Go Nea Thušo e Nyakegago Kua Matsedonia

“SELÊLA Matsedonia O re hlakodišê!” (Ditiro 16:9) Mantšu a a monna yo a tšweletšego go moapostola Paulo ponong a ile a utolla go nyakega ga go bolela ditaba tše dibotse tša Mmušo wa Modimo tšhemong e mpsha, metseng yeo ga bjale e lego kua Gerika.

Setšhabeng sa bjale sa Matsedonia, go na le Hlatse e tee ya Jehofa go badudi ba bangwe le ba bangwe ba 1 840. Batho ba bantši ga se ba ka ba kwa ka Jehofa Modimo le gatee. Ee, go na le go nyakega mo go akgofilego ga gore batho ba setšhaba se ba kwe molaetša wa khutšo.—Mateo 24:14.

Modimo o butše tsela ya go nea thušo yeo e nyakegago. Ka letšatši le lengwe ka November 2003, ofisi ya Matsedonia ya Dihlatse tša Jehofa kua Skopje, e ile ya amogela mogala wo o bego o sa letelwa. O be o e-tšwa Lefelong la Tirišano ya Boditšhaba-tšhaba la Matsedonia (Macedonian Center for International Cooperation), gomme o be o laletša Dihlatse go tla go hloma mokutwana woo di bego di tla hlalosa ditumelo tša tšona go wona pontšhong ya matšatši a mararo yeo e bego e tla thoma ka November 20. A sebaka se sebotse gakaakang sa go fihlelela batho ba dikete bao le gatee ba bego ba se ba ka ba kwa ditaba tše dibotse tša Mmušo!

Baithapi ba ile ba šoma ka thata go lokišetša le go hloma pontšho ya dikgatišo tša go fapa-fapana tša Dihlatse tša Jehofa ka leleme la se-Matsedonia. Dipuku tše e lego mehlala ya tše di hwetšagalago di ile tša bewa mo di ka bonwago gabonolo e le gore baeti ba ka itšeela dikopi ge e ba ba be ba rata go dira bjalo. Pontšho ye e neile batho ba bantši sebaka sa go hwetša meetse a lapološago a moya ntle le tefo.—Kutollo 22:17.

Baeti ba be ba nyaka ka mo go kgethegilego dipuku tšeo di bego di kgoma maphelo a bona, tše bjalo ka puku ya Dipotšišo tša Bafsa le Dikarabo tše Šomago le ya Sephiri sa Lethabo la Lapa. * Batho ba 98 ba ile ba tlogela diaterese tša bona, ba kgopela Dihlatse tša Jehofa gore di ba etele. Ba bantši ba ile ba bolela gabotse ka mošomo o mobotse wa Dihlatse tša Jehofa le ka boemo bjo bo phagamego bja dipuku.

Monna yo mongwe o ile a tla mokutwaneng a swere mošemanyana wa gagwe ka letsogo. Tate o ile a botšiša ge e ba go e-na le dipuku tša bana. Dihlatse di ile tša mmontšha kgatišo ya Puku Ya-ka ya Ditaba tša Beibele. * O ile a phetla matlakala a yona gomme ka lethabo a botšiša gore ke bokae. Ge a be a e-kwa gore modiro wa go  ruta wa Dihlatse tša Jehofa o thekgwa ka mo go feletšego ka meneelo ya boithatelo, o ile a thaba le go feta. (Mateo 10:8) O ile a bontšha morwa wa gagwe puku ye gomme a re: “A puku e botse gakaakang! Tate o tlo go balela kanegelo e tee letšatši le lengwe le le lengwe!”

Moprofesara wa filosofi o ile a ya mokutwaneng. O be a kgahlegela kudu go tseba ka bodumedi ka kakaretšo, eupša ka mo go kgethegilego a kgahlegela ditumelo tša Dihlatse tša Jehofa. Ge a dutše a lebeledišiša puku ya Go Tsoma ga Batho Modimo, * moprofesara o ile a re: “Taba ya yona e beilwe ka mo go kwagalago e le ka kgonthe! E tloga e le ka yona tsela yeo ke bego ke akanya gore ditaba di swanetše go bewa ka yona.” Ka morago barutwana ba bangwe ba ba tšwago sekolong sa gagwe ba ile ba tla mokutwaneng gomme ba kgopela dikopi tša bona ka noši tša puku yeo moprofesara a e hweditšego. Ba be ba nyaka go ithuta puku yona yeo. Ba be ba nagana gore o tla diriša taba yeo e lego ka pukung ge a ba ruta.

Pontšho ye e neile batho ba bangwe sebaka sa go kwa ditherešo tša Mangwalo ka lekga la mathomo. Sehlopha sa bafsa ba mahlalagading ba difoa se ile sa tla go tlo bona. Yo mongwe wa Dihlatse o ile a ba le poledišano e kopana le sona, a thušwa ke ngwanenyana yoo a bego a e fetolela ka polelo ya diatla. A diriša diswantšho tše lego ka pukung ya Motho yo a Phagamego Kudu yo a Kilego a Phela, * o ile a hlalosa gore Jesu o fodišitše batho ba babjago, go akaretša le difoa. Ba ile ba thabela go tseba ka kholofetšo ya Beibele ya gore kgaufsinyane Jesu o tla dira se se swanago bakeng sa batho ba phelago lefaseng mehleng ya rena. Bontši bja bona bo ile bja amogela ka lethabo dipuku tše di theilwego Beibeleng gomme go ile gwa dirwa dithulaganyo tša gore Hlatse yeo e tsebago polelo ya diatla e ba etele.

Go tlaleletša lelemeng la se-Matsedonia, dipuku di be di hwetšagala ka se-Albania, Seisemane le se-Turkey. Monna yo mongwe yoo a bego a sa bolele se-Matsedonia o ile a kgopela dipuku tša Seisemane. Ka morago ga go amogela ditokollo tša dimakasine tša Morokami le Phafoga!, o ile a hlalosa gore o bolela se-Turkey. Ge a be a bontšhwa dipuku tša leleme la gabo, o be a tloga a sa kgolwe mahlo a gagwe! O ile a bona gore Dihlatse tša Jehofa di nyaka go thuša batho ka moka.

Ke bohlatse bjo bobotse gakaakang bjo bo ilego bja newa tiragalong yeo, gomme e bile mo go kgothatšago gakaakang go bona batho ba bantši ka tsela ye ba bontšha kgahlego ya go kgahlegela therešo ya Beibele! Ee, Jehofa o butše tsela ya go phatlalatša ditaba tše dibotse tša Mmušo ka mo go oketšegilego Matsedonia.

[Footnotes]

[Box/Pictures on page 9]

TIRAGALO YA BOHLOKWA!

Maiteko a go phatlalatša ditaba tše dibotse tša Mmušo wa Modimo a ile a gatela pele kudu le go feta ka May 17, 2003. Ofisi ya Dihlatse tša Jehofa e ile ya neelwa kua Skopje. Modiro wa go aga o be o tšere nywaga e mebedi gomme gwa katološwa meago ya ofisi ya pele ka makga a mane.

Go na le meago e meraro yeo e ikemetšego yeo e nago le diofisi tša tša taolo le tša bofetoledi go akaretša le lefelo la madulo, khitšhi le bohlatswetšo. Guy Pierce, e lego setho sa Sehlopha se Bušago sa Dihlatse tša Jehofa, o be a le gona bakeng sa go nea polelo ya go neelwa ga moago. Baeti ba ba tšwago dinageng tša go fapa-fapana tše lesome ba bile gona lenaneong la go neelwa ga moago. Ka moka ba be ba thabetše go bona meago e mefsa.

[Mmapa go letlakala 8, 9]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

BULGARIA

MATSEDONIA

Skopje

ALBANIA

GERIKA

[Seswantšho go letlakala 8]

Skopje, Matsedonia