KELETŠO YA BEIBELE: “Ga go na motho yo a kilego a hloya mmele wa gagwe; eupša o a o fepa le go o babalela.”—Baefeso 5:29.

SEO KELETŠO YE E SE BOLELAGO: Re swanetše go dira se sengwe go hlokomela mebele ya rena. Pego e nngwe e bontšhitše gore mathata a mantši a tša maphelo a bakwa ke tsela yeo batho ba kgethago go phela ka yona. Ka gona, ge motho a dira diphetho tše dibotse a ka phela gabotse mmeleng.

SEO O KA SE DIRAGO:

• Eja dijo tša phepo. Hlokomela mmele wa gago ka go ja dijo tša phepo le go nwa meetse ao a lekanego.

• Dula o itšhidulla. Go itšhidulla go ka go thuša gore o phele gabotse mmeleng go sa šetšwe gore o na le mengwaga e mekae, o golofetše goba o na le bolwetši bja go se fole. Batho ba geno, bagwera goba dingaka ba ka go fa maele a gore o ka itšhidulla bjang, eupša ke wena o swanetšego go dira maiteko!

• Robala ka mo go lekanego. Batho bao ba fetšago matšatši a mantši ba sa robale ka mo go lekanego ba ka feleletša ba babja kudu. Batho ba bantši ba kgetha go dira mešongwana e itšego ka nako yeo ba swanetšego go robala ka yona. Seo se dira gore ba feleletše ba sa robale ka mo go lekanego. Ge o robala ka mo go lekanego, go ra gore o nyaka go phela gabotse mmeleng.

KELETŠO YA BEIBELE: “A re itlhwekišeng ditšhila tšohle tša nama le tša moya.”—2 Bakorinthe 7:1.

SEO KELETŠO YE E SE BOLELAGO: Ge re sa šilafatše mebele ya rena ka dilo tše kotsi tša go swana le motšoko, e lego dibaki tše dikgolo tša malwetši le lehu, re tlo phela gabotse mmeleng.

SEO O KA SE DIRAGO: Ipeele letšatši leo o nyakago go tlogela go kgoga ka lona, gomme o le swaye khalentareng. Ge letšatši leo le le kgauswi le go fihla, lahla dikwayi goba disekerete, dibjana tša go tšhela melora ya dikwayi, dilo tša go laeta kwayi le dilo tše dingwe tšeo o di dirišago ge o kgoga. Phema go ya mafelong ao go tletšego batho ba go kgoga. Botša ba geno le bagwera ba gago gore o nyaka go tlogela go kgoga e le gore ba go thuše.

DIRA DILO KA TSELA E ŠIRELETŠEGILEGO.

“Ge o ka aga ntlo e mpsha, o age e mmotwana ka godimo ga tlhaka ya gago, e le gore ntlo yeo ya gago e se be le molato wa madi ka gobane motho a ka wa go yona.”—DOITERONOMIO 22:8.

LAOLA KGALEFO YA GAGO.

“Yo a diegago go galefa o na le temogo e kgolo, eupša yo a felago pelo o godiša bošilo.”—DIEMA 14:29.

O SE KE WA BA SEJATO.

‘O se ke wa ba gare ga bao ba jago ka bojato.’—DIEMA 23:20.