1-3. (a) Re swanetše go ikwa bjang ka therešo ya Beibele? Hlalosa. (Bona diswantšho tše di lego ka mo godimo.) (b) Re tlo araba dipotšišo dife sehlogong se?

BATHO ba bantši lehono ba tlwaetše go bušetša dilo tšeo ba di rekilego mabenkeleng. Le gona, tšeo ba di rekilego Inthaneteng tšona ba di bušetša le go feta. Mohlomongwe ba hweditše gore dilo tšeo ga di ba kgotsofatše, di tlile di na le mathatanyana goba ga ba di rate. Ka gona ba phetha ka go di bušetša gore ba fiwe selo se itšego goba ba bušetšwe tšhelete ya bona.

² Gaešita le ge re ka kgopela tšhelete ya dilo tšeo re bego re di rekile, le ka mohla ga re nyake go bušetša goba go “rekiša” ‘tsebo e nepagetšego’ ya therešo ya Beibele yeo re e ‘rekago.’ (Bala Diema 23:23; 1 Tim. 2:4) Ka ge re kwele sehlogong seo se fetilego, go re tšere nako gore re feleletše re tseba therešo. Go oketša moo, e le gore re reke therešo, re ka ba re tlogetše mešomo ya rena ya maemo, bagwera le ba leloko ba se sa re rata goba re fetošitše tsela yeo re bego nagana ka yona le yeo re bego re itshwara ka yona. Lega go le bjalo, tefo yeo re e lefilego ga se selo ge re e bapetša le ditšhegofatšo tšeo re di hweditšego.

³ Tsela yeo re ikwago ka yona ka therešo ya Beibele e swana le ya  monna yoo Jesu a ilego a bolela ka yena papišong ya gagwe. Go bontšha kamoo therešo ya Mmušo wa Modimo e lego bohlokwa ka gona go bao ba e hwetšago, Jesu o boletše ka mmapatši wa mosepedi yoo a ilego a tsoma diperela tše dibotse gomme a hwetša e tee. Ge e le gabotse, perela yeo e be e le ya theko e kgolo moo e lego gore o ile a “rekiša ka bjako” dilo ka moka tšeo a bego a na le tšona e le gore a kgone go e reka. (Mat. 13:45, 46) Ka mo go swanago, therešo yeo re e hweditšego ke ya theko e kgolo kudu go rena moo e lego gore ka bjako re ile ra dira boikgafo bjo bo nyakegago gore re e hwetše. Therešo yeo ke ya Mmušo wa Modimo gotee le ditherešo ka moka tše bohlokwahlokwa tšeo re ithutilego tšona ka Lentšung la Modimo. Ge feela re tšeela godimo therešo yeo, re ka se ‘tsoge re e rekišitše.’ Eupša ka manyami, ba bangwe ba bahlanka ba Modimo ba ile ba se sa bona bohlokwa bja therešo yeo ba e hweditšego, gomme ba ile ba ba ba e rekiša. Anke rena re se ke ra dira bjalo! Go bontšha gore re tloga re tšeela godimo therešo ye le gore re ka se tsoge re e rekišitše, re swanetše go kwa keletšo ya Beibele yeo e rego: “Tšwela pele o sepela therešong.” (Bala 3 Johane 2-4.) Go sepela therešong go bolela go e phelela, gore e tle pele maphelong a rena le go itshwara ka go dumelelana le yona. Anke ga bjale re arabeng dipotšišo tše: Ke ka baka la’ng ba bangwe ba ka “rekiša” therešo, le gona ba ka e rekiša bjang? Re ka phema bja go dira phošo yeo e kgolo? Ke’ng seo se ka re thušago gore re ‘dule re sepela therešong’?

4. Ke ka baka la’ng ba bangwe ba ile ba “rekiša” therešo lekgolong la pele la mengwaga?

⁴ Lekgolong la pele la mengwaga, ba bangwe ba bao mathomong ba bego ba rata dithuto tša Jesu ba ile ba palelwa ke go tšwela pele ba sepela therešong. Ka mohlala, ka morago ga gore Jesu a fepe mašaba ka mohlolo, mašaba ao a ile a mo latela ka mošola wa Lewatle la Galilea. Ge ba be ba le moo, Jesu o ile a bolela selo seo se ilego sa ba tšhoša. O itše: “Ka ntle le gore le je nama ya Morwa wa motho le go nwa madi a gagwe, ga le na bophelo go lena.” Go e na le gore ba kgopele Jesu gore a ba hlalosetše gore o be a era go re’ng, ba ile ba kgopišwa ke mantšu a gagwe gomme ba re: “Mantšu a a a tšhoša; ke mang yo a ka a theetšago?” Ka baka la se, “ba bantši ba barutiwa ba gagwe ba [ile ba] tloga ba boela morago dilong tšeo ba di tlogetšego, ba se sa hlwa ba sepela le yena.”​—Joh. 6:53-66.

5, 6. (a) Ke ka baka la’ng lehono ba bangwe ba ile ba palelwa ke go sepela therešong? (b) Motho a ka tlogela bjang therešo ganyenyane-ganyenyane?

⁵ Ka manyami, lehono ba bangwe ba ile ba palelwa ke go tšwela pele ba sepela therešong. Ke’ng seo se ba dirilego gore ba palelwe ke go tšwela pele ba sepela therešong? Ba bangwe ba ile ba kgopišwa ke kwešišo e kaonefaditšwego temaneng e itšego ya Beibele goba ba kgopišwa ke seo ngwanabo rena yo a nago le maikarabelo ka mokgatlong wa Jehofa a ilego a se bolela goba go se dira. Ba bangwe ba ile ba kgopišwa ke keletšo ya Mangwalo yeo ba ilego ba e newa, goba ba ngala phuthego ka gobane ba bile le diphapano le Mokristegotee le bona. Go oketša moo, ba bangwe ba latetše dithuto tša bahlanogi goba baganetši ba bangwe bao ba boletšego gampe ka bodumedi bja rena. Seo sa feleletša se ba dira gore ba bangwe ba thome go “katologela kgole” le Jehofa le phuthego ya gagwe. (Baheb. 3:12-14) Ruri e be e tla ba mo go botse ge nkabe bana babo rena ba ba ile ba dula ba matlafatša tumelo ya bona gomme ba bota Jesu, go etša ge Petro a ile a dira bjalo! Ge Jesu a be a botšiša baapostola ba gagwe ge e ba ba nyaka go mo tlogela, gateetee Petro o ile a araba ka gore: “Morena, re tla ya go mang? Wena o na le mantšu a bophelo bjo bo sa felego.”​—Joh. 6:67-69.

 ⁶ Ba bangwe ba tlogetše therešo ganyenyane-ganyenyane, mohlomongwe e bile ba sa ipone. Motho yo a tlogelago therešo ganyenyane-ganyenyane o swana le sekepe seo se arogago tseleng yeo se bego se e swere. Beibele e hlalosa go aroga moo e le ‘go gogolega.’ (Baheb. 2:1) Go fapana le motho yoo a tlogelago therešo ka maikemišetšo, motho yo a gogolegago ga a dire bjalo ka maikemišetšo. Eupša motho yoo bjalo o bea tswalano ya gagwe le Jehofa kotsing gomme mafelelong a ka hwa moyeng. Re ka phema bjang kotsi ye?

7. Ke selo sefe seo se tla re thušago gore re se tsoge re rekišitše therešo?

⁷ E le gore re sepele therešong re swanetše go amogela le go latela melao ka moka ya Jehofa. Re swanetše go etiša therešo pele maphelong a rena gomme re phele ka go dumelelana le melao ya motheo ya Beibele. Ge Kgoši Dafida a be a rapela Jehofa o itše: “Ke tla sepela therešong ya gago.” (Ps. 86:11) Dafida o be a ikemišeditše go sepela therešong. Le rena re swanetše go tloga re ikemišetša go tšwela pele re sepela therešong ya Modimo. Ge e ba re ka se dire bjalo, re ka thoma go nagana gabedi ka dilo tšeo re di tlogetšego, mohlomongwe ra ba ra lekega go boela go tšona. Ga re kgethe gore re amogela ditherešo dife tša Beibele gomme tše itšego ga re di amogele. Eupša re swanetše go sepela “therešong ka moka.” (Joh. 16:13) Sehlogong se se fetilego, re ithutile ka dilo tše hlano tšeo re ka bago re di gafile e le gore re reke therešo. Ka gona ga bjale anke re boneng kamoo re ka kgonthišetšago gore ga re boele dilong tšeo re di tlogetšego morago.​—Mat. 6:19.

8. Go se diriše nako ka bohlale go ka dira bjang gore Mokriste a tlogele therešo? Nea mohlala.

⁸ Nako. E le gore re kgonthišetše gore ga re tlogele therešo, re swanetše go diriša nako ya rena ka bohlale. Ge e ba re se šedi, re ka thoma go diriša nako ya rena e ntši re ithabiša, re tsene Inthaneteng goba re bogetše thelebišene. Le ge dilo tšeo ka botšona di se na bothata, eupša nako yeo re e fetšago re di dira e ka thoma go ba e ntši go feta nako yeo re bego re e fetša thutong ya motho ka noši goba dilong tše dingwe tša Modimo. Se ke seo se ilego sa diragalela kgaetšedi Emma. * Ga e sa le go tloga e sa le yo monyenyane, o be a rata dipere gomme a di namela nako le nako ge a hwetša sebaka. Ka morago ga nako, o ile a thoma go ikwa a le molato ka ge a be a bona gore o fetša nako e ntši a namela dipere. O ile a dira diphetogo gomme mafelelong a se sa etiša boithabišo pele. O ile a ba a kgothatšwa ke phihlelo ya Cory Wells, e lego kgaetšedi yoo le yena a bego a rata go namela dipere mafelong ao batho ba yago go bogela dipapadi go ona. * Ga bjale Emma o ipshina ka go fetša nako ya gagwe e ntši a dira dilo tša Modimo a na le bana babo le dikgaetšedi gotee le ba gabo. O ikwa a le kgauswi kudu le Jehofa e bile o na le khutšo ya monagano, ka ge a tseba gore o diriša nako ya gagwe ka bohlale.

9. Ke’ng seo se ka dirago gore re rate dilo tše di bonagalago go feta go hlankela Jehofa?

⁹ Dilo tše di bonagalago. Ge e ba re nyaka go tšwela pele re sepela therešong, ga se ra swanela go etiša pele dilo tše di bonagalago maphelong a rena. Ge re be re thoma go ithuta therešo, re ile ra lemoga gore go hlankela Jehofa go bohlokwa kudu go feta dilo tše di bonagalago. Ga se ra ka ra ba le bothata bja go tlogela dilo tšeo e le gore re sepele therešong. Eupša ge nako e dutše e eya, re ka bona ba bangwe ba reka didirišwa tša thekinolotši goba ba ipshina ka go ba le dilo tše dingwe tša manobonobo. Re ka thoma go ba duma. Re ka ba ra thoma go se sa kgotsofalela dilo tšeo re nago le tšona, gomme ra dula re nyaka  go ba le dilo tše di bonagalago go feta go etiša pele go hlankela Jehofa. Se se re gopotša seo se ilego sa diragalela Dema. Go rata ga gagwe “tshepedišo ya gona bjale ya dilo” go ile gwa mo dira gore a tlogele go hlankela Jehofa gotee le go šoma le moapostola Paulo. (2 Tim. 4:10) Ke ka baka la’ng Dema a ile a tlogela Paulo? Beibele ga e re botše. Mohlomongwe o ile a rata dilo tše di bonagalago go feta go hlankela Jehofa, goba mohlomongwe o be a se sa nyaka go šoma le Paulo. Re ithuta’ng tabeng ye? Mohlomongwe nakong e fetilego re kile ra rata dilo tše di bonagalago. Ge e ba re se šedi, re ka thoma go di rata gape gomme ra tlogela go rata therešo.

10. E le gore re dule re sepela therešong, re swanetše go dira’ng?

¹⁰ Bagwera le ba leloko. E le gore re dule re sepela therešong, ga se ra swanela go dumelela batho bao ba sa hlankelego Jehofa ba re dira gore re swane le bona. Ge re be re thoma go sepela therešong, re ile ra se sa gwerana kudu le ditho tša malapa a gabo rena le bagwera bao ba sa hlankelego Jehofa. Mohlomongwe ba bangwe ba ile ba hlompha bodumedi bja rena, eupša ba bangwe ba bo ganetša. (1 Pet. 4:4) Ke therešo gore re leka ka gohle gore re rate ditho tša malapa a gabo rena le go ba botho go tšona. Eupša ga se ra swanela go hlokomologa melao ya Modimo e le ge re nyaka go ba kgahla. Re tlo tšwela pele re rata ditho tša malapa a gabo rena. Lega go le bjalo, go etša ge 1 Bakorinthe 15:33 e bolela, re swanetše go gwerana feela le bao ba ratago Jehofa.

11. Re ka dira’ng gore re se wele boitshwarong bjo bo sa hlwekago?

¹¹ Tsela yeo re naganago ka yona le kamoo re itshwarago ka gona. Batho ka moka bao ba sepelago therešong e swanetše go ba ba bakgethwa. (Jes. 35:8; bala 1 Petro 1:14-16.) Ge re be re ithuta therešo, ka moka ga rena re ile ra dira diphetogo maphelong a rena e le gore re kwe melao ya go loka ya Beibele. Ba bangwe ba rena re ile ra swanelwa ke go dira diphetogo tše dikgolo. Eupša go sa šetšwe gore re dirile diphetogo tše dikgolo goba tše dinyenyane, ga se ra swanela go tlogela go itshwara gabotse gomme ra thoma go itshwara go swana le batho ba lefase le. Re ka thušwa ke’ng go ganetša teko le ge e le efe yeo e ka re dirago gore re wele boitshwarong bjo sa hlwekago? Re ka thušwa ke go naganišiša ka seo Jehofa a re neilego sona gore re be ba bakgethwa. O re neile madi a bohlokwahlokwa a Morwa wa gagwe e lego Jesu Kriste. (1 Pet. 1:18, 19) E le gore re dule re hlwekile pele ga Jehofa, re swanetše go dula re gopola bohlokwa bja sehlabelo sa Jesu sa topollo.

12, 13. (a) Ke ka baka la’ng re swanetše go lebelela matšatši a maikhutšo ka tsela yeo Jehofa a a lebelelago ka yona? (b) Re tlo bolela ka’ng dirapeng tše di latelago?

¹² Meetlo le mekgwa yeo e sego ya thewa Mangwalong. Ditho tša malapa a gabo rena, bao re šomago le bona le bao re tsenago le bona sekolo ba ka leka go re dira gore re keteke le bona menyanya yeo e sego ya thewa Mangwalong. Re ka thušwa ke’ng go gana go latela meetlo yeo goba go keteka le bona matšatši a maikhutšo ao a sa kgahlišego Jehofa? Re ka thušwa ke go dula re gopola gore Jehofa o ikwa bjang ka matšatši ao a maikhutšo. Le gona re ka bala dikgatišo le dilo tše dingwe tšeo di theilwego Beibeleng tšeo di bontšhago gore matšatši a maikhutšo a thomile kae. Ge re dula re ikgopotša mabaka a go tšwa Mangwalong ao a re botšago gore re se ke ra keteka matšatši ao a maikhutšo, re ka kgodišega gore re sepela ka tsela yeo e “amogelegago go Morena.” (Baef. 5:10) Go bota Jehofa le Lentšu la gagwe la therešo go tla re thuša gore re se ‘tšhabe batho.’​—Die. 29:25.

¹³ Go sepela therešong ga go fele, re swanetše go dira bjalo gona bjale le ka mo go sa felego. Ke’ng seo se ka re thušago gore re dule re sepela therešong? Anke re boleleng ka dilo tše tharo tšeo di ka re thušago go dira bjalo.

14. (a) Go tšwela pele re ithuta Beibele go tla re thuša bjang gore re se tlogele therešo? (b) Ke ka baka la’ng bohlale, tayo le kwešišo di le bohlokwa?

¹⁴ Sa pele, tšwela pele o ithuta ka ditherešo tše bohlokwahlokwa tšeo di lego ka Lentšung la Modimo gomme o naganišiše ka tšona. Ee, reka therešo ka go dula o beela nako ka thoko gore o iphepe ka ditherešo tšeo. Ge o dutše o ithuta therešo ke moo o tlago go e rata le go feta gomme wa se nyake go e rekiša. Go tlaleletša tabeng ya go reka therešo, Diema 23:23 e re re swanetše go reka le “bohlale, tayo le tlhaologanyo [goba kwešišo].” Go no ba le tsebo ga se gwa lekana. Re swanetše go phela ka go dumelelana le therešo. Kwešišo e tlo re thuša gore re lemoge kamoo mantšu a Jehofa a dumelelanago ka gona. Bohlale bjona bo tla re thuša gore re diriše seo re ithutilego sona. Ka dinako tše dingwe, therešo e a re laya, ya re bontšha moo re swanetšego go dira diphetogo. Re swanetše go dula re ekwa tayo yeo ka gobane e bohlokwa kudu go feta silifera.​—Die. 8:10.

15. Lepanta la therešo le re šireletša bjang?

¹⁵ Sa bobedi, dula o ikemišeditše go phela ka go dumelelana le therešo letšatši le letšatši. Apara lepanta la therešo lethekeng la gago. (Baef. 6:14) Mehleng ya Beibele, lepanta le be le šireletša lešole ntweng. Eupša e le gore lepanta leo le le šireletše, lešole le be le swanetše go le bofa ka go tia. Ge lepanta leo le be le ka se tie, le be le ka se kgone go šireletša lešole leo gabotse. Lepanta la rena la moya le re šireletša bjang? Ge e ba re phela ka go dumelelana le therešo ya Beibele, e tla re šireletša gore re se nagane ka tsela e fošagetšego gomme ya re thuša go dira diphetho tše dibotse. Ge e ba re lekwa goba re lebeletšane le mathata, therešo ya Beibele e tla re thuša le go feta gore re dire se se nepagetšego. Go no swana le ge lešole le be le ka se tsoge le naganne ka go ya ntweng le se la bofa lepanta, le rena re swanetše go kgonthišetša gore re dula re diriša therešo ya Beibele maphelong a rena. Le gona mošomo o mongwe wa lepanta la lešole e be e le go tsenya tšhoša. Anke re boneng gore re ka ekiša lešole bjang tabeng ye.

16. Go ruta ba bangwe Beibele go re thuša bjang gore re tšwele pele re sepela therešong?

¹⁶ Sa boraro, dira sohle seo o ka se kgonago go tšea karolo modirong wa go ruta batho therešo ya Beibele. Beibele e swantšhwa le tšhoša. Go etša ge lešole leo le nago le bokgoni le be le diriša tšhoša ya lona gabotse, le rena re swanetše go diriša Lentšu la Modimo ka bokgoni. (Baef. 6:17) Ka moka ga rena re swanetše go leka ka thata go ba barutiši ba bakaone ka go “[swara] lentšu la therešo ka tshwanelo.” (2 Tim. 2:15) Ge re dutše re diriša Beibele go thuša ba bangwe go reka therešo le go gana dithuto tša maaka, seo se dira gore re rate therešo le go feta. Ka go re’alo, re tlo dula re nyaka go sepela therešong.

17. Ke ka baka la’ng therešo e le bohlokwa go wena?

¹⁷ Therešo ke mpho ya bohlokwa kudu yeo Jehofa a re neilego yona. Mpho ye e dira gore re kgone go ba le tswalano ya kgauswi le Tatago rena wa legodimong. Dilo tšeo a re rutilego tšona go fihla ga bjale e sa le dinyane! Modimo o re tshepiša gore o tlo re ruta therešo ka mo go sa felego. Ka gona, tšeela therešo godimo go swana le perela e botse. Tšwela pele o “reka therešo, o se ke wa e rekiša.” Ke moka, go swana le Dafida o tla phethagatša seo o se tshepišitšego Jehofa ge o be o re: “Ke tla sepela therešong ya gago.”​—Ps. 86:11.