GO DIRIŠA DINALEDI: Batho ba bangwe ba dumela gore bokamoso bja bona bo ithekgile ka tsela yeo dinaledi di bego di dutše ka yona ge ba be ba belegwa. Ba lebelela dinaledi gore ba tsebe ka bokamoso bja bona le gore di ba thuše go dira diphetho le go phema dilo tšeo di ka ba gobatšago mo bophelong.

GO YA DINGAKENG: Batho ba bangwe ba dumela gore ba tlo ba le bokamoso bjo bobotse ge ba ka botšiša dingaka seo ba swanetšego go se dira. Ba dumela gore ge ba ka dira bjalo dilo di tlo ba sepelela gabotse. Ba dira diphetho ba ithekgile ka seo dingaka di ba boditšego sona.

GO PHASA BADIMO: Ba bangwe ba dumela gore ba swanetše go rapela bahu ba gabo bona goba medingwana gore ba šireletšege le go šegofatšwa. Van * yo a dulago Vietnam o re, “Ke dumela gore go phasa badimo ba gešo go tlo nthuša gore ke be le bophelo bjo bo kaone gona bjale, le gore nna le bana ba ka re tle re be le bokamoso bjo bobotse.”

GO TSWALWA GANTŠINTŠI: Batho ba bantši ba dumela gore ge motho a hlokofetše o tswalwa gape, gomme seo se direga gantšintši. Ba dumela gore ge motho a tswetšwe gape, dilo tše mpe goba tše di botse tšeo di diregago bophelong bja gagwe gona bjale, di bakilwe ke dilo tšeo a ilego a di dira pele a ka tswalwa gape.

Lega go le bjalo, ba bantši ga ba dumelelane le ditumelo tšeo go boletšwego ka tšona ka mo godimo ka ge ba re ke tša maaka. Eupša, ba sa dutše ba diriša mekgwa e mengwe e bjalo ka bonoge, go lebelela dinaledi, go ya baporofeteng le mekgwa e mengwe. Ba nagana gore mohlomongwe go diriša mekgwa ye, go tla ba thuša gore ba tsebe ka bokamoso.

Na batho bao ba dirilego dilo tšeo re boletšego ka tšona ka mo godimo ba ile ba thabela bophelo le go ba le bokamoso bjo bobotse?

Ekwa seo se diragaletšego Hào yo a dulago Vietnam. O ile a nyaka thušo go balepi ba dinaledi, feng shui le go rapela badimo. Na o ile a atlega? Hào o re: “Ke ile ka lahlegelwa ke tšhelete e ntši, ka tsena ka gare ga dikoloto, ka ba le mathata a lapa, ka feleletša ke gateletšegile monaganong.”

Go swana le ba bangwe bao re boletšego ka bona, Qiuming yo a tšwago Taiwan, le yena o be a dumela go feng shui, go rapela badimo, go tswalwa gantšintši, go diriša dinaledi le gore dilo tšeo di diregago mo bophelong bja gagwe di be di no direga ka mahlatse. Ka morago ga go naganišiša ka ditumelo tše, o ile a re: “Ke ile ka lemoga gore dithuto tše bjalo le metlwae e bjalo di a ganetšana e bile ga di kwagale. Ke ile ka hwetša gore seo batho bao ba dirišago dinaledi ba bego ba mpotša sona, gantši se be se fošagetše e bile le thuto ya gore motho o tswalwa gantšintši ga e kwagale, ka gore go tla bjang gore motho a fetoše bophelo bja gagwe ka morago ga go tswalwa gape mola a sa gopole dilo tšeo a di dirilego mo bophelong pele a ka tswalwa gape?”

Hào, Qiuming, le batho ba bangwe ba bantši, ba ile ba ithuta gore bokamoso bja rena ga se bja ithekga ka go diriša dinaledi, go rapela badimo, go tswalwa gape goba gore dilo di tla no direga ka mahlatse mo bophelong. Na se se ra gore re ka se kgone go laola bokamoso bja rena?

Batho ba bantši ba nagana gore ge ba ka rutega kudu, ba ba le tšhelete e ntši, seo se tlo dira gore ba be le bokamoso bjo bobotse. Batho bao ba ilego ba phegelela dilo tše, na ba ile ba hwetša bokamoso bjo bobotse?