1-2. Hlalosa gore ke ka baka la’ng ge maemo a rena a fetoga melao e mengwe ya motheo ya ka Beibeleng e ka ba bohlokwa kudu go rena.

 GE MONNA le mosadi ba nyalana, ba theetša polelo ya lenyalo yeo e theilwego Beibeleng yeo mogolo a e neago. Melao ya motheo yeo e balwago moo ga se mathomo ba e kwa. Eupša go tloga ka letšatši leo e tlo ba bohlokwa kudu go bona. Ka baka la’ng? Ka gobane ge ba šetše ba nyalane, ba tlo thoma go e diriša.

² Boemo bjo bo swana le ge banyalani ba Bakriste ba e ba batswadi. E ka ba e le kgale ba e kwa dipolelo tše dintši tša go godiša bana. Eupša gona bjale di bohlokwa kudu go bona ka gobane ba tlo thoma go di diriša. Ba tlo ba le ngwana wa bona yo ba tlago go mo godiša. Bjo ke boikarabelo bjo bogolo kudu! Ka gona ge dilo tše dingwe di fetoga bophelong, melao e mengwe ya motheo ya Beibele e thoma go ba bohlokwa kudu go rena. Le ke le lengwe la mabaka ao bahlanka ba Jehofa ba balago Mangwalo go swana le ge dikgoši tša Isiraele di be di laetšwe gore di naganišiše ka ona “matšatši ka moka” a bophelo bja tšona.​—Doit. 17:19.

3. Re tlo ithuta’ng sehlogong se?

³ Batswadi, le na le tokelo e kgolo kudu ya go thuša bana ba lena gore ba rate Jehofa. Eupša le nyaka go dira mo gontši gore le ba thuše go rata Jehofa kudu. Le ka dira’ng gore le thuše bana ba lena gore ba rate Jehofa? Sehlogong se re tlo boledišana ka melao ya motheo e mene yeo e ka thušago batswadi go ruta bana gore ba rate Jehofa.  (2 Tim. 3:​16) Re tlo bona le kamoo batswadi ba Bakriste ba hotšwego ke go šomiša melao ya Beibele.

4. Ke molao ofe wa motheo woo o ka thušago batswadi gore ba rute bana ba bona go rata Jehofa? (Jakobo 1:5)

⁴ Molao wa motheo 1: Kgopela Jehofa gore a go hlahle. Kgopela Jehofa gore a go nee bohlale bjo o bo hlokago gore o thuše bana ba gago gore ba mo rate. (Bala Jakobo 1:5.) Ke yena a nnoši a ka re neago keletšo e botse le e di phalago ka moka. Re tlo boledišana ka mabaka a mabedi gore ke ka baka la eng keletšo ya Jehofa e le e di phalago ka moka. Lebaka la pele ke gore ke go tloga kgale Jehofa e le motswadi. (Ps. 36:9) Lebaka la bobedi ke gore keletšo e bohlale yeo a re neago yona e dula e re hola.​—Jes. 48:17.

5. (a) Mokgatlo wa Jehofa o thuša batswadi bjang? (b) Ka ge bidio e bontšha, o ithutile eng tseleng yeo ngwanabo rena le kgaetšedi Amorim ba godišago bana ba bona ka gona?

⁵ Jehofa o diriša Beibele le mokgatlo wa gagwe go nea batswadi dilo tšeo di ka ba thušago go ruta bana ba bona gore ba mo rate. (Mat. 24:​45) Ka mohlala o ka hwetša dikeletšo tšeo di ka go holago tšeo di lego dihlogong tša “Thušo Bakeng sa Lapa,” tšeo e lego kgale di tšwelela ka go Phafoga! e bile ga bjale di hwetšagala wepesaeteng ya rena. Le gona dibidio tše dintši tšeo di lego go jw.org/nso di ka thuša batswadi go diriša keletšo ya Jehofa ge ba dutše ga godiša bana ba bona. *​—Die. 2:​4-6.

6. Tate yo mongwe o ikwa bjang ka tlhahlo yeo yena le mosadi wa gagwe ba e hwetšago ka mokgatlong wa Jehofa?

⁶ Batswadi ba bantši ba ile ba leboga tsela yeo Jehofa a ilego a ba thuša ka yona a diriša mokgatlo wa gagwe. Tate yo mongwe yo a bitšwago Joe o re: “Go godiša bana ba bararo ga go bonolo. Nna le mosadi wa ka re dula re rapela gore Jehofa a re thuše. Le gona ge kgatišo go ba bidio e etšwa re e bona e tšwile ka nako ya maleba, ka gobane e re thuša goba lebeletšana le boemo bjo re lego go bjona. Re be re dula re ithekgile  ka Jehofa.” Joe le mosadi wa gagwe ba ile ba bona gore dikgatišo le dibidio tše di thuša bana ba bona gore ba batamele kgauswi le Jehofa.

7. Ke ka baka la’ng go le bohlokwa gore batswadi ba beele bana ba bona mohlala o mobotse? (Baroma 2:21)

⁷ Molao wa motheo 2: Eba mohlala o mobotse. Bana ba lebelela dilo tšeo batswadi ba bona ba di dirago e bile gantši ba a ba ekiša. Ke nnete gore a gona motswadi yo a phethagetšego. (Baroma 3:​23) Le ga go le bjalo, batswadi ba leka ka thata gore ba beele bana ba bona mohlala o mobotse. (Bala Baroma 2:​21.) Tate yo mongwe o ile a bolela ka bana gore: “Ba swana le sepontšhe seo se nwago meetse. Ba tlo re botša ge e ba re ba ruta dilo tšeo re sa di dirego.” Ge e ba re nyaka gore bana ba rena ba rate Jehofa, le rena re swanetše go ba bontšha gore re a mo rata.

8-9. O ithutile’ng go seo se boletšwego ke Andrew le Emma?

⁸ Go na le ditsela tše dintši tšeo batswadi ba ka rutago bana ba bona go rata Jehofa. Nagana ka mohlala wa ngwanabo rena yo a na go le mengwaga e 17 yo a bitšwago Andrew, o re: “Batswadi ba ka ba be ba dula ba nthuta gore go bohlokwa go rapela. Bošego bjo bongwe le bjo bongwe tate o be a e tla a rapela le nna, le ge ke be ke šetše ke rapetše. Batswadi ba ka ba be ba dula ba re gopotša gore re ka bolela le Jehofa gantši ka moo re nyakago ka gona. Ka baka la seo thapelo e ile ya ba bohlokwa kudu go nna. Gona bjale go bonolo kudu go rapela le go bona Jehofa e le Tate yo a nthatago kudu.” Batswadi, dulang le gopola gore ge le rata Jehofa le ka thuša bana ba lena gore le bona ba mo rate.

⁹ Nagana le ka mohlala wa Emma. Ge tatagwe a be a tlogela lapa la gabo, o be a kolota batho ba bantši tšhelete ka gona o ile a tlogela mmagwe a le dikolotong. Emma o re: “Go na le dinako tše dintši mo mma a bego a se na tšhelete, eupša o be a dula a bolela kamoo Jehofa a hlokomelago bahlanka ba gagwe ka gona. Tsela yeo a bego a phela ka yona e be e bontšha gore o dumela seo. Mma o be a diriša seo a nthutilego sona.” Re ithuta’ng? Batswadi ba swanetše go beela bana ba bona mohlala le maemong a thata.​—Bagal. 6:9.

10. Batswadi ba Baisiraele ba be ba ka bolela le bana ba bona ka Jehofa neng? (Doiteronomio 6:6, 7)

¹⁰ Molao wa motheo 3: Bolela le bana ba gago ka mehla. Jehofa o ile a botša Baisiraele gore ba rute bana ba bona ka yena ka mehla. (Bala Doiteronomio 6:​6, 7.) Batswadi bao ba be ba na le nako e ntši mo letšatšing ya go bolela le bana ba bona le go ba thuša gore ba rate Jehofa. Ka mohlala, mošemane wa Moisiraele a ka fetša nako a na le tatagwe a mo thuša go bjala le go buna. Sesi wa gagwe a ka fetša nako a thuša mmagwe ka go roka, go loga goba go dira mešomo e mengwe ya ka ntlong. Ge batswadi ba šoma le bana ba bona, ba ka bolela ka dilo tše bohlokwa. Ka mohlala, ba ka bolela ka dika tša Jehofa tša go loka le kamoo a thušitšego lapa la bona ka gona.

11. Lehono batswadi ba Bakriste ba ka bolela le bana ba bona neng?

¹¹ Dinako di fetogile. Dinageng tše dintši, batswadi ga ba kgone go fetša nako e ntši le bana ba bona mosegare. Batswadi ba ka ba ba šoma gomme bana ba tsena sekolo. Ka gona batswadi ba ka nyaka nako yeo ba  ka bolelago le bana ba bona ka yona. (Baef. 5:​15, 16; Bafil. 1:​10) E nngwe ya dinako tšeo ke borapedi bja lapa. Ngwanabo rena wa mofsa yo a bitšwago Alexander o re: “Tate o dula a kgonthišetša gore re ba le borapedi bja lapa, le gona ga a nyake gore re šitiše ke selo ka letšatši leo. Ka morago ga borapedi bja lapa, re fetša nako re bolela ka dilo tše dingwe.”

12. Hlogo ya lapa e swanetše go dula e nagana ka’ng nakong ya borapedi bja lapa?

¹² Ge e ba o le hlogo ya lapa, o ka dira eng gore bana ba gago ba thabele borapedi bja lapa? Le ka thoma go ithuta kgatišo ya O ka Thabela Bophelo go ya go Ile! E tlo le thuša gore le kgone go thabela poledišano. O nyaka gore bana ba gago ba go botše kamoo ba ikwago ka gona le dilo tšeo di ba tshwenyago, ka gona o se ke wa diriša nako ya borapedi bja lapa go ba kgala. Le gona o se ke wa galefa ge bana ba gago ba bolela dilo tšeo di sa dumelelanego le Beibele. Go e na le moo, leboga gore ba go botša ka moo ba ikwago ka gona, le gona o ba kgothaletše gore ba dule ba dira bjalo. O ka kgona go thuša bana ba gago ge e ba o tseba gore ba ikwa bjang.

13. Ke nako efe yeo batswadi ba ka e dirišago go thuša bana ba bona gore ba batamele kgauswi le Jehofa?

¹³ Batswadi le ka kgona go ba le dibaka tše dintši mo letšatšing tša go thuša bana ba lena gore ba batamele kgauswi le Jehofa. Ga go hlokagale gore le emele nako yeo le ithutago Beibele ka yona gore le ba rute ka Modimo. Bona seo mma yo a bitšwago Lisa a se bolelago, o re: “Re diriša dilo tšeo Modimo a di bopilego tšeo di lego kgauswi le rena go ruta bana ba rena ka Jehofa. Ka mohlala, ge mpšanyana ya rena e dira selo se se segišago bana ba rena, re ba botša gore se se bontšha gore Jehofa ke Modimo yo a thabilego e bile o dirile gore le rena re thabe.”

14. Ke ka baka la’ng go le bohlokwa gore batswadi ba thuše bana ba bona go kgetha bagwera gabotse? (Diema 13:20)

¹⁴ Molao wa motheo 4: Thuša bana ba gago gore ba be le bagwera ba babotse. Lentšu la Modimo le tloga le bontšha gabotse gore batho bao re gweranago le bona ba  ka re ama ka tsela e botse goba e mpe. (Bala Diema 13:​20.) Batswadi, na le tseba bagwera ba bana ba lena? Na le ile la fetša nako le bona? Le ka dira’ng go thuša bana ba lena gore ba be le bagwera bao ba ratago Jehofa? (1 Bakor. 15:​33) Le ka ba thuša ka go laletša ba bangwe ba batho bao ba nago le segwera se sebotse le Jehofa gore ba be le lena borapeding bja lapa.​—Ps. 119:63.

15. Batswadi ba ka dira’ng go thuša bana ba bona gore ba be le bagwera ba babotse?

¹⁵ Nagana ka mohlala wa tate yo a bitšwago Tony. O hlalosa kamoo yena le mosadi wa gagwe ba thušitšego bana ba bona gore ba be le bagwera ba babotse, o re: “Mengwageng e fetilego, nna le mosadi wa ka re ile ra laletša bana babo rena le dikgaetšedi ba go se swane le ba mengwaga ya go se swane gore ba tle ka legaeng la rena. Ba be ba e ja le rena e bile ba e ba le rena borapeding bja lapa. Ye ke tsela e botse ya go tseba batho bao ba ratago Jehofa le bao ba mo hlankelago ba thabile. Re ile ra thabela go ba le balebeledi ba tikologo, baromiwa le ba bangwe legaeng la rena. Ka ge bana babo rena ba, ba na le moya wa go ikgafa e bile ba na le mafolofolo ba thušitše bana ba rena kudu gore ba batamele kgauswi le Jehofa.” Batswadi, dulang le ikemišeditše go thuša bana ba lena gore ba be le bagwera ba babotse.

16. O ka dira’ng ge e ba ngwana wa gago a re ga a sa nyaka go hlankela Jehofa?

¹⁶ A re re yo mongwe wa bana ba gago o re ga a sa nyaka go hlankela Jehofa le ge o lekile ka thata gore o mo thuše gore a mo hlankele. O se ke wa phetha ka gore o paletšwe bjale ka motswadi. Jehofa o neile batho ka moka tokologo ya go ikgethela ge e ba ba nyaka go mo hlankela goba aowa, go akaretša le ngwana wa gago. Ge e ba ngwana wa gago a dirile phetho ya gore ga a sa nyaka go hlankela Jehofa, o se ke wa felelwa ke matla a gore ka tšatši le lengwe o tla boela a mo hlankela. Nagana ka papišo  ya morwa yo a be go a timetše. (Luka 15:​11-19, 22-24) Mošemane yoo o ile a dira dilo tše dintši tše mpe, eupša mafelelong o ile a boa. Batho ba bangwe ba ka re: “Ye e be o no ba papišo fela. Na ngwanaka a ka boa a hlankela Jehofa?” Ee a ka boa! Ge e le gabotse se ke se se diragaletšego mofsa o mongwe yo a bitšwago Elie.

17. Phihlelo ya Elie e go kgothatša bjang?

¹⁷ Elie o re: “Batswadi ba ka ba ile ba nthuša go dira sohle seo nka se kgonago gore ke rate Jehofa le Lentšu la gagwe Beibele. Eupša ge ke be ke na le mengwaga e 15 ke ile ka hlanogela Jehofa.” Elie o ile a thoma go phela maphelo a mabedi, gomme a gana thušo yeo batswadi ba gagwe ba bego ba mo nea yona gore a rate Jehofa. Ka morago ga gore a tloge gae, o ile a thoma go dira dilo tše mpe. Le ga go le bjalo, o be a fela a boledišana le o mongwe wa bagwera ba gagwe ka Beibele. Elie o re: “Ge ke be ke boledišana le mogwera wa ka ka Jehofa, ke ile ka thoma go naganišiša ka Jehofa. Ganyenyane ganyenyane, peu ya therešo yeo batswadi ba ka ba ilego ba leka ka thata go e bjala pelong ya ka e ile ya thoma go gola.” Ge nako e dutše e eya, Elie o ile a boa a hlankela Jehofa. * Nagana ka moo batswadi ba gagwe ba ilego ba thaba ka gona ka ge ba ile ba mo ruta go tloga e sa le yo monyenyane gore a rate Jehofa!​—2 Tim. 3:​14, 15.

18. O ikwa bjang ka batswadi bao ba šomago ka thata gore ba rute bana ba bona go rata Jehofa?

¹⁸ Batswadi, le neilwe mpho e botse kudu ya go godiša moloko o mofsa wa bahlanka ba Jehofa. (Ps. 78:​4-6) Ga go bonolo go dira bjalo, eupša re a le reta ka ge le sa fele matla ge le dutše le thuša bana ba lena! Ge le ka dula le thuša bana ba lena go rata Jehofa le go latela melao ya gagwe le ka kgodišega gore le tlo thabiša Tatago lena wa legodimong.​—Baef. 6:4.