“Go Tloga Lehono, ke a Dumela Gore Modimo o Gona”

MOSADI wa mo-Ukraine yo a bitšwago Alexandra, yo a dulago Prague Repabliking ya Czech, o be a le tseleng a e-tšwa mošomong a lebile gae. Mo boema-terempe, o ile a bona mokotlana wo e kago ke wa go swara Beibele wo o wetšego fase, wo o bego o dutše o ragwa ka maoto ke bafeta-ka-tsela. Ge a o topa gomme a lebelela ka gare, ga se a kgolwa mahlo a gagwe. O be o e-na le mokgobo wa tšhelete ya pampiri ya di-5000 koruna! Gona moo, go be go se motho yo a bonalago a nyaka mokotlana. Ka ge e le motšwa-ntle yo a dulago Repabliking ya Czech, go be go le thata go Alexandra gore a hwetše sa go iphediša. O be a tla dira’ng?

Ge a fihla gae, Alexandra o ile a bontšha morwedi wa gagwe Victoria mokotlana woo. Ba ile ba o phuruphutša ba nyaka leina le aterese ya mong wa wona, eupša ba se di hwetše. Lega go le bjalo, ka gare ga mokotlana wo go be go na le pampišana yeo go ngwadilwego dinomoro tsoko go yona. Ka lehlakoreng le lengwe la pampišana go be go ngwadilwe dinomoro tša akhaonto, mola ka go le lengwe, e le dinomoro tše dingwe gape. Gape ka mokotlaneng go be go e-na le ditaetšo tša go ya pankeng ya lefelong leo, le lengwalwana le le rego: “330 000 koruny” (mo e ka bago R84 000). Yeo e be e le yona tlwaa tekano ya tšhelete yeo e bego e le ka mokotlaneng.

A diriša se se bego se bonala e le dinomoro tša mogala, maiteko a Alexandra a go leletša panka mogala a ile a folotša. Ka gona yena le morwedi wa gagwe ba ile ba ya pankeng gomme ba hlalosa se se diragetšego. Ba ile ba botšiša ka nomoro ya akhaonto ye ba e hweditšego ka mokotlaneng. Lega go le bjalo, panka e be e se na pego ya akhaonto yeo. Letšatšing le le latelego, Alexandra o ile a boela a swere nomoro e nngwe ye e bego e le ka mokotlaneng. Ka kgonthe, go be go e-na le motho wa mosadi yo a bego a diriša nomoro yeo ya akhaonto pankeng yeo. Alexandra le Victoria ba ile ba ikgokaganya le mosadi yoo gomme a kgonthišetša tahlegelo yeo. Ge mafelelong ba kopana, mosadi yoo o ile a ba leboga ka borutho gomme a botšiša gore, “Le nyaka go putswa ka bokae bakeng sa go buša tšhelete ye?”

Victoria o ile a fetola ka gore: “Ga re nyake moputso le gatee. Ge nkabe re be re nyaka tšhelete, nkabe re e tšere.” O ile a hlalosa ka se-Czech sa gagwe se se fokolago, gore: “Re go bušetša tšhelete ye ka gobane re le Dihlatse tša Jehofa. Letswalo la rena le le tlwaeditšwego ka Beibele ga le re dumelele go tšea se e sego sa rena.” (Baheberu 13:18) Mosadi yoo o ile a bolela ka lethabo gore, “Go tloga lehono, ke a dumela gore Modimo o gona.”