“Seetša re se Bôna rè le Seetšeng sa Xaxo”

SEETŠA ke selo seo gantši re sa se tšeelego hlogong go fihlela ge go e-ba le go kgaoga ga mohlagase gomme tikologo ya rena e aparelwa ke lefsifsi. Ka mo go thabišago, “lefelo le la go fehla mohlagase” la leratadimeng la rena​—e lego letšatši​—le botega ka mo go feletšego. Le gona, ka thušo ya seetša se se tšwago letšatšing re kgona go bona, go ja, go hema le go phela.

Ka ge seetša e le sa bohlokwa bakeng sa bophelo, ga se ra swanela go makala ge re bala go Genesi gore letšatši le ile la tšwelela letšatšing la pele la tlholo. “Modimo a re: Seetša a se bê xôna! Seetša sa na sa ba xôna.” (Genesi 1:3) Banna ba borapedi ba bjalo ka Kgoši Dafida ka mehla ba ile ba lebelela Jehofa e le mothopo wa bophelo le seetša. Dafida o ile a ngwala a re: “Xobane xo Wene xo mothôpô wa bophelô; seetša re se bôna re le seetšeng sa xaxo.”​—Psalme 36:9.

Mantšu a Dafida a šoma bobedi ka tsela ya kgonthe le ya seswantšhetšo. Encyclopædia Britannica e bontšha gore: “Ka ntle le pelaelo, seetša se ikarabela bakeng sa go kgona go bona.” Ke moka e oketša ka gore: “Tsebišo e ntši e fihlelela bjoko bja motho ka mahlo go feta ka sekwi le ge e le sefe se sengwe.” Ka ge bontši bja seo re ithutago sona bo ithekgile ka mpho ya go bona​—yeo e nyakago seetša gore e šome ka mo go swanetšego​—seetša se šomišwa gape ka tsela ya seswantšhetšo ka Mangwalong.

Ka gona, Jesu o ile a botša barutiwa ba gagwe gore: “Ké Nna seetša sa lefase. E a ntatêlaxo a ka se kê a sepela lefsifsing; ó tlo ba le seetša sa bophelô.” (Johane 8:​12) Seetša sa seswantšhetšo seo Jesu a bego a bolela ka sona e be e le molaetša wa therešo wo a bego a o ruta, woo o bego o ka sedimošetša menagano le dipelo tša batheetši ba gagwe. Ka morago ga nywaga ya lefsifsi la moya, barutiwa ba Jesu mafelelong ba be ba kgona go kwešiša morero wa Modimo ka batho le kholofelo ya Mmušo. Ruri se e be e le “seetša sa bophelô,” ka ge tsebo yeo e be e ka lebiša bophelong bjo bo sa felego. Jesu ge a rapela Tatagwe wa legodimong o ile a re: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:3) Anke re se ke ra tšea seetša se sa moya gabohwefo!