Tšhireletšo ge Phefo e Foka

GODIMO dithabeng tša alpine tša Yuropa, o ka hwetša go mela sehlašana se tiilego se se bitšwago rosa ya alpine. Rosa ye ya alpine e nyenyane gantši e mela dithokgweng tšeo di swaraganego le mmu bakeng sa tšhireletšo malebana le diphefo tše šoro tša naga-godimo. Phefo e sa kgaotšego e tšhošetša go ba gona ga dimela tša alpine ka go theoša thempheretšha ya tšona, e omiša moya le mmu le go di tumola medu.

Gantši rosa ya alpine e phonyokga ditshenyo tša phefo ka go mela ka gare ga mafsika. Gaešita le ge mmu mafelong a o ka ba o se o montši, mafsika a šoma e le tšhireletšo malebana le phefo gomme a dumelela semela go boloka meetse. E sa bonagale karolong e kgolo ya ngwaga, nakong ya selemo rosa ye ya alpine e botsefatša dithaba ka matšoba a tagilego a mahwibidu.

Moporofeta Jesaya o ile a hlalosa gore “dikgošana” di be di tla kgethwa ke Modimo, gomme yo mongwe le yo mongwe o be a tla hlankela e le “tšhireletšo ge phefo e foka.” (Jesaya 32:​1, 2, PK) Ka tlase ga taolo ya Kgoši, Kriste Jesu, dikgošana tše tša moya, goba balebeledi, di tla ba bjalo ka mafsika a sa šišinyegego, a tiilego ka dinako tša kgateletšego goba matshwenyego. Di tla nea tšhireletšo yeo go ka ithekgwago ka yona ge re lebeletšane le tlaišo gomme tša thuša ba hlokago go šireletša dipolokelo tša bona tša meetse a moya go tšwa Lentšung la Modimo.

Diphefo tša tlaišo, go nyama goba bolwetši di ka hlasela Mokriste, tša dira gore tumelo ya gagwe e fokole ge e ba a sa šireletšega. Bagolo ba Bakriste ba ka nea tšhireletšo ka go theetša ka kelohloko bothata bja gagwe, ba nee keletšo e theilwego Beibeleng, le go nea kgothatšo goba thušo e šomago. Ka go swana le Kgoši e kgethilwego, Kriste Jesu, ba nyaka go thuša bao ba ‘lahlegilego.’ (Mateo 9:​36) Gomme ba kganyoga go thuša ba bangwe bao ba sentšwego ke diphefo tša dithuto tša maaka. (Ba-Efeso 4:​14) Thušo e bjalo ka nako e loketšego e ka itlhatsela e le bohlokwa.

Miriam o hlalosa gore: “Ke ile ka ba ka tlase ga kgateletšego bophelong bja-ka ge ba bangwe ba bagwera ba kgaufsi ba tlogela phuthego gomme ka nako e swanago, tate a swerwe ke go tšhologela ga madi ka bjokong. E le maiteko a go fenya kgateletšego ya-ka, ke ile ka thoma go beana mabaka le lesogana la lefase. Kapejana ka morago ga moo, ke ikwa ke se sa swanelega, ke ile ka tsebiša bagolo ba phuthego gore ke phethile ka go tlogela therešo, ka ge ke be ke kgodišegile gore Jehofa a ka se nthate.

“Nakong ye e thata, mogolo yo a nago le kwelobohloko o ile a nkgopotša ka nywaga yeo ke hlanketšego ke le modiredi wa mmulamadibogo wa ka mehla. O ile a mpotša gore ka mehla o be a rata potego ya-ka, gomme o ile a nkgopela ka botho gore ke dumelele bagolo gore ba nthuše, ba nkgonthišetše ka lerato la Jehofa. Kgahlego ya bona e lerato ka nako yeo e thata e be e le bjalo ka ‘tšhireletšo’ go nna nakong ya ledimo la moya leo le bego le galefile go ntikologa. Pele ga ge kgwedi e fela, ke ile ka kgaotša tswalano ya-ka le lesogana la-ka, gomme ke ile ka tšwela pele ke sepela tseleng ya therešo ga e sa le go tloga ka nako yeo.”

Bagolo ba ikwa ba putsitšwe ge ba bona Bakriste-gotee ba tšwela pele moyeng, e le ka baka la tšhireletšo yeo ba ba neilego yona ka nako e swanetšego. Gomme ‘ditšhireletšo’ tše di re nea tatso e sa le pele ya motlalo wa thušo ya moya woo re tlago go o thabela nakong ya Pušo ya Kriste ya Nywaga e Sekete.