“Re Swanetše Go Kwa Modimo E Le Mmuši Go E-na Le Batho”

‘Re ka se Tlogele go Bolela ka Jesu’

NGWAGA ke wa 33 C.E., gomme lefelo ke phapoši e botse ya tsheko ya lekgotla la selegae la Bajuda kua Jerusalema. Mo tiragatšong ye, Sanhedrine e kgaufsi le go sekiša balatedi ba 12 ba Jesu Kriste. Ka baka la’ng? Ka baka la gore ba be ba ruta batho ka Jesu. Ke lekga la bobedi bjale moapostola Petro le moapostola Johane ba eme ka pele ga lekgotla. Ye ke tsheko ya mathomo ya baapostola ba bangwe.

Moperisita yo a phagamego o bolela le baapostola ba 12 mabapi le taelo yeo e ilego ya fetišwa ke lekgotla tshekong ya mathomo. Ka nako yeo, ge ba be ba laelwa go kgaotša go ruta ka Jesu, moapostola Petro le moapostola Johane ba ile ba araba ka gore: “Ge e ba go lokile mahlong a Modimo go theetša lena go e-na le Modimo, ikahloleleng. Eupša ge e le rena, re ka se ke ra tlogela go bolela ka dilo tše re di bonego le tše re di kwelego.” Ka morago ga go rapelela sebete, barutiwa ba Jesu ba ile ba tšwela pele ba bolela ditaba tše dibotse.—Ditiro 4:18-31.

A lemogile gore ditšhošetšo tša gagwe tša pele ga se tša ka tša šoma, ka lekga la bobedi moperisita yo a phagamego o re: “Re le laetše ka go tia gore le se ke la tšwela pele le ruta ka leina le, lega go le bjalo, bonang! le tladitše Jerusalema ka thuto ya lena, gomme le ikemišeditše go tliša madi a motho yo godimo ga rena.”—Ditiro 5:28.

Maikemišetšo a Tiilego

Ba fetola ka sebete, Petro le baapostola ba bangwe ba re: “Re swanetše go kwa Modimo e le mmuši go e-na le batho.” (Ditiro 5:29) Ka kgonthe, go e na le gore re kwe batho, re swanetše go kwa Jehofa ge e ba dinyakwa tša batho di thulana le ditaelo tša gagwe. *

Mantšu a baapostola a go gatelela gore ba ikokobeletša Modimo a swanetše go kgodiša ditho tša Sanhedrine. Ge ba botšišwa mabapi le go kwa Modimo, baetapele ba ba setšhaba sa Bajuda ba be ba swanetše go araba ka botee ba re: ‘E-kwang Modimo.’ Goba gona, na ga ba dumele gore Modimo ke Morena yo a Phagamego wa legohle?

Mohlomongwe e le ge a emela baapostola ba bangwe ka moka, Petro o bolela gore ka go dumelelana le bodiredi bja bona, ba kwa Modimo go e na le batho. Ka gona, o phumola tatofatšo yeo e lego mabapi le baapostola ya gore ga ba kwe. Go tšwa historing ya setšhaba sa gabo tšona, ditho tša Sanhedrine di a tseba gore go na le dinako tšeo ka tšona e lego mo go swanetšego go kwa Modimo go e na le batho. Babelegiši ba babedi ba Egipita ba ile ba boifa Modimo e sego Farao, ka go tlogela bana ba bašemane bao ba belegwago ke basadi ba Baheberu ba phela. (Ekisodo 1:15-17) Ge Kgoši Hiskia a be a gapeletšwa go ineela, o ile a kwa Jehofa e sego Kgoši Sanheribe. (2 Dikgoši 19:14-37) Mangwalo a Seheberu, ao ditho tša Sanhedrine di tlwaelanego le ona, a gatelela gore Jehofa o letetše gore batho ba gagwe ba mo kwe.—1 Samuele 15:22, 23.

Go kwa go a Putswa

Ka gona, bonyenyane setho se tee sa kgoro e phagamego se kgongwa ke mantšu a rego “re swanetše go kwa Modimo e le Mmuši go e-na le batho.” Gamaliele, moahlodi yo a tšeelwago  godimo wa Sanhedrine, o tutuetša kgoro gore e theetše keletšo ya gagwe e bohlale yeo a e neago yona ka sephiring. Ka go tsopola mehlala yeo e diregilego, Gamaliele o bontšha gore ga se ga bohlale go tsena-tsenana le modiro wa baapostola. O phetha ka gore: “Le se ke la tshwenyana le banna ba, ba tlogeleng; . . . go sego bjalo, mohlomongwe le ka hwetšwa ge e le gabotse le le balwa-le-Modimo.”—Ditiro 5:34-39.

Mantšu a Gamaliele ao a nago le tlhaologanyo a kgodiša kgoro e phagamego gore e lokolle baapostola. Le ge ba ile ba bethwa, baapostola ga ba tšhošwe ke tiragalo ye le ganyenyane. Go e na le moo, pego ya Beibele e re: “Ke moka letšatši le lengwe le le lengwe ka tempeleng le ka ntlo le ntlo ba tšwela pele ba sa kgaotše ba ruta e bile ba tsebatša ditaba tše dibotse ka Kriste, Jesu.”—Ditiro 5:42.

Ruri baapostola ba ile ba šegofatšwa kudu ka go bolela gore bogoši bja Modimo ke bjona bjo bo phagamego! Bakriste ba therešo lehono ba na le maikemišetšo a swanago. Dihlatse tša Jehofa di tšwela pele di lebelela Jehofa e le Mmuši wa tšona yo a Phagamego. Ge ba laelwa gore ba dire dilo tšeo di sa dumelelanego le melao ya Modimo, ba araba kamoo baapostola ba ilego ba araba ka gona, gore: “Re swanetše go kwa Modimo e le mmuši go e-na le batho.”

[Mongwalo wa ka tlase]

[Lepokisi/Diswantšho go letlakala 9]

NA O KILE WA IPOTŠIŠA?

Mongwadi wa Ebangedi e lego Luka o hweditše kae ditaba tšeo Gamaliele a di boletšego ka sephiring lekgotleng la Sanhedrine? Modimo a ka ba a ile a utollela Luka mantšu a Gamaliele ka pudulelo. Mohlomongwe Paulo (yo e bego e le yo mongwe wa barutwana ba Gamaliele) o boditše Luka seo Gamaliele a se boletšego. Goba go ka direga gore Luka o ile a boledišana le setho sa kgoro e phagamego seo se bego se thekga modiro wa baapostola.