Na o ka Batamela Kgaufsi le Modimo yo a sa Bonagalego?
Na o ka Batamela Kgaufsi le Modimo yo a sa Bonagalego?
O ka botšiša gore, ‘Nka hlagolela bjang tswalano ya kgaufsi le motho yo ke sa mmonego?’ Yeo e ka bonala e le potšišo e kwagalago. Eupša ela hloko:
PONO ke ya bohlokwa gakaakang go hlagoleleng ditswalano tše lerato le tše swarelelago? Na dilo tšeo di sa bonwego ga se tša bohlokwa ka mo go lekanego, ge e ba e se kudu? Ruri go bjalo! Ka lebaka leo batho ba bangwe ba hlagoletše tswalano ya kgaufsi le ba bangwe ka go ngwalelana ka mehla—mangwalo a bona ka potego a bontšha seo ba se ratago, seo ba sa se ratego, dipakane, melao ya motheo, metlae le mekgwa e mengwe ya botho goba dikgahlego.
Difofu le tšona di bontšha gore go bona ga se selo sa bohlokwa bakeng sa go hlagolela tswalano ya kgaufsi le motho yo mongwe. Ela hloko mohlala wa Edward le Gwen, banyalani bao e lego difofu. * Edward o ile a kopana le Gwen sekolong sa difofu, moo e bego e le morutwana-gotee le yena yo mogolo. O be a rata dika tša Gwen, kudu-kudu go botega ga gagwe polelong le boitshwarong, le boemo bja gagwe bja kgopolo bjo bobotse kudu mabapi le mošomo. Ka go rialo, Gwen o be a tantšwe ke Edward ka gobane, ka mantšu a gagwe, “o be a bontšha dika ka moka tšeo ke godišitšwego ke dumela gore ke tša bohlokwa.” Lefereyo le ile la hlagolelwa, gomme nywaga e meraro ka morago ba be ba nyalane.
Edward o re: “Ge le le gotee, bofofu ga bo dire phapano e kaalo go ageng tswalano le motho yo mongwe. Le ka no ba le sa kgone go bonana, eupša maikwelo ga se sefofu.” Ga bjale, ka morago ga nywaga e 57, ba sa dutše ba ratana ka mo go tseneletšego. Ba hlalosa gore sephiri sa tswalano ya bona e kgahlišago se akaretša bonyenyane dilo tše nne: (1) go lemoga dika tša motho yo mongwe, (2) go nagana le go gogelwa dikeng tšeo, (3) go boloka poledišano e botse le (4) go dira dilo gotee.
Dintlha tše tše nne ke tša bohlokwa tswalanong e nngwe le e nngwe e botse, go sa šetšwe gore ke magareng ga bagwera, banyalani goba sa bohlokwa kudu, magareng ga batho le Modimo. Sehlogong se se latelago, re tla bona kamoo go diriša dintlha tše go ka re thušago go hlagolela tswalano ya kgaufsi le Modimo, gaešita le ge re sa mmone. *
[Mengwalo ya ka tlase]
^ ser. 4 Maina a fetotšwe.
^ ser. 6 Ka go fapana le tswalano magareng ga batho, tswalano le Modimo e theilwe tumelong ya gore o gona. (Ba-Hebere 11:6) Bakeng sa poledišano e feletšego ya go aga tumelo e tiilego le Modimo, hle bona Is There a Creator Who Cares About You?, yeo e gatišitšwego ke Watchtower Bible and Tract Society of New York, Inc.