Bagoeledi Ba Mmušo Ba A Bega

Thušo Tabeng ya go Boloka Bokgethwa bja Madi

LEFASENG ka bophara bahlanka ba Jehofa ba bontšhitše go botegela Modimo ka go se kwanantšhe tabeng ya bokgethwa bja madi. (Ditiro 15:​28, 29) Borwarre bja Bokriste bo hweditše thušo go tšwa go sehlopha sa molaki yo a botegago le yo bohlale. (Mateo 24:​45-47) Anke re boneng gore ditla-morago e bile dife kua Philippines.

Lekala la Philippines le bega gore: “Ka 1990 re ile ra tsebišwa gore baemedi ba go tšwa Bethele ya Brooklyn ba tla swara seminari mo Philippines. Go ile gwa laletšwa bana babo rena go tšwa makaleng a mmalwa a Asia, go akaretša Korea, Taiwan le Hong Kong. Morero e be e le go thuša ka go hloma Lefapha la tša Tsebišo ya Sepetlele makaleng a bona le go thuša gape ka go rulaganya Dikomiti tša go Hloma Kwano le Dipetlele. Kua Philippines mathomong go be go hlomilwe dikomiti metseng e mene e megolo.” Dikomiti di be di tla katanela go hwetša dingaka tšeo di bego di tla thabela go dirišana le rena mabapi le boemo bja Bokriste tabeng ya madi. Le gona di be di tla thuša bana babo rena ge go tšwelela mathata tabeng yeo e lego mabapi le madi.

Remegio o ile a kgethwa go hlankela Komiting ya go Hloma Kwano le Dipetlele kua Baguio. Ge nako e dutše e tšwela pele, dingaka di ile tša thoma go lemoga tirelo ye. Remegio o gopola lebakeng le lengwe ge dingaka tše di bego di kopane le Komiti ya go Hloma Kwano le Dipetlele di be di nyaka go tseba kamoo di ka alafago balwetši bao e lego Dihlatse bao ba sa nyakego madi. Remegio o itše: “Dingaka di ile tša thoma go botšiša dipotšišo, eupša ke ile ka ikhwetša ke gakanegile ka gobane dipotšišo tšeo e be e le tša bongaka.” O ile a rapelela thušo go Jehofa bakeng sa gore a lebeletšane le tlhohlo ye ka katlego. Remegio o tšwetše pele ka gore: “Ka morago ga potšišo e nngwe le e nngwe, dingaka tše dingwe di be di emiša matsogo gomme tša hlalosa kamoo di ilego tša lebeletšana ka gona ka katlego le boemo bjo bjalo.” Remegio o be a thabetše thušo yeo, kudu-kudu ka ge karolo ya dipotšišo le dikarabo e ile ya tšwela pele ka diiri tše pedi.

Gona bjale go šetše go na le dikomiti tše 21 nageng ka moka, tšeo di nago le bana babo rena ba 77 ba hlankelago go tšona. Danilo, Hlatse yeo e lego ngaka o re: “Dingaka di lemoga gore balwetši ba bona bao e lego Dihlatse ba thekgwa ke mokgatlo wo o ba hlokomelago ka lerato.” Mathomong ngaka e nngwe e be e dika-dika go bua ngwanabo rena ka ntle le tšhelo ya madi. Lega go le bjalo, ngwanabo rena o ile a ema ka go tia. O ile a buiwa ka katlego. Lefapha la tša Tsebišo ya Sepetlele le bega gore: “Ngaka e be e makaditšwe ke go kaonefala ga ngwanabo rena. E itše: ‘Ka baka la se se diragetšego mo, ke tla thabela go dira se go setho le ge e le sefe sa lena seo se nyakago go buiwa ka ntle le madi.’”