Re Mohuta O Nago Le Tumelo

Go Tsebatša Mmušo wa Modimo Dihlakahlakeng tša Fiji

JESU KRISTE ka nako e nngwe o ile a bolela ka ditsela tše pedi. E nngwe ke e phatlaletšego gomme e iša lehung. E nngwe ke e tshesane eupša e lebiša bophelong. (Mateo 7:13, 14) Bakeng sa gore batho ba kgone go kgetha tsela e nepagetšego, Jehofa Modimo o ile a rera gore ditaba tše dibotse tša Mmušo di bolelwe lefaseng ka moka. (Mateo 24:14) Lega go le bjalo, batho kae le kae ba theetša molaetša wa Mmušo, gomme ba bangwe ba kgetha bophelo ka go ba “mohuta o nago le tumelo bakeng sa go boloka moya o phela.” (Ba-Hebere 10:39, NW) Re go laletša go bala ka kgetho ya bophelo yeo e ilego ya dirwa ke ba bangwe dihlakahlakeng tša Fiji le dihlakahlakeng tše dingwe tša kgaufsi tša Pacific Borwa.

Ba Ile ba Bota Jehofa

Mere e be e sa dutše e le ngwanenyana wa sekolo ge a be a thoma go kwa molaetša wa Mmušo ka 1964. Ka baka la go ba ga gagwe lekatana sehlakahlakeng seo se lego kgole, o be a e-na le kgokagano e nyenyane le Dihlatse tša Jehofa. Lega go le bjalo, mafelelong o ile a kgona go hwetša tsebo e nepagetšego ya Beibele. Ka nako yeo, o be a nyetšwe ke monna yo e bego e le ntona motseng wa gabo. Ka baka la kgetho ya Mere ya go phela go ya ka melao ya motheo ya Beibele, monna wa gagwe le metswalo ya gagwe ba ile ba mo swara ka sehlogo gomme badudi-gotee le yena motseng ba ile ba mo nyatša. Lega go le bjalo, o ile a kolobetšwa ka 1991.

Kapejana ka morago ga moo, monna wa Mere, Josua, o ile a letefatša boemo bja gagwe bja kgopolo gomme a ba a thoma go ba gona dipoledišanong tša Beibele tšeo Mere a bego a e-ba le tšona le bana ba bona. Josua o ile a tlogela go ya Kerekeng ya Methodist. Lega go le bjalo, bjalo ka ntona, o be a sa dutše a etelela pele lekgotla la motse la beke le beke. Josua o be a sa botege mahlong a badudi ba motse ka gobane Kereke ya Methodist e be e le karolo e bohlokwa ya bophelo bja metse ya ma-Fiji. Lega go le bjalo, moruti wa lefelong leo o ile a kgothaletša Josua go boela bodumeding bja gagwe bja nakong e fetilego.

Josua ka sebete o ile a kgonthišetša gore yena le lapa la gagwe ba dirile kgetho ya bona gomme ba be ba ikemišeditše go rapela Jehofa Modimo “ka môya le ka xo rereša.” (Johane 4:24) Lekgotleng le le latelago la motse, kgoši e kgolo e ile ya laela gore Josua le lapa la gagwe ba tloge motseng bjalo ka balelekwa. Ba be ba neilwe matšatši a šupago gore ba tlogele sehlakahlaka, ntlo ya bona, naga le mabele​—ee, dilo tša bona ka moka tša go iphediša.

Banababo rena ba moya sehlakahlakeng se sengwe ba ile ba thuša Josua le lapa la gagwe, ba ba thuša ka lefelo la go dula le naga yeo ba ka bjalago dibjalo go yona. Josua le morwa wa gagwe yo mogolo ga bjale ba kolobeditšwe, gomme morwa yo mongwe o hlankela e le mogoeledi yo a sa kolobetšwago wa ditaba tše dibotse. Mere o sa tšwa go ngwadišetša go ba mmulamadibogo wa ka mehla (mogoeledi wa Mmušo wa nako e tletšego). Kgetho ya bona ya go hlankela Jehofa e ile ya feleletša ka go lahlegelwa ke maemo le dithoto tša dilo tše di bonagalago, eupša ka go swana le moapostola Paulo, ba ile ba lebelela se e se selo ge se bapišwa le seo ba ilego ba se hwetša.​—Ba-Filipi 3:8.

Kgetho Yeo e Akaretšago Letswalo

Go kgetha go latela letswalo leo le tlwaeditšwego ka Beibele go nyaka tumelo le sebete. Se ge e le gabotse se be se le bjalo ka Suraang yo a sa tšwago go kolobetšwa, mosadi yo mofsa yo a dulago Tarawa, se sengwe sa dihlakahlaka tša Kiribati. Suraang o ile a kgopela tumelelo ya gore a se ke a dira karolo e nngwe ya mošomo wa gagwe bjalo ka mooki sepetlele. Kgopelo ya gagwe ga se ya amogelwa gabotse gomme gwa feleletša ka gore a romelwe go yo hlokomela lefelo le lenyenyane la tša kalafo sehlakahlakeng seo se lego lekatana moo a ilego a aroganywa le ba bangwe ba tumelo ya gagwe.

Sehlakahlakeng seo ke mokgwa gore yo mongwe le yo mongwe yo a sa tšwago go fihla a direle “meoya” ya lefelong leo sehlabelo. Batho ba dumela gore  go se dire bjalo go tla feleletša ka lehu. Ka ge Suraang a ile a gana go ba le karolo tirong ye ya borapedi bja medimo ya diswantšho, badudi ba motseng ba ile ba letela gore o tla kgangwa ke meoya yeo e kgopišitšwego. Ge go se na bošoro le ge e le bofe bjoo bo welago Suraang, o ile a bulegelwa ke dibaka tše dintši bakeng sa gore a nee bohlatse bjo bobotse.

Eupša diteko tša Suraang di be di se tša fela. A mangwe a masogana a sehlakahlaka seo a ile a go lebelela e le tlhohlo go goketša mosadi yo mofsa yo a etilego. Lega go le bjalo, Suraang o ile a gana dikgoketšo tša bona gomme a kgomarela go botega ga gagwe go Modimo. Ge e le gabotse, o ile a kgona go hlankela e le mmulamadibogo wa ka mehla gaešita le ge e be e le mooki diiri tše 24 ka letšatši.

Pele ga moletlo woo o ilego wa swarelwa go hlompha Suraang ge a be a itokišetša go tloga sehlakahlakeng, bagolo ba motse ba ile ba bolela gore e be e le moromiwa wa mathomo wa kgonthe wa go ba etela. Ka baka la go emela ga gagwe ka go tia melao ya motheo ya Beibele, ba bangwe sehlakahlakeng seo ba ile ba arabela ka mo go swanetšego molaetšeng wa Mmušo.

Ditlhohlo tša Kgonthe

Go ba lekatana ga metse e mengwe go bolela gore batho ba Jehofa ba swanetše go dira maiteko a magolo kudu go ba le karolo bodireding le go ba gona dibokeng tša Bokriste. Ela hloko mohlala wa Dihlatse tše nne tše di kolobeditšwego​—monna o tee le basadi ba bararo​—tšeo di bego di fetša diiri di sepela go ya le go boa dibokeng. Go sepela ga bona leeto le letelele go akaretša go tshela dinoka tše tharo ge ba e-ya le ge ba boa. Ge meetse e le a mantši, ngwanabo rena o tshela pele ka go rutha, a goga pitša e kgolo ya go apea e loketše mekotla ya bona, dipuku le diaparo tša bona tša diboka. Ka morago ga moo o ruthela morago bakeng sa go yo thuša dikgaetšedi tše tharo.

Sehlopha se sengwe se senyenyane, seo se yago dibokeng sehlakahlakeng seo se lego kgole sa Nonouti kua Kiribati, se kopana le ditlhohlo tše di fapa-fapanego. Ngwako woo ba kopanelago go wona o dudiša batho ba šupago goba ba seswai feela. Ba bangwe bao ba bago gona ba dula ka ntle gomme ba bone ka maboto a wona a sefeterata. Lefelo la diboka ke leo le lego molaleng go badudi ba bangwe ba motseng bao ba tšwago le go ya dikerekeng tša bona tše dikgolo. Ee, bahlanka ba Jehofa ba lemoga gore batho e sego meago, ke bona bao ka kgonthe e lego ba kgahlišago go ya ka pono ya Modimo. (Hagai 2:7) Kgaetšedi yo mongwe yo a kolobeditšwego sehlakahlakeng o godile gomme ga a kgone go sepela go fihla kgole. Lega go le bjalo, o thušwa ke mosadi yo mofsa bodireding, mogoeledi yo a sa kolobetšwago yo a mo kgorometšago ka koloyana e nyenyane yeo e kgorometšwago. A tebogo e kgolo gakaakang yeo ba e bontšhago bakeng sa therešo!

Bagoeledi ba fetago 2 100 bao ba hlankelago dihlakahlakeng tša Fiji ba ikemišeditše go tšwela pele ba tsebatša ditaba tše dibotse tša Mmušo wa Modimo. Le gona ba kgodišegile gore ba bangwe ba bantši e tla ba “mohuta o nago le tumelo bakeng sa go boloka moya o phela.”

[Mmapa go letlakala 8]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Australia

Fiji