Ngaka ya Mahlo e Bjala Peu

Maiteko a ngaka ya mahlo kua Lviv, Ukraine, a tswalana bjang le go hlongwa ga phuthego ya se-Russia ya Dihlatse tša Jehofa kua Haifa, Isiraele, yeo e ka bago bokgole bja dikhilomithara tše 2 000 le go ba kgole ka dinaga tše mmalwa? Ye ke taba yeo e bontšhago go rereša ga mantšu a Beibele ao a lego go Mmoledi 11:⁠6 a rego: “Byala peu ya xaxo e sa le bosasa, le ka mantšibua ’atla s’axo se se khutšê; xa O tsebe ye e tl’o xo mela.”

TABA ya rena e thoma ka 1990 ge Ella, mosadi yo mofsa wa setlogo sa Sejuda, a be a dula Lviv. Ella le lapa la gabo ba be ba itokišetša go hudugela Isiraele. Pejana ga ge ba ka tloga, Ella o ile a ya go ngaka ya mahlo yeo e bego e le yo mongwe wa Dihlatse tša Jehofa. Ka nako yeo, modiro wa Dihlatse tša Jehofa o be o thibetšwe Ukraine. Lega go le bjalo, ngaka ya mahlo e ile ya gata mogato wa pele bakeng sa go abelana le Ella ditumelo tša yona tšeo di theilwego Beibeleng. E ile ya makatša Ella ka go bolela gore Modimo o na le leina le le mo hlaolago. Seo se ile sa tsoša kgahlego ya Ella, gomme go ile  gwa latela poledišano e botse yeo e theilwego Beibeleng.

Ella o ile a thabela poledišano kudu mo e lego gore o ile a ba a nyaka e nngwe bekeng e latelago le e nngwe gape bekeng e latelago yeo. Kgahlego ya gagwe e be e gola, eupša go be go e-⁠na le bothata. Nako ya gore lapa le tloge go ya Isiraele e be e batamela ka lebelo. Ella o be a sa dutše a e-⁠na le mo gontši moo a bego a swanetše go ithuta gona! E le gore a diriše gabotse nako yeo e šetšego, o ile a kgopela go ba le thuto ya Beibele letšatši le lengwe le le lengwe go fihlela a tloga. Gaešita le ge Ella a se a ka a tsošološa thuto ya gagwe kapejana ge a fihla Isiraele, peu ya therešo e be e metše ka medu pelong ya gagwe. Mafelelong a ngwaga, o be a šetše a ithuta Beibele gape ka phišego.

Ntwa e ile ya tsoga Kgogometšaneng ya Peresia, gomme Isiraele e ile ya hlaselwa ka dibetša ke Iraq. Se e be e dula e le seo go boledišanwago ka sona. Ka letšatši le lengwe lebenkeleng le legolo, Ella o ile a kwa lapa leo le bolelago se-Russia la bafaladi ba ba sa tšwago go fihla le boledišana. Gaešita le ge a be a sa ithuta Beibele yena ka noši, Ella o ile a batamela lapa gomme a abelana le lona kholofelo ya Beibele ya lefase la khutšo. E le mafelelo a se, makgolo Galina, mma Natasha, morwa Sasha (Ariel); le morwedi Ilana ka moka ba ile ba kopanela thutong ya Beibele ya Ella.

Sasha e bile setho sa mathomo sa lapa seo se ilego sa kolobetšwa​—⁠go sa šetšwe diteko tše dintši. Gaešita le ge e be e le morutwana yo a nago le bokgoni kudu o ile a rakwa sekolong ka baka la gore letswalo la gagwe la Bokriste le be le ka se mo dumelele go ba le karolo tlwaetšong ya tša bohlabani, e lego karolo e nyakegago ya thuto ya sekolo. (Jesaya 2:​2-⁠4) Molato wa Sasha o ile wa išwa Kgorong ya Tsheko e Phagamego ya Isiraele kua Jerusalema, yeo e ilego ya laela gore Sasha a bušetšwe gape e le gore a ka feleletša nako ya gagwe ya sekolo. Molato wo o ile wa gašwa nageng ka bophara. Mafelelong, ba-Isiraele ba bantši ba ile ba lemoga ditumelo tša Dihlatse tša Jehofa. *

Ka morago ga go aloga ga gagwe sekolong se se phagamego, Sasha o ile a tsenela bodiredi bja nako e tletšego bja Dihlatse tša Jehofa. Lehono o hlankela e le mmulamadibogo yo a kgethegilego le mogolo wa phuthego. Kgaetšedi ya gagwe yo monyenyane, Ilana, o mo tladitše bodireding bja nako e tletšego. Mmago bona le makgolo wa bona, bobedi bja bona ke Dihlatse tšeo di kolobeditšwego. Peu yeo ngaka ya mahlo e e bjetšego e be e sa dutše e tšweletša dienywa!

Kgabagareng, Ella o ile a tšwela pele a dira tšwelopele ya moya gomme go se go ye kae ke ge a bolela ka ntlo le ntlo. Mojakong wa gagwe wa mathomo-thomo, Ella o ile a kopana le Faina, yo a bego a sa tšwa go fihla a e-⁠tšwa Ukraine. Faina o be a gateletšegile. Ella ka morago o ile a kwa gore pejana ga ge a ka kokota mojakong wa Faina, mosadi yo yo a gateletšegilego o be a rapetše Modimo ka gore: “Ga ke tsebe gore o mang, eupša ge e ba o a nkwa, nthuše hle.” Yena le Ella ba ile ba ba le poledišano e kgahlišago. Faina o ile a botšiša dipotšišo tše dintši gomme a theetša ka kelohloko dikarabo tšeo a bego a di newa. Ge nako e dutše e tšwela pele, o ile a kgodišega gore Dihlatse tša Jehofa di ruta therešo e tšwago ka Beibeleng. O ile a lokiša lenaneo la gagwe la dithuto tša yunibesithi e le gore a ka fetša nako e oketšegilego a le phuthegong le modirong wa boboledi. Faina o ile a kolobetšwa ka May 1994. Le yena o ile a tsenela tirelo ya bobulamadibogo, a iphediša ka mošomo wa  nakwana wa go šoma lefapheng la di-computer.

Ka November 1994, ge a be a le modirong wa boboledi, Ella o ile a ikwa a fokola kudu gatee-tee. O ile a ya sepetlele moo diteko di ilego tša utolla sešo sa ka maleng seo se tšwago madi. Bošego hemoglobin ya Ella e be e theogile go fihla go 7,2. Mogolo phuthegong ya Ella, modula-setulo wa Komiti ya go Hloma Kwano le Sepetlele (HLC [Hospital Liaison Committee]), o ile a nea dingaka tsebišo mabapi le ditshepedišo tše mmalwa tša tša kalafo tšeo di bego di sa nyake go dirišwa ga madi. * Go ile gwa buiwa ka katlego ka ntle le madi, gomme Ella o ile a fola ka mo go feletšego.​—Ditiro 15:​28, 29.

Ngaka ya Ella ya malwetši a basadi, Karl, mo-Juda yo a belegetšwego Jeremane, o be a kgomegile kudu. Ke moka o ile a gopola gore batswadi ba gagwe bao e bego e le baphologi ba Polao e Sehlogo, ba tsebile Dihlatse tša Jehofa ge ba le dikampeng tša tshwenyo. Karl o ile a botšiša dipotšišo tše dintši. Gaešita le ge a be a swaregile kudu ka mošomo wa gagwe wa tša kalafo, Karl o ile a beela nako ka thoko bakeng sa thuto ya ka mehla ya Beibele. Ngwageng o latelago, o be a kopanela dibokeng tša Bokriste tša beke le beke.

Mafelelo a peu yeo e bjetšwego ke ngaka ya mahlo e bile afe? Re šetše re bone seo se ilego sa diragalela Sasha le lapa la gabo. Ge e le Ella, yena ke modiredi wa mmulamadibogo yo a kgethegilego. Morwedi wa gagwe, Eina, yo a sa tšwago go aloga sekolong se se phagamego, o thoma mošomong wa gagwe wa bophelo ka moka wa go ba mmulamadibogo. Faina le yena o hlankela e le mmulamadibogo yo a kgethegilego. Ge e le Karl, yo e lego ngaka ya Ella ya malwetši a basadi, ga bjale ke Hlatse e kolobeditšwego le mohlanka wa bodiredi, o botša balwetši ba gagwe le ba bangwe ka matla a fodišago a therešo ya Beibele.

Sehlopha se senyenyane sa bafaladi bao ba bolelago se-Russia seo se thomilego e le karolo ya Phuthego ya Haifa ya Sehebere ga bjale se fetogile phuthego e mafolofolo ya se-Russia ka bagoeledi ba Mmušo ba ka godimo ga 120. Ka boripana, koketšego ye e gona ka baka la gore ngaka ya mahlo kua Lviv e ile ya diriša sebaka ka mo go holago bakeng sa go bjala peu!

[Mengwalo ya ka tlase]

[Mmapa go letlakala 29]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

UKRAINE

ISIRAELE

[Mothopo]

Mountain High Maps® Copyright © 1997 Digital Wisdom, Inc.

[Diswantšho go letlakala 30]

Ella le morwedi wa gagwe, Eina

[Seswantšho go letlakala 31]

Sehlopha seo se thabilego sa Dihlatse tšeo di bolelago se-Russia kua Haifa. Go tloga go le letshadi go ya go le letona: Sasha, Ilana, Natasha, Galina, Faina, Ella, Eina le Karl