Lentšu la Jehofa le a Phela

Dintlha tše Kgolo go tšwa Pukung ya Samuele wa Bobedi

NA GO lemoga bogoši bja Jehofa go nyaka gore re kwe ka mo go feletšego? Na motho yo a botegago o dira se se lokilego pele ga mahlo a Modimo ka mehla? Ke motho wa mohuta ofe yo Modimo wa therešo a mo tšeago e le yo a “kwanaxo le pelo ya xaxwe”? (1 Samuele 13:14) Puku ya Beibele ya Samuele wa Bobedi e nea dikarabo tše di kgotsofatšago tša dipotšišo tše.

Samuele wa Bobedi e ngwadilwe ke Gada le Nathane, e lego baporofeta ba babedi bao ba bego ba e-na le tswalano ya kgaufsi le Kgoši Dafida wa Isiraele ya bogologolo. * Puku ye ye e feditšwego mo e ka bago ka 1040 B.C.E., go ya bofelong bja bogoši bja Dafida bja nywaga e 40, e bolela kudu ka Dafida le tswalano ya gagwe le Jehofa. Kanegelo ye e kgahlišago kudu e laodiša kamoo setšhaba se se arogantšwego ke ntwa se fetogago mmušo o kopanego wo o atlegilego ka tlase ga kgoši e nago le sebete. Terama ye e kgahlišago e tletše ka maikwelo a batho ao a bego a hlaloswa ka tsela e matla kudu.

DAFIDA O “FÊLA A XOLA À E-YA”

(2 Samuele 1:1–10:19)

Tsela yeo Dafida a ilego a arabela ka yona ditabeng tša lehu la Saulo le la Jonathane e utolla tsela yeo a bego a ikwa ka yona ka bona le ka Jehofa. Kua Heburone, Dafida o kgethwa go ba kgoši ya moloko wa Juda. Morwa wa Saulo e lego Isibosethe o dirwa kgoši ya Isiraele ka moka. Dafida o tšwela pele “a xola à e-ya,” gomme ka morago ga nywaga e ka bago e šupa le seripa, o dirwa kgoši ya Isiraele ka moka.—2 Samuele 5:10.

Dafida o thopa Jerusalema go ba-Jebusi gomme o e dira motse-mošate wa mmušo wa gagwe. Boiteko bja gagwe bja mathomo bja go iša areka ya kgwerano kua Jerusalema bo baka kotsi. Lega go le bjalo, boiteko bja bobedi bo a atlega, gomme Dafida o bina ka lethabo. Jehofa o dira kgwerano ya mmušo le Dafida. Dafida o fenya manaba a gagwe ka ge Modimo a tšwela pele a e-na le yena.

Dipotšišo tša Mangwalo di a Arabja:

2:18—Ke ka baka la’ng Joaba le barwarragwe ba babedi ba ile ba bitšwa barwa ba bararo ba Tseruya e lego mmago bona? Ka Mangwalong a Sehebere, gantši mašika a be a tsebja ka tatago ona. Monna wa Tseruya a ka ba a ile a hwa go sa letelwa goba a ka ba a ile a lebelelwa e le yo a sa swanelwago go ngwalwa ka Mangwalong a Makgethwa. Go na le kgonagalo ya gore Tseruya o ile a ngwalwa ka gobane e be e le kgaetšedi ya Dafida goba kgaetšedi ya gagwe ka motswadi o tee. (1 Koronika 2:15, 16) Nako feela yeo go bolelwago ka tatago barwarre ba ba bararo ke mabapi le lebitla la gagwe kua Betlehema.—2 Samuele 2:32.

3:29—Ke’ng se se bolelwago ke monna “wa sexolê”? Ka tlwaelo, modiro wa basadi e be e le go roka. Ka baka leo, polelwana ye e ka bolela ka banna bao ba bego ba sa swanelwe ke mediro e bjalo ka go ya ntweng gomme ka baka leo ba gapeletšega  go dira modiro woo gantši o bego o dirwa ke basadi.

5:1, 2—Dafida o dirilwe kgoši ya Isiraele ka moka ka morago ga ge go fetile nako e kaaka’ng Isibosethe a bolailwe? Go bonagala go kwagala go phetha ka gore Isibosethe o thomile pušo ya gagwe ya nywaga e mebedi nakwana ka morago ga lehu la Saulo, mo e ka bago ka nako e swanago le yeo ka yona Dafida a thomilego go buša Heburone. Dafida o bušitše Juda a le Heburone ka nywaga e šupa le seripa. Gatee-tee ka morago ga go dirwa kgoši Isiraeleng ka moka, o ile a iša motse-mošate wa gagwe kua Jerusalema. Ka gona, go fetile nywaga e ka bago e mehlano ka morago ga lehu la Isibosethe pele Dafida a e-ba kgoši ya Isiraele ka moka.—2 Samuele 2:3, 4, 8-11; 5:4, 5.

8:2—Ke ba-Moaba ba bakae bao ba ilego ba bolawa ka morago ga go lwa le ba-Isiraele? Palo e ka ba e ile ya hwetšwa ka go lekanya go e na le ka go bala. Go bonagala Dafida a ile a dira gore ba-Moaba ba robale fase ba bapelane ba dirile mothaladi. Se se latelago, o ile a dira gore mothaladi wa bona o lekanywe ka botelele bja mogala, goba thapo. Go bonagala ba-Moaba ba lekanago methaladi e mebedi, goba pedi-tharong ya bona, ba ile ba bolawa, gomme ba lekanago mothaladi o tee, goba tee-tharong ya bona, ba ile ba tlogelwa ba phela.

Seo re Ithutago Sona:

2:1; 5:19, 23. Dafida o ile a nyaka tlhahlo ya Jehofa pele a ka yo dula Heburone le pele a ka yo lwa le manaba a gagwe. Le rena re swanetše go tsoma tlhahlo ya Jehofa pele re ka dira diphetho tšeo di kgomago boemo bja rena bja moya.

3:26-30. Go itefeletša go lebiša mafelelong a nyamišago.—Ba-Roma 12:17-19.

3:31-34; 4:9-12. Go se itefeletše ga Dafida le go se be ga gagwe le lehloyo ke mohlala o mobotse.

5:12. Le ka mohla ga se ra swanela go lebala gore Jehofa o re rutile ditsela tša gagwe gomme o dirile gore re kgone go ba le tswalano e botse le yena.

6:1-7. Gaešita le ge Dafida a be a e-na le maikemišetšo a mabotse, boiteko bja gagwe bja go huduša Areka ka karikana e be e le go roba molao wa Modimo gomme bo feleditše ka go palelwa. (Ekisodo 25:13, 14; Numeri 4:15, 19; 7:7-9) Go swara Areka ga Usa go bontšha gore maikemišetšo a mabotse ga a fetoše seo Modimo a se nyakago.

6:8, 9. Ge a be a le tekong, Dafida o ile a thoma ka go galefa, gomme a boifa—mohlomongwe a ba a bea Jehofa molato mabapi le kotsi e mo hlagetšego. Re swanetše go itiša malebana le go bea Jehofa molato mabapi le mathata ao a tlišwago ke go hlokomologa melao ya gagwe.

7:18, 22, 23, 26. Boikokobetšo bja Dafida, boineelo bja gagwe bjo bo feletšego go Jehofa le go kgahlegela ga gagwe go tumiša leina la Modimo ke dika tšeo le rena re ka di ekišago.

8:2. Boporofeta bjo bo boletšwego nywageng e ka bago 400 pejana bo a phethagatšwa. (Numeri 24:17) Lentšu la Jehofa ka mehla le a phethagala.

9:1, 6, 7. Dafida o phethagaditše seo a se holofeditšego. Le rena re swanetše go katanela go phethagatša seo re se holofetšago.

JEHOFA O DUMELELA GORE MASETLAPELO A DIRAGALELE MOTLOTŠWA WA GAGWE

(2 Samuele 11:1–20:26)

Jehofa o botša Dafida gore: “Tseba xore ke tlo Xo tsošetša bošula byo bo tlo xo šimoloxa ngwakong wa xaxo; ke tlo Xo amoxa basadi ba xaxo Ò lebeletše, ka ba nea motho weno, a tlo rôbala nabô’ mosexare xò sile.” (2 Samuele 12:11) Ke ka baka la’ng go tsebatšwa kahlolo ye? Ke ka baka la sebe sa Dafida le Batseba. Gaešita le ge Dafida yo a itsholago a lebalelwa, ga a efošwe ditla-morago tša sebe sa gagwe.

Sa pele, ngwana yo Batseba a mmelegago o a hwa. Ke moka morwedi wa Dafida wa kgarebe e lego Thamara o katwa ke kgaetšedi’agwe ka motswadi o tee e lego Aminoni. Kgaetšedi ya gagwe ya madi e lego Abesalomo o bolaya Aminoni e le ge a itefeletša. Abesalomo o loga maano-mabe malebana le tatagwe gomme o itsebatša e le yena kgoši kua Heburone. Dafida o gapeletšega go tšhabela Jerusalema. Abesalomo o ba le ditswalano tša botona le botshadi le basadi ba tatagwe ba direthe ba lesome bao ba tlogetšwego gore ba hlokomele legae. Dafida e ba kgoši gape  feela ka morago ga ge Abesalomo a bolailwe. Go rabela ga Seba wa mo-Benjamini go fela ge Seba a e-hwa.

Dipotšišo tša Mangwalo di a Arabja:

14:7—Ke’ng se se swantšhetšwago ke “xo tima lexala la-ka”? Go phadima ga legala le le fsago ka go nanya go dirišetšwa go bontšha ngwana yo a phelago.

19:29—Ke ka baka la’ng Dafida a ile a arabela ka tsela ye a ilego a arabela ka yona tlhalosong ya Mefibosethe? Ka morago ga go kwa seo Mefibosethe a bego a se bolela, Dafida o swanetše go ba a ile a lemoga gore o sentše ka go amogela mantšu a Tsiba ka ntle le go naganišiša ka ona. (2 Samuele 16:1-4; 19:24-28) Go na le kgonagalo e kgolo ya gore Dafida o be a ferekane gomme o be a sa nyake go kwa selo le ge e le sefe se sengwe mabapi le taba ye.

Seo re Ithutago Sona:

11:2-15. Pego e botegago mabapi le mafokodi a Dafida e hlatsela taba ya gore Beibele ke Lentšu la Modimo le le buduletšwego.

11:16-27. Ge re dira sebe se segolo, ga se ra swanela go leka go se bipa go etša ge Dafida a dirile. Go e na le moo, re swanetše go ipolela dibe tša rena go Jehofa gomme re tsome thušo go bagolo ka phuthegong.—Diema 28:13; Jakobo 5:13-16.

12:1-14. Nathane o beile mohlala o mobotse bakeng sa bagolo bao ba kgethilwego ka phuthegong. Ba swanetše go thuša bao ba welago sebeng gore ba lokiše ditsela tša bona. Bagolo ba swanetše go phetha boikarabelo bjo ka bokgoni.

12:15-23. Go ba ga Dafida le pono e nepagetšego mabapi le seo se ilego sa mo wela go ile gwa mo thuša gore a arabele mathateng a gagwe ka tsela e swanetšego.

15:12; 16:15, 21, 23. Ge go be go bonagala eka Abesalomo o tla tšea setulo sa bogoši, boikgogomošo le go rata maemo go ile gwa dira gore moeletši yo bohlale kudu e lego Ahithofele e be moeki. Go ba le bohlale eupša o se na boikokobetšo le potego e sa kwanantšhego e ka ba moreo.

19:24, 30. Ruri Mefibosethe o be a thabela botho bjo lerato bja Dafida. O ile a ikokobeletša ka go rata phetho ya kgoši mabapi le Tsiba. Go tšeela Jehofa le mokgatlo wa gagwe godimo go swanetše go re tutueletša gore re ikokobetše.

20:21, 22. Bohlale bja motho o tee bo ka bakela ba bantši dikotsi.—Mmoledi 9:14, 15.

ANKE RE WELENG “DIATLENG TŠA MORÊNA”

(2 Samuele 21:1–24:25)

Go ba le tlala ka nywaga e meraro ka baka la molato wa madi woo o bakilwego ke Saulo ka go bolaya ba-Gibeoni. (Jošua 9:15) E le go itefeletša bakeng sa molato woo wa madi, ba-Gibeoni ba kgopela barwa ba šupago ba Saulo gore ba ba bolaye. Dafida o ba neela diatleng tša ba-Gibeoni, gomme  komelelo e fedišwa ke go na ga pula. Dinatla tše nne tša ba-Filisita di “bolailwe ke Dafida le bahlanka ba xaxwe.”—2 Samuele 21:22.

Dafida o dira sebe se segolo ka go laela ka tsela e sego molaong gore batho ba balwe. O a itshola gomme o kgetha go wela “diatleng tša Morêna.” (2 Samuele 24:14) Ka baka leo, batho ba 70 000 ba bolawa ke mauba. Dafida o latela taelo ya Jehofa gomme kotlo e a emišwa.

Dipotšišo tša Mangwalo di a Arabja:

21:8—Ke ka baka la’ng go ka thwe morwedi wa Saulo e lego Mikala o be a e-na le barwa ba bahlano, mola 2 Samuele 6:23 e bolela gore o hwile a se na ngwana? Tlhaloso e amogelwago gohle ke ya gore barwa ba e be e le ba kgaetšedi ya Mikala e lego Merabe, yo a bego a nyalane le Adiriele. Go bonagala Merabe a hwile go sa letelwa gomme Mikala yo a se nago bana a godišitše bašemane ba.

21:9, 10—Retsiba o ile a fetša nako e kaaka’ng a hlapeditše barwa ba gagwe ba babedi le ditlogolo tše hlano tša Saulo, bao ba ilego ba bolawa ke ba-Gibeoni? Batho ba ba šupago ba ile ba fegwa ka “lebaka la xe ba thôma xo buna”—March goba April. Ditopo tša bona di ile tša tlogelwa molaleng kua thabeng. Retsiba o ile a hlapetša ditopo tše tše šupago bošego le mosegare go ba go fihla ge Jehofa a be a bontšha gore ga a sa galefile ka go fediša komelelo. Go na ga pula le ge e le gofe go be go tloga go ka se kgonege pele ga ge go fela sehla sa puno ka October. Ka go rialo, Retsiba a ka ba a ile a hlapetša ditopo ka dikgwedi tše hlano goba tše tshela. Ka morago ga moo, Dafida o ile a dira gore marapo a banna ba a bolokwe.

24:1—Ke ka baka la’ng e be e le sebe se segolo gore Dafida a bale batho? Go bala batho ka bogona e be e se selo seo se thibelwago Molaong. (Numeri 1:1-3; 26:1-4) Beibele ga e bolele boikemišetšo bjo bo ilego bja tutueletša Dafida gore a bale batho. Lega go le bjalo, 1 Koronika 21:1 e bontšha gore Sathane o mo tutueleditše go dira bjalo. Tiragalong le ge e le efe, molaodi wa madira a gagwe e lego Joaba o be a tseba gore phetho ya Dafida ya go ngwadiša batho e be e fošagetše, gomme o ile a leka go eletša Dafida gore a se dire bjalo.

Seo re Ithutago Sona:

22:2-51. Ruri kopelo ya Dafida e hlalosa Jehofa gabotse kudu e le Modimo wa therešo, yo a swanelwago ke gore re mmote ka mo go feletšego!

23:15-17. Dafida o be a hlompha molao wa Modimo ka mo go tseneletšego kudu mabapi le bophelo le madi mo e lego gore tiragalong ye o ile a gana go dira gaešita le selo seo se bego se swana le go roba molao woo. Re swanetše go hlagolela boemo bjo bo bjalo bja kgopolo ditaelong ka moka tša Modimo.

24:10. Letswalo la Dafida le ile la mo tutueletša gore a itshole. Na matswalo a rena a kgongwa gabonolo ka mo go lekanego gore a ka arabela ka tsela yeo?

24:14. Dafida o be a tloga a tseba gore Jehofa o na le kgaugelo kudu go feta batho. Na re kgodišegile ka tsela e bjalo?

24:17. Dafida o ile a itshola ka gobane sebe sa gagwe se ile sa dira gore setšhaba ka moka se tlaišege. Modiradibe yo a itsholago o swanetše go ikwa a le molato ka baka la kgobošo yeo tiro ya gagwe e ka bago e e tlišitše ka phuthegong.

Re ka Kgona go ‘Kwana le Pelo ya Modimo’

Kgoši ya bobedi ya Isiraele e ipontšhitše e le ‘monna yo a kwanago le pelo ya Jehofa.’ (1 Samuele 13:14) Dafida ga se a ka a belaela ditekanyetšo tša Jehofa tša go loka, le gona ga se a ka a tsoma go phegelela tsela ya go phela ka ntle le Modimo. Ka mehla ge Dafida a be a dirile phošo, o be a lemoga sebe sa gagwe, a amogela tayo, gomme a lokiša ditsela tša gagwe. Dafida e be e le monna wa go botega. Na ga re bontšhe bohlale ge re mo ekiša, kudu-kudu ge re dira phošo?

Phihlelo ya Dafida e bontšha gabotse gore go lemoga bogoši bja Jehofa go nyaka gore re amogele ditekanyetšo tša Gagwe tša mabapi le se sebotse le se sebe gomme re katanele go phela ka go dumelelana le tšona bjalo ka babotegi. Go a kgonega gore re fihlelele se. Ruri re ka thabišwa ke dithuto tšeo re ithutago tšona go tšwa pukung ya Samuele wa Bobedi! Ka kgonthe, molaetša wo o buduletšwego wo o lego ka pukung ye o a phela le gona o na le matla.—Ba-Hebere 4:12.

[Mongwalo wa ka tlase]

[Seswantšho go letlakala 16]

Go gopola ga Dafida motho yo a ilego a mmea ka go tia gore e be kgoši go ile gwa mo thuša gore a dule a ikokobeditše

[Diswantšho go letlakala 18]

“Tseba xore ke tlo Xo tsošetša bošula byo bo tlo xo šimoloxa ngwakong wa xaxo”

Batseba

Thamara

Aminoni