Phihlelo

Morwadi wa Seetša Ditšhabeng tše Dintši

PHIHLELO YA GEORGE YOUNG KA GE GO ANEGA RUTH YOUNG NICHOLSON

“Bjale, setu se ke sa eng diphuluphiting tša rena? . . . Gona re swanetše go ba banna ba mohuta mang ge e ba re homola ka morago ga ge re hlatsetše dilo tše ke ngwalago ka tšona e le tša therešo? A nke re se ke ra tlogela batho ba se na tsebo, eupša a re tsebatšeng therešo ka mokgwa wo e sego wa go itšhireletša goba wa go utega.”

MANTŠU a e be e le karolo ya lengwalo la tate la matlakala a 33 leo ka lona a bego a kgopela gore leina la gagwe le phumolwe pukung ya maina ya kereke. Ngwaga e be e le wa 1913. Go tloga ka nako yeo go ya pele, o ile a thomiša ka bophelo bjo bo tletšego ditiragalo bjoo bo ilego bja mo lebiša go hlankeleng e le morwadi wa seetša ditšhabeng tše dintši. (Ba-Filipi 2:15) Go tloga nakong ya ge ke be ke sa le ngwanenyana yo monyenyane, ke ile ka kgoboketša taodišo-phelo mabapi le diphihlelo tša tate go metswalo le dipukung tša histori, gomme bagwera ba ile ba nthuša go kopanya bophelo bja gagwe. Bophelo bja tate bo nkgopotša bja moapostola Paulo ka ditsela tše dintši. Go swana le “moapostola wa ba-ntlê,” tate ka mehla o be a dula a loketše go sepela bakeng sa go iša molaetša wa Jehofa bathong ba naga e nngwe le e nngwe le sehlakahlaka se sengwe le se sengwe. (Ba-Roma 11:13; Psalme 107:1-3) Anke ke le anegele ka tate e lego George Young.

Nywaga ya Pele

Tate e be e le morwa yo monyenyane wa John le Margaret Young, ma-Presbyterian a Scotland. O belegwe ka September 8, 1886, kapejana ka morago ga ge lapa le hudugile Edinburgh, Scotland le hudugetše British Columbia ka bodikela bja Canada. Bo-mogolo’agwe ba bararo​—Alexander, John le Malcolm​—ba belegetšwe Scotland nywaga e mmalwa pejana. Marion e lego kgaetšedi e nyenyane ya bašemane yoo ka lerato ba bego ba mmitša ka la Nellie, o be a fetwa ke tate ka nywaga e mebedi.

Bana ba ile ba thabela go golela polaseng kua Saanich e sego kgole kudu le Victoria, British Columbia.  Ka nako e swanago, ba ile ba ithuta go rwala boikarabelo. Ka gona, ge batswadi ba bona ba boa leetong ba e-tšwa Victoria, ba be ba hwetša mešomo ya ka ntle e feditšwe gomme ntlo e hlwekišitšwe.

Ge nako e dutše e e-ya, tate le banababo ba ile ba thoma go kgahlegela intaseteri ya meepo le ya dikota. Barwarre ba ga Young ba ile ba thoma go ba le botumo bjo bobotse ba tumile e le (banna bao ba hlahlobago naga bakeng sa go swanelegela go ka bjala dikota) gape e le bareki le barekiši ba kota. Tate o be a swaragane le tša ditšhelete.

Mafelelong, tshekamelo ya tate ya go sekamela dilong tša moya e ile ya mo dira gore a dire phetho ya go ba moruti wa Presbyterian. Lega go le bjalo, mo e ka bago ka nako yeo, dithero tša dikuranteng ka Charles Taze Russell e lego mopresidente wa pele wa Zion’s Watch Tower Tract Society, di ile tša kgoma bophelo bja gagwe ka mo go tseneletšego. Seo tate a ithutilego sona se ile sa mo tutueletša gore a ngwale le go romela lengwalo la go ntšha ka hlogo leo go boletšwego ka lona mathomong.

Tate ka botho le ka mo go kwagalago o ile a šomiša ditemana tša Beibele go hlatsela go fošagala ga dithuto tša kereke tša gore moya wa motho ga o hwe le gore Modimo o tla tlaiša meoya ya batho ka mo go sa felego mollong wa dihele. O ile a ba a pepentšha thuto ya Boraro botee, a hlatsela gore e be e se yeo e tšwago go Bokriste e bile ga e thekgwe ka mo go feletšego ke Mangwalo. Go tloga ka nako yeo go ya pele o ile a tšwela pele ka bodiredi bja Bokriste a ekiša Jesu Kriste, ka boikokobetšo a diriša bokgoni bja gagwe ka moka le matla a gagwe bakeng sa go tliša tumišo go Jehofa.

Ka 1917, ka tlase ga tlhahlo ya Mokgatlo wa Watch Tower, tate o ile a thoma go hlankela e le mosepedi wa bodumedi, bjalo ka ge baemedi ba basepedi ba Dihlatse tša Jehofa ba be ba bitšwa bjalo ka nako yeo. Metseng e megolo le ditoropong Canada ka moka, o ile a nea dipolelo gotee le lenaneo leo le bego le bontšha diswantšho tše di sepelago le di-slide leo le tsebjago ka “Photo-Drama of Creation.” Diholo tša dipontšho di be di tlala wa go falala ka baka la diketelo tša tate. Thulaganyo ya diketelo tša gagwe tša maeto a bodumedi e ile ya tšwelela ka go Morokami (wa Seisemane) go fihla ka 1921.

Kuranta ya Winnipeg e ile ya bega gore Moebangedi Young o boletše le batho ba 2 500 gomme ba bantši ga se ba ka ba kgona go tsena ka gobane holo e be e tletše kudu. Kua Ottawa, o ile a bolela ka sehlogo se se rego, “Go ya Diheleng le go Boa.” Moo monna yo a tšofetšego o ile a bega gore: “Ge go fedile, George Young o ile a laleletša lelokelelo la baruti sethaleng bakeng sa go ahla-ahla sehlogo se le yena, eupša ga go le o tee wa bona yo a ilego a šutha. Ke ile ka tseba ka nako yeo gore ke hweditše therešo.”

Tate o ile a leka go pitlaganya modiro o montši wa moya ka mo go ka kgonegago maetong a gagwe a bosepedi. Ka morago ga moo, o be a kitimela go swara setimela bakeng sa go ya lefelong le lengwe leo a bego a swanetše go ya go lona. Ge a be a sepela ka koloi, gantši o be a sepela e sa le mesong kudu pele ga difihlolo. Go oketša go go ba yo a fišegago, tate o be a tumile ka go ba monna yo a naganelago e bile o be a tsebja ka ditiro tša gagwe tša Bokriste le go ba yo a fago kudu.

Gare ga dikopano tše dintši tša pele tšeo a ilego a ba gona go tšona, yeo e gopolega ka mo go kgethegilego e be e swaretšwe Edmonton, Alberta, ka  1918. Lapa la gabo ka moka le be le le moo bakeng sa go bona Nellie a kolobetšwa. E be e bile e le lekga la mafelelo bašemane ba e-ba gotee. Nywaga e mebedi ka morago, Malcolm o ile a bolawa ke pneumonia. Ka go swana le barwarre ba gagwe ba bararo le tatagwe, Malcom o be a e-na le kholofelo ya bophelo bja legodimong, gomme ka moka ga bona ba ile ba dula ba botegela Modimo go fihla lehung.​—Ba-Filipi 3:14.

Go ya Mašemong a Šele

Ka morago ga ge tate a feditše leeto la gagwe la boboledi kua Canada ka September 1921, o ile a laelwa ke Joseph F. Rutherford, yoo ka nako yeo e bego e le mopresidente wa Mokgatlo wa Watch Tower gore a fetele pele dihlakahlakeng tša Caribbean. Gohle moo tate a bego a bontšha “Photo-Drama of Creation,” e be e amogelwa gabotse. Go tšwa Trinidad o ngwadile gore: “Lefelo le be le tletše, gomme bontši bo ile bja gomišwa. Bošegong bja bobedi moago o ile wa kgeregelwa ke batho.”

Ka gona, ka 1923 tate o ile a newa kabelo Brazil. Moo o ile a bolela le mašaba a mantši, ka dinako tše dingwe a diriša bafetoledi bao ba thwetšwego. Morokami (wa Seisemane) wa December 15, 1923 o begile gore: “Go tloga ka June 1 go fihla ka September 30 Ngwanabo rena Young o swere diboka tše 21 tša phatlalatša, ka palo-moka ya bao ba bilego gona ba 3 600; diboka tše 48 tša phuthego, ka batho ba bilego gona ba 1 100; a aba dipuku tšeo di sa lefelelwego ka Sepotokisi tša palo e lekanago dikopi tše 5 000.” Ba bantši ba ile ba arabela ka kgahlego ge tate a be a nea polelo e rego “Ba Dimilione Bao ba Phelago mo Nakong ye ba ka se ke ba hwa le ka Mohla.”

Ge meago e mefsa e be e neelwa kua Brazil ka March 8, 1997, poroutšha ya lenaneo la go neela e ile ya bega gore: “1923: George Young o goroga Brazil. O rulaganya ofisi ya lekala bogareng bja Rio de Janeiro.” Gaešita le ge dipuku tša Beibele di be di hwetšagala ka Sepaniši, di be di nyakega gape le ka Sepotokisi seo e lego lona leleme le legolo la Brazil. Ka gona, ka October 1, 1923, Morokami o ile wa thoma go gatišwa ka Sepotokisi.

Tate o ile a ikgokaganya le batho ba bantši bao ba gopolegago kua Brazil. Yo mongwe e be e le monna wa Mopotokisi yo a nago le sa gagwe yo a bego a bitšwa Jacintho Pimentel Cabral, yoo a ilego a neela legae la gagwe bakeng sa gore diboka di swarelwe go lona. Go se go ye kae Jacintho o ile a amogela therešo ya Beibele gomme ka morago a ba setho sa lapa la lekala. Yo mongwe e be e le Manuel da Silva Jordão, radirapana wa lesogana wa Mopotokisi. O ile a kwa polelo ya phatlalatša ye e bego e newa ke tate yeo e ilego ya mo tutueletša go boela Portugal go yo hlankela e le mmapatši wa dipuku tša bodumedi bjalo ka ge badiredi ba nako e tletšego ba Dihlatse tša Jehofa ba be ba bitšwa bjalo ka nako yeo.

Tate o be a sepela kudu ka setimela Brazil ka moka, gomme o ile a kgona go hwetša bao ba thabelago. Go le lengwe la maeto a gagwe, o ile a gahlana le Bony le Catarina Green, gomme a dula le bona mo e ka bago dibeke tše pedi, a ba hlalosetša Mangwalo. Mo e ka bago ba šupago ba leloko ba ile ba bontšha boineelo bja bona go Jehofa ka kolobetšo ya meetseng.

Gape o ile a gahlana le Sarah Bellona Ferguson ka 1923. Ka 1867 ge e be e sa le ngwanenyana yo monyenyane, yena gotee le kgaetšedi ya gagwe Erasmus Fulton Smith le ditho tše dingwe tša lapa, ba ile ba hudugela Brazil ba e-tšwa United States. Ga e sa le go tloga ka 1899 o ile a amogela dimakasine tša Morokami ka mehla ka poso. Ketelo ya tate e bile sebaka seo e bego e le kgale se letetšwe ke Sarah, bana ba gagwe ba bane le yo mongwe yoo tate a bego a mmitša Rakgadi Sallie gore ba kolobetšwe. E be e le ka March 11, 1924.

Go se go ye kae, tate o be a šetše a ruta dinageng tše dingwe tša Amerika Borwa. Ka November 8, 1924, o ile a ngwala a le Peru gore: “Ke sa tšwa go fetša go aba dipampišana tše 17 000 kua Lima le Callao.” Leetong le le latelago o ile a ya Bolivia bakeng sa go yo aba dipampišana moo. Mabapi le ketelo yeo o ngwadile gore: “Tatago rena o šegofatša boiteko. Mo-India o ile a nthuša. Legae la gagwe le methopong ya Amazon. O tšea dipampišana tše ka bago 1 000 le dipuku tše dingwe bakeng sa go boela le tšona morago.”

Ka maiteko a tate, dipeu tša therešo ya Beibele di ile tša gašwa dinageng tše dintši tša Bogareng le Borwa bja Amerika. Morokami (wa Seisemane) wa December 1, 1924 o begile gore: “George Young ga bjale o bile ka Borwa bja Amerika lebaka la ka godimo ga nywaga e mebedi. . . . Ngwanabo rena yo yo a rategago o bile le tokelo ya go iša molaetša wa therešo Punta Arenas, ditseleng tše tshesane tša Magellan.” Tate gape o ile a etelela pele modiro wa  boboledi dinageng tše bjalo ka Costa Rica, Panama le Venezuela. O ile a tšwela pele gaešita le ge a ile a swarwa ke malaria gomme boemo bja gagwe bja tša maphelo bo ile bja kgomega.

Go ya Yuropa go le le Latelago

Ka March 1925, tate o ile a thoma go sesetša Yuropa, moo a bego a holofetše go aba dipampišana tše 300 000 tša Beibele kua Sepania le Portugal le go rulaganyeletša gore Ngwanabo rena Rutherford a tlo nea dipolelo tša phatlalatša. Lega go le bjalo, ka morago ga go fihla Sepania, tate o ile a bontšha go gonona mabapi le gore Ngwanabo rena Rutherford a nee dipolelo tše bjalo ka baka la boemo bja go se kgotlelele madumedi a mangwe.

Ge a arabela se, Ngwanabo rena Rutherford o ngwadile a tsopola Jesaya 51:16 yeo e rego: “Mantšu a-ka ke a bea molomong wa xaxo; ke Xo khutiša moriting wa seatla sa-ka, xore ke alê lexodimo, ke theê lefase, ke botšê Tsione ke re: O sethšaba sa-ka!” Ka baka la seo, tate o ile a phetha ka gore: “Ka kgonthe ke thato ya Morena gore ke tšwele pele gomme ke tlogelele mafelelo go yena.”

Ka May 10, 1925, Ngwanabo rena Rutherford o ile a nea polelo ya gagwe a e-na le mofetoledi kua Novadis Theater e lego Barcelona. Ba ka godimo ga 2 000 ba be ba le gona, go akaretša le mohlankedi wa mmušo le mohlapetši sethaleng. Thulaganyo e swanago e ile ya latelwa kua Madrid, ka batho ba 1 200 ba bilego gona. Kgahlego yeo e ilego ya ba gona dipolelong tše e ile ya feleletša ka go hlongwa ga ofisi ya lekala kua Sepania yeo e ilego ya ba “ka tlase ga tlhahlo ya George Young,” bjalo ka ge 1978 Yearbook of Jehovah’s Witnesses e bolela.

Ka May 13, 1925, Ngwanabo rena Rutherford o ile a nea polelo kua Lisbon, Portugal. Ketelo ya gagwe moo e ile ya atlega kudu, go sa šetšwe maiteko ao baruti ba a dirilego a go šitiša seboka ka go hlaba mašata le go pšhatla ditulo. Ka morago ga dipolelo tša Ngwanabo rena Rutherford kua Sepania le Portugal, tate o ile a tšwela pele a bontšha “Photo-Drama,” le gona o ile a ba a rulaganyetša gore dipuku tša Beibele di gatišwe le go abja mafelong ao. Ka 1927 o begile gore ditaba tše dibotse di phatlaladitšwe motseng o mongwe le o mongwe le toropong e nngwe le e nngwe Sepania.”

Go Dira Boboledi Soviet Union

Kabelo ya tate e latelago ya boromiwa e bile Soviet Union, moo a ilego a fihla ka August 28, 1928. Lengwalo leo a le ngwadilego ka October 10, 1928, ka boripana le balega ka gore:

“Ga e sa le ke tlile Russia, ke kgona go rapela e le ka kgonthe gore ‘Mmušô wa  xaxo a o tlê’ ka phišego ya pelo ka moka. Ke ithuta leleme eupša ke dira tšwelopele e nyenyane. Mofetoledi wa-ka ke motho yo a kgethegilego kudu, mo-Juda, eupša o dumela go Kriste e bile o rata Beibele. Ke bile le diphihlelo tše di kgahlišago eupša ga ke tsebe gore ke tla dumelelwa go dula lebaka le lekaakang. Bekeng e fetilego ke ile ka hwetša tsebišo ya gore ke tloge lebakeng la diiri tše 24, eupša ke ile ka lokiša boemo ka gona ka kgona go dula lebakanyana.”

Go ile gwa ikopanywa le barutwana ba bangwe ba Beibele kua Kharkov, yeo ga bjale e lego motse o mogolo wa Ukraine, gomme poledišano e borutho e ile ya ba sekiša megokgo ya lethabo. Go be go swarwa kopano e nyenyane bošegong bjo bongwe le bjo bongwe go fihlela bošego-gare. Ge a be a ngwala ka morago mabapi le seboka se le banabešo, tate o itše: “Banababo rena ba šokišago, dipuku tša bona tše mmalwa di tšerwe gomme babuši ke bao ba se nago bogwera, lega go le bjalo ba thabile.”

Bodiredi bja tate Soviet Union bo ile bja gatišwa ka poroutšheng e kgethegilego yeo e ilego ya newa bao ba ilego ba ba gona ka June 21, 1997, ge go be go neelwa meago e mefsa ya lekala kua St. Petersburg, Russia. Poroutšha e bolela gore tate o ile a romelwa Moscow gomme e bega gore o ile a hwetša tumelelo ya “go tšweletša dikopi tše 15 000 tša dipukwana tša Freedom for the Peoples le Where Are the Dead? bakeng sa gore di abje kua Russia.”

Ka morago ga go boa Russia, tate o ile a abelwa modirong wa bosepedi kua United States. Kua South Dakota o ile a etela legae la Nellena le Verda Pool, bana ba motho bao ka morago ba ilego ba ba baromiwa kua Peru. Ba ile ba bontšha tebogo e tseneletšego bakeng sa bodiredi bja tate bja go se lape gomme ba bolela gore: “Banababo rena ba mehleng yeo ya kgale ba be ba tloga ba e-na le moya wa bobulamadibogo ka ge ba be ba e-ya dinageng tše tše šele ba swere dithoto tše sego nene tša lefase le eupša ba e-na le pelo e tletšego lerato la go rata Jehofa. Se ke seo se ilego sa ba tutueletša go phetha seo ba se dirilego.”

Lenyalo le Leeto la Bobedi

Go theoša le nywaga tate o be a dutše a ngwalelana le Clara Hubbert wa Sehlakahlakeng sa Manitoulin, Ontario. Bobedi bja bona ba be ba le gona kopanong ya Columbus, Ohio, ka July 26, 1931 ge Barutwana ba Beibele ba be ba amogela leina la Dihlatse tša Jehofa. (Jesaya 43:10-12) Beke ka morago ba ile ba nyalana. Go se go ye kae, tate o be a sepetše gape, a le leetong la gagwe la bobedi la boromiwa go phatša dihlakahlakeng tša Caribbean. Moo, o ile a thuša ka go rulaganya diboka le go tlwaetša ba bangwe bodireding bja ntlo le ntlo.

Mma o ile a amogela diswantšho, dikarata le mangwalo go tšwa Suriname, St. Kitts le mafelong  a mangwe a mantši. Mangwalo a be a bega ka tšwelopele ya modiro wa boboledi gomme ka dinako tše dingwe a akaretša ditaba tše di lego mabapi le dinonyana, diphoofolo le dimela nageng e itšego yeo tate a bego a ile a ya go yona. Ka June 1932, tate o ile a phetha kabelo ya gagwe kua Caribbean gomme a namela sekepe karolong ya maemo a tlase, go etša mehleng, a boela Canada. Ka morago ga moo, yena le mma ba ile ba tšea karolo gotee modirong wa go ruta wa nako e tletšego, ba fetša marega a 1932/33 ba le tikologong ya Ottawa le sehlopha se segolo sa badiredi ba bangwe ba nako e tletšego.

Bophelo bja Lapa ka Boripana

Ka 1934 kgaetšedi ya-ka David o ile a belegwa. Ge e be e sa le ngwana, o be a ema godimo ga lepokisi la mma la dikefa gomme a itlwaetša go nea “dipolelo” tša gagwe. Bophelong bja gagwe ka moka o bontšhitše phišego ya go fišegela Jehofa go swana le tatagwe. Boraro bja bona ba be ba sepela ka koloi e nago le digodiša-modumo tšeo di bofeletšwego ka godimo ga koloi ge ba dutše ba etela diphuthego go tloga lebopong la ka bohlabela la Canada go ya lebopong la ka bodikela. Ke belegwe ka 1938 ge tate a be a hlankela British Columbia. David o gopola tate a mpea malaong gomme tate, mma le David ba khunama go dikologa malao ge tate a be a rapela thapelo ya go ntebogela.

Maregeng a 1939, re ile ra dula Vancouver ge tate a be a etela diphuthego tikologong yeo. Gare ga mangwalo a mantši ao re ilego ra a kgoboketša go theoša le nywaga go be go e-na le leo le ngwadilwego ka January 14, 1939, leo le ngwadilwego ge a be a le Vernon, British Columbia. Tate o ile a le ngwalela Clara, David le Ruth a re: “Katlo e nyenyane feela gotee le go gokarela.” Ka gare ga lona go be go e-na le molaetša bakeng sa yo mongwe le yo mongwe wa rena. O be a bolela ka gore puno ke e ntši moo eupša badiri ga ba nene.​—Mateo 9:37, 38.

Beke ka morago ga ge a boile kabelong ya gagwe Vancouver, tate o ile a wa dibokeng. Tlhahlobo yeo e ilego ya dirwa ka morago e ile ya utolla gore o be a e-na le serurugi seo se nago le kankere bjokong. Ka May 1, 1939, o ile a fetša tsela ya gagwe ya lefaseng. Ke be ke e-na le dikgwedi tše senyane gomme David o be a le kgaufsi le go fetša nywaga e mehlano. Mma yo a rategago yoo le yena a bego a e-na le kholofelo ya legodimong, o ile a dula a botegela Modimo go fihla lehung la gagwe ka June 19, 1963.

Tsela yeo tate a bego a ikwa ka gona ka tokelo ya gagwe ya go iša ditaba tše dibotse dinageng tše dintši e bontšhwa gabotse go le lengwe la mangwalo a gagwe leo a bego a le ngwaletše mma. Ka boripana o itše: “Jehofa ka kgaugelo o ntumeletše gore ke ye dinageng tše ke le seetša sa go iša molaetša wa Mmušo. Leina la gagwe le lekgethwa a le retwe. Letago la gagwe le phadima ka go se phethagale, go se swanelege le bofokodi.”

Ga bjale bana ba George le Clara Young, ditlogolo le ditlogolwana tša bona ba hlankela Modimo wa rena yo lerato, Jehofa. Ke ile ka botšwa gore tate o be a tsopola Ba-Hebere 6:10 leboelela, yeo e rego: “Xobane Modimo xa a bebe motho, xa a lebale medirô ya lena, le leratô le Le itapišitšexo ka lôna ’ineng la xaxwe.” Le rena ka mo go swanago ga se ra lebala modiro wa tate.

[Seswantšho go letlakala 23]

Tate ka go le letona a e-na le barwarre ba gagwe ba bararo

[Diswantšho go letlakala 25]

Tate (yo a emego) a e-na le Banababo rena Woodworth, Rutherford le Macmillan

Ka tlase: Tate (mafelelong ka go le letshadi) sehlopheng le Ngwanabo rena Russell

[Diswantšho go letlakala 26]

Tate le mma

Ka tlase: Letšatšing la bona la lenyalo

[Seswantšho go letlakala 27]

Ke e-na le David le mma nywaga ka morago ga lehu la tate