Rose o re: “Ke na le bolwetši bja leabela bjo bo dirago gore ke dule ke opelwa kudu. Ga ke sa phetše gabotse.” E nngwe ya dilo tšeo di bego di mo tshwenya kudu ke gore ka dinako tše dingwe o be a sa kgone go tsepamiša kgopolo ge a ithuta Beibele le go dira mediro e sepedišanago le borapedi bja gagwe. Eupša o thušitšwe kudu ke mantšu a Jesu ao a lego go Mateo 19:26, yeo e rego: “Go Modimo dilo tšohle di a kgonega.” Rose o ithutile gore go na le ditsela tše dintši tša go ithuta. Ka ge ka dinako tše dingwe go opelwa ga gagwe go dira gore a se kgone go bala, o ile a thoma go theetša Beibele yeo e rekhotilwego gotee le dikgatišo tša Beibele. * Rose o re: “Ntle le dikgatišo tšeo di rekhotilwego ga ke tsebe gore ke be ke tla tšwela pele bjang ke aga segwera sa ka le Modimo.”

Ge Rose a nyamišwa ke go palelwa ke go dira dilo tšeo peleng a bego a kgona go di dira, o kgothatšwa ke mantšu ao a lego go 2 Bakorinthe 8:12, yeo e rego: “Ge e ba motho a ikemišeditše go nea, gona mpho e amogelega ka mo go kgethegilego go ya ka seo a nago le sona, e sego go ya ka seo a se nago sona.” Mantšu ao a gopotša Rose gore Modimo o thabela seo a kgonago go se dira ka gobane o dira sohle seo a ka se kgonago go sa šetšwe go fokola ga gagwe.

Delphine yo go boletšwego ka yena pejana o gopola ka gore: “Ka morago ga gore morwedi wa ka wa mengwaga e 18 a hlokofale, ke be ke ekwa bohloko kudu mo e lego gore ke be ke sa kgolwe gore ke tla tšwela pele ke phela. Bophelo bo be bo ka se sa swana le peleng.” Lega go le bjalo, o ile a homotšwa ke mantšu ao a lego go Psalme 94:19, moo mopsalme a boditšego Modimo gore: “Ge dikgopolo tša ka tše di mpherekanyago di be di ata ka go nna, dikhomotšo tša gago di ile tša okobatša moya wa ka.” Delphine o re: “Ke ile ka rapela Jehofa gore a nthuše go hwetša dilo tšeo ke bego nka di dira, tšeo di bego di tla nthuša go okobatša bohloko.”

Delphine o ile a dula a swaregile ka modiro o bohlokwa wa boithaopo. Ge nako e dutše e eya, o ile a thoma go itshwantšha le khrayone yeo bana ba khalarago ka yona, yeo e lego gore le ge e robegile e sa dutše e ka dirišwa. Ka mo go swanago, le ge a be a sa kwa bohloko, o ile a ithuta gore o be a sa dutše a ka kgona go thuša ba bangwe. Delphine o gopola ka gore: “Ke ile ka hwetša gore ge ke diriša melao ya motheo ya Beibele le Mangwalo go homotša batho bao ke ithutago le bona Beibele, e be e le tsela yeo Jehofa a bego a nkhomotša ka yona.” O ile a ngwala lelokelelo la batho ba ka Beibeleng bao le bona ba ilego ba lebeletšana le manyami a go hwelwa. O ile a lemoga gore: “Batho bao ka moka ba be ba dula ba rapela.” Delphine o ile a hwetša gape gore “tsela feela ya gore motho a kgone go kgotlelela ke ka go bala Beibele.”

Go bala Beibele go rutile Delphine selo se sengwe gape, e lego go nagana ka bokamoso e sego dilo tša nakong e fetilego. O homotšwa ke kholofetšo yeo go ngwadilwego ka yona go Ditiro 24:15, yeo e rego: “Go tla ba le tsogo ya ba lokilego gotee le ba sa lokago.” Delphine o kgodišegile gakaakang gore Jehofa o tlo tsoša morwedi wa gagwe? Ge a araba o re: “Ke bona morwedi wa ka ka leihlo la kgopolo nakong e tlago. Ke kgodišegile gore ke tlo mmona gape nakong yeo Jehofa a e beilego. Ke ipona ke na le yena serapaneng sa rena go swana le kamoo ke ilego ka mmona le go mo rata letšatšing la ge a be a sa tšwa go belegwa.”