O Nyaka Letswalo Leo le Tlwaeditšwego

Letšatši leo le sa lebalegego e be e le leo le holofetšago go banamedi le sehlopha sa balaodi bao ba nametšego sefofane sa Air New Zealand Flight 901 se se bego se e-ya Antarctica. Dikhamera di be di lokišeditšwe, banamedi ka sefofaneng ba be ba thabetše go fofa ge sefofane sa DC-10 se be se dutše se batamela Antarctica se fofela kgaufsi mo e lego gore banamedi ba be ba ka kgona go bona ponagalo e botse ya Antarctica.

MOLAODI, yo e bilego mofofiši ka nywaga e 15, o be a šetše a kile a fofa ka nako e akaretšago diiri tše fetago tše 11 000. Pele a ka tloga, o ile a tsenya ka šedi thulaganyo ya go fofa ga sefofane ka go computer ya gagwe ya sefofane, a sa lemoge gore dipalo-palo tšeo a bego a di neilwe di be di fošagetše. Go phatša maru ka dimithara tša ka tlase ga tše 600, sefofane sa DC-10 se ile sa pšhatlagana dipatogeng tša tlase tša Dithaba tša Erebus, sa bolaya banamedi bohle ba 257.

Go fo etša ge difofane lehono di ithekgile ka di-​computer bakeng sa go di hlahla gore di phatše maru, batho ba filwe letswalo la go ba hlahla tseleng ya bona ya bophelo. Le gona masetla-pelo a šoro a Flight 901 a ka re ruta dithuto tše matla kudu mabapi le letswalo la rena. Ka mohlala, ka tsela e swanago yeo ka yona go bolokega ga sefofane go ithekgilego ka tshepedišo yeo e šomago ka tshwanelo ya go fofišwa ga sefofane le maswao a nepagetšego a tšhupetšo, go bjalo le ka bophelo bja rena bjo bobotse bja moya, boitshwaro, gaešita le mmeleng bo ithekgile ka letswalo leo le arabelago le le hlahlwago ke maswao a nepagetšego a boitshwaro a tšhupetšo.

Ka manyami, lefaseng la lehono, maswao a bjalo a tšhupetšo a hwelela ka lebelo goba a tshedišwa mahlo. Morutiši yo mongwe wa Amerika o itše: “Lehono re kwa gantši kamoo mošemanyana yo a tlwaelegilego wa sekolo wa United States a ka se kgonego go bala ka gona, kamoo a ka se kgonego go ngwala ka gona le kamoo a swarago bothata go hwetša naga ya Fora mo mmapeng. Gape ke mo go nepagetšego gore mošemanyana yoo yo a tlwaelegilego wa sekolo wa United States o hwetša go le thata go kgethologanya se se nepagetšego le se se fošagetšego. Go go se tsebe go bala le go ngwala gotee le go se tsebe dipalo, re swanetše go tlaleletša le kgakanego e tseneletšego ya boitshwaro mathateng a mantši a tša thuto.” O boletše gape gore “bafsa ba lehono ba phela ka gare ga go se kgonthišege ga tša boitshwaro. Botšiša yo mongwe wa bona ge e ba go e-na le dilo tše bjalo ka ‘go nepagala le go fošagala,’ gomme gatee-tee o tla lebana le motho yo a gakanegilego, yo a sa kgonego le go bolela, yo a tšhogilego le yo a sa kgonthišegago. . . . Kgakanego ye e a mpefala go e na le go kaonefala ge ba e-ya kholetšheng.”

Sebaki se sengwe sa kgakanego ye ke kgopolo yeo e ithekgilego ka batho ya boitshwaro, kgopolo e phatlaletšego ya gore ditekanyetšo di fapana go ya ka dikgetho tša motho ka noši goba setlogo. Nagana ka seo se bego se ka direga ge nkabe bafofiši ba difofane ba be ba ka fofiša, e sego ka maswao a hlomilwego a tšhupetšo, eupša ka dipakane tšeo di tlošwago ka ntle le go lemošwa e sa le pele gomme ka dinako tše dingwe di timelela ka mo go feletšego! Dikotsi tša go swana le ya kua Thabeng ya Erebus e be e tla ba tše di tlwaelegilego ka mo go sa belaetšego. Ka mo go swanago, ka ge go lahlilwe go latela ditekanyetšo tše tsepamego tša boitshwaro, lefase le buna manyami le puno e golago ya madimabe le mahu ge malapa a dutše a aroganywa ke go se botege gomme ba dimilione ba tlaišega ka baka la AIDS goba malwetši a mangwe a fetišetšwago ka dikopano tša botona le botshadi.

Kgopolo ya go ithekga ka batho ya boitshwaro e ka kwagala e le e bohlale, eupša ge e le gabotse balatedi ba yona ba swana le ba-Ninife ba bogologolo bao ba bego ba sa tsebe ‘go hlaola letsogo le  letona go la ntsogošo.’ Badiriši ba kgopolo ya go ithekga ka batho ya tša boitshwaro ba swana le ba-Isiraele ba bahlanogi bao ba bego ba bolela gore ‘bobe ke botse, gomme botse ba re ke bobe.’​—Jona 4:​11; Jesaya 5:20.

Ka gona re ka retologela kae bakeng sa melao e kwagalago, e sa gakantšhego gotee le melao ya motheo yeo re ka tlwaetšago matswalo a rena ka yona gore e be tlhahlo e šireletšegilego? Ba dimilione ba hweditše gore Beibele e kgotsofatša ka mo go feletšego senyakwa seo. Go tloga go ditekanyetšo tša boitshwaro go ya boitshwarong bjo bobotse mošomong le go tloga go tlwaetšeng bana go ya borapeding bja Modimo, Beibele ga e tlogele selo sa bohlokwa. (2 Timotheo 3:​16) E itlhatsetše e le yeo e ka botwago ka mo go feletšego ka nywaga-kgolo e mentši. Ka ge ditekanyetšo tša boitshwaro tša Beibele di hlomilwe ke molaodi yo a phagamego kudu, e lego Mmopi wa rena, di swanetše batho ka moka. Ka gona, ga re na lebaka la go phela bophelo bja go se kgonthišege ga tša boitshwaro.

Lega go le bjalo, matšatšing a lehono, letswalo la gago le hlaselwa go feta le ge e le neng pele. Seo se kgonega bjang? Le gona o ka šireletša letswalo la gago bjang? Tsela e botse yeo o ka e tšeago ke go tseba mothopo wa tlhaselo le maano a gagwe. Tše di tla ahla-ahlwa sehlogong se se latelago.