“Mafelelo a Kgahlišago Kudu ao ke sa Kago ka a Nagana”

MORUTIŠI wa sekolo se se phagamego kua Sepania o ngwadile gore: “Lebakeng la nywaga ya ka godimo ga e lekgolo, Dihlatse tša Jehofa di bontšhitše botee bja kgonthe, potego ya go hloka bosodi, gomme sa bohlokwa le go feta di ile tša bontšha tumelo e sa senyegego.” Ke’ng seo se ilego sa tutueletša morutiši yo—yoo a ipolelago gore ke moila-Modimo—go bolela mantšu a bjalo?

Tše ka moka di thomile ge Noemí, morutwana wa sekolo se se phagamego yo e bilego e le yo mongwe wa Dihlatse tša Jehofa, a be a abetšwe go ngwala taodišo e le karolo ya tlhahlobo ya mafelelo ya dithuto tša gagwe tša sekolo. O ile a kgetha go diriša sehlogo se se rego: “Dikhutlo-tharo tše Phepolo ka Tlase ga Pušo ya Nazi.”

Ke ka baka la’ng a ile a kgetha sehlogo seo? Noemí o a hlalosa: “Ka ge morutiši a be a tla lekola mošomo wa-ka, ke ile ka nagana gore ke diriše sebaka se go mo nea bohlatse. Taodišo ya kamoo Dihlatse tša Jehofa kua Jeremane ya Nazi di ilego tša tšwela pele di botegetše melao ya tšona ya motheo e be e ile ya nkgoma pelo. Ke ile ka dumela gore e be e tla kgoma le ba bangwe.”

Mošomo wa Noemí o ile wa kgoma batho ba bantši kudu go feta kamoo a ka bago a ile a nagana ka gona. Ka October 5, 2002, taodišo ya gagwe e ile ya thopa sefoka phadišanong ya setšhaba ya nyakišišo ya tša thutamahlale le dithuto tša nyakišišo mabapi le batho. Difoka tša phadišano yeo di abja ke sehlopha sa baahlodi seo se bopšago ke dirutegi tše 20 go tšwa diyunibesithing tše di tumilego tša Sepania.

Noemí o amogetše sefoka sa gagwe go tšwa go Pilar del Castillo, e lego tona ya tša thuto ya Sepania. Noemí o ile a diriša sebaka seo go nea tona kopi ya bidio ya Jehovah’s Witnesses Stand Firm Against Nazi Assault. Tona e ile ya amogela mpho ka diatla tše pedi.

Morago kua toropong ya gabo Noemí ya Manresa, kuranta ya moo e ile ya tsebatša ka katlego ya gagwe ya tša thuto ya ba ya seka-seka dikagare tša taodišo ya gagwe. Go sa le bjalo, hlogo ya sekolo seo a tsenago go sona e ile ya kgopela kopi ya mošomo wa gagwe e le gore e o akaretše lenaneong la monyanya wa go keteka ngwaga wa bo-75 wa sekolo se se phagamego.

Noemí o re: “E tloga e le mafelelo a kgahlišago kudu ao ke sa kago ka a nagana a go fetša dithuto tša-ka tša sekolo se se phagamego. Ke ile ka thaba gakaakang ge ke bala mantšu a morutiši wa-ka, Mna. Jorge Tomás Calot, ao a a ngwadilego e le karolo ya matseno a gagwe a mabapi le pego ya-ka, a rego:

“‘Ke moila-Modimo, eupša nka rata go kgodišwa ka mo go feletšego ka go ba gona ga Motho yo yo a Phagamego kudu, yo a hlohleletšago ka go barapedi ba gagwe “lerato la kgonthe la go rata moagišani.”’”