Batho ba bantšhi ba dumela gore go na le dilo tše di lokilego le tše di sa lokago. Ka mohlala ba dumela gore go kata, go bolaya, le go tlaiša bana ka tša thobalano go fošagetše e bile ba kgahlwa ke go bona dilo di dirwa ka toka, batho ba kwelana bohloko le go swarana gabotse. Eupša ba bangwe ba nagana gore ga go na phetho e lokilego goba e sa lokago ge go tliwa ditabeng tša thobalano, go botega goba go godiša bana. Ba nagana gore phetho e nngwe le e nngwe yeo motho a e dirago e lokile. Gantšhi ba dira diphetho go ya ka gore ba ikwa bjang goba gore batho bao ba phelago le bona ba ikwa bjang ka seo ba nyakago go se dira. Na yeo ke tsela e botse ya go dira dilo?

Gantšhi re dira diphetho go ya ka gore re ikwa bjang goba go ya ka letswalo la rena. (Baroma 2:​14, 15) Le bana ba banyenyane ba kgona go lemoga ge ba dirile phošo e bile ba kgona go ipona molato. Ge nako e dutše e eya re ithuta gore ke eng se se lokilego le seo se sa lokago go ya ka setšo goba go batho bao re fetšago nako e ntšhi le bona, e ka ba ba leloko, bagwera, barutiši, batho ba mo motseng le ba bodumedi. Ge re dira diphetho, letswalo la rena le kgona go re botša ge e ba phetho yeo re e dirago e dumelelana le seo re ithutilego gore se lokile goba ga se sa loka.

Letswalo la rena le ka re thuša go kwela ba bangwe bohloko, go ba swara gabotse le go leboga. Le ka re thuša le gore re se dire dilo tšeo di ka dirago gore re ikwe re le molato, re kweše ba bangwe bohloko goba go dira dilo tšeo di tlago go re swabiša goba go re leša dihlong.

Na go dira diphetho go ya ka maikwelo a rena go dula go re hola? Ge Garrick e be e sa le mofsa o be a ipotša gore a ka phela ka tsela e nngwe le e nngwe yeo a e nyakago. Eupša o ile a bona gore go dira seo go be go sa be le ditlamorago tše dibotse. O ile a bolela gore bophelo bja gagwe bo be bo sa thabiše ka ge a be a itshwere ka tsela e gobogilego, a diriša dihlaretagi gampe, e le setagwa e bile e le ntwadumela.

Le ge re dira diphetho go ya ka maikwelo a rena, gantšhi re di dira re nagana gore batho ba tlo re’ng ka tšona. Go dira seo go ka re thuša go dira diphetho tše bohlale. Batho ba gabo rena, bagwera goba batho ba mo motseng ba a re hlompha ge ba bona re dira dilo tšeo ba bonago di lokile.

Na go dira diphetho go ya ka gore ba bangwe ba ikwa bjang go dula go re hola? Ge Priscila e be e sa le mofsa o ile a dira seo dithaka tša gagwe di bego di tlwaetše go se dira e lego go ba le thobalano pele ga lenyalo. Eupša o ile a lemoga gore go dira bjalo go be go sa dire gore a thabe. O ile a re: “Go dira dilo tšeo batho ba bangwe ba bego ba di dira ga se gwa dira gore ke thabe. Go ile gwa dira gore ke dire diphetho tša bošilo le go bea bophelo bja ka kotsing.”

Maikwelo a rena le a batho ba bangwe a bohlokwa ge re dira diphetho. Eupša ga se ka mehla go latela maikwelo go dirago gore re dire diphetho tše dibotse. Ka dinako tše dingwe re ka ikgobatša goba ra gobatša ba bangwe ka baka la go se tsebe gore diphetho tšeo re di dirago di tlo felela kae. (Diema 14:12) Le gona ga re na bonnete bja gore dilo tšeo re bonago di lokile gona bjale di ka se tsoge di fetogile goba tša re gobatša. Le gona boitshwaro bjo bo bego bo sa amogelege nakong e fetilego gona bjale bo a amogelwa, le mekgwa yeo e bego e amogelega nakong e fetilego ga bjale batho ba re ga se ya loka.

Na go na le moo re ka hwetšago tlhahlo e kaone yeo e ka re thušago go dira diphetho tše dibotse? Na go na le melao ya boitshwaro yeo re ka e latelago yeo e ka re thušago go dira diphetho tšeo re ka se itsholelego tšona nakong e tlago?

Se se kgahlišago ke gore go na le moo re ka hwetšago tlhahlo yeo e sa fetogego yeo re ka e tshepago le yeo batho ka moka ba ka e dirišago. Sehlogong se se latelago re tlo bona gore re ka hwetša kae tlhahlo ye, yeo e ka re thušago go tseba gore ke eng seo se nepagetšego le seo se fošagetšego.