1, 2. Ge pono ya Sakaria ya bošupa e fihla mafelelong, Bajuda ba be ba le boemong bofe kua Jerusalema?

GE PONO ya bošupa ya Sakaria e fihla mafelelong, moporofeta yo o ba le dilo tše dintši tšeo a swanetšego go nagana ka tšona. Jehofa o be a mo holofeditše gore o tlo otla batho bao ba sa botegego ka baka la ditiro tša bona tše mpe. Kholofetšo ye, e swanetše go ba e ile ya matlafatša Sakaria. Lega go le bjalo, mo nakong ye, go be go se gwa tšwa go fetoga selo. Go be go sa dutše go na le batho bao ba sa botegego le bao ba dirago dilo tše mpe. Le gona tempele ya Jerusalema yeo e bego e agwa lefsa e be e sa le kgole le go fela. Bajuda ba ile ba tlogela modiro woo Modimo a bego a ba neile wona. Go tlile bjang gore ba o tlogele ka pela ka tsela ye? Na ba be ba boetše nageng ya gabo bona feela gore ba yo itirela dilo tša bona?

² Sakaria o be a tseba gore Bajuda bao ba bego ba boetše Jerusalema e be e le banna le basadi ba tumelo. E be e le “bao moya wa Modimo wa therešo o bego o ba tutueditše” go tlogela magae a bona le dikgwebo tša bona tšeo di bego di ba dira gore ba ikwe ba šireletšegile. (Esera 1:2, 3, 5) Ba ile ba tlogela naga yeo ba bego ba e tlwaetše e le gore ba ye lefelong leo ba bantši ba bona ba sa kago ba le bona.  Ge nkabe go agwa lefsa ga tempele ya Jehofa go be go se bohlokwa go bona, nkabe ba se ba tšea leeto leo le boima la dikhilomithara tše e ka bago tše 1 600 ba feta lešokeng le le boifišago.

3, 4. Bajuda bao ba bego ba boa bothopša ba ile ba lebeletšana le mathata afe?

³ Leeto leo le ka ba le be le le bjang? Ga go pelaelo gore ge Bajuda ba dutše ba le leetong, ba be ba fetša diiri tše dintši ba nagana ka legae la bona le lefsa. Ba be ba kwele kamoo motse wa Jerusalema o kilego wa ba botse ka gona. Batho bao ba godilego ba be ba bone kamoo tempele ya pele e bego e kgahliša ka gona. (Esera 3:12) Ge nkabe o be o sepela le bona, nkabe o ile wa ikwa bjang ge o be o thoma go bona Jerusalema, yeo e bego e tla ba legae la gago le lefsa? Na o be o tla nyamišwa ke go bona meago yeo e bego e senyegile, e bile go metše sekgwa go yona? Na o be o tla bapiša maboto a magolo a Babilona le maboto a Jerusalema ao a welego, ao a nago le mašoba, moo dikgoro di kilego tša ba gona le moo bahlapetši ba kilego ba ema gona? Mohlomongwe dilo tšeo di be di ka go fetša matla, eupša Bajuda ba ile ba ba le sebete. Ba be ba šetše ba bone ge Jehofa a ba phološa leetong la bona ka moka la go boela gae. Selo sa pele seo ba ilego ba se dira ge ba fihla ke go aga aletare moo go bego go na le tempele gomme ba thoma go neela Jehofa dihlabelo letšatši le letšatši. (Esera 3:1, 2) Ka ge ba be ba thabile kudu ge ba sa tšwa go fihla, go be go bonala go se na selo seo se ka ba fetšago matla.

⁴ Go tlaleletša mošomong wa go aga tempele, Baisiraele ba ile ba swanelwa ke go aga lefsa metse ya bona. Ba be ba swanetše go lokiša dintlo tša bona, ba leme mašemo le go fepa bana ba bona. (Esera 2:70) Mošomo woo o be o bonagala o le boima. Go se go e kae ba ile ba thoma go ganetšwa o šoro. Le ge mathomong ba ile ba emeletšana le kganetšo yeo, go ganetšwa ka mengwaga e 15 go ile gwa ba dira gore ba feleletše ba fedile matla. (Esera 4:1-4) Ba ile ba lebana le bothata bjo bongwe ka ngwaga wa bo-522 B.C.E., ge kgoši ya Peresia e be e laela gore moago woo o se sa agwa kua Jerusalema. Go ile gwa bonala eka motse woo o be ka se tsoge o feditšwe go agwa.​—Esera 4:21-24.

5. Jehofa o ile a dira’ng ge a bona batho ba gagwe ba tlogetše go mo agela tempele?

⁵ Jehofa o be a tseba seo batho ba gagwe ba bego ba se hloka. O ile a bontšha Sakaria pono ya mafelelo go kgonthišetša Bajuda gore o a ba rata le gore o leboga dilo tšohle tšeo ba di dirilego gomme a ba kgonthišetša gore o tla ba šireletša ge ba ka tšwetša pele mošomo wa go aga tempele. Ge Jehofa a be a bolela mabapi le go agwa lefsa ga tempele, o itše: “Go tla ba bjalo—ge e ba ruri le theetša lentšu la Jehofa Modimo wa lena.”​—Sak. 6:15.

6. (a) Pono ya Sakaria ya seswai e thoma bjang? (Bona seswantšho seo se lego mathomong a sehlogo.) (b) Ke ka baka la’ng dipere tše di fapana ka mebala?

⁶ Mohlomongwe pono ya mafelelo ya dipono tše seswai tša Sakaria e ka ba yeo e matlafatšago tumelo le go feta. (Bala Sakaria 6:1-3.) Nagana ka tiragalo ye: “Magareng a dithaba tše pedi tša koporo” go tšwa dikoloi tše nne tšeo di gogwago ke dipere tšeo di bonagalago di swanelega go ya ntweng. Dipere tšeo di gogago dikoloi tše, di fapana ka mebala. Seo se be se thuša go fapantšha banamedi ba tšona. Sakaria o ile a botšiša gore: “Tše ke eng?” (Sak. 6:4) Le rena re nyaka go tseba karabo ya potšišo yeo, ka ge pono ye e re ama.

7, 8. (a) Dithaba tše pedi di swantšhetša’ng? (b) Ke ka baka la’ng dithaba tše di dirilwe ka koporo?

⁷ Ka dinako tše dingwe ge Beibele e bolela ka dithaba e swantšhetša mebušo. Dithaba tšeo go bolelwago ka tšona pegong ya Sakaria di swana le dithaba tše pedi tšeo go bolelwago ka tšona boporofeteng bja Daniele. Thaba e nngwe e swantšhetša pušo ya Jehofa ya ka mo go sa felego,  mola thaba e nngwe e swantšhetša Mmušo wa Mesia woo go tla bego go buša Jesu. (Dan. 2:35, 45) Ga e sa le go tloga ka 1914 ge Jesu a bewa sedulong sa bogoši, dithaba tšeo di be di dutše di le gona, e bile di kgathile tema e bohlokwa gore thato ya Modimo e tle e direge mo lefaseng.

⁸ Ke ka baka la’ng dithaba tše di dirilwe ka koporo? Go swana le gauta, koporo le yona e tšeelwa godimo kudu. Jehofa o ile a laela gore koporo ye, yeo e phadimago e dirišwe ge go be go agwa taberenakele gomme ka morago e dirišwe ge go be go agwa tempele kua Jerusalema. (Ek. 27:1-3; 1 Dikg. 7:13-16) Ka gona, re ka phetha ka gore koporo yeo e dirišitšwego dithabeng tše pedi tša seswantšhetšo e re gopotša gore Jehofa ke yena a swanelegago go buša legohle le gore mmušo wa Mesia o tlo tlišetša batho tšhireletšego le ditšhegofatšo.

9. Banamedi ba dikoloi ke bomang, gona ba abetšwe go dira’ng?

⁹ Ga bjale a re boleleng ka dikoloi tšela tša ntwa. Dikoloi tše le banamedi ba tšona di swantšhetša’ng? Banamedi ba dikoloi tše ke barongwa, mohlomongwe dihlopha tše di fapafapanego tša barongwa. (Bala Sakaria 6:5-8.) Ka morago ga gore ba eme “pele ga Morena wa lefase ka moka,” go na le modiro wo ba swanetšego go yo o phetha. Modiro woo ke ofe? Jehofa o ba romela mafelong a itšego go yo šireletša bahlanka ba gagwe, kudukudu bao ba tšwago “nageng ya ka leboa,” e lego Babilona. Jehofa o be a tla kgonthišetša gore Bababilona ga ba thope batho ba gagwe gape. Ruri se se swanetše go ba se ile sa kgothatša batho bao ba bego ba aga tempele mehleng ya Sakaria! Ga bjale ba be ba sa swanela go tšhošwa ke seo manaba a bona a bego a ka ba dira sona.

10. Boporofeta bja Sakaria bja mabapi le dikoloi tša ntwa le banamedi ba tšona bo re nea kgodišego efe?

¹⁰ Go swana le mehleng ya Sakaria, Jehofa wa madira o sa dutše a diriša barongwa go šireletša le go matlafatša batho ba gagwe. (Mal. 3:6; Baheb. 1:7, 14) Ga e sa le go tloga ka 1919, ge batho ba Modimo ba lokollwa bothopšeng bja seswantšhetšo bja Babilona o Mogolo, borapedi bja therešo bo ile bja tšwela pele bo gola go sa šetšwe kganetšo. (Kut. 18:4) Ka ge re šireleditšwe ke barongwa, ga se ra swanela go boifa gore mokgatlo wa Jehofa o ka tla wa thopša ke bodumedi bja maaka. (Ps. 34:7) Go e na le moo, re ka kgodišega gore bahlanka ba Modimo lefaseng ka moka ba tla tšwela pele ba swaregile tirelong ya gagwe ba thabile. Ge re nagana ka pono ya Sakaria, ga re belaele gore dithaba tše tše pedi di re šireleditše.

11. Ke ka baka la’ng re sa swanela go boifa gore batho ba Modimo ba tlo hlaselwa nakong e tlago?

¹¹ Kgauswinyane mebušo ya dipolotiki ya lefase le la Sathane e tlo ipopa ngatana e tee gore e fediše batho ba Modimo. (Hesek. 38:2, 10-12; Dan. 11:40, 44, 45; Kut. 19:19) Boporofeta bja Hesekiele bo hlalosa madira a mebušo ya dipolotiki a etša maru a khupeditšego naga, e bile a nametše dipere a galefile go tlo re tsogela matla. (Hesek. 38:15, 16) * Na re swanetše go a boifa? Le gatee! Re na le madira a Jehofa a barongwa ao a re thekgago. Nakong yeo e thata ya masetlapelo a magolo ao a sa tlago, madira ao a Jehofa a tlo re šireletša gomme a fediša bao ba nyatšago gore Jehofa ke yena a swanelegago go buša. (2 Bathes. 1:7, 8) Ruri leo e tlo ba letšatši le legolo! Eupša ke mang yo a etelelago pele madira a Jehofa a legodimong?

12, 13. (a) Sakaria o laelwa gore a dire’ng? (b) Hlalosa kamoo boporofeta bo bontšhago gore Lehlogedi ke Jesu Kriste.

¹² Sakaria o bone dipono tše seswai a nnoši. Ga bjale o dira selo seo se bego se tla kgothatša bao ba bego ba aga lefsa tempele ya Modimo. (Bala Sakaria 6:9-12.) Sakaria o laelwa gore a tšee meneelo ya silifera le gauta go Heledai, Tobija le Jedaya—bao ba bego ba sa tšwa go boa bothopša Babilona—gore a dire “mphapahlogo o mogolo.” (Sak. 6:11) Na Sakaria o botšwa gore a rweše Mmuši Serubabele mphapahlogo, yoo e lego wa leloko la Juda e bile e le setlogolo sa Dafida? Aowa. Batho bao ba bego ba bogetše ba swanetše go ba ba ile ba makala ge ba bona Sakaria a rweša Joshua yo e lego Moperisita yo a Phagamego mphapahlogo woo.

¹³ Na taba ya gore Moperisita yo Phagamego Joshua o rwešitšwe mphapahlogo e be e ra gore ke kgoši? Aowa, Joshua o be a sa tšwe lešikeng la bogoši la Dafida, ka gona o be a sa swanelege go ba kgoši. Go rwešwa ga gagwe mphapahlogo e be e le boporofeta bjo bo bego bo bontšha seo se bego se tlo diragalela kgoši yeo e sa hwego yeo e lego moperisita. Moperisita yo a phagamego yoo a dirwago kgoši o bitšwa Lehlogedi. Mangwalo a bontšha gabotse gore Lehlogedi leo ke Jesu Kriste.​—Jes. 11:1; Mat. 2:23.

14. Ka ge Jesu e le Kgoši le Moperisita yo a Phagamego, o phetha mošomo ofe?

¹⁴ Ka ge Jesu e le Kgoši e bile e le Moperisita yo a Phagamego, o etelela pele madira a Jehofa a legodimong. Ka baka leo, o šoma ka thata gore batho ba Modimo ba dule ba šireletšegile gaešita le ge ba phela le batho bao ba ba swarago makgwakgwa. (Jer. 23:5, 6) Kgauswinyane, Kriste o tlo etelela pele go fenya ditšhaba e le ge a thekga tshwanelo ya Jehofa ya go buša e bile a lwela batho ba Gagwe. (Kut. 17:12-14; 19:11, 14, 15) Lega go le bjalo, pele ga ge Lehlogedi a ka ahlola batho, o swanetše go phetha mošomo o mogolo.

15, 16. (a) Mehleng ya rena, ke modiro ofe wa go tsošološwa le go hlwekišwa woo o fihleletšwego, gona o dirilwe ke mang? (b) Go tlo direga’ng mafelelong a Pušo ya Kriste ya Mengwaga e Sekete?

¹⁵ Go tlaleletša mošomong woo Jesu a o neilwego wa go ba Kgoši le Moperisita, Jesu o be a tla “aga tempele ya Jehofa.” (Bala Sakaria 6:13.) Mehleng ya rena, mošomo wa Jesu wa go aga o be o akaretša go ntšha barapedi ba therešo go Babilona o Mogolo le go tsošološa phuthego ya Bokriste ka 1919. Le gona o ile a kgetha “mohlanka yo a botegago le wa temogo” gore a etelele pele modiro wa rena wa mo lefaseng, wo e lego karolo ya tempele e kgolo ya moya. (Mat. 24:45) Le gona Jesu o be a dutše a swaregile ka go hlwekiša batho ba Modimo le go ba thuša gore ba hlankele Modimo ka tsela yeo e mo kgahlago.​—Mal. 3:1-3.

¹⁶ Nakong ya Pušo ya Mengwaga e Sekete, Jesu le ba 144 000 bao e lego dikgoši le baperisita ba tlo dira gore batho bao ba botegago ba phethagale. Ge ba feditše go dira bjalo, lefaseng leo le tla bego le hlwekišitšwe, go tlo šala feela barapedi ba therešo ba Modimo. Mafelelong, borapedi bja therešo bo tla be bo tsošološitšwe ka mo go feletšego!

17. Jehofa o ile a nea Bajuda kgonthišetšo efe, gona e ile ya ba kgoma bjang?

¹⁷ Molaetša wa Sakaria o ile wa kgoma bjang Bajuda ba mehleng ya gagwe? Jehofa o be a ba kgonthišeditše gore o tlo ba šireletša ge ba phetha mošomo wa bona. Kgonthišetšo ya gagwe ya gore tempele e tlo agwa e swanetše go ba e ile ya ba nea kholofelo ka ge ba be ba lapile. Eupša batho ba, bao ba sego kae ba be ba tla kgona bjang go phetha mošomo wo o mogolo ka tsela ye? Sakaria o ile a ba botša mantšu ao a ilego a dira gore ba se sa boifa le go belaela. Go tlaleletša go batho ba botegago ba bjalo ka Heledai, Tobija le Jedaya, Jehofa o bolela ka ba bangwe ba bantši  bao ba bego “ba tla tla ba tlo aga tempele ya Jehofa.” (Bala Sakaria 6:15.) Ka ge Bajuda ba be ba kgodišegile gore Jehofa o be a ba thekga, ba ile ba boela mošomong ka pelapela gomme ba tšwetša pele mošomo wa bona wa go aga tempele go sa šetšwe thibelo ya kgoši ya Peresia. Thibelo yeo e be e le bjalo ka thaba, eupša Jehofa o ile a e tloša gomme tempele ya fetšwa go agwa ka 515 B.C.E. (Esera 6:22; Sak. 4:6, 7) Lega go le bjalo, mantšu ao a Jehofa a hlalosa ka tsela e kgolo dilo tše di diregago mehleng ya rena.

18. Sakaria 6:15 e phethagala bjang mehleng ya rena?

¹⁸ Lehono, batho ba dimilione ba tla borapeding bja therešo, le gona ka go rata ba neela ka ‘dilo tša bona tše bohlokwa,’ tšeo di akaretšago nako ya bona, matla a bona le dilo tšeo ba nago le tšona go thekga tempele ya Jehofa e kgolo ya moya. (Die. 3:9) Re ka kgodišega bjang gore Jehofa o tšeela godimo maiteko a rena a go mo thekga ka potego? Gopola gore Heledai, Tobija le Jedaya ba ile ba tliša gauta ya bona le silifera gore Sakaria a kgone go dira mphapahlogo. Ke moka mphapahlogo woo o ile wa dula “e le segopotšo,” sa seo ba ilego ba neela ka sona bakeng sa go thekga borapedi bja therešo. (Sak. 6:14) Ka mo go swanago, Jehofa a ka se tsoge a lebetše mošomo woo re mo direlago ona le lerato leo re mmontšhago lona. (Baheb. 6:10) O tlo dula a di gopola ka mo go sa felego.

19. Dipono tša Sakaria di swanetše go re kgoma bjang mehleng ye ya rena?

¹⁹ Dilo ka moka tšeo di fihleletšwego bakeng sa borapedi bja therešo mehleng ye ya bofelo ke bohlatse bja gore Jehofa o a re šegofatša le gore Kriste ke yena a re eteletšego pele. Re karolo ya mokgatlo wo o ka se tsogego o wele, wo o šireletšegilego le wo o tlago go ba gona ka mo go sa felego. Morero wa Jehofa wa mabapi le borapedi bja therešo o tla phethagala. Thabela seo o se dirago ka mokgatlong wa Jehofa, o be o ‘theetše lentšu la Jehofa Modimo wa gago.’ Ke moka o tla dula o šireleditšwe ke Kgoši le Moperisita yo a Phagamego le banamedi ba legodimong ba dikoloi tša ntwa. Dira sohle seo o ka se kgonago go thekga borapedi bja therešo. Ge o dira bjalo, o ka kgodišega gore Jehofa wa madira o tla go šireletša nakong ye, yeo Sathane a sa dutšego a buša​—le ka mo go sa felego!