Dipotšišo tše Tšwago go Babadi

Ke bjang noga kua tšhemong ya Edene e ilego ya kgona go fetišetša kgopolo ya go tshela molao wa Modimo go Efa mabapi le sehlare sa go tseba botse le bobe?

Genesi 3:⁠1 e re: “Xomme nôxa, ka xo hlalefa e be e feta diphôôfôlô tšohle tša naxa, tše Morêna Modimo a di dirilexo. Yôna ya bolêla le mosadi ya re: Afá Modimo ó boletše a re: Dihlare tšohle tša thšemo yé Le se kê la di ja?” Go bile le ditšhišinyo tše di fapa-fapanego tša mabapi le tsela yeo ka yona noga e ka bago e ile ya boledišana le Efa. Kgopolo e nngwe ke gore e dirile bjalo ka go šišinya mmele. Ka mohlala, moruti wa Leisemane Joseph Benson o hlalositše gore: “Go bonagala go e-na le kgonagalo e kgolo kudu ya gore e be e le ka maswao a mohuta o itšego. Ka kgonthe, ba bangwe ba ile ba nagana gore bokgoni bja go nagana le polelo ka nako yeo e be e le mekgwa e tsebjago ke dinoga, . . . eupša ga go na bohlatse bja se.”

Lega go le bjalo, ka go fo diriša polelo ya mmele feela, noga e be e ka botša bjang Efa kgopolo ya gore ka go ja seenywa se se ileditšwego o tla ba bjalo ka Modimo, a kgona go tseba seo e bego e le se sebotse le seo e bego e le se sebe? Go oketša moo, Efa o ile a tšea karolo poledišanong, a araba potšišo yeo e bego e rotošitšwe ke noga. (Genesi 3:​2-5) Kgopolo ya gore noga e ile ya bolela feela ka maswao goba ka go šišinya mmele e tla lebiša phethong ya gore Efa o arabile ka go itšhišinya, mola Beibele e re o ile a bolela.

Ge a be a bolela ka tiragalo ye, moapostola Paulo o ile a lemoša Bakriste-gotee le yena gore: “Se ke se boifaxo, ké xore Le ka senywa mexopolô, . . . la etša Efa xe a forwa ke nôxa ka maanô a yôna.” Kotsi yeo Paulo a bego a bolela ka yona e be e e-tšwa go “baapostola ba maaká, [le] ba xo dira ka maanô.” Tšhošetšo yeo ‘baapostola bao ba maipei’ ba bego ba e tšweletša e be e sa dumelelane le go bolela ka go itšhišinya goba boitšhišinyo bja mmele. E be e akaretša polelo ya bona​—mantšu a bona a maano, a bolelwago bakeng sa go aroša ba bangwe.​—2 Ba-Korinthe 11:​3-5, 13.

Gaešita le ge polelo e ile ya dirišetšwa go aroša Efa tšhemong ya Edene, ga go na selo seo se bontšhago gore noga ya kgonthe e na le marakodu. Ge e le gabotse go be go sa nyakege gore e be le ona. Ge morongwa wa Modimo a be a bolela le Bileama ka pokolo ya tshadi, go be go sa nyakege gore phoofolo e be le lepokisana la lentšu le le swanago le la motho. (Numeri 22:​26-31) Ka mo go lego molaleng, ge ‘lekaba le la semuma le bolela ka lentšu la motho,’ matla a go dira seo a be a e-tšwa lefelong la moya.​—2 Petro 2:16.

Sebopiwa sa moya seo se bego se le ka kua ga noga yeo e boletšego le Efa se bontšhwa ka Beibeleng e le ‘noga e kgolo ye ba rego ke Diabolo le Sathane.’ (Kutollo 12:9) Mantšu a kwagalago ao Efa a a kwelego gomme a a araba a be a bolelwa ke Sathane, yoo ‘a ikgantšhago a itira morongwa wa seetša.’​—2 Ba-Korinthe 11:14.

[Seswantšho go letlakala 27]

“La [tlo] ba byalo ka Modimo, la tseba botse le bobe”