GA GO na motho yo a ka tšhabelago lehu. Ka mohlala, nagana o lebeletše lenaneo la thelebišene leo le bontšhago motho yo mongwe wa go tuma, mohlomongwe sebapadi sa kgwele ya maoto seo o se ratago. Lenaneo leo ge le thoma le bontšha motho yoo e sa le ngwana, a sa ithuta go bapala kgwele e bile a itlwaetša gantši. Ke moka o bona a thoma go bapala sehlopheng sa go tuma, ke moka ka morago a yo bapala moše wa mawatle. Eupša go se go ye kae, o bona motho yoo a thoma go tšofala gomme mafelelong a hlokofala.

Tiragalo yeo go boletšwego ka yona ka mo godimo ga e no ba nonwane, eupša ke selo seo se diregago bophelong. Le ge motho yoo e ka ba e be e le seopedi, radipapadi goba motho yo mongwe wa go tuma, sa go nyamiša ke gore le yena o be a tla feleletša go swana le motho yo re boletšego ka yena. Go ka direga gore motho yoo o be a atlegile, eupša nagana gore nkabe a etla kae ka bophelo ge nkabe a se a tšofala le go hlokofala.

Le ge taba ye e nyamiša, nnete ke gore ka moka re tlo feleletša re tšofetše le go hlokofala. (Mmoledi 9:5) Le ge re ka dira eng, re ka se tšhabele dilo tšeo. Dilo tše dingwe tše di ka dirago gore bophelo e be bjo bokopana ke dikotsi goba malwetši. Go etša ge Beibele e bolela, re swana le kgodi yeo e “tšwelelago ka lebakanyana ke moka ya timelela.”—Jakobo 4:14.

Ka ge batho ba bangwe ba ipotša gore ka moka re tlo no hwa, ba re: “A re jeng gomme re nweng, gobane gosasa re tla hwa.” (1 Bakorinthe 15:32) Batho bao ba hlatsela taba ya gore lehu ga le phemege. E bile seo se bontšha gore ga ba na tshepo ka bokamoso. Le wena ge ka letšatši le lengwe o ka ba mahlokong, go ka direga gore o tle o ipotšiše gore: ‘Na Modimo o be a rerile gore bophelo bo be ka tsela ye?’ O ka hwetša kae karabo ya potšišo ye?

Batho ba bantši ba nagana gore ba ka hwetša karabo ya potšišo ye go borasaense. Borasaense le dingaka ba hweditše dilo tšeo di dirago gore re phele nako e teletšana. E bile borasaense ba bangwe ba leka ka thata gore ba hwetše dilo tše di ka dirago gore re phele nako e teletšana le go feta. Go sa šetšwe seo ba se dirago, re sa dutše re ipotšiša gore: Ke ka baka la’ng batho ba tšofala le go hwa? Na ka letšatši le lengwe lehu le tla fela? Dihlogo tše di latelago di tlo araba dipotšišo tše le yeo e rego: Na Modimo o re bopetše gore re tle re hwe?