Good News for People of All Nations

PUKWANA ye e lego ka mo godimo e lokolotšwe Dikopanong tša Selete tša “Sepela le Modimo” tša Dihlatse tša Jehofa ka 2004/05. Kgatišo e nngwe ya yona pukwana ye e na le matlakala a 96 ao a nago le molaetša o mokopana ka maleme a 92, go thoma ka se-Afrikaans go fihla ka se-Zulu, gomme e lokišeleditšwe go thuša go phatlalatša ditaba tše dibotse tša Mmušo go batho ba bantši ka mo go kgonegago. (Mateo 24:14) Go tlwaelegile gore go be le diphihlelo tše di latelago ge go dirišwa pukwana ye.

• Lapa le lengwe la Dihlatse le ile la etela mašoka a mararo a diphoofolo ka morago ga go amogela pukwana ye kopanong. Moo le ile la gahlana le batho ba tšwago Netherlands, India, Pakistan le Philippines. Hlogo ya lapa leo e hlalositše gore: “Le ge batho bao ba be ba kgona go bolela Seisemane, ba ile ba thabišwa ke go bala molaetša ka maleme a gabo bona, kudu ka ge ba be ba le kgole le gabo bona. Ba ile ba bona gabotse gore modiro wa rena ke wa lefase ka bophara gotee le go bona botee bja rena.”

• Hlatse e nngwe e ile ya bontšha mošomi-gotee le yona yo a tšwago India pukwana ye. O ile a thabišwa ke go bona maleme ka moka ao a lego ka gare ga yona gomme o ile a bala molaetša ka segagabo. Seo se ile sa ba lebiša poledišanong e oketšegilego ka Beibele. Mošomi-gotee le yona yo a tšwago Philippines o ile a makatšwa ke go hwetša leleme la gabo ka pukwaneng ye gomme o ile a kgahlegela go tseba ka Dihlatse tša Jehofa.

• Kua Canada, mosadi yo a tšwago Nepal o ile a dumela go ithuta Beibele le Hlatse ka mogala eupša o be a dika-dika go laletša kgaetšedi yoo legaeng la gagwe. Lega go le bjalo, ge Hlatse e be e botša mosadi yo ka pukwana yeo e nago le molaetša ka se-Nepal, o ile a laletša kgaetšedi yoo ka lethabo gore a tle legaeng la gagwe. O be a rata go fo ipalela molaetša ka segagabo. Go ile gwa swarwa thuto ya Beibele ka lapeng la mosadi yoo go tloga ka lona letšatši leo.