1. Lentšu la Modimo le re ruta’ng?

KA GE Jehofa e le Mohlahli wa rena yo Mogolo, re ka kgona go hwetša tharollo ya bothata le ge e le bofe. (Jes. 30:20, 21) Lentšu la gagwe le re ruta dilo ka moka tšeo re di hlokago gore re “swanelege ka botlalo,” e bile re “hlangwe ka mo go feletšego bakeng sa modiro o mongwe le o mongwe o mobotse.” (2 Tim. 3:17) Ge re phela ka go dumelelana le seo Beibele e se rutago, re ba bohlale go feta batho bao ba rego re swanetše go phela ka “bohlale bja lefase le.”—1 Bakor. 3:19; Ps. 119:97-100.

2. Re tlo boledišana ka’ng sehlogong se?

² Go etša ge re tla bona sehlogong se, bohlale bja lefase le gantši bo kgothaletša batho go kgotsofatša dikganyogo tša bona tša nama. Ka gona re ka hwetša go le thata go gana go nagana le go dira dilo go swana le batho ba lefase. Ka baka leo, Beibele e re: “Kgonthišetšang gore go se be le yo a le thopago ka filosofi le bofora bja lefeela go ya ka tlwaelo ya batho.” (Bakol. 2:8) Sehlogong se, re tlo boledišana ka taba ya gore go tlile bjang gore batho ba thome go dumela dikgopolo tše pedi tša maaka tšeo Sathane a di rutago. Go e nngwe le e nngwe ya dikgopolo tše re tlo bona gore ke ka baka la eng bohlale bja lefase e le bošilo, le kamoo bohlale bja Lentšu la Modimo bo fetago kgole selo le ge e le sefe seo lefase le le ka re neago sona.

3-4. Go bile le diphetogo dife tabeng ya boitshwaro kua United States magareng ga bo-1900 le bo-1930?

³ Magareng ga mengwaga ya bo-1900 le bo-1930, batho ba kua United States ba ile ba thoma go fetoša kudu tsela yeo ba lebelelago boitshwaro. Mengwageng ya pele ga moo, batho ba bantši ba be ba dumela gore ke batho bao ba nyalanego feela bao ba swanetšego go ba le thobalano. Le gona thobalano e be e se taba yeo go no bolelwago ka yona pele ga batho. Eupša tsela yeo  ya go nagana e ile ya felelwa ke nako, gomme batho ba thoma go se be le taba le boitshwaro.

⁴ Magareng ga ngwaga wa 1920 le wa 1929 batho ba ile ba fetoša kudu tsela yeo ba bego ba itshwara ka yona. Monyakišiši yo mongwe o re: “Difilimi, diterama, dikoša, dipuku tša marato le dipapatšo di ile tša thoma go bontšha kudu dilo tša mabapi le thobalano.” Mengwageng yeo, tsela ya go bina e ile ya thoma go dira gore batho ba nagane ka thobalano, le gona batho ba ile ba thoma go se sa apara gabotse. Go ile gwa ba bjalo ka ge Beibele e boletše e sa le pele gore mehleng ya bofelo batho e be e tla ba bao “ba ratago maipshino.”—2 Tim. 3:4.

5. Batho ba ile ba thoma go lebelela bjang taba ya boitshwaro ga e se le go tloga ka bo-1960?

⁵ Mengwageng ya bo-1960, go ile gwa thoma go tlwaelega gore batho ba no dula gotee ba se ba nyalana. Le gona tlhalo le go ratana ga batho ba bong bjo bo swanago di ile tša ata. Mehuta e mentši ya boithabišo e ile ya thoma go bontšha thobalano. Mengwageng ya morago bjale, re kgona go bona ka ditsela tše dintši kudu go phuhlama ga boitshwaro. Mongwadi yo mongwe o ngwadile gore go thubega ga malapa, malapa ao batswadi ba sa dulego gotee, go ba le mathata maikwelong, go lemalela go bogela diswantšho tša batho ba sa aparago le mathata a mangwe ao a swanago le ona a, a bakwa ke “tsela e gobogilego yeo batho ba phelago ka yona.” Go ata ga malwetši ao a fetelago batho ka thobalano a bjalo ka AIDS, ke selo se sengwe seo se bontšhago gore bohlale bja lefase le e tloga e le bošilo.—2 Pet. 2:19.

6. Sathane o ikwa bjang ka tsela yeo batho ba lefase ba lebelelago thobalano ka yona?

⁶ Batho ba lefase ba lebelela thobalano ka tsela yeo Sathane a nyakago. Ga go na pelaelo gore Sathane o a thaba ge a bona batho ba diriša thobalano ka tsela yeo e thulanago le morero wa Modimo, e bile ba sa hlomphe mpho ya lenyalo yeo Modimo a ba neilego yona. (Baef. 2:2) Ge batho ba itshwara ka tsela e gobogilego ba bontšha gore ga ba hlomphe mpho ya go ba le bana yeo Jehofa a re neilego yona. Le gona ge e ba batho ba bjalo ba ka se fetoge, ba ka se hwetše bophelo bjo bo sa felego.—1 Bakor. 6:9, 10.

7-8. Beibele e re ruta tsela efe ya maleba ya go lebelela thobalano?

⁷ Batho bao ba latelago bohlale bja lefase le, ba nyatša melao ya Beibele ya boitshwaro, ba re ga go na motho yo a ka kgonago go phela ka yona. Batho ba bjalo ba ka botšiša gore: ‘Ke ka baka la’ng Modimo a re bopile re na le kganyogo  ya thobalano ke moka a re botša gore re se e kgotsofatše?’ Ba ipotšiša potšišo ye ka gobane ba na le kgopolo e fošagetšego ya gore ge batho ba nyaka go dira selo se itšego ba swanetše go no se dira. Eupša Beibele ga e dumelelane le kgopolo yeo. E re ruta gore Jehofa o neile batho seriti ka go ba bopa ba na le bokgoni bja go lwantšha dikganyogo tše di fošagetšego. (Bakol. 3:5) Go oketša moo, Jehofa o dirile gore batho ba kgone go kgotsofatša kganyogo ya thobalano ka tsela ya maleba ge ba nyalane. (1 Bakor. 7:8, 9) Ge monna le mosadi ba nyalane, ba tla thabela thobalano ba sa tshwenyege ka mathata ao gantši a bakwago ke go itshwara ka tsela e gobogilego.

⁸ Bohlale bjo bo lego ka Beibeleng bo fapana le bohlale bja lefase le, ka gobane Beibele e re ruta tsela ya maleba ya go lebelela thobalano. E bolela gore banyalani ba ka thabela thobalano. (Die. 5:18, 19) Eupša ya buša gape ya re: “Yo mongwe le yo mongwe wa lena a tsebe go laola mmele wa gagwe ka kgethego le kgodišo, e sego ka kganyogo ya megabaru ya go robala ga monna le mosadi go etša ditšhaba tšeo di sa tsebego Modimo.”—1 Bathes. 4:4, 5.

9. (a) Mengwageng ya magareng ga bo-1900 le bo-1930, batho ba Jehofa ba ile ba thušwa bjang gore ba latele bohlale bjo bo phagamego kudu bja Lentšu la Modimo? (b) Ke keletšo efe e botse yeo e lego go Johane wa Pele 2:15, 16? (c) Ke mekgwa efe e gobogilego yeo re swanetšego go e phema yeo e boletšwego go Baroma 1:24-27?

⁹ Mengwageng ya magareng ga bo-1900 le bo-1930, batho ba Jehofa ga se ba ka ba goketšwa ke pono e fošagetšego ya bao ba “[lahlegetšwego] ke maikwelo ohle a boitshwaro.” (Baef. 4:19) Ba ile ba leka go dira sohle seo ba ka se kgonago go phela ka melao ya Jehofa ya boitshwaro. Morokami wa Seisemane wa May 15, 1926, o boletše gore “monna goba mosadi o swanetše go hlweka le go hloka bosodi tseleng yeo a naganago ka yona le yeo a itshwarago ka yona, kudukudu ge a dirišana le batho ba bong bjo bo fapanego le bja gagwe.” Go sa šetšwe gore batho bao ba bego ba phela le bona ba be ba itshwara bjang, batho ba Jehofa ba ile ba latela bohlale bjo bo phagamego kudu bja Lentšu la Modimo. (Bala 1 Johane 2:15, 16.) Ruri re leboga kudu gore Jehofa o re neile Lentšu la gagwe! Le gona re a mo leboga ka go re nea dijo tša moya ka nako ya maleba tšeo di re thušago gore re se ke ra forwa ke bohlale bja lefase le ge go tliwa tabeng ya boitshwaro. *—Bala Baroma 1:24-27.

10-11. Beibele e boletše gore go tlo direga’ng mehleng ye ya bofelo?

¹⁰ Beibele e boletše e sa le pele gore mehleng ya bofelo batho e tlo ba “baithati.” (2 Tim. 3:1, 2) Ka gona ga re makale ge re bona batho ba lefase ba kgothaletša moya wa boithati. Puku e nngwe e re ka bo-1970 “dipuku tša go thuša batho go atlega di ile tša ata kudu.” Tše dingwe tša dipuku tšeo “di be di kgothaletša babadi gore ba se ke ba fetoša seo ba lego sona.” Ka mohlala, nagana ka mantšu a ao a tšwelelago ka go e nngwe ya dipuku tšeo ao a rego: “Ithate ka gobane o botse kudu, o a kgahliša e bile o bohlokwahlokwa.” Puku yeo e kgothaletša “motho go ipeela melao ya boitshwaro yeo e dumelelanago le letswalo la gagwe le yeo e ka se mo šitišego go phela ka tsela yeo a ratago ka yona.”

¹¹ Na o kile wa kwa taba ya mohuta wo? Sathane o ile a kgothaletša Efa go dira selo se se swanago le seo. O ile a mmotša gore a ka “swana le Modimo, [a] tseba botse le bobe.” (Gen. 3:5) Lehono batho ba bantši ba itšeela godimo kudu moo ba naganago gore ga go na motho yo a ka ba botšago selo, ba nagana gore gaešita le Modimo a ka se ba botše selo. Ka mohlala, tsela yeo ya go nagana e bonagala kudu tseleng yeo ka yona batho ba lebelelago lenyalo.

12. Batho ba lefase ba lebelela lenyalo bjang?

 ¹² Beibele e re monna le mosadi ba swanetše go hlomphana le go hlompha dikeno tšeo ba di dirilego ge ba be ba nyalana. E kgothaletša banyalani gore ba ikemišetše gore le ka mohla ba se ke ba tlogelana. E re: “Monna [o tla] tlogela tatagwe le mmagwe, a kgomarela mosadi wa gagwe gomme bona e tla ba nama e tee.” (Gen. 2:24) Eupša bao ba naganago ka tsela ya lefase ba bolela taba e fapanego le ye. Ba re monna yo mongwe le yo mongwe goba mosadi yo mongwe le yo mongwe o swanetše go šetša dinyakwa tša gagwe feela. Puku e nngwe yeo e bolelago ka tlhalo e re: “Manyalong a mangwe keno yeo e tlwaelegilego ya gore re tla dula re nyalane ‘ge feela bobedi bja rena re sa dutše re phela,’ e tšeetšwe legato ke kholofetšo yeo e sa rego selo ya gore re tla dula re nyalane ‘ge feela bobedi bja rena re sa dutše re ratana.’” Go lebelela lenyalo ka tsela yeo e nyatšegago go dirile gore manyalo a mantši a se ke a atlega, e bile go dirile gore batho ba bantši kudu ba kwe bohloko maikwelong. Go molaleng gore tsela yeo lefase le lebelelago lenyalo ka yona ke ya bošilo kudu.

13. Le lengwe la mabaka ao a dirago gore Jehofa a šišimišwe ke batho bao ba ikgogomošago ke lefe?

¹³ Beibele e re: “Yo mongwe le yo mongwe yo a ikgogomošago pelong o šišimiša Jehofa.” (Die. 16:5) Ke ka baka la’ng Jehofa a šišimišwa ke batho bao ba ikgogomošago? Le lengwe la mabaka ke gore bao ba kgothaletšago moya wa boithati le wa boikgogomošo ba swana le Sathane. Anke o nagane gore Sathane o be a ikgogomoša gakaakang ka go nagana gore Jesu, yena yoo Modimo a mo dirišitšego go bopa dilo ka moka, o swanetše go mo rapela! (Mat. 4:8, 9; Bakol. 1:15, 16) Batho bao ba itšeelago godimo ka tsela yeo ba bontšha gore bohlale bja lefase le ke bošilo go Modimo.

14. Lengwalo la Baroma 12:3 le re thuša bjang go itebelela ka tsela e lekalekanego?

¹⁴ Beibele e re thuša gore re itebelele ka tsela e lekalekanego. E re ga se phošo go ithata. Jesu o itše: “O rate moagišani wa gago ka mokgwa  wo o ithatago ka wona,” e lego seo se bontšhago gore re swanetše go ithata ka tekanyo e itšego. (Mat. 19:19) Eupša Beibele ga e re rute gore re swanetše go ipona re le bohlokwa kudu go feta batho ba bangwe. Go e na le moo e re: “Le se dire selo ka tshele goba ka go ikgopola, eupša ka boikokobetšo le tšee gore ba bangwe ba le feta ka bogolo.”—Bafil. 2:3; bala Baroma 12:3.

15. Ke’ng seo se go kgodišago gore keletšo ya Beibele ya kamoo re swanetšego go itebelela ka gona ke e botse?

¹⁵ Lehono batho ba bantši bao go thwego ba rutegile ba re keletšo ya Beibele ga e šome. Ba re ge e ba o nagana gore batho ba bangwe ba bohlokwa go go feta, batho bao ba tlo go tšeela fase. Eupša moya wa Sathane wa gore batho ba ipone ba le bohlokwa go feta batho ba bangwe o bile le mafelelo afe? Wena o lemogile’ng? Na batho bao ba iponago ba le bohlokwa go feta ba bangwe ba thabile? Na ba na le malapa a thabilego? Na ba na le bagwera ba kgonthe? Na ba na le segwera le Modimo? Go ya kamoo o tsebago ka gona, ke bohlale bofe bjo bo nago le mafelelo a mabotse? Na ke bohlale bja lefase le goba ke bohlale bjo bo lego ka Lentšung la Modimo?

16-17. Ke’ng seo re se lebogago, gona ka baka la’ng?

¹⁶ Batho bao ba latelago keletšo ya bao go thwego ba bohlale go ya ka lefase le, ba swana le motho yo a etetšego nageng e itšego gomme a botšiša tsela go motho yo mongwe yoo le yena a timetšego. Jesu o ile a bolela ka batho bao go bego go thwe ba bohlale mehleng ya gagwe gore: “Ke bahlahli ba foufetšego. Ka gona, ge e ba sefofu se hlahla sefofu, di tla wela moleteng ka bobedi.” (Mat. 15:14) Ga go pelaelo gore bohlale bja lefase le ke bošilo go Modimo.

¹⁷ Ka mehla keletšo e bohlale ya Beibele e “hola ka go ruta, go kgala, go phošolla le go laya ka toko.” (2 Tim. 3:16) Re leboga kudu gore Jehofa o diriša mokgatlo wa gagwe go re šireletša gore re se ke ra senywa ke bohlale bja lefase le! (Baef. 4:14) Dijo tša moya tšeo a re neago tšona di re fa matla ao re a hlokago gore re phele ka go dumelelana le seo se lego ka Lentšung la gagwe. Ruri ke tokelo e kgolo kudu go hlahlwa ke bohlale bja kgonthe bjo bo lego ka Beibeleng!