Dipotšišo tše Tšwago go Babadi

Go tlile bjang gore Simisone a sware ditopo tša bao a ba bolailego eupša a no tšwela pele e le Moitlami?

Isiraeleng ya bogologolo, motho o be a ka dira keno ka go rata gomme a ba Moitlami ka nako e itšego. * E nngwe ya dithibelo tšeo yo a dirago keno a bego a swanetše go e latela e be e le ya gore: “Mehla ka moka ye a ikxethetšexo Morêna ka yôna a se kê a batamêla setoto sa mohu. A se kê a ithšilafatša ka tat’axwe, le xe e le ka mm’axwe, le xe e le ka ngwan’abô, le xe e le ka kxaetšedi ya xaxwe, xe ba ka hwa.” Go thwe’ng ge e ba “mo hleng xa xaxwe xo ka hwa motho ka sewêlô ka byako”? Go kgwatha setopo ka phošo ka tsela yeo go be go tla šilafatša go ba ga gagwe Moitlami. Ka baka leo, go be go boletšwe gore: “Matšatši ala a fetilexo a se kê a balwa.” O be a tla swanelwa ke go swarelwa tirelo ya tlhwekišo le go thomološa nako ya gagwe ya go ba Moitlami.—Numeri 6:6-12.

Lega go le bjalo, Simisone e be e le Moitlami ka kgopolo e fapanego. Pele ga ge Simisone a belegwa, morongwa wa Jehofa o ile a botša mmagwe gore: “O tsebe, xe O tlo ithwala wa bêlêxa ngwana wa mošemanyana, hlôxô ya xaxwe e se kê ya batamêlwa ka lexarê; ka xobane lesoxanyana leo, xe le sa tš’o bêlêxwa, e tlo ba mokxêthwa wa Modimo; xomme ké yêna e a tl’o xo thôma xo namolêla Isiraele diatleng tša Ba-Filisita.” (Baahlodi 13:5) Simisone ga se a ka a dira keno ya go ba Moitlami. E be e le Moitlami yo a kgethilwego ke Modimo, gomme o be a swanetše go ba Moitlami bophelo bja gagwe ka moka. Thibelo ya gore go se swarwe setopo e be e ka se šome boemong bja gagwe. Ge e ba e be e šoma gomme ka phošo a swara setopo, o be a ka thomološa bjang Boitlami bja gagwe bja bophelo ka moka bjo bo thomilego ge a be a belegwa? Ka gona, go molaleng gore dilo tšeo di bego di nyakwa go Baitlami ba bophelo ka moka di be di fapana ka tsela e itšego le tšeo di bego di nyakwa go Baitlami ba baithapi.

Ela hloko ditaelo tša Jehofa tše di yago go Baitlami ba bararo ba bophelo ka moka—Simisone, Samuele le Johane Mokolobetši—tšeo di boletšwego ka Beibeleng. Go etša ge go boletšwe pejana, Simisone o be a se a swanela go kota moriri wa hlogo ya gagwe. Hanna o ile a dira keno mabapi le ngwana wa gagwe yo a bego a tlo belegwa e lego Samuele, ya gore: “Ke tlo mo xafêla Morêna bophelô bya xaxwe ka moka; xomme mo hloxong ya xaxwe xo ka se kê xwa batamêla lexarê.” (1 Samuele 1:11) Boemong bja Johane Mokolobetši, morongwa wa Jehofa o itše: “A ka se kê  a nwa morara le sedilá.” (Luka 1:15) Go oketša moo, “Johane ó be a apere kobô ya bôya bya kamêla, à itlemile mathêka ka lerala; ’me dijô tša xaxwe e be e le ditšiê le dinose tša naxa.” (Mateo 3:4) Ga go le o tee wa ba bararo ba yoo a ilego a laelwa gore a se batamele setopo.

Le ge Simisone e be e le Moitlami, o be a le gare ga baahlodi bao Jehofa a bego a ba kgethetše go phološa ba-Isiraele diatleng tša bahlakodi ba bona. (Baahlodi 2:16) Le gona, ge a be a phetha kabelo ye o ile a kgoma ditopo. Tiragalong e nngwe, Simisone o ile a bolaya ba-Filisita ba 30 gomme a ba apola diaparo. Ka morago, o ile a betha manaba a o šoro, “a ba rôbaxanya dikxopo le dikxwele.” O ile a ba a tšea lerapo le lefsa la mohlagare wa pokolo gomme a bolaya banna ba sekete ka lona. (Baahlodi 14:19; 15:8, 15) Simisone o dirile tše ka moka ka tumelelo ya Jehofa e bile a thekgwa ke yena. Mangwalo a bolela ka yena e le monna yo a beilego mohlala wa tumelo.—Ba-Hebere 11:32; 12:1.

Na mantšu a gore Simisone o ile a gagoganya tau “e ke ke putšanyana” a bontšha gore go gagoganya diputšanyana e be e le mokgwa o tlwaelegilego mehleng ya gagwe?

Ga go na bohlatse bjo bo bontšhago gore mehleng ya Baahlodi ba Isiraele e be e le mo go tlwaelegilego gore batho ba gagoganye diputšanyana. Baahlodi 14:6 e re: “[Simisone] a tlêlwa ke môya wa Morêna, a napa a e xaxoxanya [tau e nyenyane ya ledumaedi] e ke ke putšanyana, a sa swara selô diatleng tša xaxwe.” Go bonagala tlhaloso ye e le tshwantšhišo.

Polelwana e rego “a e xaxoganya” e ka ba le ditlhaloso tše pedi. Simisone a ka ba a ile a phatlola mehlagare ya tau goba a ile a phatlola tau a e swere ka maoto ka tsela e itšego. Ge e ba polelwana ye e bolela gore o ile a phatlola mehlagare ya tau, gona ke mo go kwešišegago gore motho o be a ka kgona go dira se se swanago go putšanyana. Boemong bjo, go swana mo go bontšha gore go fenya ga Simisone tau ka diatla go be go le bonolo go etša ge a be a ka dira se se swanago go putšanyana. Lega go le bjalo, go thwe’ng ge e ba Simisone a be a bolaile tau ka go e phatlola a e swere ka maoto? Gona, tlhaloso ye e be e tloga e swanetše go kwešišwa e le tshwantšhišo. Ntlha ya tshwantšhišo ye e be e le gore moya wa Jehofa o ile wa matlafatša Simisone gore a dire tiro yeo e bego e nyaka matla a fetago a tlhago. Boemong le ge e le bofe, tshwantšhišo ye e lego go Baahlodi 14:6 e bontšha gore ka thušo ya Jehofa, tau e matla e ile ya bonagala e se e šoro go Simisone go fo swana le kamoo putšanyana e bego e ka bonagala ka gona go motho yo a nago le matla a tlwaelegilego.

[Mongwalo wa tlase]