STEFANO o ile a lebeletšana le sehlopha sa banna ba sehlogo. Ka ge sehlopha se e be le ditho tša Sanhedrine, e lego kgorokgolo ya tsheko kua Isiraele, baahlodi bao ba 71 ba be ba le gare ga banna ba matla setšhabeng. Ba ile ba kgobokanywa ke Moperisita yo a Phakgamego e lego Kayafa, yo a bego a eteletše pele kgoro yeo dikgwedi tše sego kae pele ga moo, ge Jesu a be a ahlolelwa lehu. (Mat. 26:57, 59; Dit. 6:8-12) Ge ba be ba dutše ba tliša batho bao e bego e le dihlatse tša maaka ka o tee ka o tee, ba ile ba lemoga selo se se makatšago ka Stefano. Ba ile ba bona sefahlego sa gagwe se ‘le bjalo ka sa morongwa.’​—Dit. 6:13-15.

Go tlile bjang gore Stefano a se tšhoge selo e bile a no ikhomolela le ge a be a le maemong ao a tšhošago ka tsela ye? Pele a ka išwa go Sanhedrine, Stefano o be a swaregile kudu ka modiro wa gagwe wa go bolela ditaba tše dibotse a matlafatšwa ke moya o mokgethwa wa Modimo. (Dit. 6:3-7) Ge a be a le tshekong, wona moya woo o ile wa šoma go yena, wa mo homotša le go mo gopotša dilo tšeo a bego a swanetše go di bolela. (Joh. 14:16) Go etša ge Ditiro kgaolo 7 e bolela, ge Stefano a be a dutše a ikemelela ka sebete, moya o mokgethwa o ile wa mo gopotša Mangwalo a Seheberu ao e ka bago a 20 goba go feta moo. (Joh. 14:26) Eupša tumelo ya Stefano e ile ya matlafala le go feta ge a be a bona Jesu ponong a eme ka letsogong le letona la Modimo.​—Dit. 7:54-56, 59, 60.

Le rena ka letšatši le lengwe re ka tšhošetšwa goba ra tlaišwa. (Joh. 15:20) Ge re iphepa ka Lentšu la Modimo letšatši le letšatši e bile re dula re swaregile ka go bolela ditaba tše dibotse, re dumelela moya o mokgethwa o šoma go rena. Le gona re tlo hwetša matla a go kgotlelela kganetšo re dutše re na le khutšo ya monagano.​—1 Pet. 4:12-14.