phuthego ya Bokriste ya batlotšwa ke e kgethwa mahlong a Jehofa. (1 Bakorinthe 1:2) Ge e le gabotse, sehlopha ka moka sa Bakriste ba tloditšwego ba lego lefaseng ka nako le ge e le efe se swantšhwa le tempele e kgethwa, gaešita le ge se sa bope tempele e kgolo ya Jehofa ya moya. Jehofa o dula tempeleng yeo ka moya wa gagwe o mokgethwa. Moapostola Paulo o ngwadile gore: “Boteeng le [Kriste Jesu] moago ka moka o kopantšwe gotee ka kwano, o a gola ya ba tempele e kgethwa ya Jehofa. Boteeng le yena, le lena le agwa gotee gore le be lefelo leo Modimo a dulago go lona ka moya.”—Baefeso 2:21, 22; 1 Petro 2:5, 9.

¹¹ Paulo o ile a buša a ngwalela Bakriste ba tloditšwego gore: “Na ga le tsebe gore lena le tempele ya Modimo, le gore moya wa Modimo o dula go lena? . . . Tempele ya Modimo ke e kgethwa, e lego tempele yeo lena le lego yona.” (1 Bakorinthe 3:16, 17) A diriša moya wa gagwe, Jehofa o “dula” gare ga batlotšwa gomme o “sepela gare ga bona.” (2 Bakorinthe 6:16) O tšwela pele a hlahla “mohlanka” wa gagwe yo a botegago. (Mateo 24:45-47) “Dinku tše dingwe” di thabela tokelo ya tšona ya go kopanela le sehlopha sa “tempele.”—Johane 10:16; Mateo 25:37-40.

Dilo tše Kgethwa Maphelong a Rena re le Bakriste

12. Ke dilo dife tšeo e lego tša bohlokwa maphelong a rena, gona ka baka la’ng?

¹² Ga go makatše gore dilo tše dintši tšeo di tswalanago le maphelo a ditho tše tloditšwego tša phuthego ya Bokriste le bagwera ba tšona di lebelelwa e le tše kgethwa. Tswalano ya rena le Jehofa ke selo se sekgethwa. (1 Koronika 28:9; Psalme 36:7) Ke ya bohlokwa kudu go rena mo e lego gore ga re dumelele selo goba motho go fokodiša tswalano ya rena le Modimo wa rena,  Jehofa. (2 Koronika 15:2; Jakobo 4:7, 8) Thapelo e bapala karolo ya bohlokwa go bolokeng ga rena tswalano ya kgaufsi le Jehofa. Thapelo e be e le ya bohlokwa kudu go moporofeta Daniele mo e lego gore o ile a tšwela pele a botega mokgweng wa gagwe wa go rapela Jehofa gaešita le ge go dira bjalo go be go bea bophelo bja gagwe kotsing. (Daniele 6:7-11) “Dithapelo tša bakgethwa,” goba Bakriste ba tloditšwego di bapetšwa le diorelo tšeo di bego di dirišwa borapeding tempeleng. (Kutollo 5:8; 8:3, 4; Lefitiko 16:12, 13) Go bapetša ka tsela ye go gatelela bokgethwa bja thapelo. Ruri ke tokelo e kgolo go kgona go boledišana le Mmuši wa legohle! Ga go makatše ge re lebelela thapelo e le ya bohlokwa maphelong a rena!

13. Ke matla afe ao e lego a makgethwa, gomme re swanetše go a dumelela bjang go šoma maphelong a rena?

¹³ Go na le matla ao a dirago maphelong a Bakriste ba tloditšwego le bagwera ba bona ao ruri ba a lebelelago e le a bohlokwa—moya o mokgethwa. Moya woo ke matla a Jehofa a dirago, gomme ka ge ka mehla o dira go dumelelana le thato ya Modimo yo mokgethwa, o bitšwa ka mo go swanetšego gore ke “moya o mokgethwa,” goba “moya wa bokgethwa.” (Johane 14:26; Baroma 1:4) Ka moya o mokgethwa, Jehofa o nea bahlanka ba gagwe matla a go bolela ditaba tše dibotse. (Ditiro 1:8; 4:31) Jehofa o nea moya wa gagwe go “bao ba mo kwago e le mmuši,” bao ba ‘tšwelago pele ba sepela ka moya,’ e sego go ya ka dikganyogo tša bona tša nama. (Ditiro 5:32; Bagalatia 5:16, 25; Baroma 8:5-8) Moya wo woo o nago le matla o dira gore Bakriste ba kgone go enywa “dienywa tša moya”—dika tše dibotse—le ‘ditiro tše kgethwa tša boitshwaro le mediro ya boineelo go Modimo.’ (Bagalatia 5:22, 23; 2 Petro 3:11) Ge e ba moya o mokgethwa e le selo se sekgethwa go rena, re tla phema go dira selo le ge e le sefe seo se ka nyamišago moya woo, goba sa o thibela go šoma maphelong a rena.—Baefeso 4:30.

14. Ke tokelo efe yeo batlotšwa ba e lebelelago e le e kgethwa, gomme dinku tše dingwe di thabela bjang tokelo yeo?

¹⁴ Tokelo yeo re nago le yona ya go rwala leina la Modimo yo mokgethwa, Jehofa, le ya go ba Dihlatse tša gagwe ke selo se sengwe seo re se lebelelago e le se sekgethwa. (Jesaya 43:10-12, 15) Jehofa o dirile gore Bakriste ba tloditšwego ba swanelegele “go ba badiredi ba kgwerano e mpsha.” (2 Bakorinthe 3:5, 6) Ka baka leo, ba neilwe taelo ya go bolela “ditaba tše tše dibotse tša mmušo” le go ‘dira batho ba ditšhaba ka moka barutiwa.’ (Mateo 24:14; 28:19, 20) Ba phetha taelo ye ka potego, gomme batho ba dimilione ba swanago le dinku ba a arabela, ka tsela ya seswantšhetšo ba re go batlotšwa: “A nkê re yê le lena, ka xobane re kwile xore Modimo ó na le lena.” (Sakaria 8:23) Ba hlankela ka lethabo e le ‘balemi ba mašemo’ le ‘balemi ba dirapa tša merara’ bakeng sa “bahlanka ba Modimo wa rena” ka kwešišo ya moya. Ka tsela yeo, dinku tše dingwe di thuša batlotšwa kudu go phetheng bodiredi bja bona lefaseng ka bophara.—Jesaya 61:5, 6.

15. Ke modiro ofe woo moapostola Paulo a bego a o lebelela e le o mokgethwa, gona ke ka baka la’ng re e-na le pono e swanago le yeo?

¹⁵ Ka mohlala, moapostola Paulo o be a lebelela bodiredi bja gagwe bja phatlalatša e le selo se sekgethwa. O itlhalositše e le “mohlanka wa batho bohle wa Kriste Jesu ditšhabeng, yo a swaregilego modirong o mokgethwa wa ditaba tše dibotse tša Modimo.” (Baroma 15:16) Ge a  be a ngwalela Bakriste ba kua Korinthe, Paulo o boletše ka bodiredi bja gagwe e le “lehumo.” (2 Bakorinthe 4:1, 7) Ka bodiredi bja rena bja phatlalatša, re tsebatša “dipolelo tše kgethwa tša Modimo.” (1 Petro 4:11) Ka gona, go sa šetšwe gore re batlotšwa goba re ba dinku tše dingwe, re lebelela go ba le karolo modirong wa go nea bohlatse e le tokelo e kgethwa.

‘Go Phethagatša Bokgethwa ka go Boifa Modimo’

16. Ke’ng seo se tlago go re thuša go phema go ba batho ba “sa lebogego dilo tše kgethwa”?

¹⁶ Moapostola Paulo o ile a lemoša Bakriste-gotee le yena malebana le go ba batho bao ba sa “lebogego dilo tše kgethwa.” Go e na le moo, o ile a ba kgothaletša gore ba ‘phegelele kgethego’ gomme ba “phakgame . . . gore go se be le modu wa mpholo wo o ka melago gomme wa baka bothata le gore ba bantši ba se ke ba šilafatšwa ke wona.” (Baheberu 12:14-16) Polelwana e rego “modu wa mpholo” e šupa go batho ba sego kae ka phuthegong ya Bokriste bao ba ka nyatšago tsela yeo dilo di dirwago ka yona. Ka mohlala, ba ka no se dumelelane le pono ya Jehofa ka go kgethega ga lenyalo goba go nyakega ga go hlweka boitshwarong. (1 Bathesalonika 4:3-7; Baheberu 13:4) Goba ba ka tšea karolo dipoledišanong tša bohlanogi, e lego “dipolelo tša lefeela tše di senyago se sekgethwa” tšeo di ratwago ke bao ba ‘fapogilego therešong.’—2 Timotheo 2:16-18.

17. Ke ka baka la’ng go nyakega gore batlotšwa ba dule ba katanela go bonagatša pono ya Jehofa ya bokgethwa?

¹⁷ Paulo o ile a ngwalela bana babo ba tloditšwego gore: “Baratiwa, a re itlhwekišeng ditšhila tšohle tša nama le tša moya, re phethagatša bokgethwa ka go boifa Modimo.” (2 Bakorinthe 7:1) Mantšu a a bontšha gore Bakriste ba tloditšwego, “bao ba nago le kabelo pitšong ya legodimo,” ba swanetše go dula ba katanela go bontšha gore ba bonagatša pono ya Jehofa ya bokgethwa dikarolong tšohle tša bophelo bja bona. (Baheberu 3:1) Ka mo go swanago, moapostola Petro o eleditše bana babo ba tloditšwego ka moya gore: “Bjalo ka bana ba ba kwago, lesang go bopega go ya ka dikganyogo tše le bego le e-na le tšona pele ge le be le hloka tsebo, eupša ka go dumelelana le Mokgethwa yo a le biditšego, le lena le be ba bakgethwa boitshwarong bja lena ka moka.”—1 Petro 1:14, 15.

18, 19. (a) Ditho tša “lešaba le legolo” di bontšha bjang gore di na le pono e swanago le ya Jehofa ka dilo tše kgethwa? (b) Ke karolo efe e nngwe e kgethwa ya bophelo bja rena bja Bokriste yeo e tlago go ahla-ahlwa sehlogong se se latelago?

¹⁸ Go thwe’ng ka batho bao e lego ditho tša “lešaba le legolo” bao ba tlago go phologa ‘masetlapelo a magolo’? Le bona ba swanetše go bontšha gore ba na le pono e swanago le ya Jehofa ka dilo tše kgethwa. Pukung ya Kutollo, ba hlaloswa ba direla Jehofa “tirelo e kgethwa” mabaleng a lefaseng a tempele ya gagwe ya moya. Ba bontšha tumelo sehlabelong sa Kriste sa topollo, gomme ka tsela ya seswantšhetšo ‘ba hlatswa dikobo tša bona tše telele gomme ba di šweufatša mading a Kwana.’ (Kutollo 7:9, 14, 15) Se se dira gore ba be le boemo bjo bo hlwekilego pele ga Jehofa gomme se ba tlama gore “[ba itlhwekiše] ditšhila tšohle tša nama le tša moya, [ba phethagatše] bokgethwa ka go boifa Modimo.”

¹⁹ Karolo ya bohlokwa bophelong bja Bakriste ba tloditšwego le bja bagwera ba bona ke ya go bokana ka mehla bakeng sa go rapela Jehofa le go ithuta Lentšu la gagwe. Jehofa o lebelela dipokano tša batho ba gagwe e le selo se sekgethwa. Sehlogo se se latelago se tla ahla-ahla lebaka leo ka lona re swanetšego go ba le pono e swanago le ya Jehofa ka dilo tše kgethwa tabeng ye le kamoo re ka bago le pono ye ka gona.

E le go Boeletša

• Ke pono efe ya lefase yeo bahlanka ba Jehofa ba se nago yona?

• Ke ka baka la’ng Jehofa e le Mothopo wa dilo tšohle tše kgethwa?

• Re bontšha bjang gore re hlompha go kgethega ga Kriste?

• Ke dilo dife tšeo re swanetšego go di lebelela e le tše kgethwa maphelong a rena?

[Dipotšišo tša Thuto]

[Seswantšho go letlakala 23]

Isiraeleng ya bogologolo, boperisita, tabarenakele le thoto ya yona di be di swanetše go lebelelwa e le dilo tše kgethwa

[Seswantšho go letlakala 24]

Bakriste ba tloditšwego ba lego mo lefaseng ba bopa tempele e kgethwa

[Diswantšho go letlakala 25]

Thapelo le bodiredi bja rena bja phatlalatša ke ditokelo tše kgethwa