Bagoeledi Ba Mmušo Ba A Bega

Go Hwetša Batho Mafelong a Bona a Mošomo

KE ENG seo moapostola Mateo, Petro, Andrea, Jakobo le Johane ba bego ba swana ka sona? Ka moka ga bona ba ile ba bitšwa ke Jesu ge ba be ba le mafelong a bona a mošomo. Petro, Andrea, Jakobo le Johane ba be ba swaregile ka kgwebo ya bona ya go rea dihlapi ge Jesu a be a ba laletša a re: “Ntateleng.” Mateo o be a le ka ofising ya lekgetho ge a be a laletšwa gore e be morutiwa wa Jesu.—Mateo 4:18-21; 9:9.

Go nea bohlatse go batho mafelong a bona a mošomo e ka ba mo go putsago. Ka go lemoga se, morago bjale Dihlatse tša Jehofa kua Japane di ile tša dira boiteko bjo bo kopanetšwego bja go ba le karolo sebopegong se sa bodiredi. Mafelelo e bile afe? Ka dikgwedi tše sego kae, go ile gwa dirwa maeto a go boela a dikete, gomme gwa thongwa dithuto tša Beibele tše ka bago 250. Ela hloko diphihlelo tše di latelago.

Modiredi wa nako e tletšego kua Tokyo o ile a kopana le molaodi wa lebenkele la go rekiša dijo yo a bego a boletše le Hlatse nywageng e ka bago e 30 e fetilego ge e be e sa le ngwana wa sekolo. Gaešita le ge molaodi a sa ka a kwešiša bontši bja seo se ilego sa bolelwa nakong yeo, o ile a bontšha kgahlego Beibeleng. Ga bjale ka ge kgahlego ya gagwe e tsošološitšwe, o ile a amogela thuto ya Beibele ka go rata, go dirišwa puku ya Tsebo e Išago Bophelong bjo bo sa Felego. * Go oketša moo, o ile a thoma lenaneo la motho ka noši la go bala Beibele mantšiboa a mangwe le a mangwe pele a robala.

Modiredi yo e lego mmulamadibogo yo a kgethegilego o ile a leletša ofisi e nngwe mogala. Gaešita le ge molaodi a be a se gona, mosadi yo mofsa yo a ilego a araba mogala wa molaodi o ile a botšiša gore: “Na o ka rata go bolela le nna?” Ka morago ga poledišano e kopana mogaleng, mosadi o ile a tla bogorogelong gomme a bolela gore o kgahlegela go bala Beibele. Mmulamadibogo yo a kgethegilego o ile a rulaganyetša go boa le Beibele gomme a thoma thuto ya Beibele le yena, ba e swarela phakeng ya kgaufsi mesong pele ga mošomo.

Ofising e nngwe, monna o ile a bona mošomi-gotee le yena a amogela dimakasine tša Morokami le Phafoga! eupša a di lahla gatee-tee ka morago ga gore Hlatse e sepele. Ge monna yoo a fihla gae, o ile a botša mosadi wa gagwe yo e bego e le Hlatse ka tiragalo ye gomme a bolela gore bonyenyane yena o be a tla theetša go se nene. Morwedi wa gagwe yo a ilego a utswa ka tsebe dipolelo tša gagwe, o ile a botša Hlatse yeo e šomago tšhemo yeo ya kgwebo taba ye. Gatee-tee Hlatse e ile ya etela monna yo wa kgaetšedi ofising gomme ya thoma thuto ya Beibele le yena. Kapejana monna o ile a thoma go ba gona ka mehla dibokeng tša Sontaga.

Go nea bohlatse go batho lefelong la mošomo go tlišitše mehola e mengwe. Bagoeledi ba bantši kua Japane ba thomile go ba le bokgoni bja go dira maeto a go boela mafelong a mabenkele, difeketoring le diofising. Go oketša moo, ka go diriša mokgwa wo wa go nea bohlatse, go ile gwa ikopanywa le ba bantši bao ba bego ba se mafolofolo gomme gwa thongwa dithuto le bona. Mafelelo e bile a kgahlišago. Morago bjale phuthego e nngwe ya bogareng bja Tokyo e begile dithuto tša magae tša Beibele tše 108, e lego palo yeo e fetago gabedi yeo e begilwego ngwagola.

[Mengwalo ya ka tlase]