Dipotšišo tše Tšwago go Babadi

Daniele o be a le kae ge ba-Hebere ba bararo ba be ba lekwa ka pele ga seswantšho se segolo seo Nebukadinetsara a bego a se tsemile molaleng wa Dura?

Beibele ga e bolele, ka gona ga go na motho yo a ka tsebago gore Daniele o be a le kae nakong yeo ya teko.

Ba bangwe ba šišintše gore boemo bja bolaodi bja Daniele goba ditokelo tše di kgethegilego tše a di neilwego ke Nebukadinetsara e be e le tše phagamego go feta tša Sadirake, Mesake le Abedinego le gore ka baka leo go be go sa nyakege gore Daniele a ye moeding wa Dura. Daniele 2:​49 e a bontšha gore ka lebaka le itšego o ile a ba boemong bjo bo phagametšego bja bagwera ba gagwe ba bararo. Eupša re ka se ke ra tiiša gore se e ile ya ba lebaka la gore a se bokane le ba bangwe ka pele ga seswantšho.

Ba bangwe ge ba leka go hlalosa go se be gona ga Daniele ba boletše gore a ka ba a be a se gona ka baka la mošomo wa bolaodi goba gore o be a babja ka gona o be a ka se kgone go ba gona. Lega go le bjalo, Beibele ga e bolele seo. Go ba gona, tsela ya Daniele ga go bonagale e ile ya ntšhwa diphošo, ka gobane ge go ka be go be go le bjalo, ka ntle le pelaelo babuši ba Babele ba lehufa ba ka be ba ile ba di diriša bakeng sa go mo latofatša. (Daniele 3:8) Bobedi pele le ka morago ga tiragalo ye, Daniele o ile a itlhatsela e le mmotegi, a botega ka go se kwanantšhe go Modimo go sa šetšwe tlhohlo le ge e le efe yeo a ilego a lebeletšana le yona. (Daniele 1:8; 5:​17, 18; 6:​4, 10-12) Ka gona, gaešita le ge Beibele e sa bolele gore ke ka baka la’ng Daniele a be a se gona molaleng wa Dura, re ka kgodišega gore o be a botegetše Jehofa Modimo ka go se kwanantšhe.​—Hesekiele 14:​14; Ba-Hebere 11:​33.