Molao wa Lerato ka Dipelong

“Ke tlo bea melaô ya-ka matswalong a bôná, ke tlo e tlôka dipelong tša bôná.”—JEREMIA 31:33.

1, 2. (a) Ga bjale re tla ahla-ahla’ng? (b) Jehofa o ile a iponagatša bjang Thabeng ya Sinai?

DIHLOGONG tše pedi tše di fetilego, re ithutile gore ge Moše a be a theoga Thabeng ya Sinai, sefahlego sa gagwe se be se phadima ka mahlasedi ao a bego a bonagatša letago la Jehofa. Re ahla-ahlile gape le seširo seo Moše a bego a se apara. Ga bjale anke re ahla-ahleng taba e tswalanago le tše yeo e nago le seo e se bolelago go Bakriste lehono.

² Ge Moše a be a le thabeng, o ile a amogela ditaelo tše di tšwago go Jehofa. Ge ba-Isiraele ba bokane pele ga Thaba ya Sinai, ba ile ba bona ponagatšo e makatšago ya Modimo ka noši. “Xwa ba le medumô, le maxadima, le leru le leso-leso mo thabeng; xwa kwala moletšô o moxolo ka matla wa naká. Sethšaba ka moka sa roromêla sè le mo mešašeng. . . . Xomme thaba ka moka ya Sinai e be e thunthša muši, ka xobane Morêna ó be a foloxetše xo yôna ka mollô; xomme muši wa yôna o be o hlatloxa byalo ka mokubêlô; thaba ka moka ya šišinyêxa xa-xolo.”—Ekisodo 19:16-18.

3. Jehofa o ile a diriša’ng go nea ba-Isiraele Melao e Lesome, gomme setšhaba seo se ile sa thoma go kwešiša’ng?

³ Jehofa o ile a bolela le batho ka morongwa, a ba nea seo ga bjale se tsebjago e le Melao e Lesome. (Ekisodo 20:1-17) Ka gona, go be go ka se be le pelaelo ya gore melao ye e be e e-tšwa go yo Matla ohle. Jehofa o ile a ngwala melao yeo diphaphathing tša lefsika—diphaphathi tšeo Moše a ilego a di pšhatlaganya ge a be a bona ba-Isiraele ba rapela namane ya gauta. Jehofa o ile a ngwala melao e mengwe gape lefsikeng. Nakong ye, ge Moše a be a boa a swere diphaphathi, sefahlego sa gagwe se be se phadima ka mahlasedi. Ka nako yeo, batho ka moka ba be ba tla kwešiša gore melao yeo e be e le ya bohlokwa kudu.—Ekisodo 32:15-19; 34:1, 4, 29, 30.

4. Ke ka baka la’ng Melao e Lesome e be e le ya bohlokwa kudu?

 ⁴ Diphaphathi tše pedi tšeo Melao e Lesome e bego e ngwaletšwe go tšona di ile tša bewa ka gare ga areka ya kgwerano karolong ya Sekgethwa-kgethwa ya tabarenakele gomme ka morago tša bewa karolong ya Sekgethwa-kgethwa ya tempele. Melao yeo e bego e ngwadilwe go tšona e be e bolela ka melao e megolo ya motheo ya kgwerano ya Molao wa Moše gomme e be e bopa motheo wa tsela yeo Modimo a bego a tla buša setšhaba ka yona. E be e nea bohlatse bja gore Jehofa o be a dirišana le batho ba moswana-noši, batho ba kgethilwego.

5. Ke ka ditsela dife melao ya Modimo go ba-Isiraele e bego e bonagatša lerato la gagwe?

⁵ Melao yeo e be e utolla mo gontši ka Jehofa, kudu-kudu lerato la gagwe go batho ba gagwe. Ruri e ile ya ipontšha e le mpho ya bohlokwa kudu go bao ba bego ba e-kwa! Seithuti se sengwe se ngwadile gore: “Ga go na thulaganyo ya ditekanyetšo tša boitshwaro yeo e kilego ya hlongwa ke batho pele goba nakong e fetilego . . . yeo e nyakilego e lekana le melao ye e lesome ya Modimo, e tloga e sa lekane le yona goba go e feta.” Jehofa o boletše mabapi le Molao wa Moše ka kakaretšo gore: “Xe Le tlo theetša ruri se ke se bolêlaxo, la hlôkômêla kxwêranô ya-ka, ké mo Le tl’o xo ba baruiwa ba-ka mo dithšabeng ka moka; ka xobane lefase ka moka ké la-ka. Xomme lena Le tlo ba sethšaba sa-ka sa bô-mphamodimo, sethšaba se sekxêthwa.”—Ekisodo 19:5, 6.

Molao wo o Ngwadilwego ka Dipelong

6. Ke molao ofe wo o ipontšhitšego e le wa bohlokwa kudu go feta melao yeo e ngwadilwego lefsikeng?

⁶ Ke therešo gore melao yeo ya Modimo e be e le ya bohlokwa kudu. Lega go le bjalo, na o be o tseba gore Bakriste ba tloditšwego ba na le selo se sengwe sa bohlokwa kudu go feta melao yeo e ngwadilwego lefsikeng? Jehofa o boletše e sa le pele ka go dira kgwerano e mpsha yeo e sa swanego le kgwerano ya Molao yeo a bego a e dirile le setšhaba sa Isiraele. “Ke tlo bea melaô ya-ka matswalong a bôná, ke tlo e tlôka dipelong tša bôná.” (Jeremia 31:31-34) Jesu, e lego Mmoelanyi wa kgwerano e mpsha, ga se a ka a nea balatedi ba gagwe molao o ngwadilwego. O ile a tiišetša molao wa Jehofa ka menaganong ya barutiwa ba gagwe le ka dipelong tša bona ka dilo tšeo a bego a di bolela le tšeo a bego a di dira.

7. “Molaô wa Kriste” mathomong o be o neilwe bomang, gomme ka morago o ile wa amogelwa ke bomang?

⁷ Molao wo o bitšwa “molaô wa Kriste.” Mathomong o be o sa newa setšhaba sa ba-Isiraele ba tlhago, bao e bego e le ditlogolwana tša Jakobo, eupša o be o neilwe setšhaba sa moya, e lego “Ba-Isiraele ba Modimo.” (Ba-Galatia 6:2, 16; Ba-Roma 2:28, 29) Ba-Isiraele ba Modimo ba bopša ke Bakriste ba tloditšwego ka moya. Ge nako e dutše e e-ya, ba ile ba tlatšwa ke “lešaba le lexolo” la batho ba tšwago ditšhabeng ka moka bao le bona ba tsomago go rapela Jehofa. (Kutollo 7:9, 10; Sakaria 8:23) Bjalo ka “mohlape o tee” ka tlase ga “modiši o tee,” dihlopha ka bobedi di  amogela “molaô wa Kriste,” gomme di o dumelela gore o laole dilo ka moka tšeo di di dirago.—Johane 10:16.

8. Phapano e be e le efe magareng ga Molao wa Moše le molao wa Kriste?

⁸ Ka go fapana le ba-Isiraele ba tlhago, bao ka tswalo ba bego ba tlamilwe ke Molao wa Moše, Bakriste ba ikgethela go ba ka tlase ga molao wa Kriste, gomme dilo tše bjalo ka morafo le lefelo le motho a belegetšwego go lona ga se tša bohlokwa. Ba ithuta ka Jehofa le ka ditsela tša gagwe gomme ba hlologelwa go dira thato ya gagwe. Ka ge molao wa Modimo o le “matswalong a bôná,” gomme ka tsela ya seswantšhetšo o ngwadilwe ka “dipelong tša bôná,” Bakriste ba tloditšwego ga ba kwe Modimo feela ka gobane a ka kgona go otla bao ba sa kwego; e bile ga ba mo kwe feela ka gobane ba ikwa ba gapeletšega. Go kwa ga bona go ithekgile ka selo se sengwe sa bohlokwa kudu le se matla ka go fetišiša, gomme ba dinku tše dingwe le bona ba kwa ka gobane molao wa Modimo o le ka dipelong tša bona.

Melao Yeo e Theilwego Leratong

9. Jesu o ile a bontšha bjang gore lerato e be e le motheo wa melao ya Jehofa?

⁹ Motheo wa melao ya Jehofa ka moka le ditekanyetšo tša gagwe o ka akaretšwa ka lentšu le tee: lerato. Yeo e be e dutše e le karolo ya bohlokwa ya borapedi bjo bo sekilego e bile e tla dula e le yona. Ge Jesu a be a botšišwa gore taelo e kgolo Molaong ke efe, o ile a araba ka gore: “Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka thlaoloxanyô ya xaxo ka moka.” Ya bobedi e be e le e rego: “Wa xeno [“moagišani wa gago,” NW] O mo ratê ka mokxwa wo O ithataxo ka wôna.” Ke moka a re: “Ditaêlô tše pedi tšé di akareditše Molaô ka moka le baporofeta.” (Mateo 22:35-40) Ka gona Jesu o be a bontšha gore Mangwalo  ka moka a Sehebere a be a theilwe leratong, e sego feela Molaong wo o nago le Melao e Lesome.

10. Re tseba bjang gore lerato ke motheo wa molao wa Kriste?

¹⁰ Le gona, na go rata Modimo le go rata moagišani ke motheo wa molao o lego ka dipelong tša Bakriste? Go tloga go le bjalo! Molao wa Kriste o akaretša go rata Modimo go tšwa pelong e bile o akaretša taelo e mpsha—Bakriste ba swanetše go ratana ka lerato la boikgafo. Ba swanetše go ratana ka tsela yeo Jesu a ba ratilego ka yona, gomme o ile a gafa bophelo bja gagwe ka go rata bakeng sa bagwera ba gagwe. O rutile barutiwa ba gagwe gore ba rate Modimo le gore ba ratane, go etša ge a ba ratile. Lerato le legolo leo ba ratanago ka lona ke seka se segolo seo Bakriste ba therešo ba ka tsebjago ka sona. (Johane 13:34, 35; 15:12, 13) Jesu o ile a ba a ba laela gore ba rate manaba a bona.—Mateo 5:44.

11. Jesu o ile a bontšha bjang gore o rata Modimo le batho?

¹¹ Jesu o beile mohlala o phethagetšego tabeng ya go bontšha lerato. Ka ge e le sebopiwa se matla sa moya legodimong, o ile a amogela sebaka sa go tšwetša pele mediro ya Tatagwe ya lefaseng. Ka ntle le go neela bophelo bja gagwe e le motho e le gore ba bangwe ba ka phela ka mo go sa felego, o ile a bontšha batho kamoo ba swanetšego go phela ka gona. O be a ikokobeditše, a le botho e bile a naganela ba bangwe, a thuša bao ba imetšwego le bao ba gateletšwego. Le gona, o ile a tsebatša “mantšu a bophelô byo bo sa felexo,” gomme a thuša ba bangwe a sa lape e le gore ba tsebe Jehofa.—Johane 6:68.

12. Ke ka baka la’ng go ka bolelwa gore go rata Modimo le moagišani go a sepelelana?

¹² Ge e le gabotse, go rata Modimo le moagišani go a sepelelana. Moapostola Johane o boletše gore: “Leratô le tšwa xo Modimo. . . . Xe motho a ka re: Ke rata Modimo,—’me a hloile ngwan’abô, ké wa maaká; xobane e a sa ratexo ngwan’abô yo a mmônaxo, a a ka kxôna xo rata Modimo yo a sa mmonexo?” (1 Johane 4:7, 20) Jehofa ke mothopo e bile ke mohlala o phethagetšego wa lerato. Dilo ka moka tšeo a di dirago di tutuetšwa ke lerato. Re rata ba bangwe ka gobane re bopilwe ka seswantšho sa gagwe. (Genesi 1:27) Ka go rata baagišani ba rena, re bontšha gore re rata Modimo.

Go Rata go Bolela go kwa

13. Ge e ba re nyaka go rata Modimo, re swanetše gore pele re dire’ng?

¹³ Re ka rata bjang Modimo yo re sa kgonego go mmona? Mogato wa pele wa bohlokwa ke gore re mo tsebe. Ruri re ka se kgone go rata goba go bota motho yo re sa mo tsebego. Ka gona, Lentšu la Modimo le re kgothaletša gore re tsebe Modimo ka go bala Beibele, ka go rapela le ka go gwerana le bao ba šetšego ba mo tseba le go mo rata. (Psalme 1:1, 2; Ba-Filipi 4:6; Ba-Hebere 10:25) Diebangedi tše nne ke tša bohlokwa ka mo go kgethegilego, ka gobane di utolla semelo sa Jehofa go etša ge se bonagaditšwe bophelong le bodireding bja Jesu Kriste. Kganyogo ya rena ya go nyaka go kwa Modimo le go ekiša semelo sa gagwe e gola ka mo go oketšegilego kudu ge re dutše re mo tseba le go leboga lerato leo a re bontšhitšego lona. Ee, go rata Modimo go akaretša go kwa.

14. Ke ka baka la’ng go ka bolelwa gore melao ya Modimo ga e thata?

¹⁴ Ge re rata batho, re tseba se ba se ratago le se ba sa se ratego, gomme re itshwara ka go dumelelana le seo. Ga re nyake go kgopiša batho bao re ba ratago. Moapostola Johane o ngwadile gore: “Leratô la xo rata Modimo ké xe re e-ya ka melaô ya xaxwe; xomme melaô ya xaxwe xa se e thata.” (1 Johane 5:3) Ga e thata e bile ga se e mentši. Lerato le hlahla ditsela tša rena. Ga go nyakege gore re sware melao e mentši ka hlogo e le gore re hlahle mogato o mongwe le o mongwe wo re o gatago; lerato la rena go Modimo le a re hlahla. Melao ya Modimo ga e thata, ka gobane re thabišwa ke go hlokomela bao re ba ratago e le ka kgonthe. Ge e ba re rata Modimo, re thabišwa ke go dira thato ya gagwe. Ka gona re amogelwa ke Modimo, e bile re a ikhola, tlhahlo ya gagwe e re hola ka mehla.—Jesaya 48:17.

15. Ke’ng seo se tla re tutueletšago gore re ekiše Jehofa? Hlalosa.

¹⁵ Lerato leo re ratago Modimo ka lona le re tutueletša gore re ekiše dika tša gagwe. Ge re rata  motho, re kgahlwa ke dika tša gagwe gomme re nyaka go swana le yena. Ela hloko tswalano magareng ga Jehofa le Jesu. Ba be ba le gotee legodimong mohlomongwe ka nywaga e dikete tše dimilione. Ba be ba ratana ka lerato le le tseneletšego le le le phethagetšego. Jesu o be a swana le Tatagwe wa legodimong ka tsela e phethagetšego kudu moo e lego gore o be a ka botša barutiwa ba gagwe gore: “E a bonexo Nna ó bone Tate.” (Johane 14:9) Ge re dutše re e-ba le tsebo le tebogo ya go leboga Jehofa le Morwa wa gagwe, re tutueletšega gore re swane le bona. Lerato la rena go Jehofa gotee le thušo ya moya wa gagwe o mokgethwa, di tla re thuša gore re ‘apole motho e motala le ditiro tša gagwe, gomme re apare motho e mofsa.’—Ba-Kolose 3:9, 10; Ba-Galatia 5:22, 23.

Lerato le a Šoma

16. Lerato la rena go Modimo le go moagišani le bontšhwa bjang ka modiro wa rena wa boboledi le wa go ruta?

¹⁶ Re le Bakriste, re dumelela lerato la rena go Modimo le go moagišani le re tutueletša go tšea karolo modirong wa go bolela ka Mmušo le wa go dira barutiwa. Ka go dira bjalo, re thabiša Jehofa Modimo, “Yêna a rataxo xore batho bohle ba phološwê ba fihlêlê tsebô ya therešô.” (1 Timotheo 2:3, 4) Ka gona re ka thabišwa ke go thuša ba bangwe gore molao wa Kriste o ngwalwe ka dipelong tša bona. Le gona re thabišwa ke go bona ge dimelo tša bona di fetoga gomme di bonagatša dika tša Jehofa tše di phagamego. (2 Ba-Korinthe 3:18) Ka kgonthe, go thuša ba bangwe gore ba tsebe Modimo ke mpho ya bohlokwa kudu yeo re ka ba neago yona. Bao ba amogelago segwera sa Jehofa ba ka se thabela ka mo go sa felego.

17. Ke ka baka la’ng e le gabohlale go hlagolela lerato la go rata Modimo le moagišani go e na le go rata dilo tše di bonagalago?

¹⁷ Re phela lefaseng leo dilo tše di bonagalago  di tšeelwago godimo kudu, gaešita le go ratwa. Lega go le bjalo, dilo tše di bonagalago ga se tša sa ruri. Di ka utswiwa goba tša senyega. (Mateo 6:19) Beibele e re lemoša ka gore: “Lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.” (1 Johane 2:16, 17) Ee, Jehofa o tla dula a le gona ka mo go sa felego, gomme go tla ba bjalo ka bao ba mo ratago le go mo hlankela. Ka baka leo, na ga se gabohlale kudu go hlagolela lerato la go rata Modimo le batho go feta go phegelela dilo tša lefase, tšeo ge e le gabotse e fogo ba tša nakwana?

18. Moromiwa yo mongwe o ile a bontšha bjang lerato la boikgafo?

¹⁸ Bao ba phegelelago lerato ba tlišetša Jehofa tumišo. Ela hloko Sonia, e lego moromiwa kua Senegal. O ile a ithuta Beibele le mosadi yo a bitšwago Heidi, yo a bego a feteditšwe HIV ke monna wa gagwe yo a sa dumelego. Ka morago ga ge monna wa gagwe a hwile, Heidi o ile a kolobetšwa, eupša kapejana ka morago ga moo boemo bja gagwe bja tša maphelo bo ile bja mpefala, gomme a išwa sepetlele a e-na le AIDS. Sonia o hlalosa gore: “Bašomi ba sepetlele ba ile ba dira sohle seo ba ka se kgonago, eupša ba be ba se nene. Baithapi ba tšwago phuthegong ba ile ba kgopelwa gore ba hlokomele dinyakwa tša gagwe ge a le sepetlele. Bošegong bja bobedi, ke ile ka dula mmeteng kgaufsi le malao a gagwe gomme ka thuša go mo hlokomela go ba go fihlela a e-hwa. Ngaka yeo e bego e mo alafa e itše: ‘Bothata bja rena bjo bogolo ke gore gaešita le ba leloko gantši ba lahla ditho tša lapa ge ba tseba gore di na le AIDS. Ke ka baka la’ng lena, bao le sa tswalanego le molwetši, le sa tšwe nageng e tee e bile le se ba morafo o tee, le dumela go bea maphelo a lena kotsing?’ Ke ile ka hlalosa gore, ke be ke tšea Heidi e le ngwanešo wa nama, re be re ratana bjalo ka ge eka re bana ba motho. Ka baka la go tseba ga-ka ngwanešo yo yo mofsa, ke ile ka thabela go mo hlokomela.” Go ba gona, Sonia ga se a ka a fetelwa ke bolwetši ka baka la maiteko a gagwe a lerato a go hlokomela Heidi.

19. Ka ge molao wa Modimo o ngwadilwe ka dipelong tša rena, re swanetše go diriša’ng gabotse?

¹⁹ Mehlala e mengwe ya lerato la boikgafo e ka hwetšwa gare ga bahlanka ba Jehofa. Ga go na molao o ngwadilwego wo o hlaolago batho ba Modimo lehono. Go e na le moo, re bona go phethagatšwa ga seo se ngwadilwego go Ba-Hebere 8:10 ge e re: “Kxwêranô ye ke tl’o xo e dira le bôná ba leloko la Isiraele xe xo fetile mehla yeno, Morêna ó re šé: Ke tlo bea melaô ya-ka matswalong a bôná; ke tlo e tlôka dipelong tša bôná. Ke tlo ba Modimo wa bôná; ’me bôná e tlo ba sethšaba sa-ka.” Eka ka mehla re ka rata molao wa lerato woo Jehofa a o ngwadilego ka dipelong tša rena, gomme re diriše sebaka se sengwe le se sengwe gabotse bakeng sa go bontšha lerato.

20. Ke ka baka la’ng molao wa Kriste e le lehumo la bohlokwa kudu?

²⁰ Ke mo go thabišago gakaakang go hlankela Modimo gotee le barwarre lefaseng ka bophara bao ba bontšhago lerato le bjalo! Bao ba nago le molao wa Kriste ka dipelong tša bona ba thabela lehumo la bohlokwa kudu lefaseng le leo le se nago lerato. Ga ba thabele feela lerato la Jehofa eupša gape ba thabela tlemo e tiilego ya lerato la borwarre. “A botse le thatêxô! xe bana ba motho bà dula bà kwana!” Gaešita le ge Dihlatse tša Jehofa di dula ditšhabeng tše dintši, di bolela maleme a mantši e bile di e-tšwa ditšong tše dintši, di thabela botee bja bodumedi bjoo bo ka se bapetšwego le selo. Botee bjo bo di dira gore di amogelwe ke Jehofa. Mopsalme o ngwadile gore: “Xôna-mó [bathong bao ba kopanego leratong] Morêna ó laetše thšexofatšô, bophelô neng le neng.”—Psalme 133:1-3.

Na o ka Araba?

• Melao e Lesome e be e le ya bohlokwa gakaaka’ng?

• Molao o ngwadilwego ka dipelong ke’ng?

• Ke tema efe yeo lerato le e kgathago ‘molaong wa Kriste’?

• Ke ka ditsela dife re ka bontšhago gore re rata Modimo le moagišani?

[Dipotšišo tša Thuto]

[Seswantšho go letlakala 25]

Ba-Isiraele ba be ba e-na le melao e ngwadilwego diphaphathing tša lefsika

[Diswantšho go letlakala 26]

Bakriste ba na le molao wa Modimo ka dipelong tša bona

[Diswantšho go letlakala 28]

Sonia le ngwanenyana wa kua Senegal kopanong ya selete ya 2004