Dipotšišo tše Tšwago go Babadi

Ka morago ga Meetse-fula, Noage o ile a ntšha leeba leo le ilego la boa ka arekeng le swere “letlakala . . . la mohlware.” Leeba le hweditše letlakala leo kae?

Beibele e re botša gore “meetse ya ba a maxolo ka kudu-kudu lefaseng, xwa ba xwa khurumetšwa le dithaba ka moka tše telele tša ka tlase xa lexodimo.” (Genesi 7:19) Ge meetse-fula a dutše a gopa, Noage o ile a ntšha leeba ka makga a mararo—e lego makga ao a bego a šiana ka beke. Ka lekga la bobedi, leeba le ile la boa le “letlakala le lefsa la mohlware ka molomo. Ya ba xôna Noaxe a tsebaxo xore meetse a a phša mo lefaseng.”—Genesi 8:8-11.

Ke therešo gore mo nakong ye ga go na kamoo re ka tsebago ka gona gore karolo e itšego ya lefase e ile ya dula e tletše meetse ka nako e kaakang, ka gobane go molaleng gore sebopego sa naga se ile sa fetolwa ke Meetse-fula. Lega go le bjalo, go bonagala meetse a ile a khupetša ditikologo tše dintši ka nako e telele ka mo go lekanego gore dihlare tše dintši di hwe. Lega go le bjalo, go bonagala tše dingwe di ile tša tšwela pele di phela, e lego seo se ilego sa di thuša gore di tšweletše mahlogedi a mafsa ge meetse a gopile.

The New Bible Dictionary e bolela mabapi le sehlare sa mohlware gore: “Ge se ka rengwa, mahlogedi a mafsa a hloga modung, moo e lego gore go ka hloga dithabe tše di ka fihlago go tše hlano. Mohlware wa Moribund [wo o lego kgaufsi le go hwa] gantši le ona o hloga ka tsela ye.” The New Schaff-Herzog Encyclopedia of Religious Knowledge e re, go bonagala “eka ga o hwe.” Lehono ga go na motho yo a tsebago ditaba ka botlalo, tše bjalo ka go ba ga meetse-fula le letswai goba thempheretšha ya wona. Ka gona, re ka se kgonthišege ka tsela yeo a ka kgomago dihlare tša mohlware le dimela tše dingwe ka gona.

Lega go le bjalo, mohlware wa nageng o ka se kgone go phela dithempheretšheng tše di tonyago, tše di swanago le tšeo di hwetšwago dithabeng tše di phagamego kudu. Gantši o mela ditikologong tša bophagamo bja ka tlase ga dimithara tše 1 000, moo thempheretšha ka kakaretšo e lego ka godimo ga 10°C. Puku ya The Flood Reconsidered e re: “Ka go rialo, Noage o be a ka phetha go tšwa letlakaleng leo le sa tšwago go kgewa gore meetse a meeding a be a thoma go gopa.” Ge Noage a be a ntšha leeba bekeng e latelago, ga se la ka la boa, e lego seo se bontšhago gore go be go tletše dimela e bile go na le mafelo ao leeba le ka kgonago go dula go ona.—Genesi 8:12.