KE BELEGWE ka 1923 Hemsworth, e lego toropo ya Yorkshire, kua Engelane. Ke be ke na le buti o tee feela, e lego Bob. Ge ke be ke na le mengwaga e ka bago e senyane, tate, yoo a bego a hloile boikaketši bjo bo lego ka dikerekeng, o ile a hwetša dipuku tše dingwe tšeo di bego di utolla maaka ao a rutwago ka dikerekeng. O ile a kgahlwa ke seo a bego a se bala ka dipukung tšeo. Ka morago ga mengwaga e sego kae, Bob Atkinson o ile a re etela gomme a re ralokela rekhoto ya e nngwe ya dipolelo tša Ngwanabo rena Rutherford ka keramafomo. Re ile ra lemoga gore polelo yeo e be e gatišitšwe ke sehlopha seo se bego se gatiša dipuku tšela re bego re rata go di bala! Batswadi ba ka ba ile ba kgopela Ngwanabo rena Atkinson gore a je le rena bošego bjo bongwe le bjo bongwe, e le gore a re arabele dipotšišo tša rena tše dintši tša Beibele. Re ile ra laletšwa go ya dibokeng lapeng la ngwanabo rena yo mongwe yoo a bego a sa dule kgole le rena. Re ile ra dumela le semetseng. Ka morago go ile gwa thongwa phuthego e nyenyane kua Hemsworth. Go se go ye kae, ke ge re šetše re amogela bahlanka ba mafelo lapeng la rena, (ga bjale ba bitšwa balebeledi ba tikologo) e bile re laletša babulamadibogo bao ba dulago kgauswi gore ba tle ba je le rena. Ruri go gwerana le bona go ntirile gore ke rate tirelo ya nako e tletšego.

Re be re butše kgwebo ya go dira fenetšhara le go e rekiša, eupša tate o ile a re go buti: “Ge e ba o nyaka go yo bula madibogo, re tlo tswalela kgwebo ye.” Bob o ile a dumela, gomme a tloga gae gore a yo bula madibogo a na le mengwaga e 21. Ka morago ga mengwaga e mebedi, ge ke be ke na le mengwaga e 16, ke ile ka kgethwa gore ke be mmulamadibogo. Gantši gare ga beke ke be ke šoma ke nnoši ke diriša karata ya go nea bohlatse le keramafomo, gomme mafelobekeng go na le bao ke šomago le bona. Eupša Jehofa o ile a ntšhegofatša ka go ba le motho yo ke ilego ka ithuta Beibele le yena yo a ilego a gatela pele go fihlela a kolobetšwa. Mafelelong ditho tše dintši tša gabo e ile ya ba Dihlatse tša Jehofa. Ngwageng o latetšego, ke ile ka kgethwa go ba mmulamadibogo yo a kgethegilego gomme ka šoma le Mary Henshall. Re ile ra romelwa tšhemong yeo e sa abiwago seleteng sa Cheshire.

Ka nako yeo, Ntwa ya Bobedi ya Lefase e be e kgatlampana, gomme basadi ba ile ba laelwa gore ba dire mošomo le ge e le ofe wa go thekga ntwa. Ka ge Badiredi ba nako e tletšego ba dikereke tše dingwe ba be ba sa gapeletšwe go ya ntweng, le rena re ile ra nagana gore ka ge re le babulamadibogo ba kgethegilego, re be re ka se  gapeletšwe go ya ntweng. Eupša dikgoro tša tsheko di ile tša re gapeletša go ya ntweng, ka ge ke be ke gana go ya ntweng, ke ile ka ahlolelwa matšatši a 31 kgolegong. Ngwageng o latetšego ge ke be ke na le mengwaga e 19, ke ile ka ingwadiša go se ye bošoleng ka ge letswalo la ka le be le sa ntumelele. Balaodi ba mmušo ba ile ba nkiša dikgorong tše pedi tša tsheko, eupša dikgoro tšeo ga se tša ka tša mpona molato. Maemong a ka moka, ke be ke tseba gore Jehofa o nthuša ka moya wa gagwe o mokgethwa, o ntshwere ka letsogo la gagwe le go mmatlafatša.​—Jes. 41:10, 13.

Ka 1946 ke ile ka kopana le Arthur Matthews. O be a sa tšwa go fetša dikgwedi tše tharo kgolegong ka gobane a ganne go ya ntweng. O ile a šoma gotee le buti’agwe Den-nis yo e bego e le mmulamadibogo yo a kgethegilego kua Hemsworth. Tatago bona o be a ba rutile ka Jehofa go tloga boseeng, ke ka baka leo ba ilego ba kolobetšwa e sa le ba bafsa. Go se go ye kae, Dennis o ile a abelwa go yo hlankela Ireland gomme a tlogela Arthur a se na motho yo a ka šomago le yena. Batswadi ba ka ba ba ile ba kgopela Arthur, yoo a bego a bula madibogo e sa le mofsa e bile a šoma ka thata, gore a tle a dule le bona ka ge ba be ba kgahlwa ke tsela yeo a bego a itshwere ka yona. Ge ke etetše gae, nna le Arthur re be re hlatswa dibjana ge re fetša go ja. Re ile ra thoma go ngwalelana mangwalo. Ka 1948, Arthur o ile a golegwa gape ka dikgwedi tše tharo. Re ile ra nyalana ka January 1949 re na le pakane ya go dula re le tirelong ya nako e tletšego ge mabaka a sa re dumelela. Ka ge Jehofa a be a re šegofatša e bile re kgona go rulaganya dilo gabotse, re be re diriša matšatši a go ikhutša go thuša babuni go fula dienywa e le gore re hwetše tšhelete ya go re thuša go tšwela pele re bula madibogo.

Gateetee ka morago ga ngwaga, re ile ra kgopelwa go ya Northern Ireland, gomme ra thoma go yo hlankela toropong ya moo ya Armagh ka morago ra ya Newry. Ditoropo tšeo ka bobedi di be di tletše ka Makatholika. Go be go le thata kudu go šoma lefelong leo, ka gona re be re swanetše go ba šedi kudu ge re boledišana le batho. Re be re swarela diboka legaeng la banyalani ba bangwe ba Dihlatse tša Jehofa, leo le bego le le bokgole bja dikhilomithara tše 16 go tloga moo re bego re dula gona. Go be go etla batho ba e ka bago ba seswai. Ge banyalani bao ba be ba re kgopela gore re robale lapeng la bona, re be re dumela gomme re robala fase ke moka re ipshina ka dijo tša mesong letšatšing le le latelago. Ruri go a thabiša go tseba gore ga bjale go na le Dihlatse tša Jehofa tše dintši lefelong leo.

Buti’aka le mosadi wa gagwe, Lottie ba be ba šetše ba hlankela e le babulamadibogo ba kgethegilego kua North-ern Ireland, gomme ka 1952 ka moka ga rena re le ba bane, re ile ra ya kopanong ya selete ya Belfast. Ngwanabo rena yo mongwe o ile a re amogela ka lapeng la gagwe, gotee le Pryce Hughes, yoo ka nako yeo e bego e le mohlanka wa lekala la kua Brithania. Bošegong bjo bongwe re ile ra boledišana ka pukwana yeo e bego e lokolotšwe ya sehlogo se se rego God’s Way Is Love, yeo e bego e ngwaletšwe kudukudu batho ba Ireland. Ngwanabo rena Hughes o ile a bolela ka mokgwa wo go lego thata ka gona go botša Makatholika a kua Repabliking ya Ireland ka Modimo. Baruti ba be ba tutuetša setšhaba gore se ntšhe bana babo rena mafelong ao ba bego ba dula go ona gomme se ba tlaiše. Ngwanabo rena Pryce o ile a re: “Re nyaka banyalani bao ba nago le dikoloi gore ba thuše ka lesolo le le kgethegilego la go aba pukwana ye nageng ka  moka.” * Re ile ra araba ntle le go dikadika ka gore: “Re tla ya!” Ke ka baka leo ke thomilego ka mantšu a kanegelong ye.

Legae le lengwe leo babulamadibogo ba bego ba dula ba amogelwa go lona kua Dublin e be e le la mma Rutland, e lego kgaetšedi yo a bego a na le nako e ntši a hlankela Jehofa ka potego. Ka morago ga gore re fihle moo, re ile ra rekiša dilo ka moka tšeo re bego re na le tšona. Re ile ra sepela re le ba bane ka sethuthuthu sa Bob seo se bego se na le koloyana yeo e bego e kgomagane le sona gomme ra ya go reka koloi. Re ile ra reka koloi yeo e bego e šetše e šomišitšwe, eupša ka moka ga rena re be re sa kgone go otlela, ka gona re ile ra kgopela mong wa yona gore a e tliše moo re bego re dula gona. Arthur o ile a fetša bošego ka moka a nagana kamoo a ka itlwaetšago go otlela koloi yeo. Mesong e latetšego ge a be a leka go ntšha koloi ka karatšheng, kgaetšedi yo mongwe wa moromiwa e lego Mildred Willett (yoo a ilego a nyalana le John Barr) o ile a tla mo re bego re dula gona. Sa go thabiša ke gore o be a kgona go otlela. O ile a re ruta go otlela gomme ra lokela go sepela.

Re be re swanetše go hwetša marobalo. Re be re lemošitšwe gore re se ke ra robala ka gare ga kharabane ka gobane batho bao ba bego ba hloile Dihlatse tša Jehofa ba be ba ka e tšhuma. Ka gona re ile ra nyaka ntlo, eupša ra se e hwetše. Bošegong bjoo, re le ba bane re ile ra robala ka koloing. Letšatšing le le latelago, re ile ra hwetša kharabane e nnyane yeo e bego e na le mepete e mebedi ya go hlatlagana. Kharabane yeo, e ile ya ba legae la rena. Sa go makatša ke gore ga se ra ka ra ba le bothata bja go phaka kharabane yeo dipolaseng tšeo beng ba tšona ba bego ba le botho. Re ile ra šoma tšhemo yeo e bego e tšea dikhilomithara tše 16 go ya go tše 24, gomme ra e fetša. Ka morago ga moo, re be re boela go batho bao re boletšego le bona peleng ka Modimo, moo re bego re phakile kharabane.

Re ile ra etela batho ka moka bao ba dulago ka borwa-bohlabela bja Repabliki ya Ireland re sa tshwenywe ke motho. Re ile ra sepediša dipukwana tše di fetago tše 20 000 gomme ra romela maina a batho bao ba bego ba thabela ofising ya lekala ya Brithania. Ruri go a thabiša gore ga bjale go na le Dihlatse tša Jehofa tše makgolokgolo kua Ireland!

Ge nako e dutše e ya re ile ra kgopelwa gore re ye go hlankela ka borwa bja London. Dibekeng tše sego kae re le moo, bana babo rena ba ofising ya lekala ya Brithania ba ile ba founela Arthur ba mo kgopela gore a thome go dira modiro wa tikologo letšatšing la go latela! Ka morago ga gore re tlwaetšwe modiro woo ka beke, re ile ra ya go thoma modiro wa tikologo kua Scotland. Arthur o be a se na nako ya go lokišetša dipolelo tša gagwe, eupša ke be ke kgothatšwa kudu ke gore o be a ikemišeditše go dira sohle tirelong ya Jehofa. Re ile ra thabela kudu kabelo ya rena modirong wa tikologo. Ka morago ga gore re hlankele tšhemong e sa abjago ka mengwaga e mentšinyana, ga bjale re thabela go ba gare ga bana babo rena le dikgaetšedi ba bantši.

Ge Arthur a be a laletšwa go ya Sekolong sa Gilead ka 1962, re ile ra swanelwa ke go dira phetho e kgolo. Sekolo seo se be se tšea dikgwedi tše lesome. Ke be ke sa dumelelwa go ya le Arthur sekolong seo, eupša re ile ra phetha ka gore a amogele taletšo yeo. Ka ge ke be ke tlo šala ke se na motho yo ke šomago le yena, ke ile ka romelwa Hemsworth, e lego moo re ilego ra hlankela gona peleng,  gore ke yo hlankela ke le mmulamadibogo yo a kgethegilego. Ka morago ga gore Arthur a boe sekolong sa Gilead, re ile ra abelwa go yo šoma modirong wa selete. Tšhemo ya rena e be e akaretša Scotland, leboa la Engelane le Northern Ireland.

Ka 1964, Arthur o ile a hwetša kabelo e mpsha ya go ba mohlanka wa lekala Repabliking ya Ireland. Mathomong ke be ke sa thabele taba ya gore re ya Bethele ka gobane ke be ke rata modiro wa bosepedi. Ga bjale ge ke lebelela morago, ke leboga gore ke ile ka hwetša tokelo ya go hlankela Bethele. Ke nagana gore ge o dumela go dira kabelo e mpsha le ge o ikwa o sa e thabele, Jehofa o tla dula a go šegofatša. Mo Bethele, ke ile ka abelwa go šoma ofising, go paka dikgatišo, go apea le go hlwekiša. Ka dinako tše dingwe re be re romelwa go yo dira modiro wa selete, ka go re’alo re be re kopana le bana babo rena ba Repabliking ya Ireland. Dilo tšeo ka moka, gotee le go bona barutwana ba Beibele ba tšwela pele gabotse le phuthego ya Jehofa, di ile tša re dira gore re tlwaelane kudu le bana babo rena ba le dikgaetšedi ba Ireland. Ruri se e bile tšhegofatšo!

Kopano ya mathomo ya ditšhabatšhaba kua Ireland e ile ya swarelwa Dublin ka 1965. * Gaešita le ge go be go na le kganetšo e šoro, kopano e ile ya atlega kudu. Kopanong yeo, go ile gwa tla batho ba 3 948, gomme gwa kolobetšwa ba 65. Batho bao ba bego ba amogetše baeng ba ba 3 500, bao ba bego ba etšwa dinageng tše dingwe, ba ile ba fiwa mangwalo a ditebogo. Beng ba dintlo bona ba ile ba reta baeng bao ka baka la boitshwaro bja bona bjo bo botse. Ruri yeo e bile tiragalo e bohlokwa Repabliking ya Ireland.

Ka 1966, karolo ya ka leboa ya Ireland le karolo ya ka borwa ya Ireland di ile tša kopanywa gomme tša ba ka tlase ga ofisi ya lekala ya Dublin. Yeo e bile taba ya go makatša sehlakahlakeng seo ka gobane batho ba Ireland ba be ba sa kwane ka baka la dipolotiki le bodumedi. Re ile ra thaba kudu ge re be re bona Makatholika a mantši a fetoga Dihlatse tša Jehofa gomme a hlankela Jehofa gotee le bana babo rena bao peleng e bego e le Maprotestanta.

Ka 2011 maphelo a rena a ile a fetoga ge lekala la Brithania le be le kopanywa le la Ireland gomme re abelwa go yo hlankela Bethele ya London. Phetogo ye e tlile ge Arthur a thoma go babja. Go ile gwa hwetšwa gore o na le bolwetši bja Parkinson, e lego bolwetši bjo bo amago bjoko. Ka di-20 tša May, 2015, molekane wa ka yo ke feditšego mengwaga e 66 ke phela le yena, o ile a hlokofala.

Mengwageng e sa tšwago go feta, ke ile ka ikwa ke lahlegile, ke gateletšegile e bile ke nyamile kudu. Arthur o be a dula a nthekga. Ke mo hlologela kudu! Eupša maemo a go swana le a, a go thuša gore o batamele kgauswi kudu le Jehofa. Le gona go tseba gore Arthur o be a ratwa ke batho ba bantši go be go nkgothatša. Ke hweditše mangwalo a go tšwa go bana babo rena ba Ireland, Brithania gaešita le United States. Mangwalo ao a nkgothaditše kudu. Batho ba bangwe bao ba ilego ba nkgothatša ke buti’a Arthur e lego Dennis le mosadi wa gagwe Mavis gotee le batlogolo ba ka e lego Ruth le Judy.

Lengwalo la Beibele leo le nkgothaditšego kudu ke la Jesaya 30:18. Le re: “Jehofa o tla dula a le letile gore a le gaugele, gomme o tla ema gore a le bontšhe kgaugelo. Jehofa ke Modimo wa kahlolo. Go thaba bao ba dulago ba mo letetše.” Go tseba gore Jehofa o letetše go tlo lokiša ditaba le go tlo re nea dikabelo tše di thabišago lefaseng le lefsa go nkgothatša kudu.

Ge ke lebelela morago, ke a bona gore Jehofa o ile a hlahla modiro gagwe kua Ireland le go o šegofatša! Ke ikwa ke šegofaditšwe kudu ka go newa tokelo ya go thuša batho ba bangwe ba moo gore ba tsebe Jehofa. Ke nnete gore ka mehla ge motho a dira seo Jehofa a mo kgopelago, o hwetša ditšhegofatšo.