Ge banyalani ba dirišana gabotse, seo se swana le mofofiši wa sefofane le mothuši wa gagwe bao bobedi bja bona ba tsebago mo ba yago. Ge go eba le mathata, ga ba šupane ka menwana, go e na le moo ba thušana go a rarolla.

MOLAO WA MOTHEO WA BEIBELE: “Ga e sa hlwa e le ba babedi, eupša ke nama e tee.”—Mateo 19:6.

Christopher o re: “Monna le mosadi ba swanetše go thušana gore lenyalo la bona le atlege.”

Ge go eba le mathata lenyalong, banyalani bao ba sa dirišanego ba tlo šupana ka menwana go e na le gore ba lokiše bothata. Tabanyana e nyenyane e ka fetoga e kgolo.

Alexandra o re: “Tirišano e bohlokwa lenyalong. Ge nkabe nna le monna wa ka re be re sa dirišane, re be re tlo ba bjalo ka batho feela bao ba dulago mmogo go e na le go ba banyalani. Seo se be se tlo baka mathata ge re swanetše go dira diphetho tše bohlokwa.”

ITLHAHLOBE

• Na ke lebelela tšhelete yeo ke e golago e le ya ka ke nnoši?

• Na ge molekane wa ka a se gona ke ikwa ke thabile?

• Na ga ke nyake go gwerana le ba gabo molekane wa ka, gaešita le ge yena a ba rata kudu?

BOLEDIŠANA LE MOLEKANE WA GAGO KA DIPOTŠIŠO TŠE

• Ke selo sefe goba dilo dife lenyalong la rena tšeo re dirišanago gabotse go tšona?

• Re ka kaonefatša kae?

• Re ka dira’ng gore re kaonefatše tsela yeo re dirišanago ka yona?

DITŠHIŠINYO

• A re re wena le molekane wa gago le bapala thenise le batho ba itšego gomme le eme ka mahlakoreng a sa swanego. Ke’ng seo le ka se dirago gore le be ka lehlakoreng le tee?

• Go e na le go nagana gore: ‘Nka dira’ng gore ke fenye?’ nagana gore: ‘Re ka dira’ng gore re fenye?’

Ethan o re: “Ge bothata bo tšwelela, tlogela go nagana gore ke mang a lego molato goba gore ke mang a se nago molato. Seo se ka se le thuše ka selo. Sa bohlokwa ke gore le be le khutšo le kwano lenyalong la lena.”

MOLAO WA MOTHEO WA BEIBELE: “Le se ke la kgahlegela ditaba tša lena feela, eupša le kgahlegele le tša ba bangwe.”—Bafilipi 2:3, 4.