Pono ya Modimo ka Bahu

EHU la motho yo re mo ratago ke le le gateletšago e le ka kgonthe. Maikwelo a go hloka kholofelo, bodutu le go lahlegelwa ke a magolo. Go lahlegelwa ke yo o mo ratago go ka dira motho gore a ikwe a se na thušo, ka gobane go sa šetšwe lehumo, matla goba tutuetšo yeo a nago le yona, ga go motho lefaseng yo ga bjale a ka kgonago go tsošološa bophelo bja motho yo a hwilego.

Lega go le bjalo, Mmopi wa rena o lebelela dilo ka tsela e fapanego. Ka ge a ile a bopa motho wa pele go tšwa leroleng la mmu, a ka kgona le go bopa lefsa motho yo a hwilego. Ka baka leo, Modimo a ka lebelela bahu bjalo ka ge eka ba a phela. Mabapi le bahlanka ba ba botegago ba kgale bao ba hwilego, Jesu o itše: “Go Yena bohle ke ba ba phelago.”​—Luka 20:​38, 39, PK.

Ge a be a le lefaseng, Jesu o be a filwe matla a go tsoša bahu. (Johane 5:​21) Ka gona, o na le pono e swanago le ya Tatagwe ka bao ba hwilego ba botega. Ka mohlala, ge mogwera wa gagwe Latsaro a be a hwile, Jesu o ile a botša barutiwa ba gagwe gore: “Ke ya xo mo tsoša borokong.” (Johane 11:​11) Go ya ka pono ya motho, Latsaro o be a hwile, eupša go ya ka Jehofa le Jesu Latsaro o be a robetše.

Ka tlase ga pušo ya Mmušo wa Jesu, go tla ba le tsogo ya “bohle, baloki le ba s’a lokaxo.” (Ditiro 24:​15) Mafelelong, bao ba tsošitšwego ba tla hwetša thuto go tšwa go Modimo gomme ba be le kholofelo ya go phela lefaseng ka mo go sa felego.​—Johane 5:​28, 29.

Ee, lehu la motho yo o mo ratago le ka go gateletša gomme la go nyamiša moo go ka tšeago nywaga e mmalwa. Lega go le bjalo, go ba le pono e swanago le ya Modimo ka bahu go ka re tlišetša khomotšo e kgolo le go re fa kholofelo.​—2 Ba-Korinthe 1:​3, 4.

NA O TLA AMOGELA KETELO?

Gaešita le lefaseng le leo le dubegilego, o ka hwetša lethabo go tšwa tsebong e nepagetšego ya Beibele ka Modimo, Mmušo wa gagwe le morero wa gagwe o kgahlišago bakeng sa batho. Ge e ba o tla rata go amogela tsebišo e oketšegilego goba o tla rata gore motho yo mongwe a go etele legaeng la gago bakeng sa go tla go swara thuto e sa lefelelwego ya Beibele le wena, hle ngwala gomme o romele leina la gago le aterese ya mo o dulago gona go Jehovah’s Witnesses, Private Bag X2067, Krugersdorp, 1740, South Africa, goba o ngwalele atereseng e swanetšego ye e lokeleditšwego go letlakala 2.

www.watchtower.org