Dipotšišo tše Tšwago go Babadi

Jesaya kgaolo 53 e na le boporofeta bjo bo tumilego bja Mesia. Temana 10 (NW) e re: “Jehofa ka boyena o ile a thabela go mo pšhatlaganya; a mo hlokofatša.” Se se bolela eng?

Go bonolo go bona lebaka leo ka lona potšišo e ka rotogago mabapi le Jesaya 53:10. Bakriste ba kgonthe ga ba nagane gore Modimo wa rena yo a kwelago bohloko le yo lerato a ka thabišwa ke go pšhatlaganya goba go hlokofatša motho le ge e le mang. Beibele e re nea motheo bakeng sa go holofela gore Modimo ga a thabišwe ke go tlaiša bao ba se nago molato. (Doiteronomio 32:4; Jeremia 7:30, 31) Go theoša le nywaga-kgolo Jehofa ka dinako tše dingwe a ka ba a ile a dumelela tlaišego ka baka la mabaka ao a sepedišanago le bohlale bja gagwe gotee le lerato. Eupša ka kgonthe ga se a ka a bakela Morwa wa gagwe yo a rategago Jesu gore a tlaišege. Ka gona, temana ye ge e le gabotse e re’ng?

Re ka thušwa go kwešiša seo e se bolelago ge e ba re ela hloko temana ka moka ga yona, re ela hloko makga a mabedi moo lentšu “thabela” le tšwelelago gona gabedi. Jesaya 53:10 (NW) e balega ka gore: “Jehofa ka boyena o ile a thabela go mo pšhatlaganya; a mo hlokofatša. Ge e ba o ka dira gore moya wa gagwe e be sehlabelo sa selefa, o tla bona bana ba gagwe, o tla lelefatša matšatši a gagwe, gomme seo se thabelwago ke Jehofa se tla atlega ka seatla sa gagwe.”

Molaetša ka kakaretšo wa Beibele o bontšha gore “seo se thabelwago ke Jehofa,” seo go boletšwego ka sona mafelelong a temana, se theilwe tabeng ya go phetha morero wa gagwe ka Mmušo. Go dira ga Jehofa se go tla phagamiša bogoši bja gagwe gomme go tla dumelela gore sebe sa leabela se tlošwe bathong bao ba kwago​—dibe tša rena. (1 Koronika 29:11; Psalme 83:18; Ditiro 4:24; Ba-Hebere 2:14, 15; 1 Johane 3:8) Senotlelo se se išago go se ka moka ke gore Morwa wa Modimo o ile a swanelwa ke gore a be motho gomme a nee sehlabelo sa topollo. Ka ge re tseba, kgabagareng Jesu o ile a tlaišega. Beibele e re botša gore “ó ithutile xo kwa ka xôna xo tlaišêxa.” Ka gona Jesu o ile a hwetša moputso ka go tlaišega moo.​—Ba-Hebere 5:7-9.

Jesu o tsebile e sa le pele gore tsela ya gagwe ya go loka yeo a bego a tlo e tšea e be e tla akaretša bohloko bjo itšego. Se ke seo se kwagalago go tšwa mantšung a gagwe a begilwego go Johane 12:23, 24, moo re balago gore: “Lebaka la xore Morwa-motho a yê letaxong la xaxwe le tlile. Ruri, ruri, ke a Le botša, xe thôrô ya mabêlê e sa wele mobung ya hwa, e tlo dula è nnoši; fêla xe e hwa, ké xôna e enyaxo dienywa tše ntši.” Ee, Jesu o tsebile gore o be a tla swanela ke go kgomarela potego ya gagwe gaešita le go fihla ntlheng ya lehu la tlaišego. Pego e tšwela pele ka gore: “Môya wa-ka o huduexile. Xomme ke tlo re’ng? Tata! Mphološe nakong yé! Fêla, ké tšôna tše ke di tletšexo nakong yé. Tata! Nea ’ina la xaxo letaxô. Xe a r’yalo xwa kwala Lentšu lè etšwa lexodimong lè re: Ke le neile letaxô; ’me ke sa tlo boêla kè le nea letaxô.”​—Johane 12:27, 28, Mateo 26:38, 39.

Ke boemong bjo ba ditaba moo re kgonago go kwešiša Jesaya 53:10. Jehofa o tsebile gabotse gore phihlelo ya Morwa wa gagwe e be e tla akaretša go pšhatlaganywa ka tsela e itšego. Lega go le bjalo go gopola ka botse bja letago le bjo bo nabilego bjoo bo bego bo tla tla ka morago, Jehofa o ile a thabela seo Jesu a ilego a swanelwa ke go lebeletšana le sona. Ka kgopolo yeo, Jehofa “o ile a thabela go mo pšhatlaganya,” goba go pšhatlaganywa ga Mesia. Gomme Jesu le yena o ile a thabišwa ke seo a bego a ka se phetha gomme a se phetha. Ka kgonthe, bjalo ka ge Jesaya 53:10 e phetha, ‘gomme seo se thabelwago ke Jehofa se ile sa atlega ka seatla sa gagwe.’