1. Jehofa o re neile kholofelo efe?

 JEHOFA o re neile kholofelo e thabišago kudu ya bophelo bjo bo sa felego. Ba bangwe ba na le kholofelo ya go phela ka mo go sa felego legodimong e le dibopiwa tša moya tšeo di sa hwego. (1 Bakor. 15:50, 53) Ba bantši bona ba na le kholofelo ya go phela ka mo go sa felego lefaseng, ba phela gabotse mmeleng e bile ba thabile. (Kut. 21:3, 4) Go sa šetšwe gore re tlo phela ka mo go sa felego legodimong goba mo lefaseng, kholofelo ye ke e bohlokwa kudu go rena.

2. Kholofelo ya rena e theilwe go eng, gona ke ka baka la’ng re realo?

² Lentšu “kholofelo,” bjalo ka ge le dirišitšwe ka Beibeleng le ka hlaloswa e le “go lebelela gore dilo tše dibotse di tlo direga.” Re ka kgodišega gore kholofelo ya rena ka bokamoso e tlo phethega ka gobane e tšwa go Jehofa. (Baroma 15:13) Re tseba dilo tšeo a re tshepišitšego tšona e bile re a tseba gore o dula a phethagatša ditshepišo tša gagwe. (Num. 23:19) Re kgodišegile gore Jehofa o na le matla a go phethagatša dilo ka moka tše a rego o tlo di dira. Ka gona kholofelo ya rena ke ya therešo ka gobane ga se ya thewa go seo re nyakago se direga eupša go dithuto tša therešo.

3. Re tlo ithuta’ng sehlogong se? (Psalme 27:14)

³ Tatago rena wa legodimong o a re rata, e bile o nyaka gore re mo tshepe. (Bala Psalme 27:14.) Ge kholofelo ya rena go Jehofa e tiile, re tlo kgona go kgotlelela mathata le go ba le sebete le lethabo go sa šetšwe dilo tšeo di ka re diragalelago. A re ithuteng kamoo kholofelo ya rena e re šireletšago ka gona. Re tlo thoma ka go ithuta gore kholofelo ya rena e swana bjang le tshetledi le kefa. Ke moka ra ithuta gore re ka tiiša bjang kholofelo ya rena.

4. Kholofelo e swana bjang le tshetledi? (Baheberu 6:19)

⁴ Lengwalong leo a le ngwaletšego phuthego ya Baheberu, moapostola Paulo o swantšhitše kholofelo ya rena le tshetledi. (Bala Baheberu 6:19.) Gantši Paulo o be a tšea maeto ka sekepe, ka baka leo o be a tseba gore tshetledi e dirišetšwa go thibela sekepe gore se se ke sa gogolega. Ka nako e nngwe o be a nametše sekepe ge ledimo le matla le tšwelela. Nakong yeo ya ledimo o ile a bona basesiši ba sekepe ba lahlela ditshetledi lewatleng gore sekepe se se gogolelwe maswikeng a kotsi. (Dit. 27:29, 39-41) Go swana le ge tshetledi e thekga sekepe, kholofelo ya rena e re thuša gore re se gogolelwe kgole le Jehofa ge re lebana le mathata ao re ka a swantšhago le madimo. Kholofelo ya rena e re thuša gore re dule re išitše maswafo fase ge re lebeletšane le mathata ka gobane re tshepa gore dilo di tlo ba kaone. Gopola gore Jesu o re boditše gore re tlo lebeletšana le mathata. (Joh. 15:20) Ka gona go naganišiša ka dilo tšeo Jehofa a re tshepišitšego tšona go re thuša gore re tšwele pele re mo hlankela.

5. Kholofelo e ile ya tiiša Jesu bjang ge a be a lebeletšane le lehu?

⁵ Nagana kamoo kholofelo e ilego ya thuša Jesu go dula a botega le ge a be a tseba gore o be e tlo hwa lehu le bohloko. Letšatšing la Pentekoste ya 33 C.E., moapostola Petro o ile a tsopola boporofeta bjo bo lego pukung ya Dipsalme bjo bo hlalosago kamoo Jesu a ilego a iša maswafo fase ka gona le go ba le sebete, o itše: “[Ke] tla dula ka polokego, gobane o ka se tlogele moya wa ka o le Bodulabahu, o ka se dumelele mohlanka yo a botegago a bola ka lebitleng. . . . sefahlego sa gago se sepedišana le go thaba ka botlalo.” (Dit. 2:25-28; Ps. 16:8-11) Le ge Jesu a be a tseba gore o tlo hwa, o be a na le kholofelo e tiilego ya gore Modimo o tla mo tsoša le gore o be a tla ba le lethabo la go kopana gape le Tatagwe legodimong.—Baheb. 12:2, 3.

6. Ke eng seo ngwanabo rena yo mongwe a ilego a se bolela ka kholofelo?

⁶ Kholofelo ya rena ya Bokriste e thušitše bana babo rena ba bantši le dikgaetšedi go kgotlelela. Nagana ka mohlala wa Leonard Chinn, e lego ngwanabo rena yo a botegago yo a bego a dula kua England. Nakong ya Ntwa ya Pele ya Lefase, o ile a golegwa ka ge a be a gana go tsenela bošole. Ka dikgwedi tše pedi o ile a tswalelelwa ka seleng yeo a bego a dula a le tee gomme ka morago a newa modiro o thata. Ka morago o ngwadile gore: “Diphihlelo tša ka di nthušitše go lemoga gore re hloka kholofelo go re thuša go kgotlelela. Re na le mohlala wa Jesu, baapostola, le baporofeta gotee le dikholofetšo tše bohlokwa tšeo di lego ka Beibeleng. Mehlala ye ka moka e re nea kholofelo e kgolo ka bokamoso le go re tiiša gore re kgotlelele. Kholofelo e be e swana le tshetledi go Leonard, gomme le go rena go ka ba bjalo.

7. Mathata a tiiša bjang kholofelo ya rena? (Baroma 5:3-5; Jakobo 1:12)

⁷ Ge re kgotlelela mathata le go bona kamoo Jehofa a re thušago ka gona, seo se tiiša kholofelo ya rena e bile re bona gore Jehofa o a re amogela. (Bala Baroma 5:3-5; Jakobo 1:12.) Ka baka leo kholofelo ya rena e ba e matla go feta nakong ya ge re be re thoma go amogela ditaba tše dibotse. Sathane o nyaka gore mathata a re imele, eupša ge Jehofa a re thuša re tlo kgona go kgotlelela bothata bjo bongwe le bjo bongwe.

8. Kholofelo ya rena e swana bjang le kefa? (1 Bathesalonika 5:8)

⁸ Beibele e swantšha kholofelo ya rena le kefa. (Bala 1 Bathesalonika 5:8.) Lešole le apara kefa gore le šireletše hlogo ya lona.  Re swanetše go šireletša menagano ya rena ntweng ya rena le Sathane. O diriša dilo tše dintši go re leka le go senya menagano ya rena. Go swana le kamoo kefa e šireletšago hlogo ya lešole, kholofelo ya rena e šireletša menagano ya rena gore re dule re botegela Jehofa.

9. Go direga eng ge batho ba se na kholofelo?

⁹ Kholofelo ya rena ya bophelo bjo bo sa felego e tla re thuša go dira dilo ka bohlale le temogo. Ka lehlakoreng le lengwe, ge kholofelo ya rena e ka thoma go fokola gomme ra nagana ka dikganyogo tša rena, re ka lahlegelwa ke kholofelo ya rena ya bophelo bjo bo sa felego. Nagana ka seo se diragaletšego Bakriste bao ba bego ba phela Korinthe ya bogologolo. Ba ile ba lahlegelwa ke kholofelo e bohlokwa yeo Modimo a re tshepišitšego yona e lego ya tsogo. (1 Bakor. 15:12) Paulo o boletše gore batho bao ba se nago kholofelo ka bophelo bja nakong e tlago ba phelela feela go kgotsofatša dikganyogo tša bona. (1 Bakor. 15:32) Lehono batho bao ba se nago kholofelo ditshepišong tša Modimo, ba dira selo se sengwe le se sengwe seo se ka ba thabišago bophelong. Eupša rena ga re swane le bona ka ge re na le kholofelo ditshepišong tša Modimo tša nakong e tlago. Kholofelo ya rena e šoma bjalo ka kefa ya seswantšhetšo yeo e šireletšago menagano ya rena le go re thuša gore re se ke ra nagana ka rena feela, e lego seo se tlago go senya segwera sa rena le Jehofa.—1 Bakor. 15:33, 34.

10. Kholofelo e ka re šireletša bjang dikgopolong tše fošagetšego?

¹⁰ Kholofelo ya rena e re thuša gore re se nagane gore re ka se kgone go thabiša Jehofa. Ka mohlala, ba bangwe ba ka nagana gore: ‘Nka se tsoge ke bile gare ga bao ba tlago go phela ka mo go sa felego. Ga ke swanelege. Nka se kgone go dira seo Modimo a nyakago ke se dira. Nagana ka mohomotši wa Jobo wa maaka e lego Elifase yo a ilego a diriša kgopolo e swanago go Jobo. Elifase o itše: “Motho wa nama le madi ke eng moo e ka bago yo a hlwekilego? Go feta moo o boletše se se latelago ka Modimo: “Bona! Yena ga a bote bahlanka ba gagwe, le magodimo ka bowona ga se a hlweka mahlong a gagwe.” (Jobo 15:14, 15) Ao ke maaka a matala! Gopola gore Sathane ke yena a nyakago gore o nagane bjalo. O a tseba gore ge o dula o nagana ka tsela yeo, o tlo thoma go felelwa ke kholofelo. Gana maaka a bjalo gomme o dule o nagana ka dikholofetšo tša Jehofa. Le ka mohla o se ke wa belaela gore Jehofa o nyaka gore o phele ka mo go sa felego le gore o tla go thuša go fihlelela seo.—1 Tim. 2:3, 4.

11. Ke ka baka laʼng re sa swanela go fela pelo ge re letetše gore Modimo a phethagatše dikholofetšo tša gagwe?

¹¹ Ga se ka mehla go lego bonolo go dula re tiiša tumelo ya rena. Re ka fela pelo ge re letile gore Modimo a phethagatše dikholofetšo tša gagwe. Lega go le bjalo Jehofa ke wa ka mo go sa felego, gomme nako yeo rena re e bonago e le e telele go yena ke e kopana. (2 Pet. 3:8, 9) O tla dira seo a se tshepišitšego ka tsela e kaone, eupša a ka se ke a dira dilo ka nako yeo re e letetšego. Ke eng seo se ka tiišago kholofelo ya rena ge re letetše Modimo ka go se fele pelo gore a phethagatše dikholofetšo tša gagwe?—Jak. 5:7, 8.

12. Go ya ka Baheberu 11:1,6 kholofelo le tumelo di tswalana bjang?

¹² Kholofelo ya rena e tla dula e tiile ge re dula re le kgauswi le Jehofa, yena yo a tlago phethagatša kholofelo ya rena. Ge e le gabotse Beibele e tswalanya kholofelo le tumelo ya gore Jehofa o gona le gore ke “moputsi wa bao ba mo tsomago ka phišego.” (Bala Baheberu 11:1, 6.) Ge re dumela gore Jehofa o  gona, ke moo re tlago go kgodišega gore o tla dira tšohle tšeo a re holofeditšego tšona. A re boneng ditsela tseo re ka di dirišago go matlafatša tswalano ya rena le Jehofa le go dira gore kholofelo ya rena e tie.

13. Re ka batamela kgauswi le Modimo bjang?

¹³ Rapela Jehofa, gomme o bale Lentšu la gagwe. Le ge re sa kgone go bona Jehofa, re ka batamela kgauswi le yena. Re ka boledišana le yena ka thapelo, re kgodišegile gore o tla re kwa. (Jer. 29:11, 12) Re ka theetša Jehofa ka go bala Lentšu la gagwe le go naganišiša ka lona. Ge re bala ka bao Jehofa a ilego a ba hlokomela ka ge ba be ba mmotegela, kholofelo ya rena e tla tšwela pele e gola. Dilo tšohle tšeo di lego ka Lentšung la Modimo di ile tša “ngwalelwa go re ruta, gore ka kgotlelelo ya rena le ka khomotšo e tšwago Mangwalong re be le kholofelo.”—Baroma 15:4.

14. Ke ka baka la’ng re swanetše go nagana ka seo Jehofa a se diretšego ba bangwe?

¹⁴ Naganišiša kamoo Jehofa a ilego a phethagatša dikholofetšo tša gagwe. Nagana ka seo Modimo a ilego a se direla Aborahama le Sara. Ba be ba tšofetše gomme ba sa kgone go ba le bana. Lega go le bjalo, ba ile ba ba le ngwana, feela bjalo ka ge Modimo a ba holofeditše. (Gen. 18:10) Aborahama o ile a arabela bjang? Beibele e re: “O ile a ba le tumelo, gore e tla ba tatago ditšhaba tše dintši.” (Baroma 4:18) Le ge go ya ka pono ya batho se se be se ka se kgonagale, Aborahama o be a kgodišegile gore Jehofa o tla phethagatša kholofetšo ya gagwe. Monna yoo yo a botegago ga se a ka a nyamišwa. (Baroma 4:19-21) Dipego tše di re ruta gore ka mehla re ka ithekga ka Jehofa gore a phethagatše dikholofetšo tša gagwe, le ge e ba go ka bonagala e ka seo ga se kgonagale.

15. Ke ka baka la’ng re swanetše go naganišiša ka dilo tšeo Modimo a re diretšego tšona?

¹⁵ Nagana ka seo Jehofa a go diretšego  sona. Nagana kamoo o hotšwego ke go phethagatšwa ga dikholofetšo tšeo di lego ka Lentšung la Modimo. Ka mohlala, Jesu o holofeditše gore Tatagwe o tla re nea dilo tšeo re di hlokago bophelong. (Mat. 6:32, 33) Jesu o go kgonthišeditše le gore Jehofa o tla go nea moya o mokgethwa ge o mo kgopela ona. (Luka 11:13) Jehofa o phethagaditše dikholofetšo tšeo. O ka nagana le ka dikholofetšo tšeo a go diretšego tšona. Ka mohlala, o holofetša go go lebalela, go go homotša, le go go nea tšeo o di hlokago gore o dule o le kgauswi le yena. (Mat. 6:14; 24:45; 2 Bakor. 1:3) Ge o naganišiša ka dilo tšeo Modimo a šetšego a go diretše tšona, o tla tiiša kholofelo ya gago ka ditshepišo tša nakong e tlago.

16. Ke ka baka la’ng kholofelo e le mpho e bohlokwa?

¹⁶ Kholofelo ya rena ya bophelo bjo bo sa felego ke mpho e bohlokwa yeo Modimo a re neilego yona. Re lebeletše pele bokamosong bjo bo kgahlišago bjo re kgonthišeditšwego gore bo tla ba gona. Bo šoma bjalo ka tshetledi ya rena, go re thuša gore re kgone go kgotlelela mathata, tlaišo, le go lebeletšana le lehu. Bo šoma bjalo ka kefa, yeo e šireletšago menagano ya rena gore re kgone go gana se sebe le go dira se sebotse. Kholofelo ya rena yeo e theilwego Beibeleng e re thuša go tseba Modimo gakaone le go re bontšha bogolo bja lerato la gagwe go rena. Re holega kudu ka go dira gore kholofelo ya rena e be e tiilego.

17. Ke ka baka la’ng kholofelo ya rena e dira gore re thabe?

¹⁷ Lengwalong leo moapostola Paulo a le ngwaletšego Baroma, o ba kgothaditše ka gore: “Thabang kholofelong”. (Baroma 12:12) Paulo o be a ka kgona go thaba ka gobane o be a kgodišegile gore ge a ka dula a botega, o be a tla hwetša bophelo bjo bo sa felego legodimong. Le rena re ka thaba kholofelong ya rena ka gobane re kgodišegile gore Jehofa o tla phethagatša dikholofetšo tša gagwe. Mopsalme o ngwadile gore: “Go thaba yo . . . a holofetšego Jehofa Modimo wa gagwe, . . . yo a dulago a rereša go iša mehleng ya neng le neng.”—Ps. 146:5, 6.