Dipotšišo tše Tšwago go Babadi

Paulo o be a bolela’ng ge a be a re: “Ka mehla xe Le e-⁠ja senkxwa sé, Lè e-⁠nwa senwêlô sé”?

Ge a bolela ka go hlongwa ga Segopotšo sa lehu la Jesu, Paulo o ile a ngwala gore: “Ka mehla xe Le e-⁠ja senkxwa sé, Lè e-⁠nwa senwêlô sé, Le tsebatšê lehu la Morêna xo fihla xe a e-⁠tla.” (1 Ba-Korinthe 11:​25, 26) Ba bangwe ba nagana gore polelwana “ka mehla” mo e šupa gore lehu la Kriste le swanetše go binwa leboelela, ka kgopolo ya gore le binwe ka makga a mantši. Ke ka baka leo ba le binago gantši mo ngwageng. Na seo ke se Paulo a bego a se bolela?

Ga bjale go fetile nywaga e ka bago e 2 000 ga e sa le Jesu a hlomile Segopotšo sa lehu la gagwe. Ka gona, go bina Segopotšo gaešita le gatee ka ngwaga go bolela gore se binnwe ka mehla ga e sa le go tloga ka 33 C.E. Lega go le bjalo, go ya ka taba yeo e dikologilego 1 Ba-Korinthe 11:​25, 26, Paulo o be a sa bolele gore Segopotšo se be se swanetše go binwa gantši gakaakang, eupša o be a bolela gore se be se swanetše go binwa bjang. Segerikeng sa mathomong, ga se a diriša lentšu pol·laʹkis, leo le bolelago gore “ka mehla” goba “leboelela.” Go e na le moo, o dirišitše lentšu ho·saʹkis, leo le bolelago gore “ka mehla,” e lego polelwana e bolelago gore “neng le neng,” “nako e nngwe le e nngwe ge.” Paulo o be a re: ‘Nako e nngwe le e nngwe ge le dira se, le tšwela pele le tsebatša lehu la Morena.’

Ka gona, Segopotšo sa lehu la Jesu se swanetše go binwa gakae? Ke mo go swanetšego gore se binwe gatee feela ka ngwaga. E tloga e le segopotšo gomme digopotšo gantši di binwa gatee ka ngwaga. Go oketša moo, Jesu o hwile ka letšatši la Paseka ya Sejuda, yeo e bego e swarwa gatee ka ngwaga. Ka mo go swanetšego, Paulo o ile a šupa Jesu e le “paseka ya rena, Yena Kriste,” ka ge lehu la Jesu la sehlabelo le ile la bula tsela ya bophelo bakeng sa Isiraele ya moya, go swana le ge sehlabelo sa Paseka ya mathomo se ile sa boloka maitšibulo a ba-Isiraele ba kgonthe a phela kua Egipita gomme se ile sa bula tsela bakeng sa go lokollwa ga setšhaba bokgobeng. (1 Ba-Korinthe 5:⁠7; Ba-Galatia 6:​16) Go tswalana mo le Paseka ya Sejuda ya ngwaga le ngwaga ke bohlatse bjo bo oketšegilego bja gore Segopotšo sa lehu la Jesu se swanetše go binwa gatee feela ka ngwaga.

Go feta moo, Paulo o ile a tswalanya lehu la Jesu le monyanya o mongwe wa ngwaga le ngwaga wa Sejuda, Letšatši la Poelano. Re bala go Ba-Hebere 9:​25, 26 gore: “Xa se xore [Jesu] a fêlê a boeletša xo itira sedimo xa-ntši byalo ka Moperisita e moxolo xe a tsêna Sekxêthwa-kxethweng ka ngwaxa [Letšatšing la Poelano] ka madi e sexo a xaxwe . . . Byale xomme ó ile a bônala pele xa Modimo xa-tee ya ba moka, a fediša dibe ka sedimo se a itirilexo sôna.” Ka ge sehlabelo sa Jesu se tšeetše legato sehlabelo sa ngwaga le ngwaga sa Letšatši la Poelano, Segopotšo sa lehu la gagwe se binwa ka mo go swanetšego ngwaga le ngwaga. Ga go na lebaka la Mangwalo la go bina Segopotšo leboelela go feta gatee ka ngwaga.

Ka go dumelelana le se, radihistori John Laurence von Mosheim o bega gore Bakriste ba lekgolong la bobedi la nywaga kua Asia Minor ba be ba tlwaetše go bina Segopotšo sa lehu la Jesu “letšatšing la bo-lesome-nne la kgwedi ya pele ya Sejuda ya [Nisane].” Ke feela nywageng ya ka morago moo e ilego ya ba tlwaelo Bojakaneng go se bina gantši mo ngwageng.