JOSEFA WA ARIMATHEA o be a bona okare ga a na sebete sa go yo boledišana le mmušiši wa Moroma e lego Pontio Pilato. Mmušiši yo o be a tsebja ka go ba le hlogo e thata. Lega go le bjalo, e le gore Jesu a bolokwe ka seriti, go be go nyakega motho yo a ka yago go kgopela Pilato gore a lokolle setopo sa Jesu. Eupša sa go makatša ke gore poledišano ya Josefa le Pilato, e be e sa tšhoše go etša ka mokgwa woo a ka bego a naganne ka wona. Ka morago ga gore Pilato a kgonthišetše go tona ya madira gore Jesu o be a hwile, o ile a mo dumelela gore a tšee setopo sa Jesu. Le ge Josefa a be a sa kwele bohloko, o ile a kitimela moo Jesu a bego a bolaetšwe gona.​—Mar. 15:42-45.

• Josefa yo wa Arimathea, e be e le mang?

• O be a tswalana bjang le Jesu?

• Le gona ke ka baka la’ng o swanetše go tseba ka kanegelo ya gagwe?

Ebangedi ya Mareka e bitša Josefa gore ke “setho sa Lekgotla seo se nago le botumo bjo bobotse.” Tabeng ye, Lekgotla leo go bolelwago ka lona e ka ba feela la Sanhedrine, e lego kgorokgolo ya Bajuda le sehlopha se segolo sa bolaodi. (Mar. 15:1, 43) Ka gona Josefa e be e le yo mongwe wa baetapele, ke ka baka leo a ilego a kgona go boledišana le mmušiši wa Moroma. Le gona ga go makatše gore Josefa o be a humile.​—Mat. 27:57.

Sehlopha sa Sanhedrine se be se hloile Jesu. Sehlopha se se ile sa kwana gore se yo mmolaya. Eupša Josefa yena o be a bitšwa “monna yo a lokilego le wa toka.” (Luka 23:50) Go fapana le bantši ba badirišani ba gagwe ba sehlopha se sa Sanhedrine, yena o be a tshepagala, a itshwere gabotse e bile a dira seo a ka se kgonago go latela melao ya Modimo. Le gona Beibele e re o be a “letetše Mmušo wa Modimo,” e lego seo se hlalosago lebaka leo a ilego a ba yo mongwe wa barutiwa ba Jesu. (Mar. 15:43; Mat. 27:57) Go ka direga gore o ile a rata molaetša wa Jesu ka gobane a be a rata therešo le toka.

Johane 19:38 e re Josefa e be ‘e le morutiwa wa Jesu wa ka sephiring ka gobane o be a boifa Bajuda.’ Josefa o be a boifa eng? O be a tseba gore Bajuda ba be ba hloile Jesu le gore motho yo mongwe le yo mongwe yo a dumelago go yena o be a rakwa sinagogeng. (Joh. 7:45-49; 9:22) Motho yo a bego a rakwa sinagogeng batho ba be ba mo hloya, ba sa nyake go phela le yena e bile ba mo swara bjalo ka ge eka ga se Mojuda. Ke ka baka leo Josefa a ilego a boifa go bolela phatlalatša gore o dumela go Jesu. Ge nkabe a dire bjalo o be a tla lahlegelwa ke maemo le seriti.

Josefa e be e se yena a nnoši a lego bothateng bjo. Johane 12:42 e re “ba bantši gaešita le babuši ge e le gabotse ba ile ba dumela go [Jesu], eupša ka baka la Bafarisei ba be ba ka se bolele gore ba dumela go yena, e le gore ba se rakwe sinagogeng.” Motho yo mongwe yo a bego a le boemong bja go swana le bja Josefa e be e le Nikodemo, yoo le yena e bego e le setho sa Sanhedrine.​—Joh. 3:1-10; 7:50-52.

Le ge Josefa e be e le morutiwa wa Jesu, ga se a ka a ipolela phatlalatša. Bjo e be e le bothata bjo bogolo, kudukudu go ya ka seo Jesu a ilego a se bolela, ge a be a re: “Yo mongwe le yo mongwe yo a ipolelago pele ga batho gore o boteeng le nna, le nna ke tla ipolela gore ke boteeng le yena pele ga Tate yo a lego magodimong.” (Mat. 10:32, 33) Josefa ga se a ka a latola Jesu le gona ga se a ka a ba le sebete sa go bolela gore o boteeng le yena. Na le wena o dira bjalo?

Josefa o be a lokile ka gobane Beibele e re ga se a ka a thekga lekgotla la Sanhedrine ge le be le logela Jesu maanomabe. (Luka 23:51) Mohlomongwe o be a se gona ge Jesu a be a sekišwa, go etša ge ba bangwe ba nagana bjalo. Go sa šetšwe gore boemo e be e le bofe, Josefa o  swanetše go ba a ile a nyamišwa ke go bona go hloka toka moo go diregilego​—eupša go be go se na seo a ka se dirago go bo thibela!

Ka morago ga gore Jesu a bolawe, go bonagala Josefa a ile a beta pelo gomme a thekga balatedi ba Jesu. Seo se bonagala mantšung ao a lego go Mareka 15:43, ao a rego: “A beta pelo a ya pele ga Pilato a kgopela setopo sa Jesu.”

Go bonagala Josefa a be a le gona ge Jesu a be a ehwa. Ge e le gabotse, o tsebile gore Jesu o tlo bolawa le pele ga ge Pilato a ka tseba. Ka gona, ge Josefa a be a kgopela setopo sa Jesu, Pilato o ile a ‘ipotšiša ge e ba [Jesu] a šetše a hwile.’ (Mar. 15:44) Ge e ba Josefa a ile a bona ge Jesu a ehwa ga bohloko koteng, na seo se ka ba se ile sa mo tutueletša gore a itlhahlobe gomme mafelelong a emele therešo? Go ka direga. Eupša mo le bakeng le, Josefa o tutueletšega go tšea kgato. Ga bjale ga e sa le morutiwa wa ka sephiring.

Molao wa Bajuda o be o re batho bao ba ahloletšwego lehu ba swanetše go bolokwa pele letšatši le sobela. (Doit. 21:22, 23) Go ya ka Baroma, ditopo tša disenyi di be di swanetše go tlogelwa di fegilwe koteng gore di bole, goba di lahlelwe mabitleng a batho ba tlasana, eupša Josefa o be a sa nyake gore seo se diragalele Jesu. Josefa o be a na le lebitla le lefsa leo le epilwego letlapeng kgauswi le moo Jesu a bolaetšwego gona. Lebitleng leo go be go se gwa tšwa go bolokwa motho, se se bontšha gore Josefa o be a sa tšwa go hudugela Jerusalema a  etšwa Arimathea *, le gore mohlomongwe o be a naganne go bolokela batho ba gabo moo. (Luka 23:53; Joh. 19:41) Taba ya gore Josefa o boloketše Jesu lebitleng leo yena a bego a tlo bolokelwa go lona e bontšha gore o be a rata go nea, le gona e ile ya phethagatša boporofeta bja Beibele bjo bo rego Mesia o tla bolokwa “le bahumi.”​—Jes. 53:5, 8, 9.

Diebangedi tše nne ka moka di bolela gore ka morago ga gore setopo sa Jesu se tlošwe koteng, Josefa o ile a se phuthela ka lešela le lebotse la leokodi ke moka a se boloka ka lebitleng la gagwe. (Mat. 27:59-61; Mar. 15:46, 47; Luka 23:53, 55; Joh. 19:38-40) Go batho bao ba ilego ba thuša Josefa, ke Nikodemo feela yo a bolelwago ka leina e bile ke yena a tlilego le dinoko tša go tlotša setopo. Go ka direga gore Josefa le Nikodemo ga se bona ba kukilego setopo sa Jesu, kudukudu ka ge e be e le batho ba go hlomphega setšhabeng. Mohlomongwe ba dirišitše bahlanka ba bona go kuka setopo seo le go se boloka. Le ge ba ka ba ba thušitšwe ke bahlanka ba bona go dira mošomo wo, selo seo ba se dirilego se be se le bohlokwa kudu. Motho le ge e le ofe yo a bego a swara setopo o be a lebelelwa a se a hlweka ka matšatši šupago e bile selo se sengwe le se sengwe seo a bego a se kgoma se be se lebelelwa se se sa hlweka. (Num. 19:11; Hag. 2:13) Ge motho a be a se kgomile, o be a swanetše go se be kgauswi le batho bekeng ka moka ya Paseka gomme a se be gona ge e ketekwa. (Num. 9:6) Ge Josefa a be a rulaganya go boloka Jesu, o be a ipea kotsing ya go nyatšwa ke batho ba maemo a go swana le a gagwe. Lega go le bjalo, mo nakong ye o be a ikemišeditše go lebeletšana le ditlamorago tša go boloka Jesu ka seriti le go bontšha phatlalatša gore e be e le morutiwa wa gagwe.

Ka morago ga gore Jesu a bolokwe, Beibele ga e sa bolela ka Josefa wa Arimathia, e lego seo se dirago gore re ipotšiše gore: Go diregile’ng ka yena? Taba ke gore ga re tsebe. Eupša go ya ka seo re sa tšwago go se ahlaahla, go na le kgonagalo e kgolo ya gore mafelelong Josefa o ile a bontšha batho gore ke molatedi wa Kriste. Go feta tšohle, nakong ya ge maemo a le thata, tumelo ya gagwe e ile ya gola gomme a bontšha sebete go ena le gore a boife. Seo se be se bontšha gore o gatela pele.

Kanegelo ye e dira gore re ipotšiše potšišo ye e bohlokwa: Na maemo, mošomo, mahumo, go rata lapa goba gaešita le tokologo yeo re nago le yona, di tla pele maphelong a rena go feta Jehofa?